گؤی یئمگی یاددان چیخارتمایین

بیر مودت قاباغا قدر سوفره‌لریمیزدن گؤی اسکیلمزدی. سوفره آچیلاندا بیرنجی اؤزونو گؤرسه‌دن تازا گؤی، کالیش و قیرمیزی تیرپیلا دولا اولان سوماقپالان اولاردی کی سوفره‌نین اورتاسیندا آچیلمیش گوله بنزردی. ایشتهانی آچان گؤیلر کی یئمک هَوَسینی ایکی قات ائلردی، آما ایندی سوفره‌نین بو طراوت سمبولی داها آز گؤروشور. جوربه‌جور آغ، قیرمیزی سوْسلار، موختلیف تورشولار و جوربه‌جور چیپسلر بو طبیعی منظره‌نین یئرین توتوبلار.
ایندی ائله اولوب‌ کی جوان خانیملارین بیر عیدّه‌سی گؤیلرین خاصیّتلرین بیلمیرلر و حتی اونلارین بعضی‌سین تانیمیرلار. بونا خاطیر پیس اولماز گؤیلرین بعضی‌سی و اونلارین خاصیتلری‌ایله تانیش اولاق و بو ایطیلاعاتی اؤزوموزدن سونراکی نسله اینتیقال وئرک.
سوزو؛ قانین کولسترول و فیشارین آزالدار
بو گؤیون سغه‌سی یوخدور و غذایی جهتدن ساریمساق و سوغانا بنزیر، آما دادی و ایگی داها یوموشاق اولور. ایکی جور سوزو وار؛ بیری‌نین یارپاقلاری قیسا و نازیک اولور و معمولاً یازدا و یایدا چیخار، بیری‌ده فیرنگی سوزودور کی یارپاقلاری ائنلی، اوجا و قارت اولور و سوغانی‌دا بللی اولور.
سوزودا یوخاری میقداردا پوتاسیوم اولدوغو اوچون سودوک گتیریجی اولور و بدنین زهرلرین و قانین فیشارین و پیس کولسترولون آزالدار. اوندا اولان منیَزیوم، پروستات و باغیرساق سرطانین قاباغین آلار و غذایلا بیرلیکده یئییلسه سوءهاضیمه‌نی درمان ائلر و معده‌نین آجیشماسین آزالدیب خوشکیّت و بَواسیری توختالدار.
هابئله دالاق ناخوشلوقلارینی آردان آپاریب مفصل آغریلارینا فایدالیدیر. هابئله جینسی مئیلی چوخالدار. سوزو قارنی یئللندیرر و بونا خاطیر هر نه قدر جوان و تازا اولسا داها راحات هضم اولار و اونون فایدالی مادّه‌لری بدنه جذب اولار.
تیرپ سرطان سلّول‌لاریله ساواشار
تیرپین ائنلی و توکلو یارپاقلاری اولار. اوچ جوره قیرمیزی، قارا و آغ تیرپیمیز وار. تیرپین خاصیّتی ایستیدیر و بیر آز یئللندریجیدیر. تیرپدا گوگیرد وار کی اونا ضید‌عوفونی خاصیتی وئریب. هابئله تیرپ یاخجی ایشتها آچاندیر.
اوندا اولان چوخلو میقداردا C ویتامینی آغیز ناخوشلوقلارین درمان ائلر و دیشلرین چورومه‌سی‌نین قاباغین آلار. بو ویتامین تیرپین یارپاغیندا داها چوخ اولار و غذا ایله بیرلیکده یئییلسه، دمیرین جذبینه کؤمک ائدر.
تحقیقلره گؤره تیرپ سرطانلی سلول‌لاری آرادان آپاریر و شیمی درمانی‌نین عواریضین توخدالدیر. هابئله اونداکی یود، گواترا موبتلا اولان ناخوشلارا فایدالیدیر و بدنین مادّه موبادیله‌سینی و قانین دولانماسین تنظیم ائلیر و صفرا کیسه‌سی و بؤیرک داشینا فایدالیدیر.
رئیحان؛ آغری کسیجی و یوخو گتیرن
رئیحان چوخ عطیرلیدیر. خوشکیت و تشنوج ضیدی و عصبی باش آغریسی و باش گیجللنمه‌نین درمانی. آغری کسیجی مادّه‌لرینه گؤره ایضطیرابدان عمله گلن یوخوسوزلوقلاری درمان ائلر و یاخجی موسکّین ساییلیر.
