امیرکبیرین آغلادیغی گون
چئویردی: سوسن_نواده‌رضی
آنادیلیمیز:۱۲۶۴ هجری قمری ایلینده امیرکبیر-ین بویوروغو ایله، ایران دولتی‌نین ایلک آشیلاما برنامه‌سی گرچکلشدی. بو بویوروقدا، بوتون ایرانلی اوشاقلارلا یئنی یئتمه‌لره چیچک دویولمه (واکسیناسون آبله) پلانلاشدیریلمیشدی.
آنجاق آشیلاماق سوره‌سی باشلاناندان بیر نئچه گون سونرا، امیرکبیره خبر گلدی کی، جماعت بیلیکسیزلیک و عواملیقلاری اوزوندن آشیلانماق ایسته‌میرلر. خصوصاً ده کی، بیر نئچه فالچی و دعا یازان شهرده بئله چوو سالمیشدیلار کی، چیچک دویوپ آشیلانانلارین دامارینا جین گیریپ قانیندا دولاشار!
یئنه ده بئش کیشینین چیچک سایرولوغوندان (خسته‌لیگیندن) اولدوسو خبری امیرکبیره گلیپ چاتینجا، امیر در حال فرمان وئردی کی، هر کیمسه آشیلانماغا قارشی چیخیپ چیچک دویدورمکدن ساقینیرسا، دولت صندوغونا بئش تومن جریمه وئرمه‌لیدیر. او ائله سایردی کی، بو امری ائشیدن هر کیمسه، آغیر جریمه دردیندن آشیلانماغا بویون اگه‌جکدیر. آنجاق دعایازانلارین سوزلری‌نین داها دا کئچرلی اولماسی، هم ده جماعتین جاهللیگی أل-أله وئرید أمیرین بویروغونا اطاعت ائتمکدنسه، آشیلاماقدان قاچینماغی ترجیح ائتدیلر یئنه ده. یئترینجه مالی اولانلار بئش تومنلری وئریپ آشیلانماقدان سییریلدیلار. پوللاری اولمایانلار ایسه، مأمورلار قاپیلارینی چالینجا، سردابالاردا سیغینیب گیزلنه‌رک یا خود شهر دیشینا قاچاراق آشیلانماق هده- قورخوسوندان جانلارینی قورتاردیلار.
ربیع الاوّلین ۲۸- ینده، امیر کبیره راپورت گلدی کی، بوتون تهران شهری وچئوره کندلرینده یالنیزجا و یالنیزجا ۱۳۵ نفر چیچک دویدوروبلر. همن گون، بالاسی چیچک سایرولوغوندان اولن بیر پینه‌چینی امیرین حضورونا گتیرتدیلر. امیر کبیر زواللی اوشاغین جانسیز جسدینه باخیپ دئدی: »آخی بیز کی بالالارینیزی قورتارماغا گوره چیچک دوگن آداملاریمیزی قاپینیزا گوندرمیشدیک!« یاشلی آدام اوزونتولر ایچینده جواب وئردی: »أمیر حضرتلری، منه دئمیشدیلر اوشاغا چیچک دویدورسم جن گیرر قانینا بالامین«. أمیر کدرلره قاپیلاراق باغیردی »ا?مان نادانلیق ألیندن، ا?مان جاهللیکدن! ایندی سن هم بالانی ایتیرمیشسن هم ده بئش تومن جریمه وئره‌سن گرک!«. اختیار زارییپ یالواردی: »اینانین هیچ نه‌ییم یوخدور«.
أمیر ألینی جیبینه اوزالدیپ بئش تومن چیخاردیپ اونا وئردی و دئدی: »وئریلن حکم قایتاریلماز! آل بو بئش تومنی دولتین صندوغونا سال«.نئچه دقیقه کئچمه‌میشدی هله، بیر بقّالی ایچری گتیردیلر. اونون دا بالاسی چیچکدن اولموشدو. بو کز أمیر دوزه بیلمه‌دی. جوشوپ داشدی. بو آجییا دایانا بیلمه‌دی. چوکدو صندلی اوستونه و
اورگی پارتلادی سانکی. ایچدن هیچقیریپ اوجا سسله آغلاماغا باشلادی….همن آن میرزا آغاخان ایچری گیردی. او، آزاراق أمیر کبیرین آغلاماسینی گورموشدو. ندنینی سوروشدو. گورَولیلر، ایکی سود أمر اوشاق – بیری بقّالین بیری ده پینه‌چی‌نینکی- چیچکدن اولموشلر، دئدیلر. میرزا آغاخان شاشیرمیش، دئدی » عجب، من ائله ساندیم أمیرین اوز اوغلو، میرزا احمدخان اولوبدور کی أمیر بئله هارایلی هارایلی اورکدن آغلاییر.« سونرا أمیره دوغرو گئدیپ یاخینلاشدی و دئدی: » بقّال-چقّالین سود أمر چوجوقلارینا آغلاماق ،هم ده بو سایاق،هیچ شأنینیزده دگیل، یاخیشماز أمیره.«.
أمیرکبیر باشینی قالدیریپ درین غیظ ایله اونا باخدی. ائله غضبلیجه باخدی کی، میرزا آغاخان هورکوپ، تیتره‌شدی اعضای بدنی.
أمیر گوزیاشلارینی سیلیپ دئدی: »بیز بو ملّتین باشیندا اولدوغوموز سوره‌جه، اولوملریندن بیز سوروملویوق! »
میرزا آغاخان قیسیق سسله دئدی»آما أمیر، بونلار اوز جاهل‌لیکلریندن دولایی چیچک دویدورمه‌ییر اولورلر.»
أمیرکبیر اوجا و یئتکین بیر سسله دئدی »جاهل‌لیکلری‌نین ده سوروملوسو ائله بیزلریک! بیز هر کندده،هر کوچه‌ده و هر خیاباندا مدرسه‌لر تیکدیریپ کتاب ائولری آچساق، دعا یازانلارلا فالچیلار دا بساطلارینی ییغیشدیرارلار.
بوتون ایرانلیلار منیم حقیقی اولادلاریمدیرلار .و آغلادیغیم دا بو اوزدن‌دیر کی، بو جماعت اولمگی چیچک دویدورمگه اوستون توتاجاق قدر جاهلدیرلر.«
نوشته شده توسط admin در دوشنبه, ۲۴ آبان ۱۴۰۰ ساعت ۲:۲۲ ب.ظ
