نه یاخشی سونمزلر وار بودنیادا

علی صمدی
آنادیلیمیز: چوخ سئویندریجی حالدیر کی بویوک شاعر، یازیچی و ادبیات خادمی استاد کریم مشروطه چی سونمز جنابلارینین ۹۵ یاشلیغینی بویوک توتور و تبریک ائدیریک.
آذربایجان ادبیاتی سماسیندا پارلایان بو سونمز اولدوزا اوزون عمور و تزه باشارلار دیله ییریک.
هابئله چوخ سئویندیریجی و روحلاندیریجی حالدیر کی آذربایجان ادبیات خادملری محدودیت لر و چتین لیک لره باخمیاراق بیر یئره توپلاشیب گوزل تورن قورماقلا قوجامان و اوجامان استاد، کریم مشروطه چی نین بارلی برکتلی یارادیجلیق سوره سیندن تقدیر ائله ییرلر.
سونمز،چاغداش آذربایجان شعری و ادبیاتینین زیروه سینده دایانان لاپ پارلاق اولدوزلاردان بیری دیر. اونو برک ال ایله استاد شهریار و بولوت قارا چورلو سهندین کناریندا آذربایجان چاغداش ادبیاتینین اوچ بینووره سیندن بیری سایماق اولار. سونمزین آخار، درین معنالی، چکیم لی و اورک اوخشایان مصراعلاری حقیقتا اذربایجان ادبی روحونون اینجه لیگی، درین لیگی و عین حالدا گئنیش ظرفیت لرینی اوزونده عکس ائتدیریر:
نه قدر گوزل دیر سئوگی عالمی
هر کسین عشقی وار دئه نه یی یوخدو
اورگین واردیسا سن سئوه جکسن
عشقی اولمایانین اورگی یوخدو
نه قدر گوزل دیر محبت سوزو
محبت سئحر ائدر اورگی، گوزو
منی سئومه ینی سئویرم دوزو
اگر چی الیمین امگی یوخدو
هر کسین عشقی وار دئه نه یی یوخدو
سونمز عین حالدا، آلچاق گویول، قالماقالسیز و ادعاسیز بیر شاعر دی. تاسف لر اولسون کی اونون دولغون و پارلاق ادبی یارادیجیلیغی آذربایجان ادبی نقد سپهرینده اوزونه لایق یئر تاپماییب (هانسی ادبی نقد؟!) بونونلا بئله او بو مسئله نی وئجه آلمایاراق جوشار بیر بولاق کیمی اوز ایشینده دیر، کیم ایچدی کیم کئچدی نین فرقینه وارمادان:
صمیمی باخیشام انسان گوزونده
منی بیر باخیشدا سئچنه منت
بولاغام آخارام بو یئر اوزونده
اییلیب سویومدان ایچنه منت
حیاتا یول آچدیم گرک لر اوچون
مقدس آرزولار دیلک لر اوچون
بیر آزاد کورپویم اورک لر اوچون منت سیز اوستومدن کئچنه منت.
گوزل شاعریمیز سونمزین بیری بیریندن درین و تکرارسیز اثرلری اصیل آذربایجان دیل و فرهنگینی تمثیل ائدرک باکی یا ترکیه دئیشلرینین تاثیرندن اوزاق، آری- آیدین ادبیات اورنک لری آرایا گتیریب:
یارانیشیم بوراخیلسا اوزومه
آی اولمارام او گونش دن پای ایستر
گونش اوللام ائل قیزینار کوزومه
ایشیغیمدان اولدوز ایستر آی ایستر
شیمشک اولمام چاخان کیمی سونر او
ایلک آددیمدا اوز یولوندان دونر او
وجدان اوللام من سوساندا دینر او
هارای چکیب او دا من دن های ایستر. تاسف لو حالدیر کی بارماق سایلاریندان آرتیق اولمایان درگی لر و سایت لاریمیزدادا سونمز و اونا تای شاعرلره لایقینجه یئر وئریلمیر بونا گوره گئنیش اوخوجو کوتله سی اونلاری تانیماقدان و اثرلری ایله ایلگی قورماقدان محروم قالیرلار. ناشرلریمیزین ده تکلیفی معلوم دور هرکس پول وئرسه اثری چاپ اولاجاق آغینا قاراسینا باخمادان. استاد سونمز کیمی شاعرلرین ده اثرلری هابئله. بیر شاعرین شخصی سرمایه سی ایله چاپ اولان اثر هارا چاتار؟ یئری وار آذربایجانین ادبی جامعه سی خصوصا آذربایجانلی ناشرلر درین دن احساس مسئولیت ائله ییب بویوک و قالارقی شاعریمیزین اثرلرینی گوزل ترتیبات و مکمل شکیلده، گئنیش تیراژدا چاپ و نشر ائله سین لر( اونلار گئج یا تئز بو ایشین مادی منفعت لرینی ده گوره جک لر). ائله اولمالی دیر کی آذربایجان شهرلرینین معتبر کتابفروشی لرینده همیشه سونمزین اثرلرینی گورمک اولا( نئجه کی خوشبخت لیک دن استاد شهریارین تورکو اثرلر مجموعه سی ایندی بئله دیر). آیری بیر طرفدن استاد سونمزین دگرلی اثرلرینی آلماق، اونلاری اوخوماق، دوسلار، تانیشلار و ادبیات سئورلره ،هابئله عمومی کتابخانالارا پای وئرمک هر بیر آذربایجانلی اوچون باشلیجا فرهنگی بورج ساییلمالی دیر.
نه ایسه، بو سوزلره گلمز. بویوک، قالارقی و سونمز آذربایجان شاعری، گوزل روحلو، اینجه دویغولو، آخار قلملی، باجاریقلی شاعر و یاخشی انسان، استاد کریم مشروطه چی سونمز جنابلارینا اوزون عمور و داها آرتیق باشارلار دیله ییر حسین عارفین مصراعلارینی بورج آلاراق دئییرم:
نه یاخشی گورلاییر اصلانین سسی
چاققاللار چکردی جار بو دنیا دا
نه یاخشی یاییلیر گونون شعله سی
نه یاخشی »سونمز«لر وار بو دنیادا.