هِیوا
داود_پیرعلیلو
آنادیلیمیز:قاپی دؤینلر گؤرودولر بالابگیم گلینین قوجاغیندا اؤزوندن گئدیب. او یانا قاچ، بو یانا قاچ، بیر سئگین سو گتیریب بالابگیم-ین اوزونه سپیب، بو اوزوندن- او اوزوندن بالاجا یاناقلارینا، شاپبا ووروب هوشا گتیردیلر. بالابگیم بیردن بیر درین نفس چکیب اورکدن آغلاییب قارداشینا دئدی:
– داداش! آنام ایله آتامی داها گؤزله‌مه، اونلار بیر یوللوق گئدیبلر. اونلار بیزی تک قویدولار داداش! اونلار بیزی آپارمادیلار.جماعت ییغیشمیشدی، قارداشی دا حال قضیه‌نی بیلدی، دنیاسی دگیشیلدی، ائله بیل تازا چیرتلایان ایکی گول بیر خزان یئلینه دوشوب، ساپ ساری سارالدیلار…هِیوا ایله بالاخانین اؤلوم خبری هِیوانین باجیسینین قولاغینا چاتدی. او دا عائله‌سی ایله اؤزونو کنده یئتیریب،کندین جماعتی ایله باجیسینین و کوره‌کنلرینین جسدینی دفن ائدیب تورپاغا تاپشیردیلار. نئچه گون او ماجرانین اوستوندن کئچیردی هِیوانین باجیسی دا اوشاقلارا گؤره کنددن گئتمه‌میشدی، بالابگیمین یانیندا قالیردی. آما بالابگیم داها همان بالابگیم دگیلدی ائله سولموشدو کی، هر کیم اوزونه باخاندا ناراحات اولوردو.بیلمیردی نه ائیله‌سین. دنیا ایله کوسموشدو حتی هر یئر گؤزونه بیر خرابه‌لیک گلیردی.گولمک دوداقلاری ایله اؤزگه‌لشمیشدی، ائو اونا بیر بؤیوک جهنم اولموشدو. آخشاملار گؤزو قاپیدا،آتاسینین بوینونا آتیلماسی خیالیندان کئچرکن، آناسینین بالابگیم سسلمه‌سی قولاغیندا سسلَنیردی. بالابگیم آناسینین چادیراسینی ائوین بوجاغیندا بیر میخدان آسلامیشدی. آخشام اولجاق قاش قارالاندا، آناسینین ساغ ایکن قوقو چیراغینی یاندیریب ائوی ائشیقلاندیردیغی زمان، بالابگیم آناسینین ورینه او چیراغی یاندیریب آنانین چادیراسینی قوجاقلاییب باغرینا باساراق هؤنکور- هؤنکور آغلاییردی. گونلر بالا بگیمه چوخ آغیر گئچیردی. بالا بگیمین خالاسی گؤرور بئله اولمایاجاق، او گرک اؤز ائوینه قاییدا. بو یاندان دا بالابگیمی اؤتوره بیلمیردی، قیز اوشاغی ایدی. خالاسی بئله قرارا گلیر بالا بگیمی اؤزو ایله شهره آپاریب ائوینده ساخلاسین. خالاسی بالا بگیمی آپارماغی اونون قارداشینا دییب، اوندان دا ایسته‌ییر او دا بونلار ایله شهره گئدیب، اونلاردا قالسین. اما قارداشی اؤزونون گئتمه‌گینی قبول ائتمه‌ییر، آنجاق بالابگیمی خالاسینا تاپشیریر. قارداشی بیر بالاجا بؤیوموشدو، کندده عمیلرینین یانیندا قالدی، باجیسی ایله خداحافظلشدی. خالاسی بالابگیمی ائولرینه آپاریب، اؤز یانیندا ساخلادی. خالاسینین دا اوشاغی چوخ ایدی، اوچ اوغلو و اوچ قیزی وار ایدی کی، هامیسی دا بالابگیم-دن بؤیوک ایدیلر. بالابگیمین دردینین اوستونه بیر درد ده قویولموشدو، او دا قارداشیندان آیریلماق ایدی. داها بالابگیمین عائله‌سیندن الدن وئرمه‌دیگی بیر کیمسه قالمامیشدی.گونلر گلیب گئچیردی، بالابگیم ده گون به گون بوی آتیب دیرچه‌لیردی. اوچ- دؤرد ایل اونون کنددن شهره گلمه‌سیندن گئچیردی. بیرگون خالاسی گؤرور بالابگیمین حالی برک توتولوب. اونو چاغیریب سوروشور:– بالابگیم ندیر؟ نه اولوب؟ کیم نه دییب؟ نییه حالین یوخدور؟بالابگیمین گؤزلری دولور، دییر:– خالا، منی بیر کنده آپار آنامین- آتامین قبری اوسته گئدیب اونلاری بیر گؤروم!خالاسی قبول ائدیب ساباهیسی گون بالابگیمی کنده آپاریر. بالابگیم دییر:– خالا گئدک بیر ائویمیزه ده باش ووراق، قارداشیمی دا گؤروم.خالاسی بالابگیمی ائولرینه آپاریر. بالابگیم قاپیلارینا یئتیشنده گؤرور حاجی لِیلَک همان چنار آغاجینین اوستونده یوواسیندا دوروب. حاجی لِیلَگی گؤرمک همن آناسینین، بؤیوک آناسیندان تعریف ائتدیگی خاطره یادینا دوشوب، خالاسینا دییر:
خالا، اورا باخ! همان حاجی لیلکدیر، آنام چلّه گئجه‌سی بیزه تعریف ائدیردی.
