ایلک آددیم
یازان: یگانه کریم‌زاده
کؤچورن: تانسو خیاوی
آنادیلیمیز:معاشی‌نی دمیر قوطودان آلسا دا “ساغ اول” دئییب، پولو چانتاسینداکی پول‌قابینا یئرلشدیریب، یولونا داوام ائتدی. ایچینه دولان سئوینجین سببی‌نی آنلاماسا دا، آددیم‌لارینداکی راحاتلیق، خوش هاوانین جییرلرینه دولان یونگول‌لویوندن اوزونه تبسّوم قونموشدو.
آرادا دایانیب، باشیندان سوروشن آغ ایپک یایلیغی‌نی دوزلدیب، پالتوسونون یاخاسینی بیر داها چکیب، سیغال‌لاییب، یولونا داوام ائتدییی واخت قولاغینا گلن تانیش سس اونو ساخلادی.
دایانسا دا، گئری دؤنه بیلمه‌دی، اوزو ده‌ییشدی، سانکی بیر آنین ایچینده ایل‌لرین اوستوندن قوش کیمی اوچوب، تنگ‌نفس یئره ائندی. – سَـریه، سن‌سن؟..
سـریه گئرییه دؤندو، گؤزلری قارشی‌سیندا دایانان آدامین سسی دوغما اولسا دا، اؤزو یاد ایدی. سس یئنه سـریه‌نی اؤزونه قایتاردی.
– تانیمادین منی؟..
سـریه آداما ساری قورخاق آددیم‌لارلا گئدیب گؤزلرینی قیییب اونا باخیر، سانکی کئچمیشینی او اوزون قیریش‌لاری آراسیندا آختاریردی.
– طاهیر؟!.
– هه، آی قیز، صینیف یولداشین طاهیر!
سـریه‌نین الی اؤز اوزونده گزدی. بیر آندا دوشوندو کی، گؤره‌سن، سونونجو دفعه گوزگویه نه واخت باخیب.
طاهیر اونون ناراحات‌لیغینی باشا دوشدو، یا یوخ، بیلینمه‌دی، آما دئدی: – هئچ ده‌ییشمه‌می‌سن سـریه، – سؤزو ایله قادین الینی اوزوندن چکیب سئوینجله کیشی‌یه باخدی.
– طاهیر، باکی‌دا یاشاییرسان؟
– یوخ، آی سـریه، اوشاق یارالانیب خسته‌خانادا یاتیبدی.
– هانسی، بؤیویون؟
– یوخ، سنین قیزی‌نین اَکیزتایی…
دئییب، گوجله گولومسه‌دی: – قیزین نئجه‌دی، اَره وئرمه‌می‌سن؟
– یوخ هله…
– نییه، رحمت‌لییین قیزی، اوتوزو حاق‌لادیلار، بیزیمکی ده ائولنمه‌دی، دئییر خوجالی‌نی آزاد ائدک، تویومو اوردا ائده‌جم.
سـریه‌نین گؤزلری دولوب، سسی تیتره‌یه- تیتره‌یه: – انشاللاه، قونشو، انشاللاه. منیم قیزیم بؤیومه‌دی آخـی.
طاهیر سـریه‌نین گؤزلرینه باخدی، ایندی نسه آنلاسا دا، دانیشماغا گوجو یئتمه‌دی. سـریه اونون قولوندان توتوب، اوشاق پالتارلاری ساتیلان دوکانا ساری چکدی.
طاهیر سسسیزجه اونون بؤیرونه دوشوب گئدیردی. سـریه دوکانا گیرندن سونرا، طاهیری اوردا اونو گؤزلمه‌سینی تاپشیریب اؤزو ایچری ساری گئتدی.
سـریه گئری دؤننده او اؤزونو توخ توتوب قادین‌ین اونو هارا آپاراجاغینی، نه ائده‌جه‌یینی گؤزله‌ییردی.یاتاق‌خانایا اوخشار کؤهنه بینانین قاپی‌سیندان ایچری کئچیب، اوچونجو مرتبه‌یه قالخدیلار. قاپی آچیلاندا طاهیرین ایلک گؤزونه دمیر چارپایی، اونون اوستونه سیرا ایله دوزولموش اوشاق آیاق‌قابی‌لاری ده‌یدی.
