سونسوز محبّت و گوذشت
گنجعلی صباحی
من بیر اوشاق، سن بیر آنا
اودور کی، باغلییام سانا
هانکی سمته هانکی یانا
هئی اوچسام دا یووام سنسن
ائلیم، گوٍنوٍم، اوبام سنسن.
- دئیه، اوجالان گؤزل سس اوره‌کلری اوخشاییردی. ترانه تزهجه قوتارمیشدی کی، قاپی دویوٍلدوٍ. مریم تئز آیاغا دوردو.
- حتمن ترلاندیر!- دئییب، قاپییا دوغرو یوٍیوٍردوٍ. آخی قیزی تهراندا یاشاییردی.
بؤیوک قارداشی دؤنمز تئلفونلا دانیشمیش جریانی سؤیلهمیش، اونو اوغلو رشید ایله گؤروشه دعوت ائتمیشدی.
قاپی آچیلدی. قیرخ یاشیندا اوجا بویلو، خوش انداملی، گؤزل بیر قادین ایچری گیردی.
آنا ایله بالانین قوللاری آچیلدی. قوجاقلاشیب، گؤروشندن سونرا گئدیب اوتاغا گیردیلر.
ترلان آتا و قارداشلاری ایله گؤروشندن سونرا اوزوٍنوٍ یاد بیر جاوان قارشیسیندا گؤروٍب دایاندی.
اوره‌ک چیرپینتیسی آرتمیشدی»یعنی، بو منیم کؤرپه رشیدیمدیر«- دئیه، گؤزلرینه اینانمیردی. رشید ده مات- مات اونا باخیردی. حسن بابانین دوداقلاری قاچدی.
- اوغلوم! نییه مات قالمیسان، آختاردیغین دوغما آناندیر دا!- دئدیکده، رشید یاز بولودو کیمی دولدو. گؤزلریندن یاش آخماغا ایشقیریقلار ایچریسینده،
- آناجان!… – دئییب، اؤزوٍنوٍ ترلانین قوجاغینا آتدی. هیجانا توتلدوغونو گؤرن آنا:
- آغلاما، منیم رشیدیم آغلاما!- دئییب، اونو باغرینا باسدی. اوغلونون آراسی کسیلمهین ایشقیریق سسی، اون سککیز ایل قاباق کؤرپه رشیدی زورلا، آغلایا- آغلایا اوندان آییردیقلاری آنلار گؤزوٍنوٍن اؤنونده جانلاندی.
بوٍتوٍن ووٍجودو سارسیلدی. گؤزلریندن آخان ایری داملالار اوٍزوٍنوٍ ایسلاتدی. توتغون سسله:
- سن یئکه اوغلان اولموسان! کیشی ده آغلایارمی؟- دئیه، رشیدی توختاتماغا چالیشدی. ایللر اوزونو دوغما آنا حسرتیله چیرپینان اوره‌ک آسانلیقلا توختایا بیلردیمی؟ بو منظرهدن اوتاقداکیلارین هامیسینین اوٍرهیی کؤورلدی، گؤزلر دولدو، اوره‌کلر بوشالدی.
بو گؤز یاشلاری غم- کدردن دئییل، ووٍصال بولودوندان تؤکوٍلن داملالار ایدی.
???
سحر ساعات اون اولاردی. رشید یئنه آناسینین گؤروشوٍنه گلمیشدی. آنا ایله بالا اوزون ایللر آیریلیق اودوندا یانا- یانا ووٍصالا چاتمیش ایکی سئوگیلی کیمی، اوٍز- اوٍزه اوتورب بیر- بیرینه تاماشا ائتمکدن دویماییردیلار. ترلانین باشیندا کئچمیش خاطیرهلر قیمیلدانیردی: ایلک اودلو عشقی اسن قارا بیر یئلدن نئجه سؤندوٍیوٍ، گنجلییینین آجی و شیرین آنلاری خیالیندا رقصه گلمیشدی. درین بیر آه چکهرک:
- دوغرودان دا هرهنین بیر سرنیویشتی واریمیش.
