گئتمک و قالماق
اکبرسعادت
آنا دیلیمیز:هئچ کیم، اوز گویلونا حایاتا آیاق قویمویوب. هرکس باشقالارینین ایسته‌ایله دوغولوب. حایاتدا اولان‌لار ایسه، اوز ایسته‌دیک‌لری‌ایله حایاتدان آیریلماق ایسته‌میرلر.بو آیریلیق ایسته‌مه‌دن اولور. اینسانلارین هاردا دوغولدوق‌لاریندان آسیلی اولاراق، یاشام طرزلری اولور. توپلوم، قات، یئر، آغ-قارالیق، جینسل‌لیک، بویون اوجالیغی، پای وئریلیر.
انسان، مقدس و ان قییمتلی بیر اثریدیر. آدی بیر رسسامین طبیعته باخیب چکدیگی شکیلی قییمتلی اثر آدلاندیریب، ائوینیزین یوخاریسیندان آسیرسینیز. اما الله اوز وارلیغی، قودرتی و علمیله، هئچ بیر شئیه باخمادان هئچ بیر کومک اولمادان جانلی اینسان اثرینی یارادیب. صورتینه قلم چکیب، بدن-جسه‌دینی ائله قوراشدیریب کی، دیزلره، توپوقلارا، بیلک و بارماقلارا سوموکدن دیگیرجکلر قویوب کی، اینسان ایسته‌دیگی واختدا هر طرفه آسانلیقلا چئوریله بیلیر. بو جور مورککب، معجزه‌‌لی، هئچ کیمین یارادا بیلمه‌دیگی بو جانلی اینسان اثرینی قییمتسیز ائدیب، کوچه‌لره، یئتیمخانایا، قوجالار ائوینین کونجلرینه آتیرلار. اینسانلارین بیر قیسمی بو ایشلری توره‌دیرلر، دیگر قیسمی ایسه سوسوب تاماشا ائدیر. هئچ بیریمیز ویجدان عذابی چکیب اونلاری بو وضعیتدن چیخارا بیلمیریک. عکسینه هره اوز ساحه‌‌سینده گاه دنیز چیمرلیگینده لوتلشیر، آبیر-حیاسینی مقدسلیک کسریندن سالیر، گاه زینا ائدیر، گاه دا اللهین خلق ائتدیگی دوزگون بدن قورولوشونو دیَیشدیریرلر، گوزل صیفت جیزگیلرینی پوزوب، ائستئتیک عملیاتلاری آپاریب اوزلرینی عیبه‌جر جیلدلره سالیرلار و سایره.
بوتون وارلیقلاری یوخلوقدان یارادان اللهین جانلی اثری‌نین باشینا اویونلار آچیب یئرله-یئکسان ائدیرلر. سونرا دا دئییرلر کی، الله بیزی بسبخت یارادیب، ظلملره دوچار ائدیب. حال‌بوکی اینسانلارین دینج و سلامات یاشاماسی اوچون الله-تعالی کامیل پئیغمبرلر واسطه‌‌سیله مقدس کیتابلار گوندردی بیزه دوغرو یول، داورانیش، یاشاییش قایدالارینی گوستردی و اویرتدی. لاکین بیز اوزوموز قانونو پوزوب، کیم هارادا فورصت تاپیرسا اورداجا قانونسوز زینا ائدیب، اینسانا خاس اولمایان فسادلار توره‌دیب، هم وله‌دی-زینا دووولان کورپه‌لری، هم ده جمعیتی کورلاییریق. الله-تعالی اینسانی، جین-شیطان و حئیواندان اوستون یاراتدی. اینسانا خاس اولان داورانیش قایدالاری مثلا، کبین، ائو-آوادانلیق، اکمک-بئجرمک، آتا-آنا-اوولاد بیر-بیرینی تانیماسی و سایره کیمی شئیلری حالاللاشدیریب، قانونلاشدیریب کی، اینسان اوز مقدسلیک کسرینده قالسین. چونکو، قورآن، اینسان، برکت، اللهین مقامیندان، عرش-الانی، جنتی گوروب گلیبلر.
