دایانما آرخالانما سویکنمه
کوچوره ن:اکبرسعادت
طوفاندا نه قدرت کی ،منی سالسین آیاقدان
ائلدن دی گوجوم ،ائل کوکونه باغلییام هر آن
آی شانلی مقدس آنا ، ای کوهنه دیاریم
هر امرینه آماده یم ایندی ، نه دی فرمان؟
آنادیلیمیز:گوره سن دونیادا، آنا دیللرینی سئومه ینلر ده وارمی!؟ بو سورغونون جاوابینی آلماق اوچون، دونیادا اولان هر بیر کسدن سوروشولمالی دیر. دونیادا آنا دیلی، کیملر اوچون اونملی اولور گورسن؟!. دیلی دونیا دیلینه چئوریلن اینگیلوساکسانلارا، یوخسا، دیللری ادبیات دیلی اولان فرانسیجالیلارا، دیللری یئنی ادبیات دیلی اولان ایسپانلارا نئجه؟ دیللری فلسفه دیلی آدلانان آلمانلیلارا نئجه؟ دیللری سایماق ایستمیرم. بیر چوخ اینسانلار اوچون دیل دردی دئیه بیر شئی یوخ دیر. نییه کی دیللری، اونلارین ایستمکله ایسته مه مکلرینه باخمایاراق، اوز یولونو تاپیب گئدیر.
دیل دردی، دیللرینه ایستییب، اللری چاتمایانلار اوچون دیر. نییه درد اولدوغونو سوروشماق ایستسز، جاوابلامایاجایام سیزی. بیلمیرم نئچه ایل دیر، دونیا آنا دیلی گونویله تانیشام. ائله بیل چوخداندیر. بو گونو آدلاندیرمادان دا اونجه، منیم اوچون هر گون بو گونودو. ایندی ایلده بیر یول بو گونو گوزلویوروک.
دونیالیق آنا دیلی گونو آدلاندیرماقدان بیر چوخ زامان گئچمیر ۱۹۹۹-جی ایلین نویامبر آیینین ۱۷-سینده بو گونو آدلاندیرماق قرارینا گلمیشلر یونئسکودا.بو گون، بیزه وورغولاندیقدا ایلدن ایله سئودیییم دیل اوچون گوردویوم ایشلری، گوزدن گئچیریرم. ایل سایار اولوب یازسایدیم، بلکه یاخشی اولاردی. ایل سایارا گرک قالمیر، اوزومه زور وئریرم، بو دیلی اوزوم اوچون اوخویوب، یازماقدان باشقا بیر ایش یادیما گلمیر. اوخویوب-یازیب-پوزدوقلاریمین زامانینی خاطیرلایاندا، تئلویزیون، اینتئرنئت ایش، ائو، یوخو، قوناقلیق، دانیشیق، آل-وئر… قودوغوم واقتلار چوخ آزدی.
اوخوماقلا یازی-پوزولارا گلنده باشقا بیلدیییم بیر-ایکی دیلدن ده آز اولور. دیل سوزجویون، ایلک آنلامی، آغیزدا یئرله‌شیب، دادلاری تانی‌یان بیر اورقان دیر. دانیشیق‌دا دیلین گوتوردویو گوره‌و اوچون، دانیشیلان آنلامی دیل آدلاندیریب‌لار. دیلین نئجه یاراندیغینا کسین بیر سوز دئمک اولمور. بیرینجی سوز دیلین بیر آللاه پایی اولدوغونو دئمک اولار. اینسان‌لاری باشقا جاناوارلاردان فرقلندیرنلرین بیری دیل اولوب‌دیر.دیلین گوره‌وینی سایماغا دورساق. بیرینجی گوره‌وی ایلگی‌لنیب، ایلگی‌لندیرمک دیر.دیل، دوشونجه‌نی اولوشدوروب، نسیل‌لر آراسی کولتور داشی‌یان نسنه اولوب‌دیر. دیل بیر میللتین کئچمیشینی بوگونه داشی‌یان دیر. تکجه دیل ایله کئچمیشدن، گله‌جک‌دن، گورمه‌دی‌ییمیز بیر شئی‌لردن دانیشا بیله‌ریک. خیا‌ل‌لاریمیز دیل‌له جانلانیر. تکجه گوردوک‌لریمیز یوخ، گوره بیلمه‌دیک‌لریمیزه آنلام وئره بیلیریک.
اوزه یانسی‌یان سئوگی، کدر، سئوینج… دویغو‌لار دیل‌ایله بوشالیرلار. دانیشمادیق‌دا، ایچیمیزده قالیب، هره‌سی بیر جور بوغولورلار.سیجیر، شئعر، ناغیل، تاپماجا، اویکو، رومان، سوزلشمه‌لر دیل ایله یارانیر. شاعیر، هانسی دیل‌ده شئعر قوشورسا، او دیلین شاعیری اولور. ریوایتچی، اوز دیلینین ریوایتچی‌سی، اوخویان، اوز دیلینین اوخویا‌نی‌دیر. دونیادا اولکه‌لره سای سالساق، اولکه‌‌لرده یاشایان میللت‌لرین آدلاری دیللری ایله باغلی بیر آد اولور. دیل، کیملیک اوزل‌لی‌یی دیر. دیل، ده‌یه‌رینی هر کس بیلیب، آنلادا بیلدی‌یی قدر آیدین‌دیر. من بوگون تورک، فارس، عرب، اینگیلیز، فرانسیز، هیندی‌لی… تانینیرام‌سا دیلیمدن آسیلی دیر.دیل جانلی دیر و زامان- زامان دییشیلمکده دیر. هر دیل زامان سوره سینده دوغال بیر گئدیشده باشقا دیللردن ائتگی له نیر ( اوزللیکله قونشو دیللردن). بو پروسئس دیلین موکمل لشمه سینه و گلیشمه سینه یاردیم ائده بیلر. آما بو آخیم دیلین قورولوشونو ائتگی له دییی زامان داها بیر فاجیعه باش وئریر. بونو دا بیلمه لیییک کی، بو کیمی اولایلار بوتون زامان و یئرلرده دوغال بیر اولای اولا بیلمز. بلکه بیر چوخ زامان لار، اوزللیکله سون یوز ایلده بعضی اولوسلار و دوولتلر ساواشی و یوروشو یارارسیز گوردوکده، اوز دیل و کولتورلرینی باشقا اولوسلارا تحمیل ائدیرلر. بونلار داها ژئوپلوتیکی سینیرلاری یوخ، کولتورل سینیرلاری الده ائتمه یه چالیشیرلار.