رئیحان آنالارین سودون چوخالدار و بؤیرک ایلتهابی اوچون فایدالیدیر. بو گؤی قارنی یئللندیرمز و معده‌نین ایسپاسملارین آرادان آپارار.
شاهی، بؤیرکلرین موحرّیکی
شاهی‌نین طبیعتی مؤعتدیلدیر. A و C ویتامینلر اونو گوجلو آنتی‌اوکسیدانا چئویریب و بدنین ضررلی رادیکاللارین دفعینه کؤمک ائدر. هابئله قانین قندین آزالدار و گوندن عمله گلن دری سپمه‌لرینی آرادان آپارار.
شاهی قانین یاغ و پیس کولسترولون آزالدار و اونو بوخارلانان یاغلاری آسم، بونشیت و موزمین اؤسکورمگه درماندیر.
بو گؤیده کی مادّه‌لر بؤیرَکلرین فعالیّتین تحریک ائلر و مثانه، بؤیرک و صفرا کیسه‌سی داشلارینی آرادان آپارار و مفصل آغریلاری و نقرسه چوخ فایدالیدیر.
جعفری؛ قان دوزلدن و قایدایا سالان
جعفری‌ دولودور ویتامین، معدنی املاح، دمیر کلسیوم و فوسفورلا. آیلیق عادتی تنظیم ائله‌ییب قانی دورولدار و هابئله باغیرساقلاری ضید عفونی ائلر.
جعفری‌ده دمیرین چوخلوغونا گؤره اونو گونده‌لیک یئمگی قانسیزلارا و روشدلری ضعیف اولان اوشاقلارا توصیه اولور.
جعفری قارین یئلین آرادان آپارا و قارین آغریسین توختالدار. بو گؤی قارا جیگر، تنگی نفس ناخوشلوقلاری و تئز یائسه اولماق علامتلرین آرادان آپارار و اونو چئینه‌مک آغیزین پیس ایین و معده‌نین قیجدیرما گازلارین آرادان آپارار.
ترخون، دوزون موناسیب جانیشینی
ترخونون توند و بیر آز آجی عطری وار. یئمه‌لی گؤیون ایچینده نئچه تئل ترخون ایشتهانی آچار و آغیزی عطیرلندیرر.
اونون توند اییی دری‌نین میکروبلارین کونترول ائلر و بدنین پیس ایین آزالدار. ترخونداکی توند ائسانس اونو دوز یئرینه ایشلنمه‌سینه ایمکان وئریر و اونو غذا ایله بیرلیکده یئمک، قلبی ناخوشلارا و قان فیشارلاری اولانلارا یا دوزسوز غذایی رژیملری اولانلارا توصیه اولور. ترخون اعصابی گوجلندیرر و یاغلی یئمکلرین هضمینه کؤمک ائدر و بیر مولاییم آغری‌کسیجیدیر. ترخون یاخجی زهر آلاندیر و دردلری تسکین وئرر و آیلیق عادتی‌نین موشکوللرین دفع ائلر. بو گؤی بدنین دیفاع گوجون چوخالدار و ویروسی ناخوشلوقلارین شدّتین آزالدار.
گشنیش؛ قانین قندین آزالدار
گشنیشین طبیعتی سویوقدور و خوشا گلیم ایی یوخدور. چینلی‌لر بو گؤیه چینلی جعفری دئییرلر. گشنیش قانین فیشارین و قندین آزالدار، اورک بولانما و سوسوزلوغا فایدالیدیر و یاخجی آغری‌کسیجیدیر. معده، بئیین و اورگی تقویت ائلر. ضیدی ایسپاسم، ترله‌دن و ایشتها گتیرندیر و قارا جیگر و دالاغین لاب یاخجی درمانیدیر.
بو گؤی، طبیعتی ایستی اولان یئماقلاردان عمله گلن جوشلاری آرادان آپارار و جینسی مئیلی مولاییم ائلر. اونون چوخ یئییلمه‌سی یوخونو پریشان و آیلیق عادتین نامونظم ائلر. و اینسانی گیجللندیریب درین یوخویا آپارار.