صاباحدان بیر دامجی کؤزرتی
اسماعیل خرمی
سون بولوم
آنادیلیمیز:یوخ. اؤلمهمیشم. آلا توران ایدی. پنجره یاریمچیق آچیغ ایدی. دییهسن دوغوردان، صاباحین بیر دامجی کؤزرتیسی گلیردی.
توتالیم کی بو نئچه اینتهار یولونون بیرینده اؤلدوم! مندن سونرا نه اولاجاق؟
بوتون قوهوم قونشو قاپییا تؤکولوب باستیرماق اوچون موللا، نوحهچی چاغیریب کفن آلیب، قبیر قازدیریب، احسان وئریب، یاس توتاجاقلار.
بونلارین خرجینی کیم وئرهجک؟ الیمین ایچی کیمی بیلیرم.
قوهوملاریم، بیریندن بورج گؤتوروب اوشاقلاریمین آدینا یازدیراجاقلار. دیریلیییم بیر پوخ اولمادی، اؤلومومون پوخونونو ایچینده ایللرجه چوبالایاجاقلار. ائوده نه وارسا، دهیرین دهیمزینه ساتیب لوت قالاجاقلار.
بونلاری بیلسمده، اؤزومو اؤلدورمکدن باشقا یولوم یوخدور. ائوی کؤکوندن ییخیلمیش یاشامین دادی، گؤزوندن ارییب اوزونه آخمیش گولوشلری دوداغیندا چارمیخا چکیلمیش دیزلری، قورخولو یاشامین اؤنونده اوشاق کیمی زاغ – زاغ اسمیش، بئلی گوندن – گونه آغریلارین آرتدیغینا تاپ گتیره بیلمهین بیری، اؤزون اؤلدورمهسین نئیلهسین؟
یاشام اؤلومدن چتین، اؤلوم یاشامدان. باشیمی هانسی ایتین دلییینه سوخوم بس؟
نه پوخ یئییم کی بونون ایکیسیندن بیرینی یونگوللشدیریم؟
گون باتان چاغینین بیرینده، سونو اولمایان بیر یولا دوشوب آددیملاریمی بوش – بوشونا آتیب ایرهلیلهییردیم.
اؤزومده بیلمیردیم نهیه ائودن چیخیب هارا گئدیرم. شهرین اورتاسیندا بیر مسجیدین قاباغیندان کئچنده گؤزوم بیر یاس تؤرهنی یازیسینداکی شکیله ساتاشدی. کئچمیش قونشوموزون بیری ایدی. اورهییمده الله رحمت ائلهسین دییه، یولوما داوام ائتمک ایستهینده، بیر یازی منی دوردوردو. »کرونا خستهلیینه گؤره یاس تؤرهنی اولمایاجاق.« کرونا هه کرونا.
چینلیلردن چیخان بولاشیجی خستهلیک! اؤز – اؤزومه بو کرونا سؤزجویون دالبادالا دئدیم. کرونا! کرونا! هه کرونا!
ندن ایندیدک یادیما دوشمهییب. کرونا! ایندی اؤلمک اوچون ان ال وئریشلی یول. نئچه واختدان سونرا بیرینجی کره باشاردیم دوداغیمدا بالاجا بیر گولوش یارادیم.
اویونجاغینی ایتیریب یئنیدن تاپان اوشاق کیمی، اوچماغا قانادیم اولمادی. هله ائشیتمیشدیم کرونا ایله اؤلهنین عایلهسینه ۱۰ میلیوندا پول وئریرلر. تام من ایستهدییم اؤلوم. اؤز اؤزومه »سیزه قوربان اولوم آی قیییق گؤزلو چینلیلر. سانکی منیم یاشامیمی اوخویوب منه گؤره چالیشیب بو خستهلیی گؤندریبسیز. جان آی جان.«
دییه قیریشیغیم آچیلدی. ایندیهدک ماسکا ووروب، الجک گئییب چالیشیب کرونادان اؤزومو گؤزلهییردیم.
سسسیز اونلاری چیخاردیب آتدیم. گلیب کئچهنین اوز – گؤزونه باخدیم.
هانسی تانیش اؤسگوروب – آسغیریرسا اؤزومو اونا ساری وئریب گؤروشوب قوجاقلاشماق ایستهدیم. نئچهسی قارشیمی آلیب اوزاقلاشسالاردا، قیر ساققیز اولوب ال چکمک ایستهمیردیم. او گوندن نئچه کره کرونایا آیریلمیش خسته خانا قاباغینا گئتدیم. ایتهلییب ائشییه چیخارتسالاردا، چالیشیردیم آمبولانسلارلا گتیریلن خستهلره یاردیم آدینا، توخانیم. آخی بو خستهلیک یاخین توخانماقلا بولاشیر.نئچه گون کئچدی. گونون چوخونو چؤلده – باییردا اولوردوم. تکی یاتماغا ائوه گلیردیم. اؤسگورمهیه باشلامیشدیم. الیمدن گلنه قدهر، چالیشیردیم اوشاقلاردان اؤزومو قورویوم. قاپینی دالدان باغلاییب هر نهییمی اونلاردان آییرمیشدیم. اونلارا یاخشی آتالیق ائده بیلمهسمده، هئچ اولماسا مندن خستهلنمهسینلر. یازیقلار نئچه کره گئجه یاریسی اؤسگورهییمین سسینه دوروب قاپینی دؤیوب؛ »آتا یاخشی دئییلسن.«
دییه، خسته خانایا گئتمهییمی ایستهییردیلر. گئت – گئده پیسلهشیردیم. نفس چکمهیه گوجوم چاتمیردی. نفسیم ائله دارالمیشدی کی بیرداها نفس آلماق اوچون، آز قالیردیم الیمی بوغازیما سالیب آغ جییارلاریمی ائشییه چیخاردیم. وار گوجومله چالیشیردیم ایچیمده ایلیشیب قالان بیر داشی سؤکوب آتیم.
هر بیر یانیم دیللی – آغیزلی بیر جان ایدی. آغری هر یانیمی بوروموشدو. بوتون گؤودم چیغیریب باغیرماغا باشلامیشدی. آغریلاریم ایچیمی چیینهییردی. تیکه – تیکه ایچیمدن قوپوردوم.
اسمهجه توتموش بوتون وارلیغیم، باش – گؤزونو دووارلارا چیرپیردی. ایستهدییمه چاتیردیم.
دییهسن، یاشامدا اولان آغیرلیقدان داها چوخ آغیریمیش بو موندار اؤلوم. بئله بیلسه ایدیم اؤلوم آرزولامازدیم. آمبولانس سسی گلیر.
کئشگه تئزلیکله قورتارا بیلسهیدیم. آغریدان یئری – گؤیو جیرماق ایستهییرم. ایندی بیلیرم ایشکنجه ایله آغری چکمک نه ایمیش.
نوشته شده توسط admin در دوشنبه, ۰۶ مرداد ۱۳۹۹ ساعت ۱۱:۵۶ ق.ظ