تانری آددیملایان گونش
اکبر سعادت
آنا دیلیمیز :آخشام باشیلار الیمده کی آغاجنان، قاباقیمدا کی اینه گین بئلینه وئریب قیشقیریردیم. بیلمه ییردیم منیم سسیمدیر اونلاری قاباقا سورن یا کی وئرولماقین قورخوسو بلکه ده اینه ک لر اؤزلری مندن ده یورقونیدیلار و قدملرینی سانییردیلار ائوه چاتیب دینله نه لر دیه. آخشام باشیلار. الیمده کی آغاجنان قاباقیمدا کی اینه گین بئله نه وئریب قیشقیریردیم. بؤریمده کی قولاقی کئسیک کوچوک، باشین سالیب آشاغیا یورقون یورقون اله گئدیر دی کی اله بیل هئچ دونیا خیالینا دئیر. آرادا بیر دایانیب اویان بویانا باخاندان سونرا گئنه ده باشین ساللاییردی آشاغیا، بئلکه ده اوتانیردی اینه کین یاشلارینی گؤرمه کدن.
الیمده کی آغاجی هر سئری وئریب قیشقیریردیم آخشام باشیلار کندین دوزین چیخاندا یوخاریا و بیلیردیم کی قولاقی کئسیک کوچوک و قاباقیمدا کی اینک ده بیلیر نه دن قیشقیریرام آمما بئلکه اؤز اوزلرینه گئتیرمیر لر. بئلکه ده گئتیریرلر آمما من باشا دوشمورم.
آخشام باشیدی. کندین دوزین چیخیردیم. اینه ک گؤزه لییردی قیشقیرتیلاریمدا کی ووروشو و کوچوک باشینی آشاغیا سالمیشدی. الیمده کی آغاج یئره سوروتله نیر دی و سئس وئریردی سورونین ایاقینین آلیندان قاچان داشلارا. منده باشیمی آشاغیا سالیب قابایمدا گئدن اینه کین قویروقینا گؤز تیکمیشدیم دوزی چیخا چیخا. بویوک ماوی قاپیمیزین قاباقیندا سوشوب کندین خیابانینا گیریب دالداکی تاختا قاپیمیزی آرالایب سورونو سالیب طوله یه قاپیسین باغلادیم. هاوا بو گونلر تئز قارنلیقلاییردی. طوله نین قاپیسینین آغزیندا دایانیب ایکی ائوین آراسیندا کی بویوک توت آغاجینا گؤز تیکدیم. یارپاقلارینی سارالدیب توکمیشیدی ایاقینین آلتینا آمما بیر نئچه یارپاق ائله یاپیشمیشدیلار آغاجین قانادلارینا،اله بیل یاشام بورجلارینی آغاجدان ایسته ییردیلر. گونون کؤزه رن ایشیقینین آلتیندا او جان سیز یارپاقلار، آغاجین آنا داماریندان یاپیشیب قانین سوموروردیلار. توت آغاجینین قانین سوران ساری یارپاق لار.
او ساری قیرمیزی گونون آلتیندا آغام دوغرادیقی اوتلاری گؤتوروب یئر به یئر اله ییندن سونرا، ایاقلاریما سو توتوب ائوه گیردیم. ننه مین شورباسی پوققیلداییردی پیله ته نین اوستونده، ایسیندن بیلدیم. آلا قارنلیق ائوده، بویوک اتاقین اورتاسیندا بیر ساری لامپ کؤزه ریردی، ائله بیل پاییز گونشینین بیر تیکه سینی گئتیریب ائوه اورتاسیندان آسلایب سان، اینجیدیردی بو ایشیق منی. دهلیزین قاپیسیندان کئچدیم ننه مین بورینه بالاجا اتاقدا. تک اوتورموشدی اوردا، شورباسینین دادینا باخیب، گون ایشلریندن یورقون، مورگوله ییردی آرادا. سالام وئریب اوتوردوم. بؤرینده کی سماورین اوستوندن چاینیکین گؤتوروب قارا بیر چایی ایستیکانین یاریسیناجاق بوشالتدی. اللری تیتره ییردی سماوردن سو آلاندا چایین اوستونه. ” هاردادیلار” سوراندان سونرا، قندی آغزیما قویوب دیل دوداقیمی یاندیران چایی هورتیلدادا هورتیلدادا ایچدیم. ” آغان قئفه ده، قیزلار دا علویه نین یانیندا دیلار، چیچک بی بین گیلده “. دینمه دیم.
