آچیق سوز
کوچوره ن:اکبرسعادت
آنادیلیمیز:جامعهنین قضاوتی انسانلاری یالان دانیشماغا و یالانچی اولماغا سوق وئرر. مخصوصا دینی جامعهلرده، اشخاصین دینی و اعتقادلارینین اونلارین اجتماعی موقعیت و قضاوتلری بارهده رولو اولدوغونا گوره انسانلار اوزگهنین دقتینی جلب ائلهمکدن اوتری چوخ راحت یالان دانیشیب اوزلرینی اولمادیقلاری کیمی گوستریرلر.یالانلارین چوخونون اساس عاملی قورخودور. متاسفانه بیزیم جامعهمیزده تنبیهلی رفتارلار، دانلاماق و مقایسهلی رفتارلار انسانلاری، ائله اوشاقلیق یاشلاریندان یالان دانیشماغا طرف سوق وئریر. اوشاق، تنبیه و مجازاتدان قورتولماقدان اوچون یالان دانیشماغی لاپ راحت یول کیمی سئچیر. و بو رفتار اونون شخصیتینده کوک سالیر. یالان سوزجویونون نه زامان یارانماغین فیکر ائلهمیرم کیمسه بیله. اینسان اوغلو بلکه اوزونو تانییاندان بو یالانلا اوزلشیب. هر کس اوز آچیسیندان یالانا باخیب و هر آچیدان باخیلدیقدا یالانی اوزگهسیندن ائشیتمک چوخ چیرکین اولوب. هئچ کیم یالان ائشیدن کیمسهدن خوشلانماز. آنجاق بو کی اوزو یالان دانیشا، چوخ چئشیتلی باخیشلار وار.کیمسهلری یالان دانیشماغی یاخشی بیلیب، یالان اولماسا دا گونون گئچیلمزلیگین وورغولویورلار. داها دوغروسو چورکلری یالاندان چیخیر. بو آداملارین یالانلارینا چوخلاری اینانارلار. تکجه اوزون سوره او آداملاریلا قالدیقدا یالانلاری اوزه چیخار. او زامانا دک ده آللاه بیلیر یالانلاریلا نه قدر آداملارین باشلارینا بورک قویموش اولورلار!. بئینینیزده سالین گورون بو قوروپ کیملر اولا بیلرلر؟
بیر سیرالاری یالان دانیشماغی خوش بیلمهسهلر ده، اوزل زامانلار یالان دانیشماق زوروندا اولورلار. بو آداملار یالانی چیزکین بیلسهلر ده یالانین گئچرلی اولدوغونو دوشونرلر. بیر سیرا دا آداملار وار کی یالان دانیشاندا قیپ-قیرمیزی قیزارارلار، هر کس ده بیلر اونلار یالان دانیشیرلار، آنجاق کیمسه اوزلرینه گتیرمزلر..
بیر سیرالاری دا وار یالان دانیشماقدان زهلهلری گئدر، دوز سوزو دئیرلر، بیر سؤزو ده دئمک ایستهمیین زامان، دئیرلر، سوزون دوزون دئمک ایستهمیریک، بیزی یالان دانیشماق زوروندا قویمایین،آنجاق اونلار دا هر دن یالان دانیشماق زوروندا قویولورلار.
تأسفله یالان دانیشانلار بیزیم جامعه ده اوز پیس عمللرینین جزاسینی گورمورلر و بو جهتدن یالان دانیشماق نه اینکی منفی بیر خصلت بلکه معمولی و گاهدان مثبت بیر خصلت کیمی حسابلانیر. و گاهدان بیر ملتین شادلیغینا باعث اولورلار.بو مسألهنی حل ائلهمکدن اوتری عایله و جامعهده یالان دانیشانلاری یالانلارینین هزینهسینی وئرمگه مجبور ائلهین بیر مکانیزم لازمدیر کی یالانچیلاری ائلهدیکلری پیس داورانیشلارین جزاسینی چکمله اونون قبیح و پیس اولدوغونو آنلاسینلار.
بیر جامعهنین اساس سرمایهلریندن متقابل اینانماق و عمومی اطمیناندیر کی یالان دانیشماق بو سرمایهنی کورلاییر و آرادان آپاریر. یالان دانیشماق خیانتدیر. یالان دانیشماق معمولی رفتارا تبدیل اولان بیر جامعهده گروهی و جمعی ایشلر، اورک بیرلیگی و مشارکت آرادان گئدر و اضطراب، خشونت، بدبینلیق، عدالتسیزلیک و صداقتسیزلیک اوندا ریشه سالار.
انسانلار گوندهلیک یاشاییشلاریندا اوزگهیه توهیندن اجتناب اوچون، شخصی حسّیّاتلارینی گیزلتمکدن اوترو و آیری سببلره گوره یالان دانیشیرلار. آما یالان گوندهلیک مشکللرین حلی اوچون همیشه ایشلنیرسه چوخ ضررلی اولوب بیر ناخوشلوق ساییلار. بونا گوره بئله انسانلارا ناخوش گوزونده باخیلمالیدیر و اونلارین درمانی اوچون روانشناس و حتی روانپزشکدن کومک آلینمالیدیر.
