توزلو کامانچا
آراز آتا
آنادیلیمیز: آی بنیز خانیم… آلو…ــ …ــ آی بنیز خانیم…باخین اونلار سنین طالئعین اولا بیلمزلر. آلو…
ــ …ــ لطفا دانیشین منله. خواهیش ائدیره م . سیز یئنه اوخومالی سینیز! …ــ سوسون نه اولور.ــ آمما…
آی بنیز دسته یی یئرینه قویوب، اؤزونو کاناپایا سردی. اللریله پیرتلاشیق ساچلارینی داهادا پیرتلاشدیردی. قوروموش قرنفیل چلنگی نی گؤتوروب ایله دی. اؤسکورمه یه باشلادی. قرنفیلین قوروموش لچک لری دوشموش خیاللاری کیمی یئره دوشدو. باخیش لاری تئلفوندا جالانیب قالدی.
…آینادا دن-دن اولموش پیرتلاشیق ساچلارینی گؤرونجه اؤزونه داها دیقتلی باخدی. اوز-گؤزو سولموش، قارالار ایچینده آغ بیرچکلی بیر قادینی گؤردو آینادا. بیر آن دیسکیندی. الینی آیناداکی قادینین سولموش اوزونه چکدی. اونون اوزونده کی قیریشلار دیسکیندیردی اونو. الینی اؤز اوزونه چکدی. سانکی او اسگی طراوتی و گوزه للیی آختاردی بیردن. میز اوسته کی توزلو گیتارایا و الینده کی سولموش قرنفیله بنزه تدی اوزونو. قرنفیللری اوووم – اوووم ائتدی. قاه قاه چکیب گولدو. نه زامان دان بری ایدی بئله گولمه میشدی. سونرا سونرا بو گولوشلر هؤنکور – هؤنکور آغلامایا دوندو. آینانین یانیندا کی شکیله درین درین باخدی. او باخیشلار حسرته دونوب کؤکسونه اؤتوردو. شکیلی باغرینا باسیب آغلادی…آنی ده ن نیفرت له شکیلی فیرلاتدی…
تئلفون یئنه چالدی. آی بنیز یورغون یورغون دسته یی گؤتوردو.
ــ سالام آنا. منم ایلقار. من صاباح قاییداجاغام. دییره م …آنا… آنا… هه یاخشی یادیما دوشدو…
آی بنیز دسته یی یئره آتدی، تئلفون سیمی نی ده توم گوجو ایله پیریزده ن چکدی. کاناپادا اوتوروب بیر سیقارا داها آلیشدیردی. باشینی دیک توتوب گؤزلرینی یومدو. گؤز یاشلاری ایسته مه سه ده گیله له ندیلر. یئردن شکیلی گؤتوروب، ایللرین حسرتی له آناری باغرینا باسدی: تام ایکی ایل اولدو. بیلیره م، همیشه سئودییم شوشانین داغلاری آلدی سنی. کئش کی او کدرلی ماهنی لاری هئچ اوخوماسایدیم. کئش کی او ماهنی لار قارا طالعیمه چئوریلمه سه یدی. سنی ایتیر مه سه یدیم. نفرت ائدیره م ساواشدان. سنی…
بیــــردن دعوت سیز بیر قوناق پنجره دن ایچری گیردی. آی بنیــــــز شاشقبن شاشقین اونو ایزله مه یه باشلادی. سئرچه سالوندا هر طرفه قاناد چالیب، اوچوشوردو . آی بنیز پنجره نی تام آچدی. سئرچه گلدیی یولدان گئری دؤنوب گؤیلره یوکسلدی. آی بنیز اوزون آرادان سونرا ائشیگه باخدی. هریان قارا آلتیندا قالمیشدی. خیاواندا ایسه ماشین لار ترافیکده ایدیلر. تام قارشی دا کی کافه دولو ایدی. هر کس بیر تورلو یاشیردی…
آی بنیز پنجره دن گئری چکیلیب، سیقارتی اوزون – اوزون ایچینه چکدی. توزلو گیتارانی الینه آلدی. اوزون بیر آرادان سونرا اونو سئومه یه باشلادی. آغزین آچدی همشه سئودییی کور عربی ترنم ائتمه یه… آنجاق سسی بوغازیندا قوروموشدو…
نوشته شده توسط admin در چهارشنبه, ۰۹ خرداد ۱۳۹۷ ساعت ۱۱:۲۲ ق.ظ