باشیمی آق آستارلی قیرمیزی یاستیقین اوستوندن قوزادیم ننه مین سسینن. قیزلار گئلمیشدیلر، آغامدا. بویوک اتاقدا کؤزه رن ایشیقین آلتیندا سئفرانی سئرندن سونرا ننه م هرکسین پایینی چکیب قویدو قاباقینا، ” منه آز چئک دئدیم”. کاسانی گؤتوروب قویدوم ننه مین قاباقینا. گؤز آلتی باخیب منه دئدی ” خیر اولا ؟؟ “. دینمه دیم. آغام میس قازانی قاباقینا چئکه چئکه دئدی ” گئجه ایکی-ده سو نوبامیزدی، یادوندان کی چیخماییب؟ ” باشیمنان جوابلادیم کی ” یوخ “. دئدی ” کاظیم تیراختورنان گئله جک دالیمیزجان “. اتلری سومیکدن آیریب دووندن سونرا، ننم گینه هرکسین پاین چکنده دئدیم کی ” من یئمیرم “. کئچیب بالاجا اتاقدان قئرمزی بالینجی گؤتوروب گیردیم بالاخانایا.ساعات سککیز دؤزه سی اولاردی هله. اوزانمیشدیم. قارداشلاریم ائوله نندن سونرا من بالاخانادا تک یاتیردیم. قیزلار بؤیوک اتاقدا و آغامنان ننه من ده بالاجا اتاقدا یاتیردیلار. بالاجا اتاق ننه مین ساغ الیدی. اتاقین بیر طرفینده یاریم مترلیک سَکی واریدی.سَکسنین آلتینا توردان پرده وئریب قوناق قابلارین اورا ییغمیشدی. سَکینین اوستینه سه، یورقان دوشه ک لرین. اتاقدان بیر کوشه سیینده، پنجره نین آلتینا، سماوارین و بئش آلتی ایستیکانین قویموشدو.ایکی دوشه جه سئریب بیر بویوک جئجیم پشتی نی دایامیشدی دیوارا. ار آرواد اوردا اوتوراردیلار. آغام همیشه بیزلری یوخو توتاندان سونرا، پنجره نی آچیب سیگارین آلیشدیریب قبرستانلیقین بؤرینده کی تپه یه باخاردی. بیر نئچه دفعه گئجه لر سودان گلنده آغامی اوجور گؤرمیشدیم. اوزاقدان، آغامین بئغینین آلتیندان قاچان توستولر، گؤزه بیر ناخیش باغیشلاییردی قارانلیقدا ساچیلان یالانچی ایشیقلارین اوزونه. ننه م ده اله راحات یاتاردی کی، باخان دیئردی گؤره سن هانسی پادیشاهین قیزی دی. هر ایکیسی ده قوجالمیشدیلار. ساعات سککیز دوره سی دی. قولاقی کئسیک کوچوک ، اوزاقدان گئلن ایت سسینی بیر نئچه هوروش نن جوابلادی. هوردو.هوردو.هورد… او گون کی قارا ایت کیمی. اوتانیردیم. بارماقلاریمی الیمین ایچینده گیزله دیب باشیمی آشاقیا سالیبب ایاقلاریما گؤز تیکدیم. ننه مین روف کاساسینی بارماقلاریمنان اویان بویان اله دیم. آرادا بیر باشیمی قوزایب گؤزلرینه باخیب بیرده اوتانا اوتانا ایاقلاریما باخیردیم. ننم روف کاساسیلا باشدان ایاقیما سو توکیب، ساری صابنین کوپیگینی یووب، سو توکیب، بیرده اویکه له ییردی. هاوالار سویوق اولاندا راحاتلاییردیق و تندیرخانایا گئدیب اوردا چیمیردیک آمما یایدا، یازدا، بیرده پاییزدان نئچه هفته سینی حیت ده، بیر قازان قینار سو و بیر تئشتین ایچینده. ننم بیزی چیمیزدیرردی.
هر سئری چیمیزدیرنده، بیزی لوطده ییب توشه ردی جانیمیزا.قابیقی گئدمیش کیسه نن اوقدر بیزی سورته ردی کی قابییمیز گئده ردی. سورادا بیزی بیر پارچا تیکه سینه بوروییب ائوه قویاندان سونرا، باشلاردی پالترلاری ایاقلاماقا، تشتین ایچینده.اله همیشه اولدوقو کیمی لومبیلی لوت تشتین اورتاسیندا دایانمیشدیم.ننم منی چیمیزدیریردی.
