الله دان اوزاقلاشمایین
کوچوره ن:اکبرسعادت
آنادیلیمیز:اینسان ایکی ضدین بیر یئرده اولدوغو بیر وارلیقدیر. بدن ایله روح، ماده ایله معنا ایچ ایچهدیر.
اینسانین خوشبختلیگی بو ایکی فرقلی عنصورون تعادولوندا توتولماسینا باغلیدیر.
مادی ایستیقامتیمیز داها آچیق اولدوغو اوچون روحی گوجلریمیزی گولگهلمکدهدیر. بو تمایل دواملی و تأثیرلی اولسا، اینسان روحونون گلیشمهسینه مانع توردیلمیش اولار.
تاغوتلاری رد ائتمهدیکجه ایمانین قبول اولونمایاجاغی آچیق بیر شکیلده آیهلرده ایفاده اولونور.
تاغوت دئدیکده، اللهین ائندیردیگی حوکملره موخالیف اولان و بو حوکملرین عوضینه اوز حوکملرینی ایجاد ائدن هر بیر وارلیق تاغوتدور. تاغوت همچینین اللها قارشی عصیان ائتمکله برابر، اونون قوللارینی اوزونه قول ائتمک ادعاسیندا اولانلاردیر.
بو ایسه شیطان، دینی و سییاسی بیر لیدئر و یا بیر کرال اولا بیلر. اللها قارشی حددینی آشمیش هر بیر وارلیق تاغوتدور. قئیبدن خبر وئرن فالچیلیقلا مشغول اولان، جادوگرلیک ائدن هر بیر کس ده تاغوت حوکموندهدیر.
بو سببدن هر هانسی بیر اینسانین حقیقی موسلمان اولماسی اوچون تاغوتو رد ائتمهسی لازیمدیر.
چونکی اوجا اللها ایمان ائتمهمیشدن اؤنجه بوتون تاغوتلاری اینکار ائتمک شرطدیر. یعنی تاغوتلاری اینکار ائتمهدن، اللها ایمان گتیرهنین ایمانی یانلیشدیر.
بورایا قدر آنلاتدیغیمیز تاغوتلار بیزدن خاریجده اولان تاغوتلاردیر. و هر بیر ایمان گتیرن اینسانین دا بو خاریجی تاغوتلاردان چکینیب اللها یونلمهسی لازیمدیر.
لاکین بو گون بیز اینسانلارین داخیلینده اولان تاغوتدان دانیشماق ایستهییریک.
اینسان اوز داخیلیندهکی تاغوتو رد ائتدیکده او خاریجده اولان تاغوتلاری دا اینکار ائتمک گوجونده اولور. محض بونا گوره ده اینسان ایلک اونجه داخیلیندهکی تاغوتو تانیمالیدیر.تاغوتو تانیمادان اونو اینکار ائتمک ده مومکون دئییلدیر. بس بو ایچیمیزده، داخیلیمیزده اولان تاغوت نه دیر؟ بو ائله بیر تاغوتدور کی اینسانلاری عبادتدن، اللها قوللوقدان، ایماندان کنار ائدیر. بو نفسدیر! نفس ائله بیر تاغوتدور کی او اینسانی دونیایا و دونیا نعمتلرینه آلوده ائدیر. نتیجهده ایسه دونیا نعمتلرینه هریس اولان اینسان بو نعمتلره نایل اولماق اوچون یالان دانیشماغا اوغورلوق ائتمهیه، روشوت آلماغا حتی اینسان جانینا بئله قصد ائتمهیه مجبور اولور.
نفس اونو ائله بیر سویهیه گتیری کی، او حئیواندان فرقلنمز حالا دوشور.
نه گلدی یئییر، حالال-حرام بیلمیر و بو جور عمللری “قوچاقلیق” ، “زمانیله آیاقلاشماق” کیمی ایفادهلرله حاق قازاندیریر.
حالبوکی، بوتون بو عمللری شیطان اونا حرام و گوناه عمللر کیمی دئییل، “باجاریق” کیمی تلقین ائدیر.