خالاسی بالابگیمین الیندن یاپیشیب چکه‌رک دییر:
– آی بالا، گل گئدک قارداشینی گؤر! ائوینیزین ده ایچریسینه بیر باش وور گئدک قبر اوسته، بیر فاتحه اوخویوب سونرا دا چیخیب گئدک ائویمیزه، گون باتانا قالمایاق.
بالابگیم قاپیلارینی دؤیوب گوردو بیر کس گلمه‌دی. بیر آز برک دؤیندن سونرا گؤردو قونشولاری چیخدی. بالابگیمی اوّلده تانیمادی. ائله کی، بالابگیم سلام وئردی بیردن اونو تانییب:
-ای وای بالابگیم! بالابگیم ،سنسن؟ ماشالله نه قدر بؤیوموسن! آلله-ا شوکور اولسون سلامتسن!
دئییب، بالابگیمین او اوزوندن- بو اوزوندن اؤپوب بوینونو قوجاقلاییب باغرینا باسارکن دئدی:
– قارداشین بیر ایل اولار شهره گئدیب، اوردا کرپیج کوره‌سینده ایشله‌ییر. آمما ائوین آچارلاری بیزده‌دیر، هردن بیر ائوه باش ووراریق کی بیر زاد اولماسین.
او قاچدی حیطلرینین آچارلارینی گتیریب قاپینی آچدی. بالابگیم خالاسی ایله ائوه گئدیب او یانا- بو یانا باخدیلار، یئنه قاپینی باغلاییب آچارلارینی قونشولارینا وئردیلر. سونرا قبر اوستونه گئدیب فاتحه وئریب، شهره قاییتدیلار.
خالاسی یواش- یواش کنیز گؤزو ایله بالابگیمه باخیردی. ائوین هر ایشینی اونا گؤردوروب، اوزونو ده دویونجاق دانلاییردی. خالانین اوشاقلاری بالابگیمه اذیت وئریب، هرنه ایشلری اولوردو، اونا گؤردوروردولر. بالابگیمین ایشی- پیشه‌سی اولموشدو اونا- بونا باش اوسته دئمک. خالاسینین بیر کار- لال اوغلو وار ایدی، ائولنمه‌لی وقتی ایدی، هرکیمه ائلچی گئدیردیلر هیچکیمسه کار- لال اولدوغونا گؤره اونا قیز وئرمیردی. خالاسی بیر فکرلشیب، دییر یاخشی اولدو، ائله بالابگیمی بونا خانم ائدیب، هم ائوین ایشلرینی گؤردورَرَم هم ده گلینیم اولار. خالاسی بالابگیمی چاغیریب حال قضیه‌نی اونا دییر. بالابگیم ده کی اون اوچ یا اون دؤرد یاشیندا بیر گؤزل قیز اولوب، نئچه قونشولارین اؤزونه گلین ائته‌سین دییه گؤزو اوندادیر. اما بالابگیم ائولنمکدن بیر زاد بیلمیر. خالاسی دا بالابگیمی هیچکیمین یانینا قویمور، دیینده کی نَدن او اوشاغی ائیله ائیلیرسن، دییر قیز اوشاغی ائشیگه چیخماز. خلاصه بالابگیمی راضی ائدیرکی، کار- لال اوغلونا وئریب اؤزونه گلین ائیلیه، نه قدر عمرو وار اؤز قاباغیندا کنیز کیمی ایشلَده.
خالاسی داها یوباتمادان تئز بالابگیمین صیغه‌سینی اوغلونا اوخودوب، کبینینی کسدیریر. بالابگیم اولور او ائوین گلینی. هر آغیزدان بیر هاوا گلیر، خالاسینین اوشاقلاری دا بالابگیمه بیر گلین کیمی دگیل، کنیز کیمی باخیرلار. هر کس بیر زادی سیندیریر یا خراب ائدیر، بالابگیمین بوینونا آتیرلار، گون به گون بالابگیمی گؤزه گؤتوروب، هر کس بیر بهانه ایله اونو تحقیر ائدیر، حتی قونشولار دا تحقیر ائدیرلر بونا گؤره کی نییه گئدیب بیر لال-کارا خانیم اولدو.
آنا بو سؤزلری اوغلونا دییب، آخرده ده دییر:
– اگر گؤردون سنی فشارا قویوب، دییر منی بوشا، دئنه عیبی یوخ اوشاقلاری وئر منه من ده سنی بوشاییم. او اوشاقلارا گؤره بوشانمایاجاقدیر.
نوشته شده توسط admin در شنبه, ۰۴ دی ۱۴۰۰ ساعت ۹:۲۹ ق.ظ
