قورداوغلونون داستانی
شهری دئیهر :
چرخی دؤنموش قویماز سورهک بیز صفا سالیب اورهگیمه جؤور ایله جفا
بیلمم وفالیسان یوخسا بیوفا گئدرمیسن مهری یاریم گئتمهسن ؟
مهری دئیهر :
هر ایکیمیز شاد اولوبان گولریک سیرری بیر بیرینه عیان ائلریک اؤلسک با هم قالساق با هم قالاریق قورخما عم اوغلو ایلقاریمیز بئلهدی شهری دئیهر :
شهری آغلار شیرین – شیرین سسی وار میدان آراسیندا عجب بحثی وار قورداوغلونون پولو خزینهسی وار گئدرمیسن مهری یاریم گئتمهسن؟
مهری دئیهر :
بیر باخگیلن فقیر مهری حالینا هئچ دؤزمرم غوغاسینا قالینا سنی وئرمم بو دونیانین مالینا قورخما عم اوغلو ایلقاریمیز بئلهدی .
ائله کی اورهکلری بوشالدی، باشلادیلار نجات یولو آختارماغا.
مهری دئدی: عم اوغلو بو دفعه بیر سؤز یازاق کی، دونیادا جوابی اولماسین .
شهری دئدی : گل قاچاق گئدهک تورکمان ائلینه.
مهری دئدی : قورداوغلونون قاباغیندان قاچماق اولماز فقط یولو بودور کی بیر سؤز دئیهک جوابی اولمایا.
شهری دئدی :گؤردون نئجه سؤزلره جاواب وئردی ائله بیل کی اؤزو یازمیشدی من بئله دوشونورم هر نه جور سؤز یازاق قورداوغلو جاواب وئرر.
مهری دئدی: عم اوغلو سن آرخایین اول بو دفعه ائله ایش گؤرهرم کی هامی معطل قالار. هر ایکیسی ساوادلی اولماقلارینا گؤره ائولرینده کتابخانالاری وار ایدی، مهری تمام کتابلاری گتیریب و اونلارا باخدی و ایچیندن ائله سؤزلر سئچدی کی چتین آداملار اونلارا جاواب وئره بیلر مهری و شهری گئجه سحره کیمی آللاها یالواردیلار کی صاباح قورداوغلو سؤزلره جاواب وئره بیلمهیه.
صاباح آچیلدی مهری خانیم دوستلاری ایله گینهده قورد اوغلونون چادرلارینین طرفینه گلدیلر. قورداوغلو دستور وئرمیشدی میدانی سولاییب سوپورموشدولر. نیزهلرین باشینا گول تاخمیشدیلار. ایکی حریف میدانین باشیندا اوز به اوز هر کس اؤز یئرینده اگلشیب .
مهری دئدی: آغا قورداوغلو ایندی گؤرهک سن منیم سؤزلریمه جاواب دئیهجکسن یا یوخ ؟
قورداوغلو دئدی: سن هر نه سوروشسان جاواب دئییب سنی عربستانا آپاراجاغام.
مهری دئدی :اگر قورخورسان سؤزلره جاواب وئرهنمهیهسن لشگرینی ده گؤتور اصفهاندان گئت.
قورداوغلو بیلدی کی گرک جاواب وئره دئدی :مهری خانیم میدان سنه منتظردیر. مهری دئدی :
سندن خبر آلیم آغا قورداوغلو بن آدم ذاتینین نئچه یولو وار؟
او کیم ایدی اگلشمیشدی تختینده کیملر ایدی اللرینده دولو وار؟
قورداوغلو بیلدی کی سؤزلری معمولی سؤز دگیل بیر لحظه دایاندی، مهری دئدی ائله بیل قورداوغلو جاواب وئره بیلمیر. قورداوغلو اورهگینده دئدی آخی نازنین من سندن اؤترو بورا گلمیشم نئجه الی بوش گئدیم. بئینین ایشه سالدی گؤردو سؤزلرین جاوابی وار.
