قاری ننه‌نین ساری فره‌سی
صمد بهرنگی
سون بولوم
آنادیلیمیز:قاری یئیین گئدیب مانقالا کؤموٍر تؤکوٍب، آلیشدیردی؛ سونرا گلیب فره‌نی توتوب آپاردی مانقالین یانینا، اونون یانینی یاپیشدیردی مانقالین قیزارمیش کؤزلرینه. ساری فره‌نین یانی جیزیلدایا-جیزیلدایا یاندی.
گیردکان آغاجی بیردن-بیره سیلکه‌له‌نیب، گیردکانلارینی چیرپدی قاری‌نین اوٍز-گؤزوٍنه. قاری، فره‌نی بوشلاییب، گیردکانلاری ییغماق ایسته‌ینده گؤردوٍ گیردکانلار‌هامیسی داشا چئوریلیب. بیر آغاجا باخدی بیرده فره‌یه، قاییدیب گیردی کوٍمایا.
ساری فره بیر کوٍنجوٍده جونبوشوب، باشینی سوخموشدو قانادینین آلتینا؛ هردن بیر باشینی قانادینین آلتیندان چیخاردیب، یاندیریلمیش یانینا باخیردی. هردن‌ده قانادینین اوجو ایله گؤزلرینین یاشین سیلیردی و تزه‌دن دوردوغو یئرده بوٍزوٍشوٍردوٍ.
قاری ساری فره‌دن گؤز گؤتوٍرموٍردوٍ. ناهارا یاخین یئل قالخیب خئیلک گیردکانلاردان تؤکدوٍ یئره. ساری فره یئریندن ترپنمه‌دی. یئل یئنه‌ده آغاجی سیلکه‌له‌ییب خئیلک گیردکان تؤکدوٍ یئره، آنجاق ساری فره ائله اوجور جونبوشموشدو. یانینین آغریسیندان ترپنه بیلمیردی. ایکینجی چاغی قاری‌نین حیطی گیردکانینان دولدو. قاری ائله اوجور گؤزلرینی زیلله‌میشدی فره‌یه و باشقا بیر زادی گؤره بیلمیردی.
قاری بیردن-بیره بیر سس ائشیتدی:
– ساغ اول ائی قوچاق قاری سن کی او سارالمیش جوٍجه‌نین جزاسین وئردین، بس نییه دایانیبسان؟ گؤرموٍرسن گوٍن باتیر، تئز گوٍن گئجه گلیب چاتمامیشدان دور آیاغا گیردکانلارینی سات، بلکه بیر تیکه چؤرک تاپاسان.
قاری باشین دؤنده‌رنده گؤردوٍ کی بؤیوٍک بیر هؤروٍمجک تاقچادان اوٍزو آشاغی گلیر. او، یانیندا کی باشماق تایین توولاییب، هوروٍمجه‌یی ووردو، یاخدی دووارا. سونرا او، چارقادی‌نین اوٍجوٍیله گؤزلرینین یاشینی سیلیب، دوردو گئتدی ساری فره‌نین یانینا، اونا دئدی:
–آی منیم مهربان گؤزل، گؤیچک فره‌م، گؤر نه قده‌ر گیردکان تؤکوٍلوٍب. سن اونلاری سیندیریب یئمک ایسته‌میرسن؟
ساری فره‌نین باشی آشاغا ایکن دیللندی:
– ال چک مندن یانیمی‌داغلادیغین یادیندان چیخدی؟
قاری ننه ساری فره‌نی تومارلایا-تومارلایا دئدی:
– آی منیم گؤزل، گؤیچک مهربان فره‌م. تامام گیردکانلار تؤکوٍلوٍب قالیب، اونلاری سیندیریب یئمک ایسته‌میرسن.
ساری فره بو دؤنه باشینی قالدیریب، قاری ننه‌نین اوٍزوٍنه باخدی. اونون گؤزلرینده مهربانلیغی، اوٍزوٍنده گوٍلوٍشوٍ، دانیشیغیندا شیرینلییی گؤر‌نده دئدی:
–نییه یئمیرم، من یئیه‌رم، سنده منیم یارالاریما مرهم قویارسان.
قاری ننه گوٍله-گوٍله دئدی:–نییه قویمورام ، قویارام، چوخدا گؤزه‌ل مرهم قویارام ، دور گئده‌ک ائوه.ایشیغین یایدیغی معلومات اساسیندا آرازآذربایجان راپورونا گوره ،او گئجه قاری ننه ایله ساری فره‌نین سوٍفره‌لری دولو ایدی گیردکان ایچی ایله. سحر قاری ننه یئریندن دوراندان سونرا کوٍمانین قیراق-بوجاغیندا اولان بوٍتوٍن شیطان تورولاری سیلیب-سوٍپوٍروٍب توکدوٍ ائشییه.
نوشته شده توسط admin در چهارشنبه, ۱۸ بهمن ۱۳۹۶ ساعت ۶:۳۹ ق.ظ
