اوتلارین بحثی
کؤچورن: احمد اسدی
سیز آداملارین قارینلارینا گیرنده یاشایا بیلمزسینیز، اما من یاشارام، اورادا اولان دردلری قوووب کنارا چیخاردارام. من حکیمم، حکیم! سیز نه¬سینیز؟ منیم مسکنیم بولاق¬باشی، گلین‌لر قیزلار اویلاغی‌دیر.
اوننوجا اونون سؤزلرینی ائشیدیب دئدی:
-اده، نه اؤزونو اؤیورسن، سن من اولا بیلمزسن. من چوخ آدامی اؤلومدن قورتاریرام. منی قاتیخلی آشا تؤکرلر، لذتله یئیه-رلر.
جینجیلیم بؤیوردن چیخیب دئدی:
-منم، منم دئمه! من باغلی آداملارین قارنینی سندن تئز آچارام. منی آشا تؤکرلر. مندن کته بیشیررلر. جینجیلیم کته‌سی یئیه¬ن، دئیر بیر ده یئییم.
امنکؤمجی پاپاغینی گؤزونون اوستوندن یوخاری قالدیریب دئدی:
-اده، سن دانیشدیغین ایشلر منیم ایشیم‌دیر سن هله اوشاقسان. من ارسطویام، ارسطو! قازآیاغی قاز کیمی دیکه¬لیب دئدی:
- دئیه‌سن دره¬نی خلوت گؤرموسونوز آغزینیزا گلنی دئییب اؤزونوزو اؤیورسونوز. هئچ باشقاسیندان دانیشمیرسینیز. من هامینیزدان باشام. منی یئمه‌ین تاپیلماز. من عؤمرو اوزادارام سانجینی کسرم، انسانا قوت وئررم.
خینجیلوووز الینی اسدیریب دئدی:
-باخ، اوردا چاشدین ها! باشقاسی‌نین ایشینی اؤز آدینا چیخیررسان. عؤمورلری اوزا‌دان منم منی کابابلا، قیزارتما ایله، قووورما ایله یان-یانا قویارلار. اما سنی سوپوروب آتارلار. خینجیلوووزون قووورماسی دیل‌لرده داستان‌دیر. اما سنین آدین ایت دفترینده ده یوخدو.
گؤبه¬لک غضبلنیب دئدی:
-من اولان یئرده سنی کابابین، چیغیرتمانین قووورمانین سمتینه قویمازلار. اؤز یئرینی تانی! من کابابدان باشام. منی یئیه-ن‌لرین جانی سالامات اولار، کؤکه‌لر.
یارپیز گؤبه¬لگین سؤزونو کسیب دئدی:
-اؤزونو چوخ اؤیمه! منی قاتیقلا آشا تؤکرلر. اؤزوم باش آغری‌سی‌نین درمانییام. یاخشی یئمک‌لرین یولداشییام.
یونجا گولوب دئدی:
-چوخ داوا ائله¬مه¬یین! هئچ بیرینیز آدام و حیوان کؤکلده بیلمزسینیز. اما من کؤکلدرم. آجیغیم توتانی دا اؤلدوررم. منیم زهریم سولئیمانی‌دان برک‌دیر.
بات-بات بو سؤزو ائشیدیب دئدی:
-من اولان یئرده بیر کس دلی‌لیک آدی توتا بیلمز. کیم منی دیشله‌سه، او ساعت دلی ائدیرم. منه ساتاشمایانین دا یاراسینی ساغالدارام. منده اولان زهری لقمان دا قاییرا بیلمز.
قایا اوتو دئدی:
-په، په، په، تزه حکیم گلیب‌دیر. من یارا ساغالداندا، سن هئچ دونیایا گلمه¬میشدین. چیبانین یان-یؤره‌سیندن هئچ کس کئچه بیلمیر. اما من اونو دئشیب ساغالدارام. من قارا و ساری یارانین درمانییام.
باغا یارپاغی بو سؤزدن برک غضبلنیب دئدی:
-آی قایا اوتو، سن نه هرزه-هرزه دانیشیرسان؟ منیم کیمی چیبان دئشیب ساغالدان هله آناسیندان اولماییب‌دیر. من بوتون یارا‌لارین هووونو آلیرام چیرکینی چیخاردیرام. منه یارا ملحمی دئیه¬رلر خالص لقمانم، لقمان!
