سورتوک بگ

احمد اسدی
دائم اؤلوم فکرینده ایدی. اؤز-اؤزونه دئییردی:
- آی آللاه، بوگون سحر ییخیلیب اؤله جگم. آدیم سانیم باتاجاق. ایسته میرم آخی الیم دونیادان اوزولدوگو زمان، یادلاردان و ذهنلردن سیلیلنیب گئده م.
سورتوک بگ بونا گؤره، هر یئرده اؤزونو گؤزه سوخوردو. بوتون مراسملره، فئستیواللارا انجمنلره گئدیردی. دولتلی بیریسی اولدوغو اوچون، اؤز شکیللرینی و بیر سیرا اثرلرینی چاپ ائتمک اوچون نشریه لره بوللو پول وئریردی.
هر یئره باش چکیردی. تلویزیون ایله رادیویا او قدر گئتمیشدی، اورانین ایشله ینلری ده بئزمیشدیلر. اؤزوندن تابلولار چکدیرمیشدی. حتی چیخارتدیغی کتابلاری پولسوز ، چوخلو یئرلره و شخصلره هدیه وئرمیشدی.
اؤز-اؤزونه دئییردی: یقین بو قدر پول خرجله میشم، تلویزیوندا، رادیودا چیخیشلاریم اولوب نشریه لرده مصاحبه لریم گئدیب، ایندی هامی منی تانی ییر و گله جکده آدیم دیللر ازبری اولاجاق، حتی اؤلندن سونرادا منی خاطرلایانلار اولاجاق.
خیابان قیراغیندان بو فکرلرایله گئدیردی، بیر ماشین قاباغیندان توو ایله کئچدی، آز قالمیشدی سورتوک بگه توخونا، اؤزونو ساخلایانمادی ملتین ایچینده اونو قاتدی یامانا…
او صحنه دن آیریلاندان سونرا، عسکرآبادی خیابانیندا پیادا کئچیدی ایله گئدیردی. بو آندا بیر قوجا کیشی الینده کی آغ چلیک ایله اونو سسله دی:
-ای، آغا ای خانم، امکانی اولسا منه بیر یاردیم ائت. چاره سیز قالمیشام. گرفتارام.
سورتوک بگ ائله بیل هئچ نه گؤرمه ییب باشینی سالیب آشاغی کئچدی. گئدیب گئدیب محله لرینه چاتدی. ائولرینه یئتمه میش قونشولارینی گؤردو.
بیر بیرلری ایله اوشاقلاری اوسته دالاشیردیلار. ائله ساواشیردیلار کی توز دومان هاویا قالخمیشدی. آما سورتوک بگ، منه نه وار دئیه رک، ائوینه گیردی.
عائله سی اوندان ناراضی ایدیلار. او ائوده کیلرین هئچ بیرینین ایستکلرینه اهمیت وئرمه ییردی. یالنیز منم منم دئییردی. ائولرینده بیر مسموم فضا وار ایدی.
سحریسی گون ائودن ائشیگه چیخدی. قونشولارینین بیری ایله اوز-اوزه گلدی. سلام علیک عوضینه اؤز فکرینده ایدی. اونون سلام جوابینی دا وئرمه یرک، قونشوسونو پئشمان ائله دی.
بیر قدر یول گئدندن سونرا، ایش یئرینه چاتدی. اورادا یولداشینی گؤردو. سؤز وئرمیشدی، کئچن هفته اونون ایشینی حله سالا. آما سؤز وئردیگی گوندن بیر هفته کئچسه ده هئچ نه ائتمه میشدی. یولداشی اوندان گیلئیلی اولاراق، آیریلدی.
بیرگون، نشریه لرین بیری ایله دانیشمیشدی کی اونون شکلینی بؤیوک بیر فورمدا بیرینجی صحیفه ده چاپ ائتسینلر. تله سیک اورا گئتمگه حاضرلاندی.یولدا بیر تاکسی یه ال ائده رک، دال ردیفده اوتوردو.تاکسی نین ظرفیتی سورتوک بگ ایله دولموشدو و سوروجوده رادیوسونو آچاراق یولونا دوام ائتدیردی.
همیشه کیلره سایاق بو فکرده ایدی کی نئجه ائده بیلر. مشهور اولا و ائل ایچینده قالارغی قالا.
بو آندا رادیو آپاریجیسی بئله سسلندی:
-سیزدن دعوت ائدیرم، مرحوم آشیق درویشدن بیر ماهنی نین ائشیدنی اولاسینیز.
تاکسی ده کیلر، اوجا سسله آللاه اونا رحمت ائتسین، نه یاخشی معرفتلی انسان ایدی، رادیونون سسینه عکس العمل نشان وئردیلر.
قاباق ردیفده اوتوران بیر یاشلی کیشی ایدی پاپاغینی باشیندا ترپه درک، دئدی:
-رحمتلیک چوخ آلچاق کؤنول ایدی. بیر دفعه ده اولمادی من ایلک نوبه ده اونا سلام وئره م. ائله ایسته میشدیم آغزیمی آچام، او سلامینی وئرردی.آرخا ردیفده اوتوران بیر گنج اوغلاندا اؤزونو ییغاراق صحبته بئله قاتیلدی:
-آتامدان ائشیتمیشدیم. نه زمان بیر نفری خطاب ائدنده احتراملا داورانیب، سونرادا گؤزلره قوربان دئیه رک اونون اوره گینی اله گتیرردی.
بو سیرادا سوروجوده بحثدن گئری قالماسین دئیه، بیر الین ماشین پنجره سیندن ائشیکده اولارکن، دانیشماغا باشلادی:
-مسافرلرین بیری بیر سئری تعریفله ییردی انقلابدان اؤنجه اورمودا بیر سیرا محله لاتلاری وار ایدی. اؤزلرینین محدوده لری وار ایدی. بیر دفعه بیر یازیغی پول اوسته مرکزده پیچاقلادیلار. اودا یئرده دوشدو.
ملتین گؤزونون قورخوسونو آلمیشدیلار، دا هئچ کیم یاخینا گئدنمه ییردی. رحمتیک آشیق درویش بو صحنه نی گؤروب، او یارالی کیشی یه طرف قاچدی. لاتلاردا اونا هجوم چکدی. بو آندا ملتده آّشیق درویشه آرخا دوروب، اونلاری قاچاق سالدیلار.
صحبتلر بورا یئتینجه، سوروجو ((خوش گلدیز ایالته یئتیشدیک))، دئیه رک مسافرلرینی یولا سالدی.
سورتوک بگه، بو سؤزلر یاواش یاواش دئیه سن اؤز اثرینی قویوردو. بئینینده اولان فکرلر دگیشیلمک اوزره ایدی. آخی او نئچه ایللر ایدی او یاندا بو یاندا اؤزونو پوللا تبلیغ ائدیردی. کتاب چیخادیردی.
نشریه لرده شکلینی چاپ ائتدیریردی انجمنلره، فئستیواللارا قاتیلیردی. آما خالق ایچینده بو قدر سئویلن اولمامیشدی. ایندی نئچه واختدان سونرا، ندنینی بیلیب، یاواش یاواش باشا دوشوردو.
بو فکرلر ایله یولون قیراغی ایله گئدیردی بیردن گؤزو بیر بنره ساتاشدی، اؤنونده ده نئچه نفر دایانیب اونون یازیلارینی اوخویوردولار:
-آشیق درویشین وفاتینین ۲۱-جی ایل دؤنومونون آغیرلاماسی ۵-جی آیین دوققوزوندا اونو سئونلر طرفیندن قورولاجاق. هامی ائده بیلر قاتیلا.