کیم دئیه بیلردی کی، آتان گؤزلهنیلمز بیر تصادوٍفده اؤلهجک، ائویمیز داغیلاجاق، اؤز جانیمدان ارتیق سئودیییم بیرجه بالامی الیمدن آلاجاقلار. اونو گؤرمکدن ده منی محروم ائدهجکلر.
بیزیم ده آلنیمیزا بئله یازیلمیش ایمیش… دیء گؤروٍم، نئجه اولدو کی، بیردن دوغما آنا فیکرینه دوٍشدوٍن؟ یوخسا، عمیندن، پری خانیمدان ناراضی ایدین؟- دئیه سوآل وئردیکده، رشید یوخ آناجان! اونلار منی اوز جانیندان آرتیق سئومیش، همیشه نازیملا اوینایـیبلار.
آغلیم کسندن بویانا آتامین اؤلوٍموٍنوٍ درک ائتمیشدیم. آنام ساغ اولدوغونا دا اینانیردیم. سیزی گؤرمک هوسیله اوٍرهییم چیرپینیردی. بو آرزی گوٍنوٍ- گوٍندن شیددتلندی.
سون گوٍنلرده لاپ دلی کیمی اولموشدوم. ناراحاتلیغیمی گؤرن عمیم معمّانی آچدی، منی حسنبابانین یانینا آپاریب تانیش ائتدی. داییلاریملا گؤروشدوٍم، اوٍرهییم بیر آز توختادی. دوٍنن گلهجهیینی منه خبر وئردیلر. منه نه حال اوٍز وئردییینی دئیه بیلمیرم- دئدی. ترلان:
- بیزیمله گؤروشوٍندن پری خانیم خوشحالدیر یوخسا…
- متأسفانه یوخ! او گوٍندن کی، من گؤروش فیکرینه دوٍشموٍشم، اونون گوٍلر اوٍزوٍنوٍ غم بولودو اؤرتوٍبدوٍر.
منی گؤرنده گؤزلری دولور، نه قدر دانیشدیریرام، جاواب وئرمیر- دئدیکده ترلان فیکره گئتدی. سانکی اونون ناراحاتلیغینین عللتینی دویدو.
- یوخ! – دئدی. من گرک اونون نیگرانلیقدان چیخاردام. دور اوغلوم! دور گئدک سیزه. من اونونلا دانیشمالییام- دئییب آیاغا دوردو. رشید آناسینین تصمیمیندن حئیرته دوٍشسه ده بیر سوز دئمهدی. دوروب آناسییلا یولا دوٍشدوٍ.
یول اوزونو ترلانین بئینینده جوٍربهجوٍر قاریشیق فیکیرلر قایناشماغا باشلادی. بلکه پری منیله گؤروشه حاضیر اولمادی.
منیمله اوٍز- اوٍزه گلهجکمی؟ رفتاری نئجه اولاجاق؟ بلکه ده هئچ ائوینه یول وئرمهدی. کیم بیلیر ایندی او، نه دوٍشوٍنوٍر، فیکری هارادادیر.
و سایره… چوخ فیکیردن سونرا، بو قرارا گلدی کی، اوّل بؤیوک قایین خاتونون یانینا گئتسین. اونونلا بیرلیکده پرینین یانینا گؤروشوٍنه گئتسینلر.
بیلیردی کی، زینب خانیمین اونون یانیندا چوخ احتیرامی واردیر.
ائله ده ائتدی. رشیدین اوٍچ عمیسی واردی. ائولری بیر- بیرینه یاخین ایدی. ترلان اوٍچ ایل بو خانوادهنین کیچیک گلینی اولدوغو، اؤز اخلاق و رفتاری ایله هامیسینین محبّتینی قازانا بیلمیشدی.
اونو سئویردیلر. زینب خانیم اونو گؤرنده ائله بیل اوزون ایللر آیری دوٍشموٍش دوغما باجیسینی گؤردوٍ.
