آتام او گون گوله‌جک
یازان: قدسی قاضی نور
چئویرن: محمود بنی‌آدم
آنادیلیمیز: معلم یازی تاختاسی‌نین یانیندا دایانمیشدی، بیر پارچا آغ گج ایله، تاختانین اوستونده یازدی: انشاء قونوموز؛ گؤردویوم أن گؤزل یوخو! – حسن دادخواه – بلی آقا. – انشاء یازمیسان؟ – بلی آقا. – گل اوخو. حسن یئریندن قالخدی. انشاء دفترینی گؤتوروب، یازی تاختاسی‌نین یانیندا، اوشاق‌لارین اؤنونده دوردو، باشلادی انشاسینی اوخوسون؛»گؤردویوم أن گؤزل یوخو بیر گون یوخودا گؤردوم، ائله بو صینیف‌ین ایچینده اوتورموشام. تاریخ صینیفی‌دیر، هر یان قارانلیق‌دیر. گئتدیم یازی تاختاسی‌نین یانینا، بیر گج ایله قارا تاختانین اوستونده گونش شکیلی چکدیم. گونش بیزیم صینیف‌ین ایچینه دولدو. تاریخ‌ین الیندن توتدوم، اونو پنجره‌دن ائشییه سالدیم.
او گون، بیر یئنی گون اولموشدو. یولدان یئنی گلمیش بیر گون! تاریخ‌ین آغیر یوک‌لری، هله اونون بئلینی اَیمه‌میشدی. من بئله دوشوندوم، أن یاخشی گون، او گون‌دور کی، آرخاسیندا تاریخ‌ین آغیر یوکو اولماسین. گلسین اؤزو – اؤزونه سایاق بیر تاریخ یاراتسین، چونکی، او زامان هر شئی تزه‌له‌نر. گون‌لر ده بیر آیدین گون اولار، اونلارا قاریشیق قارانلیق اولماز. اوندا هامی آدام‌لار سانکی بیر آدام اولارلار. اونلارین دوشونجه‌لری، یئنی بیر دوشونجه اولار. یاشاییش‌لاری تزه‌له‌نر. گون‌لری، اورک‌لری ایسته‌دییی کیمی گلیب، کئچرلر.
پنجره‌دن ائشییه باخدیم. هر یان یاشیل ایدی. یام- یاشیل. سئرچه‌لر کیمی پنجره‌دن اوچدوم. گئتدیم، یئرلرین، هر زادین یاشیل اولماسینی نئجه می اینانماق اولار؟ بلکه گؤزلریمین ببک‌لری یاشیل اولموشدولار! چونکی، داش‌لارین اوستونده یوسون‌لاردا (خزه) یاشیل اولموشدولار.
اوردا، او داش‌لارین یانیندا بیر چای آخیردی. آما او دا یاشیل اولموشدو. اونا ساری گئتدیم. ایسته‌دیم اوندان سوروشام کی، سیز گرک ماوی اولاسیز، نه‌دن یاشیل‌سیز؟
چای‌ین قیراغینا چاتدیم. بیر آز اونون یانیندا اوتوردوم. اونون سسینه قولاق آسدیم. چوخ یاواش، ووقالی آخیردی.
– سلام، نیه بئله یاواش سس‌ین واردیر؟
– بونا گؤره کی، من حیرص‌لی دئییلم.
– آما من گؤرموشدوم، ایلک زامان‌لار چای‌لار چوخ قورخولو اولاردیلار! دوغرودان سن نه‌دن یاشیل‌سان؟ من بیلن سن گرک ماوی اولاسان؟!
– نیه، گرک ماوی اولام، ایندی‌ده ماوی‌ایم. من چوخ ایل‌لر آوارا، بو یانا – او یانا گزمیشم، چوخلو چؤل‌لردن، اؤلکه‌لردن کئچمیشم، اوره‌ییم ایسته‌ییردی، بیر یئره چاتیم کی، اوردا منه احتیاج‌لاری اولسون. چوخ سئویردیم من ده بیر ایش گؤروم کی، دیری اولماغیمدان اوتانمایام. بو یئره چاتجاق دوردوم. فیکره گئتدیم. بورا او سئودیییم یئرلر دئییل می؟ گؤردوم بورالاردا هر یاندان چوخ یارارلی اولا بیلرم. بیر بئله یاشیل یئر اولارمی اوره‌ییمه یاتماسین؟
– یاخشی نه ائله‌دین؟
– بوردا قالدیم!
– نه‌دن یاشیل اولدون؟
– ساغ – سولومدا کی، آغاج‌لاری گؤردوم. بو آغاج‌لار باشلارینی یئره ساری اَمیشدیلر، چای اوستونده گونبذ قورموشدولار، چای دا گوزگو اولموشدو اونلاری اؤز ایچینده ساخلامیشدی.
ایندی بیلدین نه‌دن یاشیل اولموشام؟ آغاج‌لار منیم آیدین‌لیغمدا اؤزلرینه باخیرلار. بیلیرسن بو آغاج‌لارین ده‌یری نه قدردیر؟ اونلار بیلیرلر کی، یئر اوزونده چوخ اؤنملی‌دیرلر. اونلار یاخشی بیلیرلر باهالی بیر نعمت‌دیرلر. اونلارین کؤلگه‌سی یورقون یولچولار اوچون چوخ ده‌یرلی‌دیر. بو یولچولار اونلارین کؤلگه‌سینده دینجه‌لیرلر. بیردن هامیسی بیر سایاق پالتار ایین‌لرینده اولان بیر سیرا دوزنلی(منظم) اوشاق، آغاج‌لارین ساپلاق‌لارینا اوخشار تاپیلیب، گلدیلر.
