آنا! جومله‌لریمی آرد- آردا قوشا بیلمیرم سؤزسوز قالیرام
یازان: یاقوت_آسلان‌اووا
حاضیرلایان: شبنم_توحیدی
آنادیلیمیز: آنا حاقیندا نه آز یازیلیب، نه ده چوخ! آنادان نه قدر یازیلسا دا، آزدیر.
چونکی بورجونو، اذیتینی اؤده‌یه بیلمه‌یه‌جه‌ییمیز انسان‌ین حاقیندا یازماق‌لا، عوض اؤده‌نمیر.
ایندییه قدر چوخ ده‌یرلی شخصیت‌لر آنا حاقیندا یازیب. شعر یازان، مقاله یازان، رُمان یازان، ماهنی بَـسته‌له‌ین و باشقا…
سانکی یازا بیلن، یازماق ایسته‌ین هر کس یارادیجیلیغیندان موطلق بو باشلیق‌دا یازی ایسته‌ییر.
منده یازمالی‌یدیم. یازدیم. دوزدور، اولا بیلر کی، گئج اولسون آما سندن یازماق اوچون، آنام اؤزومو حاضیر حیس ائتمه‌لیدیم. اؤزومو ده قلمیمی ده، سؤزومو ده!
کیمی بو یازینی آناسینی چوخ سئودیییندن یازیر، کیمی‌سی آناسی‌نین یوخلوغوندان اینجی‌دیییندن، کیمی‌سی آناسینا اؤزونو بورجلو حیس ائتدیییندن یازیر. من ده سنی ایتیرمک تهلوکه‌سینی یاشایاراق یازماغا باشلادیم.
آنا! یگانه سؤزدور کی، دئدیکدن سونرا ایستر – ایسته‌مز سوسارسان. حیاتین گؤزونون اؤنونده آنی اولاراق جانلانیر.
حیاتینی اونا بورجلو اولدوغونو بیرده آنلاییرسان.
ایسته‌ییرسن وارلی، ایسته‌ییرسن کاسیب گوجلو یا دا، گوجسوز آنانین دوعاسی‌نین صداسی قولاغیندا وارسا، آنانین وارلیغینی حیس ائدیرسن‌سَـه، دئمک سندن گوجلوسو یوخدور.
اوچ حرف اؤزونده نه قدر درین معنانی بیرلشدیریر.
منیم جومله‌لریم چوخ واخت دولاشیق اولور، درین اولور، مرکّـب اولور.
آما سندن یازاندا اوشاق‌لیغیما گئری قاییدیرام ائله بیل. بیلمیرم نییه!
غریبه‌دیر، جومله‌لریمی آرد – آردا قوشا بیلمیرم سؤزسوز قالیرام. سنه لاییق ایفاده، سؤز، جومله – هئچ نه تاپا بیلمیرم.
هر بیریمیز آنالارا قوربان اولاق. آنا بیزه حیات وئریب و بیزیم ده بورجوموزدور کی، بو ابدیتی قیمت‌لندیرک.
بوتون آنالار وار اولسونلار، اؤولادی‌نین یانیندا اولسون. اؤولاد اونون وارلیغینی حیس ائتسین. هئچ بیر اؤولاد آناسیز قالماسین. چونکی آناسیز بیر طرفین همیشه یالان‌دیر.
بیر قولونا نه گئیینیرسن گئیین، آما او بیری قولون همیشه اوشویه‌جک.
اونو هئچ نه ایسیندیرا بیلمه‌یه‌جک، آنا وارلیغین‌دان باشقا. هئچ بیر اؤولاد بو حیاتدا باخ بئله اوشومه‌سین.
یامان پیس اولور. عزیز وارلیغیمیز، ده‌یرلیمیز آنامیز. همیشه اؤزوموزو سنه بورجلو بیلدیم.
اوشاق‌لیقدا حیه‌طده اوینایاندا، حیه‌طدن گول گتیرمک‌له، مکتب‌ده اوخویاندا اعلا قیمت‌لر آلماق‌لا، درس‌ده ساکیت اوتورماق‌لا عالی مکتبه داخیل اولماق‌لا، عالی مکتبی بیتیرمک‌له ایشله‌مک‌له عایله قورماق‌لا… داها دوشونموردوم کی، بونلارین هامیسی‌نی اؤزوم اوچون ائدیرم هر شئیی اؤز گله‌جه‌ییم اوچون ائدیرم.
حیاتدا چوخ ایتکی‌لرین آجیسی زامان‌لا یونگول‌لشیر، آما آنا یوخلوغو اینجی‌دیر.
بو حیاتدا هانسی یاشدا، هانسی وظیفه‌ده هانسی محیط‌ده اولماغیندان آسیلی اولمایاراق، آنا حاققینی، آنا وضعیتینی چالیشاق ایتیرمه‌یک. آنالارین حؤرمتینی، آنا یولونو همیشه ساخلایاق.
آنانین دوعاسینی آل کی، خئییر تاپاسان. آنا دوعاسی، اؤولادا تام باشقادیر.
