ناغیل لاریمیز
حسین واحدی
حاضیرلایان:اکبر سعادت
آنا دیلیمیز:هامیمیزین اوشاق لیغیندا، ناغیل خاطیره لری واردیر و بویوک اولدوغوموزدادا او گون لری خاطیرلایاندا گوزل دویغوسال آن لار (لحظه لر) یاشادیریق. او دووراندان الوان خاطیره لریمیز قالیر و بو خاطیره لرده او زامانین ناغیل لاریندان آلینیب دیر. عیبرتلی و فایدالی ناغیل لاریمیز ایندیده قولاق لاریمیزدا سسلنمکده دیر. آمما ایندیکی اوشاق لار بئلنچی ناغیل لاردان اوزاق قالیبلار.آتا- آنالاریمیزدان اوشاق لیق لاریندان سوروشاندا، او زامانین تندیر داملاریندان، کورسو باشیندان و ناغیل سویله مه لریندن دئیه جکلر و او گون لردن سوز آچماق دا، اونلارا یاخشی لحظه لر یارادیر.چئشیتلی ائشیتملی آذربایجان ناغیل لاری، گئتدیکجه اونودولوب گئتمکده دیر و نسیلدن نسیله گلن او عیبرتلی ناغیل لار کولتوروموزون بیر بولومو اولاراق، اونودولوب گئدیرسه کولتوروموزده آرادان گئده جک دیر. ایندینین اوشاق لاری باتی (غرب) اولکه لرین ناغیل لارینین بیر- بیر آدلارین ساییب قهرمان لارین دئییرلر و بو ایش گئتدیکجه اوشاق لا اوز کولتورونون آراسیندا آرا آچیب اوزگه کولتورونه یاخینلیق دویغوسونو یاراداجاق دیر.قاباقجالار عاییله نین بویوک آتا یوخسا آناسی، اوشاق لاری بیر یئره ییغیب اونلارا ناغیل سویله ردیلر. اوشاق ایسه او ناغیل لاردا اوزونو ناغیلین قهرمان لارینین یئرینه قویوب درین بیر خییالا جوماردی. آنجاق بو ناغیل لار اؤزوموزون ایدیلر و قهرمان لاریدا بیزیم قهرمان لارییدیلار. زیرناچی ناغیلی، پیس پیسه لی پوسته خانیم، قوردون ناغیلی، گؤزل فاتما ایله ساری اینک، تولکو ایله قارغا، یالانچی چوبان، … و مین لرجه بئلنچی گوزل و ائشیتملی ناغیل لاریمیز اوز یئرلرین، بیزیم کولتوروموز ایله غریبه اولان و ساواشجیل باتی ناغیل لارینا وئریرلر.تلویزیون ایله رادیودادا بو ناغیل لار اوز یئرلرین ایتیریب لر و یئرلرینه یابانجی اولکه لرین کارتون لارین گونو گوندن داها چوخ یاییرلار. اوستانی شبکه لر بو قونودا اونملی رول اویناییرلار و آنا دیلیمیزده اولان ناغیل لارین کارتون لارین تورکجه ده دوزلدیب اوشاق لاریمیزا گوسترمکده کئچمیشدن قالان گوزل ناغیل لاریمیزیدا دیری ساخلایا بیله جکلر.آتا- آنالار ایسه بو ناغیل لار ایله تانیش اولوب اونلاری گله جک نسیل لره تاپشیرمالیدیرلار. بونلارین یانیندا اوشاق لار باخچالاری ( مهد کودک لری) داها مهم نقش ایفا ائدیرلر. اوشاقلارین چوخو اوشاق واختی بو یئره گئدیرلر و اورادا رسمی دیلیمیزین یانیندا اوشاق لارین آنا دیللرینین دیری قالماسی و کئچمیشدن قالان کولتوروموزو دیری ساخلامالیدیرلار و فایدالی و تجروبه لی آذربایجان ناغیل لارین سویله مکله گله جک نسیل لره بویوک قوللوق ائده بیلرلر.ناغیل لاردا ایسلامی و ایرانی (هر بولگه ده اوز دیل لرییله) کولتوروموزه یئر آییریب بو روحیه نی اوشاق لارا وئرمه لییک. ناغیل عومور وار کن اوشاغین ذهنینده قالیر و اوشاق اوزون او ناغیل لار ایچینده یاشادیر. چوخلو اوشاق لار نصیحتدن قاچارلار و بونا گوره چوخلو سوزلری ائله بو ناغیل لارلا اوشاق لارا دئیه بیله ریک و اوشاغا نصیحتیده ناغیل عونوانیندا چاتدیرا بیله ریک…
