داها قوشلار بو بولگه یه گلمز
حاضیرلایان:اکبرسعادت
آنادیلیمیز:یای، یاز بیتمک‌له باشلاییب، گون-گونه قیزیب چیلله‌سینه چاتار. یایین چیلله‌سی قویروق دوغماق‌لا باشا یئتریب اوزو آشاغی فیرلانار. هاوانین ایستی‌لی‌گی آلینار. اونا گوره ده هر ایل قویروق دوغمامیشا قالان چیممک ایسته‌ین‌لره سولار سویوماسین دئیه چیممه‌یه گئدرلر. قویروق دوغاندان سونرا هاوا سرینله‌دیکده سویا گیرمک‌له سویوغون جانا اوتورماغی بیر اولار. بو ایل قویروغون دوغماسی‌نی گؤزلسک ده، قویروق دوغاندان سونرا، هاوا بیردن چوخ ایستی‌له‌دی. آغ یئل اسیب، جانلاردان تری آخیتدیردی. آخان ترلر ده گوزلره دولوب گوزلری قان چاناغینا دوندردیلر. دئیه‌سن تکجه بیزیم گوزوموز یوخ آذربایجانین گوزو ده قان آغلاماغا باشلادی. نئچه ایللردن قاباق ترله‌مه‌یه باشلانان اورمو گولونون آخان ترلری گوزلرینی ده قیزارتماغا باشلادی. گوزلرله بیرلیکده گوزه‌لر ده قان آغلادیلار. آد آلان آدالار دان دا آد قالمادی. قویون داغین‌دا قویونلارین قویروق‌لاری دوغمادی. ایچینی چکیب هونکور-هونکور آغلایان گول قان چاناغینا چئوریلدی. قان چاناغی اولان گولو کیم اوووتمالی‌دیر؟! کیم سو وئریب گوزلرینی توختات‌مالی دیر؟! بیر ”تک صبیر” دوزومو دوزسیدیلر بو مصیبتلی گول ده قورویاردی ، اوندان سونرا بو گولون ایچی له تبریز – اورمو سکگیز بانده اوتوبان دا وورسایدیلار ائله بیر زادا باخمازدی . داشی قومو کی اوزوندنیدی ، بیر قالاردی قیری ، مسئوللار دا بیر آز داها قیر وئرردیلر، اولاردی آسفالت ! بو عظمت ده !! کووپونون ده خرجی جیب ده قالاردی .اورمو گولونه گوره کئچیریلن کنفرانس لارین خرجی له نتیجه سین بیر یئره ییغسایدیلار بئش – آلتی درین قویو ( چاه عمیق) قازیب بو گولو سووارایدیلار بلکه … البته اوندا گولون اوستونده کی کورپو داها عجایب اولا بیلمزدی.
من نیسگیللی اورمو گولویم! اسکی زامانلار منه چیچست گولوده دئمیشلر. زرتشت حضرتلری منیم اطرافیمدا اولان بیر یئرده دونیایا گلیب. بیر زامان دونیانین ایکینجی ان دوزلو گولویدوم. ایندی ایسه سویومون آزالدیغینا گوره سانیرام دونیانین ایلک ان دوزلو گولو اولا بیلم! البته منه گول آدی قویا بیلسه لر!
ایلکین سیرایا یوکسلمه¬یه¬ نه¬لر ندن اولوب. یئرلی- یئرسیز سدلرین وورولماسی، یاغینتی¬نین آزالماسی، مسئوللارین ال اوستونه ال قویما اوزل ژستی، …
مجلیس نوماینده لری یاردیمچین اولوبمو؟اونلار یاردیملارین سئچگیلر آخشامینا ساخلاییب. اونلارین دا گرک سئچیلمه¬یه سوژه لری اولا دای! سئچیلندن سونرا بو یاردیم ائتمه شوعارلارین هامیسی سوز اولاجاق اودا اونودولوب گئده¬جک. البته منیم بو کوتو دورومدان چیخماغیما نوماینده لرین بیری یالنیز دعا ائتمه یی تکجه یول بیلیب! من بیلن ایندی ده ایشین- گوجون بوشلاییب ائله دعا حالیندادیر و هئچ مجلیس ایشلرینه یئتیشمیر! والهی من راضی دئییلم! بیریسی ده بویوروب اورمو گولونون کیچیکلنمه سی اونون یاخشی قورونماسینا یاخشیدیر! آللاه هامیسی¬نین ایشلرین راست گتیرسین!آمما سایین اورمو گولو! اوستده قوروماغینیزا ندن اولانلارین بیرین، سدلری دئدینیز! سدلر کی اکینچی¬لره ده یاخشیدیر برقین تولیدینده ده! نه دئییرسن سون پیشیک؟ بولگه کویر اولماق اوزره دیر، نه اکینچیسی نه برقی؟ اکینچی اکین-بیچیندن، باغچی باغچیلیقدان راضی اولسایدی نه اوچون کنددن شهره کؤچمک گون به گون آرتیردی؟ برق¬لر ده ¬کی ائله کئچن ایللر کیمی گئدنده گئدیر گئتمه ینده گئتمیر. بیرده بو کندلی¬لرین قازانجینا نه یاغینتی نه ده سد، هئچ بیری فرق ائله مز! کئچن ایل اوزوم محصولو باغچی¬لارین الینده قالا- قالا توکانلاردا بیر کیلو اوزوم ۱۵۰۰ تومن ایدی، باغچی¬لار دا بیر کیلو اوزومو ۱۰۰ تومنه یالواریردی دلالی ناز ائدیردی! من ایشین ایچینده یم بیلیرم یازیق اولان اولوب قورتولوب، بیزیم اؤلکه ده جور به جور مئیوه ایله اکینه جک اولارکن یابانجی اؤلکه لردن تون- تون وارد اولور.
