های هارای گونلریمیز
حاضیرلایان:اکبرسعادت
های ائشیتمیش قولاغیم ائل هارایین من تانیرام
هایینا های وئره رم من بو ائلین قوربانییام
آنادیلیمیز: آذربایجان خالقی‌نین ایران تاریخینده قویدوغو قهرمانلیق ایزلری خالقلارین یادداشیندان پوزولماز ایزلر اولوبدور. آذربایجانین کئچمیش یوزایللیک ایران سیاسی، اجتماعی تاریخینده اونودولماز رولو اولوب و بیر سیرا تاریخی حادثه‌لرده اوینادیغی رول اعتباریله بوتون شرق اولکه‌لرینه اورنک کیمی اوزون تانیتدیریبدیر.
اورمونون گئجه لری اونون اوچون چوخ گوزل ایدی . ائله اوشاقلیقدان بو گونه کیمی گونش باتماسینی سئویب هر دفعه اونا باخماغا ائولرینین دامینا چیخاردی . بو سون زامانلار گون باتماسینا باخماغا واختی دا چوخ ایدی . آخی بو شولوق ها شولوق دا کیم گلیب دووار قیراغیندا اوتوران بالاجا بیر اوغلاندان باشماقلارین واکس ائله مه یین ایسته یه جک ؟ حاج سلامتی ده نئچه گون قاباق منبر باشیندا دانیشیب جاوانلاردان ایسته میشدی کی میلته قوشولوب و تظاهراتدا شیرکت ائتسینلر. نئچه گون ایدی کی ملتین های ـ هارایی ، آمبولانس لارین اورک قیران آژیری هابئله آرا سیرا آتیلان گولـله لرین نریلتی سی هامینی انقلابین باشلاماسینا ایناندیرمیشدی . چوخلاری اینانماسایدیلاردا آنجاق گونده بیر نئچه گنج اوغلانین شکیللرین دووار دا گورنده داها دئمه یه هئچ بیر سوزلری قالمیردی .
دوغروداندا انقلاب اوزون هامییا ثبوت ائله ییب یئر ـ گویو بیر ـ بیرینه قاتیردی . آیدینین ۱۵ یاشی اولسایدی دا آنجاق بو گونه کیمی اوز تای توشلاری کیمی اویناماغا باش قاتمامیشدی . آتاسی آللاهین رحمتینه گئدندن ، او اوزو ایشله ییب آناسی و باجیسین ساخلاییردی . آتاسیندان یادگار قالان یاشیل کت آیدینی او یاشیندان داهادا یوخاری گوستریردی . هر گون سحر گجیل قاپیسیندا اوزونه بیر یئر تاپیب ، دوزتدییی قوتونون آرخاسیندا اوتوراردی . قوتونون ایچینده نئچه دانا باشماق رنگی ، فیرچا هابئله دستمال قویموشدو . آخشاما قدر اورادان کئچن کیشی لرین و مسافرلرین باشماقلارینی واکس لاییب ایکی اوچ تومن قازانیب ائولرینه ساری یوللاناردی . بعضاً ده یولونون اوسته یوغورد چورک یادا باشقا زادلار آلیب ائوه آپاراردی .
آنجاق آیدین داها نئچه گون ایدی ایشه گئتمیردی . نئچه جاوان اوغلانلا مسجد ده بویوک مقوالار اوسته شعار یازیب تظاهراتا حاضیرلاییردی . بعضاً ده بیر گالن الینه آلیب اورادان ـ بورادان بنزین ییغیب کوکتول موتولوف دوزلدیردی .حاج میر سلیم اونا چوخ تاثیر قویموشدو . آیدین اونون سوزلرینی چوخ سئویردی . هر گون دامدا گونون باتماسینا باخا باخا حاج میرسلیمین ده مسجدین بلندگوسوندان یایینلانان احساسلی سسینی ائشیدیب آرتیق جوشوردو . آناسی اوغلونون تظاهراتدا اولماسیندان نگران اولسایدی دا آنجاق اورییین تکینده اونا فخر ائدیردی . داها دوغروسو اوز کیشی سینین اییینی آیدین دان آلیردی . آیدین دوغرودان دا بیر کیشی ایدی .
بیر ائوی اوزو تک باشینا دولاندیریردی . سون زامانلار باجیسینین آلتی یاشی دا بیتدی . بو آیدین اوچون هم چوخ سئوینمه لی ایدی ، همده کدرلی . سئوینمه لی بونا گوره کی باجیسی بویویور کدرلی ده بونا گوره کی او بو ایل مدرسه یه گئتمه لی ایدی . اونون آدینی مدرسه یه یازدیرماغا پول لازیم ایدی . آنجاق آیدین آناسی و باجیسینین یانیندا اوزونو سیندیرماییردی . اونلارا سوز وئرمیشدی کی هر هاردان اولموش اولسا باجیسینی بو ایل مدرسه یه یازدیراجاق . آناسی آیدین دان آرتیق نگران ایدی . ایسته ییردی قولوندا کی بیلزیکلرین ساتسین بلکه بیر پول دوزلده بیلسین . آنجاق آیدینین غیرت و غرورونون سینماق قورخوسوندان هئچ سسین چیخارتمیردی .اورمو چوخ قاریشمیشدی . بیر یاندان انقلابچی لار ، او بیری یاندان دا شاه دان دفاع ائله ین سربازلار . هامی دیمیشدی بیر بیرینه . ملت دایانمادان قاباغا گئدیردی و سربازلاردا ملتی گولـله یه باغلاییردیلار . آرادا بعضی لری بیریسینی اللرینی اوستده آمبولانس لارا ساری قاچیردیردیلار . » الله اکبر « سوزو میلتین دیلیندن دوشموردو . بو ملت آرتیق جوشموشدو . اونو سوندورمک اولموردو . بونو شاه دا بیلیردی ، اونون نوکرلری ده . آما اوزه قالان آداملار کیمی یالنیز دفاع ائله مه یه اوز گتیرمیشدیلر . قاباقلاریندا دورانی اولدوروردولر . شاه یامان تخت ـ تاجیندان نگران اولموشدو . ملت بونلاری گوردوکجه سئوینیب داهادا گوجلنیردی . آیدین بیر آن دا ملتدن اوزاق دوشموردو . هامی اونون قورخمازلیغینا هابئله جسارتینه حئیران قالیردیلار .