قانتپر گولوب دئدی:
-سیز هامینیز منیم شاگردیمسیز. یارا ساغالتماغی مندن اؤیرنمی‌سیز. هله اوسته‌لیک من قانی دا کسیرم، سویوق دگن آدامی ساغالدیرام. گؤرون لقمان منم، یا سیزسینیز؟
گول ختمی‌نین رنگی دگیشدی، بیر نعره چکیب دئدی:
-من اولان یئرده سیزین “لقمانام”، – دئمگه حاقینیز یوخدور. لقمان منم. من بوتون دردلرین درمانییام. من بوتون یارا‌لاری ساغالدیرام. هوو‌لانان یارانین درمانی منم.
قارغیدا‌لی تئلی اونون هیرسلندیگینی گؤروب دئدی:
-اؤزونو بیر بالاجا ییغیش‌دیر! دوه‌دن بؤیوک فیل ده وار. هئچ کس ساغالدا بیلمدیگی ناخوشلوق‌لاری من ساغالدیرام. بؤی‌رک خسته‌لیگینی من یاخشی ائدیرم. آدامین آغزین‌دان ایچری گیریب اورادا اولان خستکیک‌لره ده دیوان توتوب هامینی باییرا قووورام.
همرسین اونون سؤزلرینی ائشیدیب دئدی:
-دونیادا اؤزونو تک بیلمه. ایچریده اولان خسته‌لیک‌لری من ساغالدیرام. اؤمرو من اوزادیرام. ورم مندن قورخور. شیشمیش دالاغی من یاتیردیرام. لوغمان هکیم‌لیگی مندن اؤیرنمیش‌دیر.
شاهدره اوتو همرسی‌نین سؤزونو کسیب دئدی:
-نه بئله اؤزونو اؤیورسن؟ بیر کیشی ایسترم کی، سؤودا خسته‌لیگینی ساغالتسین. اما من تامام ساغالدیرام. کیمین سؤوداسی وارسا، گلسین بو ساعت ساغالدیم.
خینجیلیم تورپاق‌دان باش قالدیریب دئدی:
-چوخ بئکارا موباهیسه ائدیرسیز. دونیادا مندن باش یوخدور. مجلیس‌لرده گزرم قووورمامی یئین دئیر، بیر ده یئییم.
داغداگزر باشینی اسدیریب دئدی:
-بیر اؤزونوزدن دئینده، بیر ده قونشونوزدان دئیین. من هامینیزدان باشام. مجلیس‌لرده منی مزه اوچون یئیرلر. آش آلتینا قویارلار. یئم‌لرین ان یاخشی‌سینی تورپاغین آلتیندا من یئیرم. زیر-زیبی‌لی یئنه سیزه چاتار.
چیچک‌لر، بنؤوشه‌لر، یاسمن‌لر، بیر ده قره‌نفیل‌لر اؤزلرینی بیر چمن‌لییه وئریب بو دانیشیق‌لارا قولاق آسیردی‌لار. بو بحث اونلارین خوشونا گلمه‌دی. دئدی‌لر:
-بیز اولان یئرده سیزین دانیشماغا حاقینیز یوخدور. بیزیم اتریمیز روح‌لاری تزه‌لییر. بیز دونیانین یاراشیغیییق، بزییگیک. بیزی گلین‌لر قیزلار یاخا‌لارینا تاخارلار.
بو سؤزلری قیزیلگول ائشیتدی، برک هیرسلنیب دئدی:
-گول‌لرین، چمن‌لرین بزیی منم. اتریم هامییا لذت وئریر. گولابیم مجلیس‌لرده گزیر. دردلر درمانییام، روح تزه‌له‌ینم.
لاله دئدی:
-هئچ اؤزونوزو اؤیمیین. سیز هامینیز تئز سولارسیز. همیشه هسرتله یاشار، اؤز دردینیزه درمان تاپمازسیز.
بیردن دلمه اؤزونو اورتایا آتیب دئدی:
-بیر کیشی ایسترم، سودو دوندوروب قاتیق و پئن‌دیر ائله‌یه. اما من ائلییرم، منیم مسکنیم گؤزل داغ‌لار، چیچک‌لی اوتلوق‌لاردیر.
