سوسن_نواده‌رضي
اولوم قالیم حقی
آنادیلیمیز:اوشاقلارین ایلک اوخولدا اوخودوقلاری دیل، اؤز آنا دیللری اولمالیدیر، اوندان سونرا هر نئچه دیل اؤگرنسه‌لر اونلارا آنا دیلی تَمَلینه دایالی اولان ایکینجی دیل ساییلیر.
دیلی اولمایان کیمسه‌نین دوشونجه‌سی اولماز، دوشونجه‌سی اولمایانین ایسه دیلی اولماز. اؤز دیلینی اؤگرَنَن انسان، کیملیگینه وارار، حقیقتی قاورایار (ادراک ائیلر). دیلینی دوغرو- دوزگون اؤگرنمه‌ین بیریسی‌نین دوشونجه دایره‌سی دار، ذهنی باشاریقسیز اولار.
دیل جانلی بیر وارلیقدیر. منطقی اولاراق، دیل و وارلیق بیری بیریندن آیریلمایان ایکی اولقو (فنومن)دیرلر. انسانین کیملیک یوغرولوشو، اونون اِگیتیمینده گیزلیدیر. عمومی اِگیتیم و گله‌جکده ایش و یاشامدا اوغورلو اولماق ایسه، آنا دیله باغلیدیر. اوشاقلارین ایلک اوخولدا اوخودوقلاری دیل اؤز آنا دیللری اولمالیدیر، اوندان سونرا هر نئچه دیل اؤگرنسه‌لر، اونلارا آنا دیلی تَملینه دایالی اولان ایکینجی دیل ساییلیر.
اوشاق، اؤزونو آنا دیلی ایله تانیییپ، کیملیگینه ساری ایلک آددیملارینی گؤتورر. یئنیجه دوغان کؤرپه، آنا دیلییله کیملیک و کولتور اییه‌سی اولار. سونرا همین دیل ایله، ایلک سوسیال (اجتماعی) قورال‌لاری اؤگر‌نیپ، باشقالاری ایله ایلَتیشیم (ارتباط) قورار. بو باخیمدان، آنا دیلی اوشاق ایچون باشلیجا رول اویناماقدادیر و بیرئیین (فَردین) هر یؤنده گلیشمه‌سی، مطلق آنادیلی‌نین اؤگرنمه‌سینه باغلیدیر.
اؤز آنا دیلینی دوغرو- دوزگون اؤگر‌نَن اوشاق، منطقی اولاراق، اؤزونو داها یاخشی تانیییپ، تانیدا بیلر. بیر توپلومون دیلی، او توپلومداکی انسانلارین بیری بیریله باغلانیپ، ایلَتیشیم قورماق ایچون آراج، و اورتاق دگرلرین تمَلیدیر. بیز یا دا توپلوموموز، آنا دیلیمیزی اؤنمسمه‌دیکجه، سوسیال (اجتماعی) ایلیشکیلرده داها چوخ چتینلیک‌لر چکه‌جَگیک. آنجاق کیملیگیمیزی آنا دیلیمیزین اساسیندا یوغرولدارساق، بیر چوخ سورونلاریمیز اورتادان قالدیریلاجاق.
دنیانین بوتون ائگیتیم اوزمان‌لاری (متخصصلری) بو نکته‌یه وورغولاییرلار کی، اوشاقلار اؤز آنا دیلینده دوشونوپ، اؤز فکرلری و دویغولارینی بو دیلده داها یاخشی افاده ائده بیلیرلر.
آنا دیلینده ائگیتیم آلماق، هر شیئدن اؤنجه بیر انسانلیق حقّیدیر، عینی زماندا ایسه، بیر ملّت یا دا بیر قومون اولوم- قالیم حقّیدیر. آدلیم دیلبیلیمچی، هارکورت، “دیل، بیر ملّتین گوزگوسودور” دئمیشدیر، بو اوزدن ده هر ملّتین، آنلامینی یالنیزجا اؤز دیلینده تاپا بیلدیگی اؤزونه اؤزل کولتورو و یاپیسی (ساختاری) واردیر.
نوشته شده توسط admin در دوشنبه, ۱۵ آذر ۱۴۰۰ ساعت ۹:۰۵ ق.ظ
