صاباحدان بیر دامجی کؤزرتی
اسماعیل خرمی
بیرینجی بولوم
آنادیلیمیز:یاشاماق هامییا گؤیچک بیر گلینین توی گونونده گولن گؤزلری اولسادا، منه ناغیللارداکی، کوپدن چیخمیش چیرکین قارینین قیریشمیش اوزودور.
بیر کره بئله، یالانداندا آغزیمی آچیب گوله بیلمیرم. قارشیما چیخان هر کیمسه‌ده بو اوزدن، منی قاش – قاباقلی سایار. حاقلیدیلاردا. بیرینین اوزونه باخیب گولومسه‌مک ایسته‌سم، ایچیمده فیرتینا قوپار. آلار منی جایناغینا. یئردن قالدیریب گؤیه، گؤیدن یئره وورار. اونلارین گولومسه‌مه‌لری ده منه اؤگئی گلر. یالاندان گولدوکلری ایچیمه دامار. آخی هانسی خوش گونلرین گؤزونه گولومسه‌ییم. گولمک یالنیز دوداقدا دئییل. گؤزلر ده، اوره‌‌کدن گولمه‌لیدیر. بونلارین دا گؤزلری او سئوینجی، او خوشبختلییی گؤسترمیر. سئوینج، گولوش، اوره‌یی آچیقلیق، مندن قاچیب آسانسورسوز یوز مرتبه‌لی بینالارین باشیندا دوروب. نه الیم چاتیر نه‌ده قالخیب اورا چیخا بیلیرم. بیر گون تانیشلارین بیری قاباغیمی کسیب دئدی: «اوزوندن – گؤزوندن زهرمار تؤکولور. بیر آز دوداقلارینی اویان بویانا دارت، قوی اوزون گولر گؤرسنسین. ائشیتمه‌‌ییبسن می »ترازا آنا« دئییب: »بیر بیرینیزی گولوشله قارشیلاساز اوره‌‌یینیز عشقله دولار.« ایسته‌دیم دییه‌م سن نه هایدا من نه هایدا، آنجاق واز کئچدیم.
صاباحا توکجن اومودوم یوخدو. گؤزومده صاباحدان بیر دامجی کؤزرتی‌‌ده یوخدو. صاباح اولجاق نه اولاجاق؟ هانسی کدریمین هانسی آغریمین الیندن یاپیشیب اوونداراجاق؟ بیر گون عؤمرومه آرتدیقجا آغریلاریمین، کدرلریمین، گوجوم چاتمایان یوز مرتبه‌لی ائولرین آغیرلیغی قده‌ر بئلیمده داشیدیغیم یوکون آغیرلیغینی چوخالداجاق. ایشیقلا، قارانلیغین نه اولدوغونو آنلایا بیلمیرم. گؤزلله، چیرکینی آییرد ائده بیلمیرم. سولارین دورولوغونا باخیب اؤزومو گؤرنده باشیمی سویا باسیب بوغولماق ایسته‌ییرم. ایسته‌‌مه‌دن، قولاغیما سوخولان قوشلارین سسی، بئینیمه ائلکترو شوک وورور. هر بیر جوککولتوسو باشیمین بیر یانیندان گیریب او بیری یانیندان چیخیر. باشینیزی ندن چوخ آغریدیم، یاشاماقدان داد آلا بیلمیرم.