هئچ بیر آنا اؤولاد ایتکیسی‌نی، هئچ بیر اؤولاد دا آنا ایتکیسی‌نی یاشاماسین. چونکی بو ایتکی دؤزولمز حیس‌دیر. حیاتی‌نین هر آنینی سئودییینی ایتیرمک قورخوسویلا یاشاماق قدر، شکنجه‌لی باشقا حیس یوخدور.
تکجه اؤز آناما دئییل، بوتون آنالارا حؤرمت ائدیرم. بوتون آنالارین آدی دا، اؤزو ده، وارلیغی دا اؤزلدیر. فرقی یوخدور کیمین آناسی‌دیر. اونا حؤرمت ائدیلمه‌لی‌دیر. آنانین ساچینداکی آغ توکون نه قدر درین معناسی وار. او ساچ نییه آغاردی؟! نه واخت آغاردی؟ بیلیریک مـی؟ یوخ!..
آنانین اوزونه باخاندا، داواملی گولمه‌سینی ایسته‌ییرسن. چونکی گولنده، آنا اوشاق کیمی اولور. اینانیلما بیر شئی‌دیر، سانکی بالاجا کؤرپه‌یه چئوریلیر. یاناغینا توخونورسان یوموشاق‌دیر. حیاتدا سنین اوچون اوندان باشقا هئچ نه اولمایاجاقمیش کیمی!
آنا، سنین خئییر – دوعان سانکی، بوتون چتین ایشلری آسان ائدیر. هر دفعه دئییرلر کی بؤیوک‌لرین خئییر – دوعاسینی آل. بلی، آنانین دوعالاری اؤولادی‌نین حیاتیندا چوخ اؤنملی یئر توتور. مکتبـه گئدنده، اوزون یولا چیخاندا امتحان وئرنده، عایله قوراندا، ایشه قبول اولاندا آنامیزین دوعاسینی آلیب گئدیریک. اؤولادا آنانین دوعاسی دا، اؤزو ده، خوش سؤزو ده، پیس سؤزو ده هامیسی گرکلی‌دیر. آنانین زحمتینی یئره ووران، ایتیرن، ده‌یرسیزلشدیرن اؤولاد هئچ واخت ایره‌لی گئدیب، اوغور قازانا بیلمز. بیلیرم والدین‌لر آراسیندا آیری- سئچکی‌لیک ائتمک دوز دئییل.
آما اوشاق‌لیقدا، “آتانی چوخ ایسته‌ییرسن یوخسا آنانی؟” سوالینی تکجه منه وئرمه‌ییبلر. من ده او زامان‌لار بو سوالا “آتامی” جاوابینی وئریردیم. هه، سون ۳ ایله قدر آنام‌دان دا باجیم‌دان دا داها چوخ آتامی ایسته‌ییردیم. لاکین سون ۳ ایلده، هر شئی ده‌ییشدی. و ایندی بو حیاتدا اؤزومدن ده ده‌یرلی، منیم اوچون آنام‌دیر. یاشادیغیم هر گون آنامی ایتیرمک قورخوسویلا کئچیردیییم ساعات‌لاردیر. بو ساعات نه واخت دایاناجاق، نه واختا کیمی داوام ائده‌جک اونو بیلمیرم. آما خسته‌ده اولسا دا، یانیمدا اولماغی منیم اوچون کفایت‌دیر. اساس اودور کی وار مؤوجوددور و منیم یانیمدادیر. آما هر دفعه ائودن چیخاندا دئییرم کی، آللاه سنی قوروسون آنام
اوره‌ییمده ایسه پیچیلداییرام کی، گئری قاییداندا سنی گؤرمک اومودو ایله گئدیرم. اؤولادلارا سؤزوم اودور کی، اونسوز دا نه ائتسه‌نیز، آنا زحمتی‌نین قارشی‌لیغینی وئره بیلمه‌یه‌جکسینیز.
اونا گؤره ده آنایا ناز ائتمک، آنانی اینجیتمک سؤزونو یئره وورماق، حؤرمت‌سیزلیک ائتمک سونرا أن چوخ سیزی اینجیده‌جک. اونا گؤره‌ده سونرادان پیس اولماماق اوچون، پئشمانلیق یاشاماماق اوچون آنا یولونو، حاق یولونو توتان. آنانین بؤیوکلویونو درک ائدن و اونوتمایان اؤولاد اولون کی، گؤردویونوز هر ایشدن خئییر قازانا بیله‌سینیز. عایله‌ده آنا اولمایاندا، او ائوده روزی ده برکت ده بوُل اولمور. آنا اولان ائوین برکتی همیشه وار. والدین‌ین یولونو ساخلایین حؤرمتینی گؤزله‌یین کی، گله‌جکده اؤولادلارینیز سیزین یولونوزو ساخلاییب، آدینیزا و اؤزونوزه حؤرمت ائتسینلر.
Arazazarbaijzn.anadilimiz@gmail.com
نوشته شده توسط admin در شنبه, ۰۹ مرداد ۱۴۰۰ ساعت ۱۱:۲۹ ق.ظ
