گونش باتییا ساری گئدن
حسین واحدی
بیراینجی بولوم
آنادیلیمیز:گونش باتییا ساری گئدرکن، گؤزو آرخاسیندا قالاراق بیزدن آیریلماق ایستهمهییردی. آخشامین لاپ شیرین چاغیندا، کندین قوزئینده اولان خرمنلیکده فوتبال اویناییردیق. اویونون شیرین یئرینده آلای-قولای باش تاپدیم اوزاقدان بیری آدیمی سسلهیه- سسلهیه بیزه دوغرو گلیر.
ـ ممد… ممد…. ممد….خرمنه یاخینلاشاندا، لاپ کیچیک قارداشیم، بایرامدیر گؤردوم! تئز مئیداندان ائشییه چیخیب، بایراما دئدیم:
ـ نهدى بایرام؟ نه اولوب؟
نفس- نفس وورا-وورا، ممد! ایبو…
ـ آی اوغلان نفسینی آل، بیر آز دینجل سونرا دئ دا.ـ ممد، ایبو گلیب! موشتولوغومو وئر!
ـ آی قادانی آلیم بایرام، خوش خبر اولاسان!
“یولداشلاریما ساری چؤنوب، آی اوشاقلار من گئدیرم ائوه، قارداشیم تهراندان گلیب” دئییب بایرام ایله بیرلیکده ائوه ساری گئتدیک. بایرامین ۱۲ یاشی وار ایدی. او ائویمیزین سونبئشییی ساییلیردی. ائوده ۵ اوشاق ایدیق. من ائوین اوچونجو اوشاقییدیم. بایرام هامیدان چوخ منله آراسی ساز ایدی، منیم ده بایراملا.
ایبو دا، ائوین ان بؤیوک اوشاغی ایدی. ۱۳۸۰ دان ایش اوچون اورمیهدن تهرانا گئتمیشدی. ایندی بئش ایل ایدی اوردا قالیردی. بو بئش ایلین ایچینده بیر دفعه ده اونو یاخیندا گؤرمهمیشدیک. فقط سسینی ائشیتمیشدیک.
یولو گئده- گئده مینلرجه فیکیر بئینیمه گلدی. رؤیالارا گیرمیشدیم. لاپ او اوشاقلیغیمین شیرین چاغلارینا. ۱۳۷۵ ایدی. منیم یئددی یاشیم وار ایدی و ایبونون اوندؤرد یاشی. کندین اوشاقلاری هرگون بالیق توتماق اوچون قودوقبوغان چایینا گئدردیک. من سویا دوشمزدیم. ائشیکدن ایبو گیله باخاردیم. بالیق توتاندا اورکدن هارای چکیب، گؤیه آتیلاردیم:
– یاشاسین ایبو، یاشاسین ایبو!
– ممد سن ده یاشا، بو بالیقلاری سنه توتورام.
سونرا آپاریب اود اوستونده بیشیریب یئیردیک. بئله- بئله خاطیرهلرده یاشایا- یاشایا ائوه چاتدیم.
قاپی آچیق ایدی. قاپیدان ائیوان گؤرونوردو. ایبو آتا- آنام گیل ایله دانیشیردی. منی گؤروب گولومسهدی. من اؤزومو ساخلایانماییب اونا ساری قاچدیم. گؤز یاشلاریم آخیردی. ایبونو قوجاقلاییب اللریمی کورهیینه دویونلهدیم:
– نه جورسان ایبو؟
– ایبو نمنه دی؟ ابراهیم! یئکه کیشی اولوبسان!
– ایبو بو نه سؤزدو! ایبو یانی بو بئش ایلده پیس اولوب؟!
– بله! دا دوباره بو واژهنی ایشلهتمه ها!!
– هله بولاری بوراخ آی قارداش! تهراندان تعریفله؟ نه ائلیرسن؟ اورالاردا نه وار نه یوخ؟!
– هئچ، مشغولام شکر خدا!
آنام ایسه: ممد قارداشین یول یورغونودو داریخدیرما ال- آیاغین یوسون شامی گتیریم ابراهیم ایکی گونهجن کنددهدی دویونجا دانیشارسیز. هله سنه ده ایش تاپیب! – دئیه دانیشیغیمیزا قوشولودو.آتام دا، همشهکی کیمی سسسیز- صداسیز چیچئست رادیوسونو دینلهییردی. آخشاملار، آتام فقط رادیویا قولاق آساردی.