دادی او آدام آلسین کی، بورجو یوخدو. بورجلولار، ائوینه ال قویماق اوچون هله بئلینه مینمه‌ییب. آرواد – اوشاغینین قارنینی دویورماق چون، ان اسگیک انسانلارا اوز وورماییب، اسگیکجه‌سینه بیرینه خیتیلانماییب. آروادی،کیشی‌سینین اوجباتیندان، اوشاقلاری اوستونه تؤکوب، دده‌سی گیله چیخیب گئتمه‌ییب. اوشاقلارینین گؤزوندن دوشمه‌ییب. منیم قونشولاریم کیمی، قاباغینی کسیب؛ ائویندن گلن گونده‌لیک ساواش های کویونون الیندن جانا گلموشوک دییه، بوردان چیخیب گئتمه‌یینی گؤرسک، اؤلمه‌ریک دئمه‌ییبلر.گونلر اؤنجه، ایش یولداشیم خداکریم منه ساری یاخینلاشیب »کنفسیوس«ون »یاشاماق چوخ ساده‌دیر بیزلر اونو چتین توتوروق« جومله‌سینی خاطیرلادیب، بئله دئدی: »آ کیشی سن دئییرسن بیزیم بورجوموز، آغریمیز یوخدور؟ گرک علینین بؤرکون ولینین باشینا، ولینین بؤرکون علینین باشینا قویوب کئچینه‌سن. الله کریمدی. هر شئی دوزه‌له‌جک.« بو سؤز منی بیر آز اؤزومه گتیردی. خالق نئجه، منده اونون بیری. خداکریمدن یاریم ساعات دانیشیب بیلمه‌دیکلریمی اؤرگه‌شیب، اوشاقلارا سؤز وئردیم؛ آنالارینی ائوه قایتارام. قایین آتام گیله ساری یولا دوشدوم. دئدیم؛ بیر جور بیر تهر آروادا یالاندا اولموش اولسا وعده وعید وئریب، ائوه قایتاریم. سؤکوک – سؤکوک یاشاییشیمدان دوشن سون کرپیجدن باشلاییم. آروادلا چوخ دانیشدیم. آغزیمی آچیب بالاجا بیر یالان سؤیله‌دیکده آغزیمدان ووردو. من دییه‌نده کی گئری دونسن ائوی سنون آدینا سالدیرارام، دئدی: »آی بدبخت ائو قالیب منیم آدیما سالدیراسان؟ سحر – بیر گون نوزولچونون بیری الوندن چیخارداجاق. ایندی سن بیر حصیرسن بیرده ممدنصیر.«آروادین سؤزون نظره آلارق نوزولچویا گئتدیم. یالواریب یاخاریب واخت ایسته‌دیم. سؤز وئردیم، بانکدان وام گؤتوروب اونون بورجونو اؤدهدییم. نوزولچودا اولسا، یاخشی آدام ایدی. بیر نئچه فاییز بورجومون اوستونه چکیب، بورج چئکیمی یئنیلشدیریب واخت وئردی. اوندان آیریلیب، بیر نئچه بانکا باش ووردوم. چوخ قاشدیم آمما باجارمادیم. تانیش بیر بانک ایشچیسی واریمیزدی. اونون قاپیسینا گئتدیم. دویونجان دانیشاندان سونرا دئدی: »سن دئییرسن بلکه بانک وامی ائله – بئله‌سینه وئریر؟ یوخ قارداشیم! بانکین ده فاییزی وار. نوزولچودان دا قالان دئییل. بورجونون بیر آیی یوبانسا چکیب بوغازوندان چیخاردارلار. نوزولچویا یالواریب یاخارماق اولار، آمما بانکین ایشی قانونلادیر. قانونا قارشی گله بیلمزسن.« گومانیم بانکا گلمیشدی. اودا بوشا چیخدی.
یوخ! بو علی – ولی بؤرکو منلیک دئییل. اونو گرک چوخ چوخدان اؤرگه‌شئیمیشم. ایللرجه دوز اوتوروب، دوز دانیشان بیریسی، بیردن – بیره یالان دانیشا بیلمز. ائیری اولماغین دا، یالان دانیشماغین دا اؤزمانی، مکتبی وار. من آخی او مکتبه گئتمه‌میشم. ایندی آغزیمی بیر یالانا آچاندا، اوز گؤزوم پؤرتور، ال – آیاغیم اسیر، آغزیم سؤز توتماییر. عؤمور بویو آلدانماغا یارانمیشام. منیم کیمیلر آلدانماسا اونلار نئجه یاشایا بیلرلر؟ اونلارین دا چؤرهیی یالاندان چیخیر. آرواد اوشاقلارینین قارنینی آج قویمویاجاقلارکی؟ ایندی بو یاشدا، بو ساچ – ساققالدا ائیریلییی باشدییب اؤرگنسم، نه اولار؟ آلتمیش یاشیندا زورنا اؤرگه‌شن، گؤروندا چالار دئمیشلر. دای نه ائدیم؟ منیم کی بوراجان ایمیش. اپریمیش یاخام بورجلولارین پیرتلاقلی اللرینده قالیب.