- آی قیز ترلان!… دئییب، اونو قوجاقلادی. اؤپوٍش- گؤروشدن سونرا:
- سن هارا، بورا هارا؟ باجی دا بئله وفاسیز اولارمیش؟ هله دیء گؤروٍم، نه عجب بیزی یاد ائتمیسن؟- دئیه، بیلمیردی نه ائتسین.
اوتاغا کئچدیلر، اوتوراندان سونرا ترلان گلیشینین سببینی اونا سؤیلهدی.
زینب اونون پاک، اینسانی نییتیندن خوشحال اولدو.- آفرین باجی- دئدی. سن بونونلا اونون تلاطوٍمه توتولموش قلبینی توختادا بیلرسن. اؤزون بیلیرسن کی، اونون بو دوٍنیادا هئچ کسی یوخدور. بوٍتوٍن محبّتینی رشیده سالیبدیر. یاشاییشی اونا باغلیدیر.
اونسوز، او دلی اولار- دئییب، چادراسینی باشینا سالدی. هر اوٍچوٍ یولا دوٍشدوٍلر.
رشید قاپینی دویدوٍ. پری قاپینی آچدیقدا زینب، ترلان و رشیدله اوٍز- اوٍزه گلدی. اونا عجیب بیر حال اوٍز وئردی.
قلبینده ترلانا قارشی نیفرت حیسبی دویسا دا اؤزوٍنوٍ اله آلدی. ترلان گوٍلر اوٍزله اونو قوجاقلاییب اؤپدوٍ. آنجاق پرینین توتغون دومانلی اوٍزوٍ آچیلمادی. اوتاغا کئچدیلر. زینب گوٍلر اوٍزله:
- آی قیز! نه یامان قاش- قاباغینی ساللامیسان؟ ترلان باجی ائوینه گلیب- دئدیکده، پری کوٍسکوٍن بیر حالدا،
- خوش گلیبدیر. آمما نهیه گلیبدیر؟…- دئدیکده، ترلان اونا یاخینلاشاراق،
- باجی جان! سن نه فیکیر ائدیرسن؟ خیال ائدیرسن کی، من رشیدی سنین الیندن آلماغا گلمیشم؟ منیم نه حاققیم وار ائله بیر فیکره دوشم؟ او گوٍندن کی، اونو منیم الیمدن آلدیلار اونو اؤلدوٍیه قویموشدوم، دیریلییینه باعیث سن اولموسان.
گئجه- گوٍندوٍز ناز ایله اویناییب، زحمتینه قاتلاشان من اولمامیشام، سن اولموسان! آیریلدیغیم کؤرپه رشیدی ایندی بیر اییید اوغلان گؤردوٍکده سئویندیم.
گلدیم قایغی و زحمتلرینیز اوٍچوٍن سیزدن تشککوٍر ائدم. من دوغما آناسی اولسام دا، حقیقی آنا سیزسینیز. گلنده، یولدا اونا دئمیشم: »منی ترلان, سیزی آنا سسلمهلیدیر.
سیز ایجازه وئرمهسهنیز، منیمله گؤروشه گلمهیه ده حاققی یوخدور.
او، همیشه سیزنله یاشایاجاقدیر«- دئدیکده، پرینین غم بولودو ایله اؤرتوٍلموٍش اوٍزوٍ آچیلدی. سئوینجینین شیددتیندن گؤزلری دولدو. دوروب دؤنه- دؤنه ترلانی اوپدوٍ.
- قوربان اولوم سنه ترلان! گرک منی باغیشلایاسان. حاققینیزدا پیس قضاوت ائتمیشم- دئدی. زینب:
- آی خانیم! من سنه دئمهدیممی، ترلان کیشی قیزدیر. حالال سوٍد امیب، هئچ واخت سنین زحمتینه گؤز یوموب حاققینی پایمال ائتمز. خوش رشید بالانین حالینا کی قلبلری سونسوز محبّت و گوٍذشتله دولو آنالاری واردیر.
رشیدین دوداقلاریندا تبسّوٍم، گؤزلرینده راضیلیق قیمیلداندی.
نوشته شده توسط admin در دوشنبه, ۱۰ شهریور ۱۳۹۳ ساعت ۵:۲۳ ق.ظ