نئچه دفعه لر اولموشدو کی الینده بیر کوکتول موتولوف شاهین سربازلارینا ساری قاچیب اونو اونلارا ساری توللامیشدی . هئچ ندن قورخموردو . بو جسارتی اوز آتاسیندان یادگار ساخلامیشدی . ژاندارمالار هئچ زامان آیدینی توتا بیلمه میشدیلر . ایکی دفعه ده اونون آرخاسیجا گولـله آتیب اونو یارالاماق ایسته میشدیلر کی آللاهین لطفی ایله اونا هئچ نه اولمامیشدی .آیدین هئچ های ـ کوی سالیب شعار وئرمه دن جانینی الینه آلیب ملت له برابر تظاهرات لاردا شرکت ائدیردی . هر زامان حاج میر سلیمین سوزلری قولاغیندا ایدی . او دئییردی آللاه و ملت یولوندا چالیشان کسلر دونیانین ان سعادتلی آداملاریدیلار .آیدین هر گوندن آرتیق هیجانلی ایدی . سحر بویوک بیر تظاهرات بازار آغزیندا باشلاناجاق ایدی . آخشام نامازینی مسجدده قیلیب ، حاج میر سلیمین سوزلرینه قولاق یاتیردمیشدی . بو آخشام هر گونلر کیمی گونشین باتماسینی گوره بیلمه میشدی . ائوه قاییداندا داها هاوا قاپ ـ قارانلیق اولموشدو . باشینا مینلرجه فیکیر گلیردی . مدرسه لرین باشلانماسینا نئچه گون دن آرتیق قالمامیشدی . آما او هله باجیسینین آدینی مدرسه یه یازدیرانمامیشدی . بیر طرف دن ده ایش یوخ ایدی . پول قازانماق اولموردو . بو گونلر آیدین و اونون عائیله سینه چوخ چتین گونلر ساییلیردی . نئچه بانکین شوشه لرینی سیندیریب پوللارینی کوچه یه تؤکوب اودلاسایدیلار آنجاق آیدین او پولارا هئچ فیکیرده وئرمه میشدی .
آیدینین فیکری او قدر قاریشیق ایدی کی ، هئچ زامانین کئچمه سیندن خبری یوخ ایدی . آناسی نین سسی اونو اوزونه گتیریب ساعاتی اونا آنلاتدی . یاتمالی ایدی . سحر تئز دوراجاقدی .
سحر اذانینین سسی آیدینی یوخودان اویاتدی . نئچه آیلار انتظارینی چکدییی گون آخیر کی گلیب چاتدی . یامان اضطرابلی ایدی . اما یوبانمادان آیاغا قالخیب دست ناماز آلیب پالتارلارینی اینینه گئیدی . آناسی و باجیسی هله یوخودایدیلار . آستاجا اونلارا یاخینلاشیب آناسینین اوزوندن اوپدو . سونرا دا باجیسینین اوستون چکیب ، بالاجا بارماقلاری ایله اونون تئللرینی سیرغالادی . اوره یینده باجیسییلا نئچه کلمه دانیشدی : » باغیشلا ، سنی هله مدرسه یه یازدیرا بیلمه میشم . آما قوی بو آخشام تظاهرات دان قاییدیم هایاندان اولموش اولسا بیر بورج تاپارام . بلکه ده حاج میرسلیم منه یاردیم ائتدی . او درس اوخوماغی سئور … « .
گون آستا ـ آستا اوزونو گوستریردی . داها گئتمک واختی ایدی . باجیسینین آلنیندان اوپوب آیاغا قالخدی . قاپینین آغزینا یئتیشنده بیر داها دا دالی یا دونوب آناسی و باجیسینا باختی . سونرا آستاجا قاپینی آچیب کوچه یه سوزولدو . بوروق ـ بوروق کوچه لردن اوتوشوب اوزونو بازار آغزینا چاتدیردی . بیر آز آختاراندان سونرا اوز یولداشلارین بیر گوشه ده تاپدی . او یانا ساری گئدیب اونلارا قوشولدو . یاواش یاواش میلتین های ـ هارایی قالخیردی . آیدین دا اوز یولداشلاری ایله میلته قوشولوب شعار وئره وئره یولا دوشدولر . سربازلار هر زامان کی کیمی ماشینلارینین دالیسیندا سنگر توتوب مسلسللرین اوجونو میلته ساری دوتموشدولار .
نوشته شده توسط admin در شنبه, ۰۳ بهمن ۱۳۹۴ ساعت ۸:۰۹ ق.ظ
