صمد بهرنگی ۳۱ آوقوست ۱۹۶۸-جی ایل (۲۹ یاشیندا)
قیزبوغان داشین جیریغینا گیریب الینده بیر قیلینج قاییتدی. قاراجا بالیق قیلینجی آلیب دئدی: سئویملی قیزبوغان سیز چوخ مهربانسینیز. بیلمیرم سیزه نئجه تشکر ائدیم. قیزبوغان دئدی: تشکره گرک یوخ. منیم چوخ قیلینجیم وار. ایشیم اولمادیغیندا اوتوروب بیتکی‌لرین تیکانلاریندان قیلینج دوزلدیرم و سنین کیمی بیلگین، قورخماز بالیقلارا هدیه وئریرم. قاراجا بالیق دئدی: مندن اؤنجه ده دنیز آختاریشیندا اولان بالیقلار بوردان کئچیبلر می؟ قیزبوغان دئدی: چوووخ، چوخلاری بوردان گلیب کئچیبلر. آرتیق اونلار بؤیوک دسته‌یه چئوریلمیش بالیقچی‌لاری بئزدیرمیشلر. قاراجا بالیق دئدی: باغیشلایین، سؤز سؤزو گتیریر. اونلارین بالیقچی‌لاری نئجه بئزدیرمه‌لری حاقدا مومکونسه بیر آز گئنیش بیلگی وئرین. قیزبوغان دئدی: اونلار او قدر چوخالمیشلار کی بالیقچی‌لار بالیق توتماق اوچون دنیزه تور آتاندا تورو دارتیب بالیقچی‌لارین اللریندن چیخاریب و دنیزین دیبینه آپاریرلار. قیزبوغان قولاغینی داشین دلیگینه سؤیکه‌ییب دقتله قولاق آسماغا باشلادی. سونرا دا قاراجا بالیغا دئدی: من آرتیق گئتمه‌لییم. چوجوقلاریم یوخودان اویانمیشلار. سنه اوغورلار دیله¬ییرم. قیزبوغان داشین دلیگینه گیردیکدن سونرا قاراجا بالیق یولونا داوام ائتدی. یولا دوشدوکدن سونرا یوزلرجه جاوابسیز سؤاللار بئینینی سارمیشدی. اؤز-اؤزونه سوروشوردو: دوغرودانمی آرخ دنیزه تؤکولور یوخسا منیم اویدورمام‌دیر؟ بالیق اودان قوشون گوجو منه چاتارمی؟ آنجاق من کی اونا هئچ پیس‌لیک ائتمه¬میشم، بیزیم کی آرامیزدا هئچ بیر دوشمن‌لیک یوخدور، نه¬دن منی یئمک ایسته‌سین؟ قاراجا بالیق فیکیرلره، خیاللارا دالغینجاسینا گئدیردی. یولچولوغونون هر آشاماسیندا یئنی‌لیک‌لرله راستلانیر، یئنی شئی‌لر اؤیرنیردی. هوندور چاغلایانلارین (شلاله‌لرین) باشیندان دونبالاق آشا‌راق دره‌یه توللانماقدان لذت آلیردی. گونشین ایستی‌سی آرخاسینی ایسیدیردی. قاراجا بالیق یاشامینداکی بوتون بو اولایلاردان ذوق آلیردی. بیر جیرانا راستلاندی. جیران تله‌سه-تله‌سه سو ایچیردی. قاراجا بالیق سئوینرک دئدی: گؤزل جیران، نیه بئله تلسیرسن؟ جیران دئدی: اووچو آرخامجا‌دیر. بالدیریما بیر باخ. گولـله دگمیش. قاراجا بالیق گولـله یاراسینی گؤره بیلمه‌دی، آنجاق جیرانین آخسایا‌راق قاچماسیندان آنلادی کی، دوغرو سؤیله¬ییر. بیر یئرده باغا‌لارین قیزمار گونشین آلتیندا مورگوله¬مه‌لرینی گؤردو. باشقا بیر یئرده ایسه ککلیک‌لرین هوسله، سئوگی ایله ماهنی سؤیله-مه‌لرینه تانیق (شاهد) اولدو. داغلاری بوروموش چیچک‌لرین قوخوسو هاوادا دالغا‌لانا‌راق سویا قاریشیردی. گون اورتا‌دان سونرا دره‌نین ائله بیر یئرینه چاتدی کی، آرخ بیر اورمانین اورتاسیندان کئچیردی. سو او قدر چوخالمیشدی کی، قاراجا بالیق گئرچکدن ده بو قدر بول سویون ایچینده اولماقدان لذت آلیردی. بیر آز داها گئتدیکدن سونرا بیر سورو بالیغا راستلاندی. آناسیندان آیریلدیغی گوندن بالیق گؤرمه¬میشدی. بیر نئچه کیچیک بالیق قاراجا بالیغا یاخینلاشا‌راق دئدیلر: سانکی غریبسن دگیلمی؟ قاراجا بالیق دئدی: هه غریبم. اوزاقدان، چوووخ اوزاقلاردان گلیرم. کیچیک بالیقلار سوردولار: هارا گئتمک ایسته¬ییرسن؟ قاراجا بالیق دئدی: آرخین سونونو تاپماغا گئدیرم. کیچیک بالیقلار دئدیلر: هانسی آرخین؟ قاراجا بالیق دئدی: ایچینده اوزدوگوموز بو آرخین سونونو آراماغا، آختارماغا گئدیرم. کیچیک بالیقلار دئدیلر: بو آرخ دگیل کی، بیز بونا چای دئییریک. قاراجا بالیق بیر شئی سؤیله¬مه‌دن سوسقونجا دوردو. کیچیک بالیقلاردان بیریسی دئدی: هئچ بیلیرسن می بالیق اودان قوش او طرفلره گئدن بالیقلاری اوولاییر؟ قاراجا بالیق دئدی: هه، بیلیرم. کیچیک بالیقلاردان بیر باشقاسی سؤیله‌دی: بالیق اودان قوشون چوخ بؤیوک بیر کیسه‌سینین وار اولدوغونو دا بیلیرسنمی؟ قاراجا بالیق دئدی: بونو دا بیلیرم.کیچیک بالیق سوردو: بوتون بونلاری بیلرک یئنه ده گئتمک می ایسته¬ییرسن؟قاراجا بالیق دئدی: هه، نئجه اولورسا-اولسون گئتمه‌لییم. بالیقلارین آراسیندا پیچی-پیچی صحبت‌لر باشلادی کی، قاراجا بالیق چوخ اوزاقلاردان یولا دوشوب گلمیش و چایین سونونو آراییب تاپماق ایسته¬ییر. بالیق اودان قوشدان دا قورخمور! کیچیک بالیقلاردان بیر نئچه‌سی قاراجا بالیغا قاتیلیب گئتمک خیالینا دوشدولر. آنجاق بؤیوکلرینین قورخوسوندان سس‌لرینی چیخارا بیلمه‌دیلر. بیر نئچه‌سی ده سؤیله‌دی: بالیق اودان قوش اولماسایدی سنینله گلردیک. بیز بالیق اودان قوشدان قورخوروق.
چایین کناریندا بیر کند وار ایدی. کندین قادینلاری و قیزلاری چایدا پالتار یویوردولار. قاراجا بالیق بیر سوره پالتار یویان قیزلارین ماهنی‌لارینی دینله‌دی. بیر سوره ده چایدا چیمن اوشاقلارا تاماشا ائتدیکدن سونرا یولچولوغونا داوام ائتدی. گئتدی… گئتدی… گئتدی… بیر داها گئتدی. آرتیق گئجه اولموشدو. بیر داشین آلتینا سیغینیب یاتدی. گئجه یاریسی یوخودان اویاندی. گؤردو آی سویون ایچینه دوشموش و هر یئری ایشیقلاندیرمیشدیر. قاراجا بالیق آیی چوخ سئویردی.
نوشته شده توسط admin در یکشنبه, ۰۷ اردیبهشت ۱۳۹۳ ساعت ۳:۵۲ ق.ظ