ماراقلی دیر کی، بعضی دوولتلر ده سینیرلاریندا اولان دیل و حتی دئییم لردن بیریسینه هر تورلو یاردیم ائدرک باشقا ائل و اولوسلارین دیلینی و کولتورونو آرادان قالدیرماغا چالیشیرلار. داها دا ماراقلیسی بو کی، یوخاریدا سویله دیییمیز کیمی، بعضی دوشونجه سیز و آنلاقسیز کیمسه لر ده یارینی بوگوندن اودوزورلار. اونلار” بو گون ده اولماسا یارین اریییب گئتمه لیییک ” دئییب، دوشونمزجه سینه تحمیل اولان دیل وکولتورون قارشیسیندا قولایجاسینا باش ائندیریرلر. یعنی اوزلری کونوللو اولاراق یا هئچ بیلمه دن آسیمیلاسیون پروسئسینین گئدیشینه یاردیم ائدیرلر. بو گون بیر بیتگی، حئیوان و حتی بیر بوجه یین نسیلینین آرادان گئتمه سیندن و اونا نئجه قارشی دورماقدان سوز گئدیر. اما نه یازیق کی، هر گون دونیانین بیر بوجاغیندا نئچه دئییم و دیلین اولومونه تانیق ( شاهید ) اولوروق. دئیلنلره گوره گلن ایللرده دونیانین بوتون دیللری آرادان گئدیب، یالنیزجا بارماقلارین ساییسیندان آز اولان نئچه دیل قالاجاق. یعنی دونیادا اولان ۳۰۰۰ دیل محو اولماق تهلوکه سینده دیر. بیلدیییمیز کیمی هر دیلین وحتی دئییمین آرادان قالدیریلماسی ایله بشرین وارلیغینین بیر بولومو محو اولور. ائله بو اوزدن ده اونا قارشی دورماق گرکلی دیر.
اما بو آرادا باشلیجا بیر سورو تورنیر. دیلی کیم و یا کیملر و نئجه قورومالیدیرلار؟ بو سورونون یانیتیندا دئمه لیییک : هر کیمسه، ائل و اولوس اوز دیلینه یییه اولوب، اونو قورومالی دیر.بونونلا یاناشی هر دوولت بیر بورج اولاراق ان آزیندان سینیرلاریندا یئرله شن بوتون ائل و اولوسلارین دئییم و دیللرینی هر تور اولورسا قورویوب، ساخلامالی دیر. هم ده بو گون دیلی قوروماق اوچون هر اولوسون یازیلی ادبیاتی دا اولمالی دیر. بو یازیلی ادبیات اوخولون بیرینجی سیراسیندان سون صینیفینا دک ائله جه ده بیلیم اوجاقلاریندا اوخونولمالی دیر. یوخسا زامان سوره سینده چئشیدلی ندنلره گوره دیل آرادان گئدجک. دین و قوتسال کیتابین آچیسیندان دا باخماق ایسته سک، دیلین اونمی و اونون قوروماغینین نه قدر اونملی اولدوغونا گوره اولو تانریمیز گویسل کیتابیمیز قرآن- کریم ده روم سوره سینین ۲۲- جی آیت ینده اینسانلارین چئشیدلی دیللرله دانیشدیغی و دییشیک ائللردن و ائتنوسلاردان اولدوغونو یئر و گویه تای اوز ایز و گوسترگه لریندن بیریسی بیلدیریر. بئله لیکله دیلی آرادان گوتورمک ایسته ین، تانرینین یئر اوزونده اولان ایزینی محو ائتمه یه چالیشیر. یوخاریدا سویله نیلن آیته اساسلاناراق بیر جومله ده دئمه لی ییک: دیل دوشمنی، دین دوشمنی دیر.
اما سون سوز اولاراق دئمه لیییک:وارلیغیمیزی ( دیلیمیز، یوردوموز، تاریخیمیز، کیملیییمیز، کولتوروموز، اویقاریمیز و… ) قوروماق اوچون، دیلیمیزی قورومالیییق، دیلیمیزی ده قوروماق اوچون اونو دوزگون و موکمل اویرنیب، اویرتمه لیییک.
دونیالیق آنا دیلی گونونو، آنا دیلینی سئونلره قوتلو اولسون دئییرم.
نوشته شده توسط admin در شنبه, ۳۰ بهمن ۱۳۹۵ ساعت ۷:۲۹ ق.ظ