اوخولا گئتدیییمیزده اولونو کیتابلاردا اوخوماغا باشلامیشدیم. اینسان بیر گون گلیب، بیر گون گئده جک. دینی کیتابلار، اولومدن یوخودان یازیردیلار. اوشاقلیق، گنجلیک تکرینه دوشدویوموزدن، هر نه یی تئز-تئز ائشیدیب، یاددان چیخاریردیق. اونوموزده اوزون بیر یول واریدی. یولون نه اولدوغونو، بیلمیردیک. دونیا گوروشوموز، یوخودو. جنگ اولدوغوندان دولایی، گون یوخودو شهید خبری گلمییه. گنج اوغلانلارین اولومه قوجاق آچمالاری، قوجا یاشلیلارلا، اورتا یاشلیلاری اوتاندیریردی. شهیدلر اولومدن قورخمویوب، اولومه جان دئییردیلر. آنجاق شهیدلری قویلادیقدا هر کس آغلاییردی، قره پالتار گئییب، ساققال ساخلاییردیلار! باشا دویوب، آغلاماق، عاشورا ایله تاسوعادا دا جانلانیردی.
انسان حیاتیندا دوغوم شادلیقلار یاراتدیغى حالدا اولوم حسرت و غم دوغورور.انسان ایکى یوللا دونیادان گئدیر: بیرى یاتدیغى یئرده? یاتاق ایچینده یاشین چوخلوغوندان یا ساغالماز ناخوشلوقدان وجودون سارسیلماسى و اولگونلشمه سى ایله? ایکینجیسى آیاق اوسته? وجودوندا حیات چاغلادیغى و یاشاماغا یارادیغى حالدا اولور. بو ایکینجى یوللا اولنلرین ایچینده تصادفه اوغراماق کیمى گوزله نیلمز اولوملر اولدوغو کیمى? بو حیاتا گوز یومانلارین چوخونو? دین? حق? خلق و وطن یولوندا جانیندان کئچن شهیدلر تشکیل ائدیر. دوغماق حالیندا دونیادان گئدن آنالار و صغیر اوشاقلاردا بو شهیدلر سیراسیندا اولورلار۰ اینانجیلارا گوره شهیدلر باغیشلانمیش اولور? اونلار سئوال¬ سورغوسوز بهشته گئدیر و کربلا شهیدلرى و اولیالارین حمایه سى آلتیندا یئر توتورلار.دین ? حق? خلق و وطن یولوندا شهید اولانلارین تورپاغا تاپشیریلما و عزا مراسیمى ائل مراسمینه چئوریلیر. بونلارین جنازه سینى ائل یولا سالیر و عزاسینى ائل ساخلاییر.
اولوم، چئورمیزده دولانماغینا باخمایارق، هله گورنمیردیم. اولوم دئیه سن تاس آتیردی. هر آن بیرینی توتوردو. اوخول ایللرینی بیتیرمه ده، جان یولداشیم اولان خالا اوغلومون اولوم خبری، منی آغلادا بیلمیشدی. نئچه گونلر اوزومه گلنمیردیم. ایلک گونلر، اولمادیغینا اینانانمیردیم، سونرالار خاطیرَلر گزیردی منله. خالا اوغلونو اولومو، اولومونون نه اولدوغونو بیر آز آچمیشدی منیم اوچون. او ایل، اوخول بیریم، احد سرخابی، آدیندا یاراشیقلی یولداشیمیز، اوزونو اولدورموشدو، بیزیم اوخولدا او، هر کسدن فرقلی بیریدی! یبلیم یوردونا گئدیب، ائویمیزدن اوزاقلاشیب، باشقا یئرلرده اولدوغوم، یاتاقلاردا گئدن دوشونجه دارتیشمالاری، فیکیرلشدیرمه یه یونلندیریردی اینسانی. اولوم آنلامینی، گئت-گئده بویویوردو. بعضی گونلر، بوتون آنلاملارین یئرین توتوردو. دینلرله، اوسطوره لر، بیر-بیر اوخونوردو، بو آنلامی چوزمک اوچون. هئچ بیری چوزنمیردی، منیم اوچون اولوم آنلامینی. اولومون آنلامی چوزولمک یئرینه، ایچریدن داغیدیردی منی. گئجه-گوندوزومون قاریشمیشدی. هئچ زامان تک قالانمیردیم. بیلیم یوردون سون ایللرینده چؤزولمه یه باشلامیشدی. هر نه دوزنه گیریردی.