و نتیجهده نفسینه تابع اولوب زلالته دوغرو آددیملاییر. خاریجدهکی تاغوتلار ایلاهیلشدیریلدیگی کیمی، داخیلی تاغوت اولان نفس ده ایلاهیلشدیریله بیلر. و نتیجهده اینسان اوز نفسینی اوزونه ایلاه سئچیر. و اللهدان قئیریسینی اوزونه ایلاه سئچدیگی اوچون کافیر اولور. اوجا الله اوز رسولونا بو خیسلتلی اینسانلار بارهسینده بئله مراجعت ائدیر: نفسینین ایستهیینی ایلاهیلشدیرن کیمسهنی گوردونمو؟ گونوموزده بو جور اینسانلارا چوخ راست گلمک مومکوندور. اونلار نفسلرینین ایستکلرینه تابع اولوب، دونیا حیاتینا کوله اولموشلار. حالبوکی اونلار اللها قوللوق ائتسیدیلر، الله اونلارا بو دونیادا دا ، آخیرت دونیاسیندا دا گوزللیکلر بخش ائدردی. البتدهکی اوجا الله بو دونیادا موسلمانا دا کافیره ده رحملیدیر.
بو دونیاداکی نعمتلرین ذره قدر قییمتی اولسایدی، کافیره بیر قورتوم سو بئله وئریلمزدی. آخیرت گونونده ایسه اوجا الله یالنیز موسلمانلارا رحیملی اولاجاق.
جنّت نعمتلری ایسه یالنیز بو دونیادا اونا ایمان گتیریب و تاغوتلاردان چکیننلر اوچون اولاجاقدیر. اوجا الله بو بارهده بئله بویورور: قادینلارین، اوشاقلارین، ییغین-ییغین قیزیل گوموشون، یاخشی جینس آتلارین، مال-قارانین و اکین یئرلرینین وئردیگی ذووقلره اولان ایستک اینسانلارین گوزونه گوزل گوستریلمیشدیر. بونلار، دونیا حیاتینین کئچیجی ذووقودور، گوزل قاییدیش یئری ایسه الله یانیندادیر. اینسان آنلامالیدیر کی، بو دونیا یاشاماق و ذووق اوچون بیر مکان دئییل.
بو دونیا ایمتاهان دونیاسیدیر. بو دونیاداکی نعمتلر یالنیز اوندان ایستیفاده ائدیب، ایمتاهانا حاضرلاشماق اوچوندور. چونکی قارشیدا بویوک بیر ایمتاهان وار. بو ایمتاهاندان موفووقیتله کئچه بیلمک اوچون بوتون تاغوتلاری دیل ایله عمل ایله رد ائدیب، اللها ایمان گتیرمک لازیمدیر.
بونون اوچون ایسه ایلک نووبهده داخیلیمیزده اولان نفس آدیندا تاغوتو رد ائتمک لازیمدیر.
داخیلیندهکی تاغوتو رد ائتمهدن ، خاریجی تاغوتلاری رد ائتمک مومکون دئییلدیر. اگر مومکوندورسه ده بو یالنیز دیلده اولاجاق.
عملده ایسه هئچ بیر دیَیشیکلیک اولمایاجاقدیر. بو معنادا گلین بیر داها بیزی اللها عبادتدن اوزاقلاشدیران نفسی ایستکلری ترک ائدک.
داخیلیمیزدهکی نفس آدینداکی تاغوتو و خاریجیمیزدهکی تاغوتلاری ترک ائدک کی، اللها حقیقی معنادا ایمان گتیرک.
گلین داخیلمیزدهکی و خاریجیمیزدهکی تاغوتلاری ایلاهلشدیریب اونلارا عبادت ائتمهیک.
گلین یئرین و گویلرین حقیقی رببی اولان اللهی ایلاهیلشدیرک و اونا دا عبادت ائدک. سوندا گلین اوجا اللهین بیزلره بو بارهده مراجعتلرینه بیر داها نظر سالاق:
هر کس تاغوتو اینکار ائدیب اللها ایمان گتیررسه، هئچ واخت قیریلمایان ان موحکم دستکدن یاپیشمیش اولار. الله ائشیدندیر، بیلندیر.
تاغوتا عبادت ائتمکدن چکینیب اللها اوز توتانلارا موژده واردیر. قوللاریمی موژدله. نفسینی گوناهدان تمیزلهین اوغور قازانمیشدیر. الله بوتون موسلمانلاری نفسدن و اونون شرریندن قوروسون. آمین
نوشته شده توسط admin در شنبه, ۲۲ خرداد ۱۳۹۵ ساعت ۸:۳۰ ق.ظ