ائلهبیل دونیادا گؤرولن ایشلرله سونوجلاری، باشقالارینا اوزوموزو سرگیلندیرمهییمیز اوچون دیر. هر ایشی، باشقالارینا گؤروله بیلن یؤنده قاباغا آپاریریق. ایشین دوز اولوب-اولمادیغی یوخ، باشقالارینین طرفیندن نئجه آلیندیغی اؤنمسهنیلیر. گؤرولن ایش، آخین یاراتماق اوچون یوخ، قیسا سورهلی ایشیمیزی یولا سالماق اوچون گؤرونور. هارا گئتدییی ده اؤنملی اولمور. بو اوزدن ایشیمیز یولا دوشدوکده، هر نهیی بوشلاییب، یئنیدن ایشیمیزه گلمهیهنهدک بوراخیلیر. بئله بیر ایش گؤرولمهلرده، گؤرولنلره تیتیزلنسک، چوخلو آخساقلیقلاری گؤرهجهییک. آراشدیراندا الیمیزه چاتان، چئینک-توپورلره راستلاشاجاییق.
ایشی گؤرنلردن سوراشاندا، وئردیکلری جاواب، کیم دوز ایش گؤروب کی بیز گؤرک، یا دا بؤینوموزا دوشهنین آرتیقلاماسیجا گؤرموشوک اولور. هر کس ده ایناندی، گؤردوکلریمیزه!. هئچ اولماسا اؤزوموزه دوز اولاق، یا بیر ایشی گؤرمویهک، گؤرورکسه گؤردویوموز قدری، اؤزوموز اوچون اولمالی دا اولسا دوز گؤرک. اؤزوموزله دوز اولاق. یوخسا گؤرهجهییک بیر عؤمور سووشوب، اؤزگهلری اوچون چوخ ایشلهری سرگیلهیه بیلسک ده اؤزوموز اوچون، هئچ بیر دوز ایش گؤرمهمیشیک. بیزیم یئرلرده حاقلاریندا دورانلار آز اولور. حاقلاریندا دورماق بو آنلامدا دیر؛ بیر بو کی باشقاسینین حاققینی آیاقلامی یاسان, ایکینجی سی اؤز حاققیوی کیمسه یه یئدیرتمه یه سن. بورالاردا اینسانلارین چوخو ایکی سینی ده گؤرورلر. هم حاق یئییرلر, هم ده حاقلارینی زورلاری چاتمایانلارا یئدیردیرلر. داها دوغروسو گوجلری اونلارین نئجه داوراندیقلارینی بللندیریر. بونو دئدیکده گئنلده بئله اولور. آنجاق واردیر بیرکس لر ده کی باشقالارینین حاقلارینا سایغی دوروب, اؤز حاقلاریندان کئچرلر. ایشلر یولا دوشسون دئیه اولسون دئییب کئچرلر. اولسون دئمک ایله ایش یولا دوشمور بلکه باشقا حاقسیزلیقلارا یول آچیلیر. حاققیمیزدا دورماق, او قدر ده چتین دگیل. اوزوموزون ایشیمیز یولا دوشسون دئیه باشقالارینین حاق اولدوقلاری آنجاق حاق بیلمه دیک لرینه ال اوزالتمامالی ییق. یییه لری ده بیلمه سه, بیز بیلیریک او بیزیمکی دگیل. عئینی حالدا, الیمیز ایله باشقالارینین حاقسیزلیغینا یول وئرمه مه لی ییک. ها بئله حاققیمیز اولان هر بیر نسنه نی, زوربالارا یئدیردمه مه لی ییک.
سؤزون سونو بونو دئمک ایستیرم؛ حاقسیزلیق ایکی باشلی دیر. هم حاققی یئین, هم حاققی یئییلن سوچلودور. حاقسیزلیق هم باشقالارینا دیر, هم اؤزوموزه! ایستیریک یاخشی بیری اولاق, حاق یئمه ییب, حاققیمیزدان کئچمه مه لی ییک. حاققیمیزدا دورمالی ییق.
هردن آدامین بیر نهیی توکولر! ائشیدیبسیز، یا دا گوروبسوز! توکولنلرین بوشالتماغی بتر داد وئرر. آدامین یوخوسو توکولنده، باشی بنده دورماز، باشی یئره ساللانار، یئره دهیدیکده دوشوب یاتار، هم باشی دینجهلر هم ده گوزلری. بدن ده اوز یئرینده! اوندا دئیهرلر گورهسن یوخودان دادلی زاد وار بو دونیادا… بونلاری دئدیکده ایستیردیم چیخام، یازماغیم گلدی، حاضیرلاندیم گئدم، یازماغیم توکولدو! من ده قالدیم یازام. نه یازاجاغیمی دا بیلمیردیم. تکجه بیلدیییم یازماق ایدی. اونو دا یازدیم. ائله بو یازینی دئییرم. هردن یازماغیم گلردی آمما توکولمزدی. یازماغیندا توکولمهیی گلنده، یازیلدیقدا، هم بئیین دینجهلیر، هم اللر، هم ده گوز.یازیب کوچوره ن داش قاپی…
نوشته شده توسط admin در شنبه, ۱۷ مهر ۱۳۹۵ ساعت ۸:۰۴ ق.ظ
سلام ؟آچیق یول و آراز و امانت دن تبریزده خبر یوخ اقلا سایت لاردا فعال اولسون تا ۳۰ میلیون تورک ایرانی فایدالانسنلار ساغ اولون شاد یاشایین