سـریه ایره‌لی کئچیب، اونو ائوه دعوت ائدیب سئوینجک چانتاسیندان یئنی اوشاق آیاق‌قابی‌سینی چیخاردیب، یاتاغین اوسته قویوب، چایین آلتینی یاندیرماغا گئدنده طاهیرین غفیلدن یادینا دوشدو کی، بو گون خسته‌خانادا یارالی یاتان اوغلونون دوغوم گوندو، دئمه‌لی سـریه‌نین ده قیزی‌نین دوغوم گونو ایدی.
سـریه بالاجا ماسانین اوستونه قند، مربا دوزوب، چایین قایناماغینی گؤزلمک اوچون طاهیرله اوز- اوزه اوتوروب، – بو گون اوشاق‌لاریمیزین دوغوم گونودو، سنینکی خسته‌خانادا، منیمکی ایسه… سـریه ال‌لری ایله اوزونو توتوب هؤنکوردو.
طاهیر اونا باخیب، آجی- آجی آغلادی، اوزونو توتمادان، گؤز یاشیندان اوتانمادان: – نه واخت سـریه، نه واخت؟.. دئدی.سـریه الینی اوزوندن چکمه‌دن: – دور آیاق‌قابی‌لاری سای… – دئدی.
طاهیر اوتوردوغو یئردن آیاق‌قابی‌لاری سایدیغی واخت سـریه اوزونو سیلیب، چای دمله‌مه‌یه دوردو، سانکی اؤز- اؤزونه دانیشیردی – یادیندادی، “سعادت” دیل آچمامیشدی، آما هله چتین یئریییردی.
حکیم دئمیشدی، بیر آز گئج یئرییه‌جک، آما یئرییه‌جک. اوشاق آیاق‌قابی ایسته‌ییردی بیزدن! رحمتلیک آتاسی هر دفعه دئییردی، معاشیمی آلیم، قیزیما آیاق‌قابی آلاجاغام…
سـریه چای سوزدو، طاهیرله اوز- اوزه اوتوروب، گؤزلرینی الی ایله سیلدی.
– بیلیرسن، اوشاق یئریدی.
طاهیرین گؤزلری ایشقلاندی، قیزارمیش گؤزلرینده‌کی اومیدله سـریه‌یه باخدی.
سـریه چئویریب آیاق‌قابی‌لارا باخدی، طاهیره ساری چئویریلدی: – یئریدی. خوجالی‌دان قاچدیغیمیز گئجه آتاسینی ووردوقلاری واخت اونو یئره قویدوم، آتاسینی توتدوم.
بیر ده گؤردوم “سعادت”یم بیزی قویوب گئری گولـله آتیلان طرفه گئدیر، آیاق‌لاری آتاسی‌نین قانینا بولاشمیشدی، قارین اوسته یئریدیکجه، قانـلی آیاق ایزلری یئره هوپوردو.
بیز بئله عهد ائلمه‌میشدیک آخـی. من اوشاغا چاتانا کیمی اونو دا ووردولار ائرمنی‌لر…
طاهیرین یوموروغو سیخیلسا دا، اونو هارا ووراجاغینی بیلمه‌دن دوروب، بو ائودن نئجه چیخدیغینی بیلمه‌دی.
تئلفونو سوسماق بیلمیردی، جاواب وئرمک لازیم دئییلدی، تئلفونو آچماق بس ائدیردی خبری زنگ ائدن اؤزو وئره‌جکدی. او خبر آرتیق بتشقا حکایه یازاجاقدی.
شهیدین وار، طاهیر کیشی!!
قار یاغیر. سیز قار اوستونه یازیلان قانلی آیاق ایزلری گؤرموسونوز؟!
ایندی او، هئچ واخت بؤیومه‌یه‌جک، یالین آیاق‌لارینی هئچ واخت گئیمه‌یه‌جک… اییرمی دوققوز آیاق‌قابی‌سی وار ایدی… سون
Arazazarbaijzn.anadilimiz@gmail.com
نوشته شده توسط admin در دوشنبه, ۱۱ مرداد ۱۴۰۰ ساعت ۱۱:۲۸ ق.ظ