هئچ کیمنن ایشی اولمازدی.هؤوولسک آنامدان سوروشدوم: نه ایشی آنا جان؟– محمد تهراندا بیر خارِجی شرکتنن همکاری ائلیرم. بیلدیم لیسانس آلیبسان دانیشمیشام سنی ده اورا آپارام! – دئیه، ایبو آنامین عوضینه آچیقلادی.
قاشقاباق ساللاییب چوخ جدی دئدیم: یوخ من اورمیه ده ایش تاپاجایام. بورادا دا چوخ ایش وار. یازیچیلیغادا تازا باشلامیشام.– خب نمنه یازیرسان؟ هارالارا چاتیبسان؟ نهیین وار؟
– بیرزادلار یازیرام دا! کیتابیمی دا حاضیرلاییرام اینشاا …. اوچ آیا قورتولار…
بیلمیرم نییه قاپیدان گیرمک همین بو سؤزلر باشلاندی. ائودهکیلر ده قیراقدا نئچه گؤز ده بورج آلیب بیزی دینلهییردیلر.
آنام بیر داها دا سؤزوموزه قوشولدو: اوشاقلار سوفرا گلدی. دانیشیقلارینیزی ساخلایین شامدان سونرایا.
شاما قیزارتما ایله ساریمساقلیایدی. منیم ان چوخ سئودیییم یئمکلردن بیری. شامی یئییب ایبو ایله بالاخانایا گئتدیک.ایبونون اوستو باشی دا دهییشمیشدی. خط باشیلاری قولاغینی کئچمیشدی. توکلرینین بیر آزی ساغا، بیر آزی دا سولا، بیر آزی آلینینا، بیر آزی دا گؤیه ساری دارانمیشدی.
دارانمیشدی نه دئییم، یالانمیشدی!اؤز عالمینده فشن ائلهمیشدی! هرهمیز باشیمیزین آلتینا بیر یاستیق قویوب اوزاندیق. او منله اهمیتلی دانیشیق آپاراجاغی اوچون هئچ کیمی اوتاغا قویماییب، سیزلرله صاباح گؤروشوب دانیشاریق سؤز ایله باشلارین اکدی!
– خب محمد سن تعریف ائله؟! نه خبر؟
– من ده هئچ خبر یوخدو، دئدیییم کیمی داها چوخ یازماغا مشغولام. ایش ده آختاریرام ها. بیر ایکی مجلهدن سؤز وئریبلر یازی یازام اونلار، البته آللاه دئین اولسا. اینشاللاه علاقهمه گؤره ده بیر دوز- عمللی ایش تاپارام.
– بابا بیخیال! یازیرام کیلویی چنده؟!!
– اوجور دئمه، منه چوخ مهمدی…
– بابای من پول تهراندا، زندگی تهراندا، سنی ده آپاراجایام، مامان گیلی ده راضی سالمیشام. باور ائلهمیسن فقط بیر سئری گل…او گئجه او قدر دئدی دانیشدی، بئینیمین دیبین قازیب مندن بیر دیل اوجو گلرم جاوابینی آلدی. صاباحیسی گون بیلمیرم کیملرله ایشی وار ایدی آخشاماجان شهرده قالدی، گئجهنی ده یورغون- آرغین قاییدیب، من شام یئمیرم، شهرده بیرزادلار یئمیشم دئییب یاتدی.
او گونون صاباحیسی، گئجه ساعات اونا منله اؤزونه تهرانا گئتمک اوچون بیلیت آلمیشدی بیلمیرم نییه، آما قاییتماغا چوخ تلهسیردی.
گون اورتادان سونرا هامیمیز بیر یئره ییغیشدیق.
ایبو ایله دانیشیب، کئچمیشلریمیزی دیریتدیک. زامان بیزه آمان وئرمهدن توو ایله قاناد چالیب اوچوردو. آخشام ساعات ۸:۳۰ دا آژانس دان تاکسی چاغیریب هامی ایله ساغوللاشیب تئرمینالا گئتدیک.
تئرمینالدا بیر آز اویانا گئت- بویانا گل، ایبو ایسه یولداشلارینا، رئیسلرینه جویز حالواسی ایله اورمو نوغولو آلاندان سونرا اوتوبوسا میندیک.
ساعات ۱۰ اولوب اوتوبوس تهرانا ساری یولا دوشدو. یولدا من بیر آز فیلم ایله مشغول اولدوم قالانین دا مین بیر مصیبت ایله یالاندان یاتدیم.
نوشته شده توسط admin در چهارشنبه, ۰۳ شهریور ۱۳۹۵ ساعت ۷:۲۴ ق.ظ