بو گونلر اولاردی. پاییزین سون گون لری..بوگون کی کیمی نئچه یارپاق توت آغاجینین قانین سوریردیلار، دال قاپیدان چیچک بی بی گلدی؛ دالیجان دا علویه. باشیمی آشاقیا سالیب الیمی یاواش جا سوروتله دیم دوییمه بویدا شی- ایمین اوستونه.ننم خوش گلدین دئیب چیچک بی بینن دانیشیقا باشلادی. دانیشا دانیشا، روف کاساسینی سودان دولدیریب باشدان ایاقیما توکدی. کیسه سینی الینه گئیدی و باشلادی کیسه چئکمه گه. الیم ایستر ایسته مز، ننمین کیسه چئکمه زوریلا، زادیمین اوستوندن چئکیلدی قیراقا.علویه چیچک بی بی نین تومانیندان یاپیشیب اوتانا اوتانا منیم زادیما باخیب گولومسه دی. اوتانیردیم. بارماقلاریمی الیمین ایچینده گیزله دیب باشیمی آشاقیا سالیبب ایاقلاریما گؤز تیکدیم. چیچک بی بی، آغامین عمی سی قیزیدی.آریغ اوزون بیر آرواد. چوخ واخت ساری تومان کؤنک گیئردی، قارا بیر جیلیققا اوستوندن.گؤزلری علویه نین گؤزونه اوخشاییردی. بئلکه ده علویه نین گؤزو اونون گؤزونه. دنیز گؤزلو بیر آروادی دی چیچک بی بی. دؤرد پئزه وک اوغلاندان سونرا علویه نی دوغموشدو.علویه، بیر بویوک دنیزی گؤزلرینین ایچینده بوغان قیز. بالاجا آق آستارلی قئرمزی دون، رنگی گئدمیش ساری چهمه و یاری اوزون یاری گوده ساری ساچلارینان، گوز آلتی منه باخیبب گولومسه ییردی. ننم منی کیسه لییندن سونرا دئدی ” اؤزون دورولان چیخ ” و سونرا چیچک بی بی گیلنن ائوه گئدیب بویوک اوتاقدا اوتوردولار. بویوک اوتاقین پنجره سیندن حیت گورسه نیردی.منیم دوییمه بویدا شی ایم و علویه نین باخیشلاری.
او گوندن نئچه گون سونرا، اورتا قاپیدان کئچیب توت آغاجینین بوریندن سوشیب چیچک بی بی گیله گئتدیم، علویه نی چاغیردیم گله ائو چی ائوچی ایناماقا. گلدی. سوماوری ، گلین جیکی و چاینیکی. الیمده کی آغاجی قویدوم ایکی قیچیمین آراسینا، دئدیم گل مین آتا گئدک. آغاجی ایک قیچینین آراسیندان کئچیردیب اوتوردو آتین اوستونده. بیر ایکی دؤر حیت ده چاپاندان سونرا، گئدیک تو آغاجینین دالینا.اوتوردوخ. من آتیمی آتدیم اوتلارین ایچینه، بیر آز اویانلیق. علویه دئدی ” گئد اویاندان گل ائله بیل کی چؤلدن گلیبسن، منده سنه چای توکیم. سن چای ایچ سورا دا کیشی لر کیمی منن دانیش “. نینک دئیب گئتدیم. یالانچی چایی ایچندن سونرا. دئدیم گل یاتاق. نینک دئدی. اوزاندی، منده اوزاندیم دالیندا، الینی آلدیم الیمه. بیلمیرم نیه آمما هر سئری اونی قوجاقلیاندا، ایچیمده بیر ایستیلیک اولوردو کی کئف الییردیم و ایسته میردیم اونو قوجاقیمدان آییرام. بیز چوخ واخت قوجاقلاشاردیق آمما هئچ بیر کیمسه گؤرمه میشدی. هئچ کس بیلمیردی. اوشاقلیقیمیزنان باشاریردیق سیر ساخلاماقی. بو دفعه علویه نی قوجاقلیاندان سونرا، او گون کی گولوشلری یادیما دوشودو. بیلمیردیم کی قیزلاریندا شی ای وار یا یوخ. ایسته ییردیم سوروشام کی قارا ایت هورمه گه باشلادی. باش قوزادیم و چیچک بی بی نی باشیمین اوستونده گؤردوم.ساهات سکگیز دوره سی دی. قئرمزی بالینجین اوستونده باشیمی اویان بویان ائله مه کدن یورولموشدوم. دوروب اوتوردوم یئرین ایچینده. قیزلارین سسی آشاقیدان گلیردی. ایکی گون دن سونرا علویه توی الیه جک دی. چیچک بی بی او گون گورندن، دای من علویه نی قوجاقلیا بیلمه میشدیم.
نوشته شده توسط admin در چهارشنبه, ۰۶ اسفند ۱۳۹۳ ساعت ۶:۳۹ ق.ظ
