آنا دیلین بیلمه ین نئجه اینسان سایلیر

اکبر سعادت
سو”دئییبدیر منه اولده،آنام آب کی،یوخ
آنا دیلیمیز: آنا دیلی هر میللتین اساسی وارلیقلاریندان بیری اولاراق بشری جامعه لرین کیملیک (هویت) قورولوشون تملی (پایه سی) ساییلیر. آنادیل هر شخصین کیملیک، کولتور (فرهنگ) و شخصیتینده اؤنملی رولو (نقشی) اولاراق اویرنمگی هامییا گرکلی دیر. تام بونون اهمییتینه گوره یونسکو تشکیلاتین طرفیندن ۲ اسفند (۲۱ فوریه) دونیا آنا دیلی گونو آدلاناراق دیرلندیریلیب. هر ایل دونیا اولکه لرینده بوگون قوتلانیب و اونون اوچون مراسم لر کئچیریرلیر.
بیلدیگینیز کیمی دیل هر شخصین کیملیک سندلریندن بیری دیر. کولتورون و کیملیگین قورونماسی و اونلارین یاشاتدیرماسی تام دیله باغلی دیر. منجه بو گون بیزیم کیمی نئچه دیللی و نئچه کولتورلو اولکه لره اونملی گون ساییلیر. منجه، بو گون بیرلشمیش میللتلر اورگوتو (سازمان ملل متحد) طرفیندن یالنیز نئچه دیللی اولکه لری دستکله مک (حیمایت) اوچون یارانیب. بوگون، نئچه دیللی اولکه لر آراسیندا داها آرتیق قوتلانیر آنجاق منجه بیزیم کی بیرآز فرقلی دیر! بیز ایران تورکلری بوگونو بیری بیریمیزه قوتلاییب و تبریک دئیه بیلریکمی؟!
آنا دیلی گونون تبریک دئییم می؟ چون آنا دیلیمیزی یازیب اوخویانمیریق! بوگونو قوتلاییمی؟ چون اوشاقلاریمیز اونلارلا شعر- ترانه باشقا دیلده باجاراراق آنادیللرینده بیرجه ماهنی باجارمیرلار!
بو گونو قوتلاییم می؟ چون آنا دیلیمیزده اوخول یوخدور! بوگونو تبریک دئییم می؟ چون آذربایجان میللتینین آنا دیلی تهلوکه ده دیر . . .
طبیعی حاققیندان محروم قالانا، آنادیلینده یازیب اوخویانمایانا، نئجه آنا دیلی گونون تبریک دئییم ؟!بو آرادا هر کیمسه اوز آنا دیلینه ده یییه (صاحب) چیخمالیدیر و اونا قوللوق ائتمه لیدیر.رحمتلیک اوستاد»شهریار« بو ایشده باشاریلی اولوب و عومروندن نئچه ایل کئچندن سونرا آنا دیلینه قوللوق ائتمه ییی دوشونوب و تورک دیلینه بویوک بیر قوللوقچو اولوبدور.چاغداش زاماندا شهریار،»حیدر بابایا سلام« اثرینی یازماقلا آذربایجان تورکجه سینه یئنی بیر روح ایله جان وئریب و عئینی زاماندا اثری دونیا سئویه سینده ان دیرلی اثرلردن اولوبدور.بونلاری دئمکده بونو بیلدیرمه لیم کی هر کیمسه اوز یئرینده و نووبه سینده آنا دیلینه سایغی و حورمت ساخلاییب اونو اوجا یئرلره یئتیره بیلر.اوشاغا تورکجه آد قویوب اونا هر دیلدن اونجه اوز آنا دیلینی اویرتمک ان کیچیک بیر ایش اولا بیلر و هر بیر تورک اینسانی ان آزی بو ایشی گؤره بیلر.بوتون دیللر »تانری«- دان بیزیم اوچون بویوک بیر پای و نعمت دیر و بو دیللری قوروماق(حفظ ائله مک) بوتون اینسانلارین گوره ویدیر(وظیفه سیدیر)
*دیلیمیزی قورویاق:بوتون دیللر گوزل دیر و یئرینده هامیسینا دیر وئریب اونلاری قورویوب ساخلاماق بیز اینسانلار اوچون آغیر گورودیر(وظیفه)–دیر. بونون یانیندا هر اینسانین اوز آنا دیلی داها فرقلی و اونملی ساییلیر. اینسان اوز آنا دیلینده دویغولارینی اوزه چیخاریب، اونلاری یاشادیر. آنا دیلینی بیلمه ین اینسان ایسه اوز آنا دیلینده اولان دویغولاردان اوزاق قالاراق، اوزگه دویغولاری ایله یاشایاجاق دیر.ایندیکی چاغیمیزدا آنا دیلینین یانیندا، هر اینسان دونیانین باشقا دیللریندن، بیر- ایکی سینی ایسه باجاراندا، دونیایا نئچه آچی-دان و نئچه یون-دن باخا بیلیب و نئچه اینسان ساییلیر. آمما آنا دیلین بیلمه ین ایسه، اون دیل بئله بیلسه ده، ظولوم آلتیندا یاشاییر. آنا دیلی بیر اینسانین وارلیغی ساییلاراق اونو بیلمه ین اینسان، اوز وارلیغیندان اوزاق دوشه رک، آنا دیلینده اولان بوتون دویغولار ایله گوزللیک لردن محروم قالیر.