اولوم حاق ایدی. چوخلاری اونجه دن دئییردیلر، اینانمیردیم. آما ایندی اینانمیشدیم، اولومون حاق اولدوغونا. اونون یانیندا یاشادیغیمیز سورجده یاشاماغیمیزین دا حاق اولدوغونا اینانمیشدیم. اونون اوچون ده، اولومله یاشاییشی، بیر شئیین ایکی اوزو اولدوغونو، دوشونوردوم. اولومو، اولوم تکین، یاشاییشی دا یاشاییش تکین گورمه لیدیم. یاشاماق اوچون زامانیمیزین، نه قدر اولدوغونو بیلمیرم، بیلدیگیم، بیر گون سونا چاتماغی دیر. اونون اوچون، زامانی یاخشی دیرلندیرمک گرکیر. یوخسا اولوم، وار. تکجه قالیب، نه زامان قاپیمیزی چالا. دونیادا سئودییمیز، هر کیمی الیمیزدن آلا بیلمک سهل دیر، دونیانین اوزون ده الیمیزدن آلان دیر. اولوم دونیانی الیمیزدن آلدیغی آن، حئییفسنمه دن قویوب گئتملیییک. اونون اوچون آرزیلاریمیز گلدیکده، دوغرولتماغینا، چوخ تئز آددیم آتمالییق. اینسانا قالان، نئجه یاشماق دیر. نئجه یاشاماق ایسه، دوروموندان آسیلی اولور. هر نه دورومدا اولور اولسون، یئنه، بیر بالاجا نئجه یاشاماق سئچیمی اونا قالیر. یاشاماغی سئچدی‌یی سورج عؤمروندن سوووشور. عؤمرونون بیر قیسمی‌نی، حالسیز‌لیق‌لا اوغراشان‌لارا، یاشام طرزی سئچیمی قالمیر. ایسته‌مه‌دیـیی واقت، یاشام طرزینین سئچیمی سونوج‌لانمادان حایات بیتیر. گئری‌یه قالان سئچیمی اولمایان بیرلری‌نین خاطیره‌لری قالیر دئمک ایستیردیم کی قالمیر. تکجه سئچیم‌لری‌نی بللندیرن‌لرین خاطیره‌لری قالیر. دوغولماق‌لاری‌لا اؤلمک‌لرینی بللندیرن‌مه‌سه‌لر ده، نئجه یاشادیق‌لارینی بللندیریرلر، نئچه ایل یاشادیق‌لارینا باخمایاراق!
سون سوز: قالماق؛ خوشوموز گلن یئر، واقت، دورومدا اولور. ایستیریک اولدوغوموز یئرده قالاق. اوزوموزه خوش کئچیردیریک. زامانی دایاندیرا بیلسک، قالا بیله‌ریک. قالماغیمیز، بیر یئره کیمی اوز الیمیزده اولور. اوندان اویانا، بیزلیک‌دن چیخیر. قالماغیمیز اوچون بیرلرینی قاندیرمالی‌ییق. ائله یئرلر ده وار، قاندیرماق یئترلی اولمور. تکجه یول گئتمک‌دیر.
گئتمک؛ قالمادیغیمیزدا اولور. قالماقدان یورولدوغوموزدا اولور. بیر یئرده دایانماقدان یورولوروق، باش گوتوروروک گئدک، هارا بیلمیریک. تکجه بیلدیـییمیز گئتمه‌ییمیز دیر. قالماقدان یورولدوغوموزدا گئتدی‌ییمیز یئری بیلمه‌دیـییمیزه باخمایاراق، گئتمه‌یی سئویریک. گئتمک‌دن سوز سالیریق، بلکه بیری دئیه گئتمه. بیری دئمیر، هامی بیلیر گئتمه‌لی‌ییک. قالماغیمیزا سوز آلانمیریق.
نوشته شده توسط admin در دوشنبه, ۲۰ اردیبهشت ۱۳۹۵ ساعت ۵:۱۰ ق.ظ