دئدی :
آل سؤزون جاوابین ای مهری یاریم بن آدم ذاتینین یئتمیش یولو وار او مولاایدی اگلشمیشدی تختینده قیرخلار ایدی اللرینده دولو وار
مهری دئدی :
نه دگیرماندی ایشلر اوندا اولماز دن نه حیواندی گؤزو اولدو بیر خرمن حق تعالی یارادیبدی نئچه جان نئچه جانین نئچه دنه دیلی وار؟
قورداوغلو دئدی : چرخ فلک ایشلر اوندا اولماز دن موتان بالیق گؤزو اولدو بیر خرمن حق تعالی یارادیبدی ایکی جان ایکی جانین یئتمیش ایکی دیلی وار
مهری دئدی : او نهدیر کی گونده – گونده ائلر کؤچ او کیمدیر کی هئچ بوینونا آلماز سوچ بیر هانسیدیر دؤرد هانسیدیر هانسی اوچ بونو بیلمهینین نه کمالی وار ؟
بورادا ایدی کی قورداوغلو دایاندی دؤرد قاپیدان گیردی چیخدی آما آیاغینی بیر یانا چیخاردا بیلمهدی، دؤرد قاپی دئمکده، حقیقت، شریعت، طریقت، معرفت. هر حال جاواب تاپانمادی. اون بئش دقیقه سونرا مهری دئدی :آقای قورداوغلو جاواب وئر.
قورداوغلو دئدی :مهری خانم منه فرصت وئر. او طرفدن شهری سسلندی عم قیزی قورتار. آما مهری دئدی :عم اوغلو اوندا نامردلیک اولار. قیزلار دئدیلر: هاردا نامردلیک اولار اگر سنی زورلا آپارا نامردلیک دگیل؟ آنجاق مهری اونا فرصت وئردی. قورداوغلو اوزون توتوب گؤیه ساری دئدی: پروردگارا من عربستاندان چیخاندا سنین اومودونلا گلمیشم منه اؤزون یاردیم ائت. بیردن یادینا دوشدو کی آللاه بیردیر کتابی دؤرد. قورد اوغلو دئدی : او آی – گوندور گونده گونده ائلر کؤچ او شیطاندیر هئچ بوینونا آلماز سوچ آللاه بیردیر کتاب دؤرددور طلاق اوچ بونلاری بیلنین بیل کمالی وار مهری دئدی: دئییم سؤزلریمی بیر- بیر قاناسان ایگیدلر ایچینده سن بیر داناسان اؤز – اؤزونه اود توتاسان یاناسان بیلهسن مهرینین توتقون حالی وار قورداوغلو گولدو دئدی :
دئییم سؤزلریمی سن ده قاناسان گؤزللر ایچینده سن بیر داناسان اؤز – اؤزونه سن ده بیردن یاناسان بیل کی قورداوغلونون یوز مین فعلی وار.
ائله کی سؤز قورتاردی هر ایکی طرفدن ال چالیب شادلیق ائلهدیلر. آما مهری و شهرینین آز قالیر باغیرلاری چاتداسین قورداوغلو دئدی: آهای مهری یاریم نئچه گوندو منه شعر دئییرسن اجازه وئر من ده سنه بیر قاتار شعر دئییم گؤروم سن ده جاواب وئره بیلیرسن یا یوخ؟ مهری دئدی :آقای قورداوغلو هر نه سوروشورسان سوروش. قورداوغلو دئدی :
ساللانیبان ایراغیندان گلن یار رحمین گلسین منه یا چشم فراش آشیقمیسان یک عربی تورک سؤیله باغرین قوْردو گؤزون چاخماق نار آتش مهری گؤردوکی اصلاً بو سؤزلر قولاغینا دگمهییب دئدی: هامیسینا آخردا جاواب دئیهرم .
قورداوغلو دئدی :
پیغمبرلر سودا قورار حکومت گؤزل اوزه چیخار اوردا سمند آت کتاب قورآن صدرین گونش لب نبات کؤکسون عنبر داغی خانیم حجر داش مهری گؤردو بو سؤزه جاواب تاپا بیلمیر اودور کی دئدی منه قیرخ گون فرصت وئر. قورداوغلو دئدی :نه علّته گؤره؟
مهری دئدی: من ده اؤزومه گؤره بیر ایشلر حاضرلامالیام.
قورداوغلو دئدی: من سندن هئچ بیر زاد ایستهمیرم من آنجاق سنی ایستهییرم گل گئدهک عربستانا گؤر سنه نه عظمتلی توی توتاجاغام. مهری دئدی: اولماز گرک منه قیرخ گون فرصت وئرهسن.
قورداوغلو دئدی: اولسون .
ائله کی قاییتدیلار ایکی عم اوغلو- عم قیزی او قدر آغلادیلار کی اورهکلری بوشالسین.
مهری دئدی: عم اوغلو عقلیمه بیر فکر گلدی. شهری دئدی :نه فکر؟
مهری دئدی :قورداوغلو مرد آدامدیر من گرک اونا سنی تانیتدیرام و اونا بیلدیرم کی نشانلیم وار. شهری دئدی: عم قیزی من ایله قورداوغلونونکو توتماز او هارا من هارا؟ او بیر شاه اوغلو من بیر تاجر اوغلو.