دونیانین او بیری اینسانلارینا تای بیزم ده، اوز آنا دیلیمیز واردیر. بیزیم آنا دیلیمیز اولان تورکجه (آذربایجان تورکجه سی)، دونیانین گوجلو، گوزل، قایدالی و دیرلی دیللریندن ساییلاراق، یاشاماقدادیر. بیز ایسه اونو یاشاتمالیییق. اونجه اولکه میزین قانونوندان فایدالاناراق، اونو اوخول-لار ایله بیلیم یوردلاردا دیری ساخلاماق ان واجیب اولان دیر و بودا رویالاردان اوزاق قالان بیر زاد دئییل دیر. ایسلامی اولکه میزده بو ایمکان وار و تئز-گئج یاراناجاق دیر و بو ایشله تانری وریندن وئریلن پای-ا یییه (صاحب) چیخاجاییق.اونون یانیندا ایندیکی دورومدا، یئتیری (رسانه)-لرین هامیسیندا، اوزللیک له رادیو-تلویزیون دا، تورکجه میزی تمیز و دوزگون دانیشماق ایله، دیلیمیزه بیر آیری یاردیم ائده بیله ریک. تاسفله بو ایکی یئتیری (رسانه) ده، اوزللیکله اوستانی شبکه لرده (آذربایجان تورک لری یاشایان اوستان لارین شبکه لرینده) تورکجه میزه هر دیلدن بیر آز قاتیب یئنی بیر دیل یارادیب لار و یقین اولاراق کوتله نین ده (مردم) دانیشیغیندا تاثیر قویولور.گوزل تورکجه میز رادیو-تلویزیون دا دوغرو-دوزگون و تمیز دانیشیلسا، یوزده-یوز کوتله نین ده دانیشیغی دوزگون تورکجه اولاجاق دیر. جمله نین سونوندا تکجه بیر تورکجه فعل گتیرمه یه، تورکجه دانیشماق دئمزلر!! گرکلیدیر بونا چوخ دقت ائدیب دیلیمیزین آرادان گئتمه سینه یاردیم ائتمه یک. ایندیکی وضعیت ده تورکجه کیتاب لار ایله نشریه لردن ایسه فایدالانا بیله ریک. بو ایشله هم اونلار آیاق اوسته قالار همده تورکجه میز یاشایار.اوزوموز ایسه دانیشیغیمیزا دقت ائتمه لیییک، نه زامانادک دیلیمیزه خور گوز ایله باخا جاییق؟ ندن تورکجه دانیشاندا جمله میزین چوخونو باشقا دیلده دئییریک، بودا کیلاسمی؟ منجه کیلاس و افتخار، تورکجه میزی دوزگون دانیشماقدادیر. پیس عادت لریمیزدن بیری عددلری، بویالاری و… باشقا دیلده دئمک دیر. تورک، تورکجه!! دانیشاندا اولکه ده یاشایانلارین هامیسی نه دانیشدیغینی آنلایا بیلیر و اودا تورکجه میزه هر دیلدن قاتماسی ندنی (سببی) دیر. همن آدام باشقا دیلده دانیشاندا چالیشیر هم تمیز، همده لهجه سیز دانیشسین!! و بیری بیلمه دن آیری بیر دیلین کلمه سین او دیله قاتاندا، ایش گولمه یه چکیر!دیلیمیزین آرادان گئتمه سی ائله بو عددلر ایله بویالار و جمله میزده تکجه تورکجه بیر فعلی ایشلتمک دن باشلاییر، نه زامانا کیمین، بیر-بیریمیزه، واز گئچ نه اولاجاق -دئیه جه ییک؟ دوروم بئله گئدیرسه، ساباح دیلیمیزدن قورو بیر آد قالار!!دیلیمیزی قوروماق ایسته ییریک سه، بوتون دیرلی یازیچیلاریمیز، تمیز و تورکجه قیرامئرینده یازمالیدیرلار. ان اؤنملی سی، که/کی، اگر، چونکی، آیا و… کلمه لرینی قوللانماق لا دیلیمیزه آغیر بیر ضربه وورماغا داوام ائدیریک. آمما اونلاری دیلیمیزدن آییرماق لا دیلیمیز داها گوزللشه جک دیر. بو ایش ایسه یازیچیلاریمیزین وظیفه سینی آغیرلادیر. اونلار توپلومون آیدینی اولاراق، دیلیمیزی جانلی و تمیز یاشادیب، ساخلاماسی اوچون داها چوخ چالیشیب، زحمت چکمه لیدیرلر.دیلیمیزی یاشاتما، یئرلرین بیری ایسه اینترنت دیر. وبلاگ لار ایله سایت لاریمیزدا تورکجه میزه اوزل یئر وئریب اونو قوللانماق لا بیر آیری یاردیم ائده بیله ریک. اومود ائدیرم دیلیمیز یاشام بویو یاشایاجاق دیر اومورام یاخین گلجکده بوگونو یوردداشلاریما تبریک دئیه بیلم…

نوشته شده توسط admin در جمعه, ۰۱ اسفند ۱۳۹۳ ساعت ۳:۵۶ ب.ظ

• ۱ نظر
• 1646 بازدید
•    تویت
•  چاپ