تک علی – ولی بؤرکو دئییل، یاشاماق بئله منیم ایشیم دئییل. زور دئییل کی باجارمیرام والسلام. هامی منی سو ایچمک کیمی آلدادیرسا بو او دئمک دئییل کی منده اؤزومو آلدادیم. والله هئچ اونودا باشارمیرام. اؤزومو آلداتماق باشارسایدیم چوخ ایشلر یاجاراردیم. دوداغیمی دارتیب، هامینین اوزونه گولردیم. اؤزومو خوشبخت ساناردیم. آرواد مندن آیریلماییب کیمی دوشونردیم. اوشاقلار منله فخر ائتدیینی دویاردیم. یاخام هئچ بیر ایتین الینده قالمامیش کیمی اؤزومو آپاراردیم. یوخ من باجارمیرام. من بئله یاشایا بیلمیرم. الدن وئرمه‌یه هئچ نه‌ییم یوخدو. عؤمور بویو مینلر چتینلییه دؤزوب، الله‌شیب – ووروشوب ائو – ائشیک تیکه‌سن، اؤزوندن سونرادا آرواد – اوشاغینین یاشامینی دا سئوینجله قوراسان، سونوندا بیر گؤز قیرپیمیندا هامیسین ایتیرهسن. ایتیرمک یوخ بوتونلوکله آرادان گئتمک! یوخ من باجارمیرام.دوزو بودور کی اؤز الیمله حیاتیما سون قویوم. »برایان تریسی« دئمیشکن:»دوغرو یاشاییش سنون دوشوندویوندن آیری دئییل.« ایندی منیم باشیمدا اؤلمکدن باشقا هئچ نه یوخدور. بونو اؤز الیمله اؤزوم سئچیرم. کیمسه منه دئمیر؛ گئت اؤزونو اؤلدور. بو منیم اؤزل حیاتیمدیر، کیمه نه؟ من اؤزومله دوشمن اولموشام. من یئرین – گؤیون ان چیرکین آدامی، ان کؤبود اری، ان لیاقتسیز آتاسییام. بو چیرکینلیی ده اؤز الیمله بیله – بیله آرادان قالدیرمالییام. بونودا وورغولاییم کی، کیمسه منیم اؤلومومو سیاسیلشدیرمه‌‌سین. کیمسه‌یه گؤره دئییل، یالنیز اؤزومه گؤره بو ایشی گؤرورم. مینم ایشیم نه اگوستیک‌دیر(خودخواهانه) نه آلتوریستیک(دیگرخواهانه) نه ده آناموک(بی هنجاری)، بلکه ایچیمدن گلن بیر ایستکدیر. »زیگموند فروید«ون دا حاقی یوخدو منیم دالیم سوره دانیشیب منی پیسکوپات بیر خسته سایا. هامینی بزهر اؤزو لوت گزهر مثلی اولماسین. او، اؤزونه یوخاری دوزادا مورفین ووروب اؤلدورمه‌دی‌می؟اؤزومو نئجه اؤلدورسم گؤره‌‌سن یاخشی اولار؟ اؤزومله بیر نئچه مئتیر قالین ایپ گؤتوروم، سسسیز بیر یئر تاپیم، ایپی بیر آغاجدان آسیم، آیاغیمین آلتینا بئش – اون دنه کرپیج قویوم، ایپی بوغازیما کئچیرندن سونرا یاواش – یاواش کرپیجلری آیاغیملا داغیدیم. بو ایش اعدام کیمی گؤرکملی گؤرونسه ده، چوخ اعتبارلی دئییل. آخی اعدامدا دؤولت ایشینی اعتبارلی گؤرور. ایپین، آغاجین، آیاق آلتینین، آسیلان آدامین آغیر – یونگوللویو و هر نه‌یین گوجونو دوزگون اؤلچوب – بیچیرلر. داها دوغروسو اوزمان‌‌لار اؤز ایشلرینی یاخشی باشاریرلار. بوش یئره خرج گؤتوروب موفته‌سینه آد قازانماییبلار کی. منیم ایپیم چوروک چیخار، بیردن ایپ قیریلار اؤلمه‌رم! بیر یانیم ایفلیج اولار! اوندا باشیما نه داشی سالا بیلرم؟ یورغان دؤشه‌یه دوشوب، آیاقلار آلتیندا سورونه‌رم. بلکه اؤزومه اود ووروب یاندیریم! بونوندا قورخولو یئری بوراسیدیر کی، جانیمین آغریسیندان اورا – بورا قاچیب باشقا یئرلری یاندیریب کیمسه‌یه ضرر وئره بیلرم. بیرده اوستومه تؤکولوب، اؤلمه‌میش سؤندوررلر، اوز – گؤزوم یانیق قالار. بلکه ده سیچان داواسی تاپیم آتیم! صاباحلاری اوشاغیمین قاباعینی کسیب، دئمزلر؛ سیچان داواسی ییهنین بالاسی؟ ایسته‌میرم اونلارین آلنیندا بو دامغا قالسین. اؤزومو سودا دا بوغا بیلمه‌رم. بونا گؤره‌کی اوزمه‌یی یاخشی باجاریرام. بیلیرم نفسیم قورتاراندا، اوزوب سویون اوزونه چیخارام. ماشین آلتینا آتیلماقدا دوزگون دئییل. اولا بیلر کی قولوم، قیچیم، بئلیم سیندی آنجاق اؤلمه‌دیم. الیمده – جئبیمده ده پولوم یوخدو بیر تاپانچا آلیم، دایاییم آلنیمین دوز اورتاسینا، بئینیمی پارتلادیب ائشییه تؤکوم!
آمبولانس سسی دای گلمیر. عزراییلی گؤرورم. تپه‌دن دیرناغا قارا پالتار ائینینده، اوز – گؤزو یانان آدام کیمی، باشینی آغ پارچا ایله ساریمیش، الینده اوزون بیر درگاز، درگازینین اوجوندان قان آخا – آخا اوستومه گلیر. قاچیم می؟ قاچماییم می؟ بو اؤلومو اؤزوم ایسته‌سم ده یامان قورخولودور. گؤره‌‌سن ایلکین اولاراق درگازلا هارامی کسیب دوغرایاجاق؟ کئشگه بیر باشا بوغازیمی بیچئیدی. اووووف! نئجه دؤزه بیله‌‌جم. خیرچ سسی یادیما دوشنده جانیم تیترهییر. بو نه یاشامدی آخی؟ دوغولوب بوغازینی عزراییلین درگازینا بیچدیرمک نه دئمکدیر؟ هله کئشگه بونونلا بیته! قورخورام ال – قولومو، قیچیمی کسیب، قارنیمی سؤکوب، دیل – دوداغیمی کسندن سونرا جانیمی آلا. گؤره‌‌سن قیشغیریب، باغیریب دئسم؛ اؤلمکدن پئشمان اولموشام قبول ائدرمی، ائتمزمی؟ اینانمیرام. عزراییل منه بیر آددیم قالمیش، نوزولچو قارداش اؤزونو آرایا سوخوب دئدی:. »رحم ائله ای تانرینین ائلچیسی. اؤلدورمه بو یازیغی.« عزراییل بور و قالین سسی ایله اونون اوستونه چیغیردی: »گئری دور مورتدین بیری مورتد. ندن اؤلدورمه‌ییم؟ سن تانرینین ایشینه نییه قاتیشیرسان؟«نوزولچو اونا بیلدیرمک ایسته‌دی کی، منیم اونا دویونجان بورجوم وار. من اؤلسم اونون بورجلارینی کیم اؤده‌یه‌جک. چالیشدی عزراییلا مالدان – مولکدن پئشکاش گلسین. آمما عزراییل دونیا قانون یوللاریلا اونو باشا سالدی کی گئدیب منیم ورثهلریمدن بورجونو آلسین.