مهری دئدی: عم اوغلو بیر آشیق پالتاری گئییب اونون چادرینا گئت و هر سؤزو اوخوماق ایله دیء، سونرا الیندن اؤپ، حتماً قبول ائیلر. شهری بیر آشیق پالتاری گئییب بیر ساز الینده اونون چادرینا طرف گئتدی. قورداوغلویا خبر وئردیلر کی بیر آشیق گلیب .
قورداوغلو دئدی :چوخ یاخشی، گتیرین اوخوسون. شهری همی قورخوردو همی ده تلسیردی کی نه جور دئییم؟ شهری سازی چیخاردیب اوّلده اؤزون ایتیردی سونرا یاواش یاواش اؤزون تاپیب باشلادی اوخوماغا: اوزاق یئردن سنی دئییب گلمیشم
آغا، مهری یاری باغیشلا منه سنی من اؤزومه اومود بیلمیشم آغا، مهری یاری باغیشلا منه بو سؤزلری کی ائشیتدی قورداوغلونون رنگی عوض اولدو، اوزون توتوب آشیقا بو سؤزلری دئدی: جانیم آشیق بو سؤزلری سؤیلهمه وئرمم سنه مهری دلبر منیمدی
قورداوغلونون حالین خراب ائیلهمه وئرمم سنه مهری دلبر منیمدی شهری گؤردو اولمادی بیر داها اوزون توتوب قورداوغلویا دئدی: شیدا بولبول اوچار قونار بوداغا منی سالما یار چشمیندن ایراغا بیر جانیم وار سن عربه صاداغا
آغا، مهری یاری باغیشلا منه قورداوغلو دئدی: گیزلین – گیزلین دوست باغینا گیرمرم ال اوزادیب غنچهگولون درمرم مهری یار منیمدی سنه وئرمرم وئرمم سنه مهری دلبر منیمدی
شهری آخر سؤزون بئله دئدی :
شهری سؤزلرینی سنه قاندیرسا خدنگ اوخلار سینهن اوسته قالدیرسا کیشی بیلمم منی یاردان آییرسا آغا مهری یاری باغیشلا منه .
قورداوغلو غضبلندی مصری قیلینجی چکدی شهرینین اوستونه دئدی :
قورداوغلویام اؤزوم سنه بیلدیررم دوستلار آغلار دوشمنلرین گولدوررم
مهری آدی چکسن سنی اؤلدوررم وئرمم سنه مهری دلبر منیمدی. ائله کی سؤز قورتاردی قیلینج گئتدی گؤیه شهری بو حالی گؤرن کیمی اؤزون چادردان ائشیگه چکدی میندی آتا سوردو. قورداوغلو دستور وئردی دالیسیجا گئتسینلر .بیر آز تعقیبدن سونرا دئدیلر جانیم، آشیق بیر سؤز دئدی قورتاردی گلین قاییدیب گئدک قورداوغلویا دئیهک کی قاچدی. هر حال مهری چوخ نگران ایدی، شهری گیردی ایچری مهری قاباغینا قاچیب دئدی آماندیر عم اوغلو نه جور اولدو. شهری آغلایا – آغلایا دئدی: یئری یئری ایکی دیللی بی ایلقار اولموسان مهری باغچا
آردی وار
نوشته شده توسط admin در چهارشنبه, ۱۳ شهریور ۱۳۹۲ ساعت ۴:۴۸ ق.ظ
با سلام و خسته نباشید و تشکر بابت صفحه خوب و پربار آنادیلیمیز. خواهشی دارم از خدمتتون واون اینه که من یکی دوباری داستانهای خیلی زیبایی رو تو این صفحه خوندم که از زبان پیشکسوتان شهرمان بود. این داستانها گنجینه فرهنگی ما هستند و باید آنها را بسط وگسترش بدهیم. خواهشمندم اگر مقدور باشد این کاررا ادامه بدهید و از این داستانها بیشتر چاپ کنید تا ما هم قصه هایی برای فرزندانمان داشته باشیم و این فرهنگ سینه به سینه به فرزندانمان منتقل شود. مطمعنا افراد زیادی هستند که داستانهای بسیاری را در ذهن دارند که آنها هم از پدران ومادرانشان آموخته اند. پس چه بهتر که ما نیز آنهارا مستند کنیم. ممنون ومتشکر