بیربیری میزی سئوه ک

یازار:اکبر سعادت
آنا دیلیمیز: سئومک و سئویلمک چرخه سی هر بیر اینسانا عایید بیر مسئله دیر.بو گون لر هر تک تکمیز بئله بیر فیکیرلرده یاشاییریق کی”نه اولار گوزل حیاتیم اولسون…نه اولار خوشبخت یاشاییم…نه اولار من فیلان کس دن پولوم چوخ اولسون…
من بئله فیکیرلشیرم کی داها اینسانیت دن عقلانیت دن تکجه بیر آد قالیب..کی بیزلر اونو ویجدان تلقی ائلییریک.
یوخ بو حیاتیمیزین یولو دئییل.بو ویجدان دئییل.”چالیشریق جامعه نی دئیشیب تغییر وئرک،اما هئچ کس چالیشمیر کی اوزون تغییر وئره”.
بعضی لر بئله دوشونور کی اگر من بیر گون ایشیم ده بیر وسایلی ۱۰ برابر قیمتینه ساتسام،بو ایشنن یاواش یاواش حیات قازاناجاغام…و سونرالار بیر ماشین صاحبی اولاجاغام کی فیلان کس لر اونو یوخودا دا گورمه ییب.اوزونه سوز وئریر کی داها اوندا بیر کسی یاخین سالمیاجاغام اطرافیما.
یوخ بو حیاتین یولو دئییل
آخی بیز نیه گرک ایشدییمیز سالیم سوته بیر پارا شیمیایی مواد آرتیراق؟و اونو اوز وطنداشلاریمیزا ساتاق؟سونرا دانیشاندا سرطان دان دانیشاق،هی اولوم دن دییک…سکته دن… جوان اولومودن دانیشاق…
بیز نیه گرک بالیق کنسرولرینه دورو یاغ یئرینه،بالیق یاغی قاتیب دولو قیمته سالتاق؟و دانیشاندا ویجدان دان دانیشاق…
بلی وار،بئله بیر اینسانلار دا وار بوردا…
من اوزوم بئله دوشونورم کی اگر فلان کارخانانین مدیری اگر بیزلری سئوسه یدی،دئییردی که “یوخ بو ایش دوز دئییل و نه البت کی منیم اوز خانوادم ده بو سوت یا هرنه دن،تغذیه ائلیر.اما او یازیق فحله یازیق کارگر بو سوتو ایچیر و پول سوز بیمارستان لاری گزیر
من اوتانیرام او اوشاغی گورنده کی اوز آتاسینین پول سوز لوغونا آغلاییر.
او میوه چی کی بیزلره میوه یئرینه،سم وئریرب یئیریک.اودا بئله فیکر ائلیر کی ب. ایل ده یاخشی ساتدیم.بو بیزلر اونا لعنت اوخویوب و گونو گوندن نیفرت آرتیریریق.
بیری درد ایچینده یاتیر،بیری گئجه لر بوجور قازاندیقی پول لارا گؤه نیر.بیری گئجه لر الی بوش،بیری ده توخلوغوندان یاتا بیلمیر.
بو گون لر هر خیابانا چیخدیقجا بو مسئله نی آشکار یاخیندان گورورم.ملت بیربیرینه یان باخیر…هامی تضاد یول لاردا گزیب دولانیر.هرکس دیئه سن اوز جیبینه چالیشیر.
ملت بیر ماشین سیغنالینا داها تابی یوخدور.ملت یول اوستونده اوتوران یازیق ایشچی یه کی سویوقدان اوشویور باخیب رد اولور…هئچ سورموروق کی نیه…؟؟؟
آنجاق بونو اویره نمیشیق کی باخیب رد اولوب و آه چکه ک.یا دا بیر دمیر پول وئریب تصدق عنوان ائلیه ک.
من حیاتی بیر نربان تک بیلیرم…بئله کی قرار دیر هامی بو پیله لری چیخسین .نه اوجور اولسون کی اوز پیشرفتیمیزه گوره بیر بیر اینسانلاری پیله لردن آشاغیا آتیب رد اولاق.و بئله دوشونه ک کی حیاتین یولو بودور.
یاواش یاواش سئومک رابطه سی یا چرخه سی بیزیم جامعه ده آرادان گئدیر و اینسانلار بیر بیرینه ابزار گوزونده باخیرلار.بیر ابزار کی شاید بیزیم پیشرفتیمیزه مانع دیر و گرک آرادان گئتسین.
نه اولار بیربیریمیزی سئوه ک؟تکجه حیاتین کلیدی و ان خوشبخت یاشاماقین گوزل یولو بودور.همن سئومک سایه سینده دیر کی بیزیم چوخلو مشکلاتیمیز اوز حلینه یول تاپاجاق. چوخلو ایجتماعی –فرهنگی مشکل لریمیز بونا خاطیر کی” بیربیر دن قاچیریق” گون به گون چوخالیر و جواب سیز قالیر. اما یوخ،حیاتین گوزل دادین سئومک سایه سینده تاپاجاییق…
سون سوزوم :اگر بیر بیریمیزی سئوسه ک داها جامعه ده هئچ نیگرانچیلیق یوخدو…داها نزاع یوخدو…و اوندادیر کی دادگاهلاریمیز بوم بوش قالار و گونو گوندن آرتیق پیشرفتیمیز اولار.
من بئله بیلیرم کی هامی میز بیر بیره اعتمادیمیز وار و سئویریک بوتون اینسانلاری…
من سنین ان چوخ سسینی سئودیم/ بوخارلی اکثر زامان، بیر اکمک کیمی
اؤنجه عشقه چاغیران، سونرا دینلندیرن/ منه هر زامان دوست، هر زامان سئوگیلی…