آدام قالماییب قاپیمیزا ییغیشیب. تانیش، اؤزگه، قوهوم، قونشو. دییه‌سن اؤلموشم. آرا بیر آغلاماق سسی گلیر. آداملار، اوچ – اوچ، دؤرد – دؤرد بیر یئره ییغیشیب خیسین – خیسین دانیشیرلار. بیری گؤرومو سؤیور. تومبه‌تین اوغلو تومبه‌تین، سؤزونو دال بادالا ائشیدیرم. بیری دئییردی: »یولون – یولاشیغین بیلمه‌دی بدبخت. گوجو چاتمایان داشی گؤتورمک ایسته‌دی.« باشقاسی، »زهرمار تولوغو سونوندا کؤچدو .« دئییردی. نوزولچونو گؤرورم. فاتیحه‌نی هامیدان اوجا سسله چئویریر. یاخین قوهوم کیمی قاپینین آغزیندا دوروب گلن – گئدهنین سلامین آلیب، »آلله سیزونده اؤلنلروزه رحمت ائله‌سین« دئییردی. ائله بیل یاس ییه‌سی بو کیشی ایمیش. آز بیلمیر کی. بیر کره بورج وئردیینی اون قاتینا چیخارتمیشدی. من اونا پول داغارجیغی ایدیم. یئنه ده آلله آتاسین رحمت ائله‌سین. بیر آغ ساققال کیمی مجلیسی دولاندیریردی. یاسا گلنلر، آزالاندان سونرا اؤزون اوغلوما ساری وئریب، جئبیندن بیر نئچه کاغیذ چیخاردیب اونا گؤستردی. یاواش – یاواش دانیشیردیلار. ائشیتمه‌سم ده بیلیردیم دانیشیق، بورجلاریما چکدییم چئکلریمدن گئدیر. ائوه ییهلنمک اوچون ان اویغون واخت ایدی. اوغلوم باشینی آشاغا سالیب آغلاییردی. دئمه‌یه سؤزو یوخ ایدی. گاه گؤزونون گاهدا بورنونون سویونو سیلیردی. بلکه اودا منی یامانلاییردی. منه، بو گونو گؤرمک اؤلومدن داها پیس ایدی. کئشگه اؤلمه‌‌‌سئیدیم. کئشگه باشقا یول تاپیب بوگونه دوشمه‌سئیدیم. بیر یول اولمالیدی البت. اؤلوم دئییلدی کی، چارهسی تاپیلمایا. بو نه ایش ایدی باشیما گتیردیم؟ اؤزومدن سونرا گؤر نئچه‌لرینی پیس گونه قویدوم؟قبیرده راحات اوزانمیش کیمی ایدیم. داها هئئئئئئئئئئچ نه یوخ ایدی. انکیر – منکیرلرین ده منله ایشلری یوخ ایدی. بیردن قولاغیما بیر سس گلدی. اوجادان نم کیمسه‌یه دئدی: اؤزونه گلدی. آغ گئییملی ایدی. انکیر – منکیر اولمالیدیر. ایسته‌دیم قیشقیریب دئییم: گوناهسیزام، حاققینیز یوخدو منی جهنمه آپاراسینیز. بیر قادین، الجکلی الین باشیما قویوب دئدی: اللها شوکور بوگون یاخشی سان.» اویان – بویانا باخدیم. نئچه‌لری منیم کیمی الینده – قولوندا سوروم اوزانمیشدیلار. الیمی اویان بویانیما ووردوم.آردی وار
Arazazarbaijzn.anadilimiz@gmail.com
نوشته شده توسط admin در شنبه, ۰۴ مرداد ۱۳۹۹ ساعت ۱:۰۵ ب.ظ