بیر قیسسا ناغیل:
آراز و ساناز آدلی ایکی دایی قیزی_بی بی اوغلو وار ایدی. اونلارین بیر پیشیک‌لری وار ایدی. اونلارین پیشیک‌لری یاز فصلینده ایتدی. اوشاقلار هر یئری اونون دالینجا گزدیلر، آمما اونو تاپا بیلمه‌دیلر. اونلار بیر گون آنبارین یانیندا اویناییردیلار ائشیتدیلر کی بیر نفر اونلارین باشی‌نین اوستونده میو- میو ائدیر. آراز نردیوان‌دان یوخاری قالخدی،اوزونو آنبارین تاوانی‌نین یانینا یئتیردی آمما ساناز آشاغیدا دایانمیشدی، هئی سوروشوردو:» تاپدین می؟ تاپدین می؟اما آراز اونا جاواب وئرمه‌دی. آخیردا آراز اوجا سس‌له سؤیله‌دی:- تاپدیم! بیزیم پیشیک‌ین… نه قشنگ پیشیک بالالاری واردیر. تئز اول بورا گل!ساناز قاچدی گئتدی ائودن بیر آز سود گتیردی.پیشیک بالالاری بئش ده‌نه ایدی. اونلار بیر مدت‌دن سونرا بیر آز بویودولر و باشلادیلار آنادان اولدوغو یئردن ائشیگه گلدیلر. اوشاقلار ایسه بیر بوز رنگلی پیشیک بالاسین کی آغ پئنجه‌لری و ار ایدی سئچیب گوتوروب ائوه گتیردیلر. آنالاری قالان پیشیک بالالارینی باشقا کیمسه‌لره وئردی و تکجه بو پیشیک بالاسین اونلارا قویدو قالدی. اوشاقلار اونا یئمک وئریردیلر و اونونلا اویناییردیلار. اونلار، اونو اوزلریله یاتیردیردیلار.بیر دفعه اوشاقلار اویناماق اوچون یولون اورتاسینا گئتدیلر. اونلار، پیشک بالاسینی ایسه اوزلریله آپاردیلار. یئل سامان چوپلرینی یول اوزه‌رینده ترپه‌دیردی.پیشیک بالاسی ایسه سامان چوپلریله اویناییردی. اوشاقلار ایسه اونون اویناماغیندان لذت آلیردیلار. اونلار، سونرا گوردولر یولون کناریندا اوه‌لیک گویریبدیر. اونلار باشلادیلار اوه‌لیگی درمگه، بئله‌لیکله پیشیک بالاسینی یاددان چیخارتدیلار.اوشاقلار، بیردن- بیره ائشیتدیلر کی بیر نفر قیشقیرارکن باغیریر:»قاییدین! قاییدین!« اونلار، گوردولر بیر آتلی اووچو آت چاپارکن اونلارا دوغرو ایره‌لی گلیر. اونون اونونده ایسه ایکی ایت هوره- هوره قاچارکن گلیرلر.ایتلر، پیشیک بالاسینی گوروب ایسته‌ییرلر اونو قاپیب، دیدیب، ییرتیب داغیتسینلار. آمما، بیلمز پیشیک بالاسی قاچماق عوضینه، قوز بئل دوروم دا یئره اوتوروب ایتلره باخیری. ساناز، ایتلردن قورخدو و قیشقیردی و ایتلرین قاباغیندان قاچدی. آمما، آراز بوتون گوجویله پیشیک بالاسینا ساری قاچدی. ائله، دوز ایتلر یئتیشن چاغدا، او ایسه اوزون پیشیک بالاسینا یئتیردی.ایتلر ایسته‌دیلر پیشیک بالاسینی قاپیب، دیدیب، ییرتیب، بودارلاییب داغیتسینلار. آمما، آراز، اوزون، قارنی اوستده، پیشیک بالاسی‌نین اوستونه آتیب سالدی. او، پیشیک بالاسینی، ایتلرین گوزلری‌نین اونون دن ایتیریب، قورودو.آتلی اووچو، اونلارا چاتدی، ایتلری اورادان قوودو. واسیا ایسه پیشیک بالاسینی ائوه گتیردی. او، پیشیک بالاسینی، او گوندن بری، داها هئچ واخت اوزویله چوله آپارمادی.
نوشته شده توسط admin در دوشنبه, ۰۸ دی ۱۳۹۳ ساعت ۶:۰۸ ق.ظ
با سلام و تشکر از متن سلیس و روان شما و قدر دانی از تلاش شما برای حفظ فرهنگ اصیل قصه های شفاهی آذربایجان