رومانتیک بیر گئجه

رقیه کبیری
آنادیلیمیز: رومانتیک بیر گئجه حاضیر‌لامالییام ایل‌لردن سونرا. اوشاق‌لار بئش گونلوک بیر سفره گئدیبلر. باش-باشا قالمیشیق ایکیمیز.
ایداره‌دن اونون ایش یئرینه زنگ آچدیم. هر زامانکی کیمی یورغونلوق سسیند‌ن تؤکولوردو.
ـ »بیر سورپیریزیم وار بو گئجه. لوطفن بیر آز تئز گَل!«، دئدیم.
بیر آن تئلفونون دسته‌ییندن ـ »گؤروم دا« کلمه¬سینی ائشیدنده، بوتون سَسیمین نئشه‌سی بوغازیمدا دویونله‌نیب ایتدی.
یول قار-کولک‌ ایدی. تئلفوندا ـ »ساعات بئشده ترمینالدا یولونو گؤزله‌ییرم. تَکلیکدن باغریم چاتلادی… « دئمیشدی.
ساعات یئددی اولموشدو؛ کولَکدن قورتارمیش اتوبوس ترمینالین قاپیسیندان ایچَری گیرنده، ـ »سنی دونموش پنجره‌لرین دالیندا گؤرَنده، سئوینجدن قلبیم دایانا بیلردی« پیچیلدامیشدی قولاغیما.
سونرا زیللَنمیشدی گؤزلریمه. الیمی ائله سیخمیشدی کی، بارماق¬لاری¬نین ایزی الیمده قالمیشدی نئچه گون.
ال¬لریم بوش. ائوه الی دولو گئتمه‌لییَم. ان سئودییی یئمه‌یی پیشیرمه‌لییَم .هر شئی مکمل اولمالی بو گئجه. تام ایلک گئجه بیرلیکده اولدوغوموز کیمی. چیچَک آلماغی دا اونوتمامالییام.
بیر چلنگ آغ رُز قونچاسی وئرمیشدی الیمه. عقد خطبه¬سینی اوخویاندا دا، گؤزلریمی گؤتورَنمه¬دیم چیچک¬لردن …
گولچو مغازاسینا گیرنده، تانیش بیر قوخو، مریم گولونون اییی دولدو بورنوما. نه‌ ایسه ایکی قیرمیزی رُز قونچاسی گؤزومو توتدو. ـ »لوطفن گؤزَل باغلایین! ایکی نیشانلی ایچون آپاریرام«، دئدیییمده، یاناق¬لاریمین قیزارماسینی حیس ائتدیم.یاناق¬لاریمدان اود قالخیردی سانکی. حیاتدا هئچ بیر شئی منی بو قدَر سئویندیره‌مزدی. چیچک قوخوسو اوتاغی گؤتورموشدو. الیمده‌کی چلنگی اییله‌دیم.
اوتاقداکی چیچک قوخوسو فرقلی ‌ایدی. گؤزلریمی یوموب، ال¬لریمدن یاپیشاراق، یاتاغا ساری آپاردی منی.
یورغانی آچاندا، نفسیم چیخمیردی سئوینجیمدن. یورغانین آلتی دولو ‌ایدی قیرمیزی رُز ‌ایله، مریم چیچه¬یی ‌ایله.
ائوه یئتیشَندن سونرا، هر ایشدن قاباق دوش آلیب، ساچ¬لاریمی بیگودیله‌دیم. مکمل بیر قادین اولماق ایسته‌ییردیم. قادینلیغیمی حیس ائتمک ایسته‌ییردیم. محتشم بیر گئجه اولمالی ‌ایدی بو گئجه.
یئمک حاضیر. موسیقی اوچون ایکی کاسئت سئچیب ضبط¬ده یئرلَشدیردیم. زمانیندا یالنیز بیر دویمه‌نی باسمالی ‌ایدم.
ساعات مندن چوخ تله‌سیر آخشام اولماق اوچون. آمما من هله حاضیرلانمامیشام. پالتار کُمُدونون قاباغیندا دونوب قالمیشام. نه گئیه‌جَییمی بیلمیرم. بیر ایکی دونو گئییب چیخارتدیم. آغیر قابیل، عینی حالدا وسوسه‌لی اولمالییدیم.
ـ »منیم اوچون قادینین فیکیری هر شئیدن ایره¬لی¬¬دیر. گئیینیشی، منجه فیکرینه باغلی‌دیر. آمما خصوصی حیاتیندا، هوس‌لی و پارلاق اولمالی‌دیر!«، دئمیشدی.
بیر سورمه‌ای، گوموش رنگینده نارین گول¬لری اولان یاخاسی آچیق بیر دونو سئچدیم. میرواری‌لاریمی دا بویون قولاغیمدان آسلادیقدان سونرا، قاش گؤزومو قارالادیم.
ماشینی¬نین سسینی دویوب سالونا ساری گئدَنده، گوزگوده ووقارلی، آز آججا دا گؤیچک بیر قادین گؤردوم.
قاپینی آچدیقدا، هر گونکی کیمی اوزومه باخمادان ایچَری گیردی. یئنیدن دؤنوب باشدان آیاغا منه بیر نظر سالدی. گؤزلریندن یورغونلوق یاغیردی.
ال¬لری قاپ قارا‌ ایدی. حاماما ساری گئدنده، ـ »لوطفن بوگون حوله‌ ایله اوتورما میز باشیندا. پالتارلارینی حاضیرلامیشام«، دئدیم.
دوشدان چیخیب اوتاغا گیردی. ایکی رُز چیچه¬یی میزین اورتاسینا، شمع‌لرین آراسینا قویدوم. چیراق‌لاری سؤندوردوم. شمع‌لرین ایشیغی تیتره¬ییردی دیوارلاردا.
کت-شالواری تخت اوسته سَریلی قالمیشدی. تی¬شرتی ائو شالواری¬نین اوستونه چکیب اوتاقدان چیخاندا، ـ »نییه سؤندوردون چیراق¬لاری؟ قارانلیقدا نه یئمک اولار کی!« دئییب چیراق¬لاری یاندیردی.
مریم چیچک‌لری¬نین قوخوسو دولموشدو جانیمیزا. شمع‌لری یاندیریب، چیراق¬لاری سؤندورموشدو.
شمع‌لرین ایشیغی تیتره‌ییردی مریم چیچک‌لری¬نین اوزَرینده. بیزیم کؤلگه‌میز دیواردان یاتاغا یئنمیشدی.
قاشیق چَنگل بوشقابا دَییب، آرامیزداکی سس‌سیزلییه سون وئریردی. اؤزومو سیندیرمادان، حاضیرلادیغیم کاسئت‌لردن بیرینی اوخوتدوردوم. اونونلا اوز به اوز اوتوردوم. کاسئتدن چیخان موسیقی سسی ده اوستون گله‌نمیردی یئمک لذتینه.
ـ »ال¬لرین آغریماسین!« دئییب، میز باشیندان قالخدی. هر گونکو کیمی تلویزیون قاباغیندا اوتوروب، مخده‌یه سؤیکَندی. بیر بالیش دا آیاق‌لاری¬نین آلتیندا، کنترل ایسه الینده .
نفس‌لری¬نین سسی ایتمیشدی موسیقی سسینده، تلویزیوندان یاییلان خبرلر ایچینده.
من، تک باشینا میز باشیندا اوتورموش، قیرمیزی رُز چیچک¬لرینی ده الیمده اوینادیردیم. او ‌ایسه ایشدن گلمیش، یورغون‌ ایدی. هم ده چوخ یورغون.