قانقال اونا گولوب دئدی:
-آرتیق ایش گؤرمورسن. دانیش مندن. هسرتیمی اولاق‌لار، دوه‌لر چکر.توخومو گلین‌لر قوووروب یئیر.
زیه‌رک دئدی:
-آی آمان، قویمایین، آغزیما تیکان باتدی. سنی کی، ائششک یئییر. منیم یاغیم دردلر درمانی‌دیر. منی قیزلار قووورغایا قاتیب یئیرلر.
بو سؤزلرین هامی‌سینا اوزرلیک کناردان قولاق آسیردی. لووغا‌لیق‌لار اونون جینینی باشینا ییغدی. سیچراییب دوز داغین تپه‌سینه دوشدو. برک‌دن نره چکیب دئدی:
-دئیه‌سن دره خلوت، تولکو بی‌لیک ائدیرسیز؟ من هم هکیمم، هم فالچییام. من اولان یئره خسته‌لیک، بد نظر آیاق باسا بیلمز. من گؤزل گلین‌لری، قیزلاری، اوغلان‌لاری، اوشاق‌لاری وار-دؤولتی قورویارام. من ساغالتمایان دردی لوغمان دا ساغالدا بیلمز. منیم یانیمدا هامینیزین دیلی گؤدک‌دیر.
اونا دئدی‌لر:
-اؤزونو چوخ اؤیمه! ایگین او قدر پیس‌دیر کی، حیوان دا سنی یئمز. مکانین پئیین‌لیک کوللوک‌دور.
بلی، هر یئره سس دوشدو. بوتون اوتلار پنجرلر تؤکولوب گلدی. هره دؤشونه دؤیوب اؤزونو اؤیدو. آخیردا بو قرارا گلدی‌لر کی گئدیب سوروشسون‌لار، گؤرسون‌لر کی، کیم حاق‌لی‌دیر.
قاباقجا بالدیرغان، اونون دالینجا خیمی، او بیری‌لری ده خیمی‌دان دالینجا یولا دوشدولر. آز گئتدی‌لر، اوز گئتدی‌لر، دره-تپه دوز گئتدی‌لر، بیر چوبانا راست گلدی‌لر، دئدی‌لر:
-چوبان قارداش، دئ گؤرک، بیزیم هانسیمیز باشیق، یاخشیییق؟
چوبان دئدی:
-البته، یونجا ایله دلمه اوتو، بیر ده بالدیرغان.
- سن ترفکئش‌لیک ائدیرسن. اؤزونه لازیم اولان‌لاری تریفلییرسن.
چوبان‌دان آیریلدی‌لار. چوخ گئتدی‌لر، آز دایاندی‌لار، آز گئتدی‌لر، چوخ دایاندی‌لار، بیر آروادا راست گلدی‌لر. اوندان سوروشدولار:
-دئ گؤرک، هانسیمیز یاخشیییق؟
آرواد دئدی:
-البته، قوزوقولاغی ایله گیجیرتکان.
دئدی‌لر:
-سن ده دوز دئمیرسن.
برکیتدی‌لر چاریق‌لارین دابانینی، قیردی‌لار یئرین دامارینی، تکی گئدیب بیر ائششه‌یه راست گلدی‌لر، اوندان سوروشدولار:
-دئ گؤرک، هانسیمیز یاخشی اولاریق؟
ائششک برک‌دن آنقیریب دئدی:
-البته، قانقال.
دئدی‌لر:
-آی آمان، آغزیما تیکان باتدی.
بون‌دان دا آیریلدی‌لار. اوردا آیلا-ایلله، بوردا شیرین دیلله، گئدیب خفنک‌لی بیر کیشییه راست گلدی‌لر. اوندان سوروشدولار.
-دئ گؤرک، بیزیم هانسیمیز یاخشی اولاریق؟
کیشی بیر خئیلاق اؤسکوردوک‌دن سونرا دئدی:
-البته، اوننوجا ایله اوه‌لیک.
دئدی‌لر:
-سن ده دوز دئمیرسن.
نوشته شده توسط admin در دوشنبه, ۱۲ اسفند ۱۳۹۲ ساعت ۶:۱۳ ق.ظ