کئچک نوماینده لرین سوزلرینه. آخی او نوماینده دئمیشکن کیچیلسن یاخشی اولماز کی، بولگه نین اکو سیستمی دیر بیر-بیرینه، آرتمیانین نسلی آرادان گئدر، سنین آدالارینا گلن کوچری قوشلار آرتیق بو بولگه یه گلمز، بونو دونیانین اهلی بیلیر!
- اولسون! اونلارین یئرینه اولکه میز اوتوردوغو یئرده ۸ میلیارد تن قوم و دوز بومباسینا صاحیب اولار، دوشمنلریمیزین هره سینین گوزونه بیر اوووج قومومدان سپیلسه هامیسی کور اولار!انشاالله نه سن قورویارسان نه ده بیزیم دوشمنیمیز اولار سنین قوموندان اونون گوزونه سپیله! بیر بئله کنفرانس کئچیریلیر، سونوجدا سنی قورتارماغا بیر یول تاپیلاجاق، دئییلمی؟ باخین! او کنفرانسلاردا خرجله نن پوللار هله هئچ، او کنفرانسلارا گلن قوناقلارین ماساسینا، مئیوه سویو، چای، بیرده هئچ اولماسا بیر بارداق سو قویولور دا، کئشگه بو بیر بارداق سویو ایچمه ییب گتیریب توکه یدیلر منیم اوستومه. ایندی آرتیق گول باشلی گولویدوم!
اورمو گولونون تکجه بیزیم یئرلرده یاشایان آدام‌لارین مسئله‌سی کیمی اوزونو گورسه‌دیر. هر دن خبرلرین ایچینده بیر خبری گئدیر، آنجاق بیر خبر کیمی باشقا خبرلرین ایچینده باتیب گئدیر. ائله بو اوزدن بوردا اولان تیتیزلیک، باشقا یئرلرده گورونمور. ائله بو اوزدن، اورمو گولونون قیرغیندا یئرلردن سئوای، آذربایجانین باشقا یئرلرین ماراق‌لاندیرانمیر. یادیما گلیر، آمریکانین بیر نفت لوله‌سی دنیزده پاتلاماغی دونیانین ماراغینی قازانمیشدی. دونیا بیر چوخ اولکه‌لرینده بو مسئله چوزوم آختاریردیلار.
اورمو گولو اونوتولان بیر مسئله دئیر، بیز اوشاغلیق دان گوزوموزو آچیب اورمو گولون سولو گورموشیک، ایندیسه بو آندا بو دوزلو گوله گرک یاردیم اولاق. اوشاغ اولار کن یایین ایستی گونلرینده اورمو گولو قوجاغین بیزه ساری آچیب و بیزی باغرینا باسیردی، هئچ یادیم دان گئتمز او گون لریمیز. بو آندا هر بیریمیزه وظیفه دی بیلییی نه قدر و باجاردیغینا قدر بو دوزلو گولون حاققیندا چالیشا. مینت اولماسین چونکی اوز حاققیمیزدا وطن حاققیندا و آنا حاققیندا چالیشیریخ.
گورک بیزیم الیمیزدن آغلاماق‌دان سئوای نه گلیرکی ائله‌میریک؟! گوره‌سن بو گوله چاره وارمی؟! آرازدان پای آلاق، یوخسا اوز چای‌لارینی قایتاراق. بلکه ده گوله بیر اورتو اورتک، سویو بوندان آرتیق بوخارلانماسین. دئییرسیز دوزونو آزالداق، شورلوغو آزالسین، تئز قوروماسین.
سون سوز اولاراق نئیله¬مه¬لی¬ییک؟
کنفرانسدان زاددان هئچ زاد چیخماز. دده مالی داواسی دئییل آغ ساققاللار گلیب دده دن قالانی پای- بولوش ائده لر ورثه راضیلاشا. بو بیر بولگه نین یاشام مسئله سیدیر، ۸ میلیارد تن قوم و دوز بومباسی! گورون من هاواخت دئدیم ها…
نوشته شده توسط admin در شنبه, ۰۷ مرداد ۱۳۹۶ ساعت ۷:۰۱ ق.ظ
