کهلیک

کهلیک

رضا همراز
بئله دئییرلر، اسکی زآممانلاردا گونلرین بیرینده بیر نفرین الی بتر بوشا چیخار. بو یازیق آدام اؤزون چوخ اویان – بویانا، اودا – کؤزه ویردیقدا مع‌الاسف الینه پول توخدآمماییب، الی هر یئردن اوزولور. بئچاره کیشی بو فیکره دوشر کی اؤزون چؤل – باییرا ویرسین تا بلکه قورد – قوش داغیدیب، آجی یاشاییشدان الی اوزولسون.کیشی اؤزون چؤله ویردیقدا فیکریندن مین – بیر ایکی فیکر و خیال کئچیردی. آخ نه ائدیم؟ نه تهر اولاجاق؟ آرواد – اوشاق نئجه اولاجاق‌لار؟ و… بو آرا بیردن بیره بیر اتلی کهلیک سسی یازیق کیشی‌نین فیکرین اؤزونه جلب ائدر. بو دؤنه او تام فیکیرلرین اونودوب، یالنیز کهلییه فیکر ائدر. نه گؤزل کهلیک‌دیر؛ قلم قاش‌دیر؛ اتلی‌دیر؛ یئریشینه باخ و… بو دؤنه کیشینی تآمماح توولاییب اونو توتماق قرارینا گلر. او حیله ایله، کلک ایله، فیشقا چالا- چالا دیلسیز آغیزسیز کهلییی خامسیدیب، بیردن بیره توتار. یازیق کهلیک ایسه کیشی‌نین قوجاغیندا هئی قاققیلداییب، اونون قوجاغیندا قاناد چالیب اوچماغا چالیشار. آمما نه ائیله‌مک، اولماز کی اولماز.قارابخت کیشی ایسه “هه یاخشی اولدو، بو گونون خرجی چیخدی. اونو آپاریب شهره ساتارام”- دئیه شهره ساری یوللانیر. هله تزه شهرین دروازاسینا چاتمامیشدیر کی، گؤرر چال – چاتداسین سسی گلیر. بیر ایکی نفر اورادا اولانلاردان “آی بالا نه خبر دی”- دئیه “شاه گلیر” بیله‌سینه دئیرلر. آوارا – سفیل دولانان کیشی کهلییی قییناغینا ویریب، شهره ساری یئنه یولا دوشر. بو دؤنه – سالام آی کیشی! سسی بونو دیسکیندیرر. سسه ساری دؤنوب بیر عسگر گؤرر. بختسیز کیشی تیتره‌مه‌یه دوشوب قورخوسوندان ال – آیاغی اسمه‌یه باشلار. آمما دولت آدامی (عسگر) اوزون اونا توتاراق “اده قورخما من سنین دوستونام؛ منی خاطیرلاییرسان‌می ؟”- دئیه یازیق کیشی‌نین قورخوسوندان بیر آز آزالار. اونلار خوش – بئش ائدیب، بیر آز سونرا یازیق کیشی‌نین یادینا دوشر کی نئچه ایللر قاباق او عسکره بیر خدمت ائتمیشدیر؛ شانسدان او عسگر اونون یاخشیلیغین اونوتماییب، چالیشیردی بیر تهر اونو جبران ائله‌سین.بو ایکی قدیمی دوست بیر آز خوسانلاشاندان سونرا بیر- بیرلرین یاخشی باشا دوشرلر. باختی قارا کیشی باشینین حال قضیه‌سین اونا دئدیکده عسگر اوزون اونا توتوب “عجب عجب اولسون، سن هئچ ده نایراحات اولما، من سنه ایندی بیر یاخشی یول گؤستره‌رم” دئیه- او کیشی‌یه اورک وئرر.شاه ایندی بورایا گله‌جک. سن بیر رول اوینا تا اوندان بیر پول بلکه قوپارتدیق. نایران اولما من سنه اونلا گؤروشمک ایمکانی دا یارادارام.هئچ قورخما! یازیق کیشی‌نین ایکی الی اولار بیر تپه‌سی؛ آی میخی میسمارا دؤندرن آللاه! منه اؤزون یاردیمچی اول. سن گئچمه آللاهین ایشلریندن. بیر نئچه دیقه سونرا بو ایکی دوست حیم بیر اولوب بو قرارا گلرلر کی بیر جور بو کهلییی شاها ساتسینلار.بو سؤز یا داها دوغروسو کلک، بونلارین آغیزلاریندان تازا چیخمیشدی کی سس قوپار- “شاه گلدی”! شهرین مئیدانینا حامی توپلاشیب شاهینان گؤروشمک ایسته‌ییرلر. آمما دارغالار بو ایمکانی اونلاردان آلارلار. هامان عسگر قاباغا یئری‌ییب، دارغالارین بؤیوگونه دئییر” – “اجازه وئرین بو آدام گلسین شاهین قوللوغونا. بونون بیر جور کهلییی وارکی دیل بیلر. اونو ایسته‌ییر شاها پئشکش ائتسین.اونلار ایسه بو سؤزو ائشیتجه‌یین تعجبله‌نیب “بو اولان ایش‌دیر”- دئیه توموب اجازه وئررلر. بو کیشی الین باش گؤزونه چکیب و سؤزلرین ذهنینده حاضیرلاییب، دوستونون همتی و یاردیمی ایله شاهین قوللوغونا یئتر. اؤنجه سالام وئریب دانیشیق ایجازه‌سی آلیب دئیر: شاها سنه فدا اولوم من؛ بیر کهلیک توتموشام کی یالنیز سیزه لایق‌دیر. بو کهلیک عجیبه – غریبه ایشلر گؤرر. مثلا بونا اؤیره‌دنده کی گئت اون دانا کهلیک گتیر، اون بئش دانا توولاییب گتیریر. ائله اونا گؤره من صلاح گؤرورم اونو آلیب آپاریب درباردا ساخلایاسینیز کی شوبهه‌سیز لازیم اولار.شاه بو کیشی‌نین آغ یالانلارین دینله‌دیکده گولومسه‌ییب الین جیبینه آتیب، اونا بیر کیسه آلتون سیککه وئره‌رک کهلییی اوندان آلیب و ائله هامان لحظه الین آتیب اونون بوینون اوزوب باشین بیر طرفه، لشین ایسه بیر طرفه تولازلایار.
بو ماجرانی گؤرنلر حویوخوب بیر سوکوت مجلیسه حاکیم اولار. بیر آز سونرا قوللوقچولارین بیری شاها “سنه فدا اولوم، اولمایا سنه لایق دئییلدیر کی به‌ینمه‌دینیز؟” دئیر.یوخ، یوخ هئچ ده ائله دئییل. باخین بیر کهلیک کی اوز یار – یولداشین گودازا وئره، اونلاری توولاییب مفته‌سینه ساتا، جزاسی یالنیز اؤلوم دور.بو سؤزو شاهین آغزیندان ائشیدنلر هامیسی یئنه توموب، یئنی بیر درس آلمالارین اؤیره‌ندیلر…..

نوشته شده توسط admin در چهارشنبه, ۱۹ شهریور ۱۳۹۳ ساعت ۴:۰۱ ق.ظ

دیدگاه


× سه = 12