آشيق بشير

شهید آشیق

یازان: دوکتور مرتضی مجدفر
دولایدا کهلیک قوودوم
داغدا یئملیکدن دویدوم
منه بول روزی وئرن
تورپاغا نشان قویدوم
(خلق بایاتیلاریندان)
کؤنلومون قوشو قانادلاناراق جبهه یه دوغرو یوللاندی و آزادلیغی قورویان دؤیوشچولرین دؤیوشلرینه ناظر اولدو. دئمک، آزادلیغی قوروماق اونو فتح کیمی مقدش ایمیش.
بورادا بوتون ائللر ییغیشمیشلار. بورا ائللر قورولتایی دیر. ان بؤیوک آخینلاردان بیری باشلانمادادیر. دؤیوشچولرین گونش تک پارلایان اوزلرینده سئوینج دویغولاری دویولور.
قودوز یاغی لارا ظفر چالماق اومودو ایله آخینا باشلاییرلار. اللر بیر، دیللر بیر، اوره کلر بیر، قدملر بیردیر.
آذربایجانلی گنج عسگر آشیق ایسه صفین قاباغیندا، الینده سلاح، محکم و متین آددیملارلا ایره لی له ییر. اونون گوجلو اراده سی و سارسیلمایان ایمانی بیر چوخ دؤیوشچولره دایاق اولموشدور.
آخین باشلانیبدیر. اودلو دؤیوش دایانمادان دوام ائدیر. گنج آشیق شنلیکله دوشمنلر اوستونه آتش آچیر و سلاحینی یا همان قوپوزونو سیخاراق بو ماهنی نی اوخویوردو:
حاققین باطل ایله دوشوب داواسی
بویانماغا قیزیل قانه گئدیرم
مجنونام، سریمده لیلی هاواسی
بلکه یئتم او جانانه گئدیرم
***
کؤنلوم قوشو داها اوچوب یووادان
سیزده منی اونوتمایین بورادان
اوزولسه ده الیم فانی دونیادان
بیر غواصام من عمانه گئدیرم
***
آشیق بشیر قورخماز بیر داملا قاندان
آلیبدیر مطلبین صاحب زاماندان
حق یولوندا کئچیب باش ایله جاندان
سیغینمیشام، او سبحانه گئدیرم
گنج آشیغین هیجانلی آتش آچماسی و اویان بویانا قاچماسی، هامینی حیرته آپارمیش، دؤیوش ماراقلاندیرمیشدیر. بیر چوخ اشغال اولونموش یئرلر ایسه دوشمنین الیندن، آلینمیشدیر.
یاناقلاری قیزاران گنج آشیغین سسی، بیر آن بوتون آزاد اولونموش چؤللری بورودو:
-آی قارداشلاریم، آلوولاندیم!
او بو سؤزلری قیشقیراراق، وار گوجونو گونشین ضیاسی آلتیندا بئجریلن تونج بیلکلرینه ییغاراق، تورپاقلاری قالدیرماغا، یئرین باغرینی سؤکمگه باشلادی. ائله بیل کی، بو شاد خبری، او یئر اوزونده یاشایان بوتون انسانلارا و دونیانین هر بیر گوشه سینه چاتدیرماق ایسته ییردی!
-قارا بختلر دفن اولمالیدیر، سعادت گلیر…
آزادلیغی قوروماق، اونو فتح ائتمک کیمی مقدس دیر… آشیق دیلین وار اولسون! ائلین وار اولسون! آدین دیری قالسین!
*آشیق بشیر یا خود ((رشید شهریوری)) تبریز شهری نین یاخینلیغیندا یئرلشن میاردان کندینده آنادان اولموشدور.
بویا-باشا چاتیب، عائله قوروب، اوچ اوشاق دده سی اولدوغو حالدا آشیقلیق صنعتینی ده اؤیره نمیشدیر.
او ۱۳۶۰ جی ایلین آذر آییندا، ((بستان))دا، شهید اولموشدور. بو یازی، او آشیغین شهید اولان گونلرینده یازیلمیشدیر.