– بونلار کیم‌دیرلر؟ من کئچمیش زامان‌لار بونلاری بو یئرلرده گؤرمه‌میشدیم.
– اوشاق‌لارین اوخول زامانی‌دیر. بوردا هامی اوشاق‌لار مکتبه گئدرلر.
– آشیق اویونو، اوینامازلار؟
– یوخ!
– اوشاق‌لار هئچ بیریسی اوغورلوق ائلمز؟
– یوخ.
– بو اوشاق‌لار ساواشمازلار؟ ائولرین پنجره‌سینده‌کی، شوشه‌لری داش ووروب، سیندیرمازلار؟
– یوخ. – نه‌دن؟
– نه اوچون بیر بئله پیس ایش‌لری گؤرسونلر؟ بوردا هامی اوشاق‌لار بیر سایاق یاشاییرلار! بونا گؤره کیمسه، آیری‌سینی وورماز. هامی‌نین یئییم ـ ایچیمی، پالتارلاری، چانتاسی، کیتابی واردیر. نه‌دن اوغورلوق ائله‌سینلر؟ بوردا مکتبه گئتمک هامی‌لارا ممکون‌دور، اونلارین یئکه – یئکه کیتاب‌خانالاری واردیر، اویون یئرلری واردیر، بوش واخت‌لارینی سئودیک‌لری ایش‌لر ایله سونا چاتیریرلار. نه‌دن آشیق اویناسینلار؟ بیریسی اونلارا زور دانیشمیر. نه‌دن گرک ائولرین پنجره‌سینده کی، شوشه‌لری داش ووروب سیندیرسینلار؟ بورداکی باغچالار هامی اوشاق‌لار اوچون‌دور. اونلارین آراسیندا منیم، سنین یوخ‌دور. هر شئی ایسته‌سه‌لر بو باغچالاردا واردیر. اونلار اؤز باغچالاریندا ایشله‌ییرلر، سئرچه‌لری اؤز باغچالارینا قوناق چاغیریب، ال‌لرینده او سئرچه‌لره دن وئریرلر.
أن اؤنملی‌سی بودور کی، بوردا هامی یئکه آدام‌لار دا برابر ایش‌لرین گؤرورلر. اونلار ایش‌لری‌نین ایچینده گؤزل – گؤزل ماهنی‌لار اوخویورلار. برابر گؤلورلر. بیریسینی لاغا قویمورلار. سونرا یورقون زامان‌لاری ایش‌دن أل چکیب برابر سیاحت ائدیرلر.
حالبوکی، من آتاما فیکر ائله‌دیم. هیچ واخت آتامی ایش گؤرنده گولر اوزلو گؤرمه‌میشم! بلکه ده آتامین گولمک اوچون واختی اولمور! بو سبب‌دن‌دیر کی، بیر سیرا آدام‌لار ایش گؤرمورلر، آتام گرک اونلارین‌دا ایشلرینی گؤرسون.
چوخ زامان کئچمیشدی، بئواخت اولموشدو. گرک قاییدیب گله‌یدیم، من او یاشیل چای آخان یئرلردن چوخ سؤزلر اؤیرنمیشدیم. او شئی‌لری، او سؤزلری کی، عؤمروم‌ده اونلار نه‌دن بئله اولوبلار سببی‌نی دوشونموردوم. اونلارا جاواب تاپا بیلمیردیم.
یئنی‌دن صینیف‌ین ایچینه گلدیم. او زامان کی، من اوردا یوخ ایدیم، تاریخ گینه ده گلیب یازی تاختانین اوستونده‌کی، گونش‌ین شکیلینی سیلمیشدی. هر یئر قارانلیق اولموشدو.
بیر پارچا گج گؤتوردوم. تاختایا ساری گئتدیم…
بیردن یوخودان آییلدیم!
آما بیلیرم کی، بیر گون گونش گلیب بیر یئنی گون یاراداجاق‌دیر. اوندا بیزیم ده یاشیل باغچامیز اولاجاق‌دیر. سئرچه‌لری قوناق چاغیراجاییق، گلسین‌لر بیزیم چیین‌لریمیزده اوتورسونلار، اووج‌لاریمیزدان دن یئسین‌لر. داها بیزیم ده گونش یاخشی شاخسین. بیزیم اؤلکه‌ده سئرچه‌لر دمیر قفس‌لرده قالماسینلار، قفس‌لرین ایچینده یاشیل یوخولار گؤرمه‌سین‌لر. هامی‌لار بیزیم باغچالاردا قوناق اولسونلار. چای‌لار چوخ گور آخسین‌لار. من ده گؤروم کی، آتام ایش ایشله‌ینده دوداق‌لاریندا گولش واردیر، دیلی آلتیندا هردن بیر ماهنی اوخویور.
****
حسن‌ین انشاء‌سی قورتاردی. صینیف سس‌سیز اولموشدو. قلم معلّم‌ین ایکی دوداغی‌نین آراسیندا قالمیشدی. او گون‌لره فیکر ائله‌ییردی کی، آدام‌لار ایشله‌ینده، گوله بیلسین‌لر، اوشاق‌لارین گؤزلری اؤز انشاء دفترلرینده قالمیشدی. بلکه ده سئرچه‌لره فیکر ائله‌ییردیلر کی، دمیر قفس‌لردن چیخیب، گلیب چییین‌لرینده اوتورورلار، اونلارین اووج‌لاریندان دن گؤتوروب، یئسین‌لر.
نوشته شده توسط admin در شنبه, ۲۴ آبان ۱۳۹۹ ساعت ۱۰:۴۳ ق.ظ
