حسین (ع) و اصحابی عاشورا گونونده
امام حسین علیه السلام عاشورا گونونده بیر نور کیمی پاریلدایا‌راق اؤز اصحابینا قوت و اومود وئریردی. همین امام کی، باباسی اونون حاقیندا بئله بویورموشدور: »حسین هدایت چیراغی و امتین قورتولوش گمی¬سیدیر«.
حسین (ع) فریاد ائدیردی: »ای دونیا اهلی! بیلین کی، محاربه¬نی من باشلامادیم و قیلینجا بیرینجی من ال آتمادیم. جنایتکارلار نسلیندن اولان یزید آدلی بیر مردار منی ایکی شئی‌دن بیرینی سئچمگه وادار ائتدی: یا قیلینج چکیب دینیمی و شرفیمی مدافعه ائتمه‌لی، یا دا ذلت و آلچاقلیغا بویون اگمه¬لی¬ایدیم.
اما بیلیرسینیز کی، ذلت و تسلیم اولماق بیزدن چوخ-چوخ اوزاقدیر. من ظالملارا قارشی دؤیوشمک مجبوریتینده¬یم«. داها سونرا حضرت حسین (ع) یزیدین عسگرلری‌نین قارشی‌سینا چیخیب اونلارا خطاب ائده‌رک بویوردو: »منیمله دؤیوشوب منی اؤلدورمه¬گینیز دین و دونیانیزین خئیرینه دگیل‌دیر.« اگر محاربه ائتمک ایسته¬ییرسینیزسه، یاخشی اولاردی کی، بیر شورا تشکیل ائدیب اورادا اشتراک ائدنلردن سوروشاسینیز کی، کیم »پیغمبرین اولادی ایله دؤیوشون« – دئییر و هانسی آزغین و بدبخت منی اؤلدورمکده سیزینله امکداشلیق ائتمگه حاضردیر.
عراقین والی‌سی مرجانه‌نین اوغلو (ابن زیاد) مردار و اقتدار دالینجا اولان بیر کیشی‌دیر. او سیزی بدبخت ائتمک ایسته¬ییر. من بیلیرم کی منیم شهادتیمدن سونرا پئشمان اولوب بیر بیرینیزی قینایاجاقسینیز. ائله بونا گؤره ده محاربه‌یه باشلامازدان اول گؤرمک ایسته-دیگینیز ایشین حاقیندا دوشونون.
بیلین کی، منیم آرخامدا الله دوروب و من هئچ ندن قورخمورام. من بابامدان بئله بویوردوغون ائشیتمیشم: »دونیا کافیرلره جنت، مؤمن‌لره ایسه زینداندیر«. اؤلوم بیزیم اوچون شهادت باشلانغیجی، سیزین اوچون ایسه بدبختلیگین اولی‌دیر. بو دونیا ایله او بیری دونیانین آراسیندا بیر کؤرپو واردیر کی، او دا اؤلومدور.اگر سیز محاربه ائتسه‌نیز، بیز ده اؤز اصحاب و اولادلاریمیزلا مدافعه ائتمگه باشلایاجاغیق. اگر غلبه چالساق، بیزیم اوچون تزه بیر شئی دگیل‌دیر اگر اؤلدورولسک، دونیا بیلیر کی، بیز مغلوب اولمامیشیق.
آی یازیقلار! بیلیجی آداملار چالیشیرلار کی یولو آزماماق اوچون اؤزلرینه بیر چیراق تاپسینلار. من بو امتین چیراغییام. سیز ایسه اؤز چیراغینیزی سؤندورمک ایسته¬ییرسینیز. کیمینله دؤیوشدوگونوزو بیلیرسینیزمی؟ سیز منیمله دگیل، الله و پیغمبری (س) ایله دؤیوشورسونوز.
حضرت حسینین سؤزلریندن سونرا دوشمن قوشونوندا قارماقاریشیقلیق یاراندی. محاربه ایسته‌ینلر گؤردولر کی، اگر محاربه‌یه باشلاماسا‌لار، حسین (ع) اؤز سؤزلری ایله اونلارین اوردوسونو حرکته گتیریب بوتون پلانلارینی پوچا چیخارا‌جاقدیر. ائله بونا گؤره ده محاربه¬نی باشلاماق امرینی وئردیلر.
حسین (ع) ایسه بئله فریاد ائتدی: »ای منیم بؤیوک و دگرلی اصحابیم! قالخین دؤیوش واختی‌دیر!«
زهیر و حبیب کیمی اصحابی امامین محاربه امرینی وئردیگینه گؤره سئویندیلر. اونلاردان هر بیری بیرینجی اولا‌راق امامین اونو محاربه مئیدانینا گئتمک اجازه‌سی وئرمه‌سینی ایسته¬ییردی. قمر بنی هاشم، علی اکبر قاسم و باشقا‌لاری دا دؤیوش اوچون حاضرلاشدیلار.
اونلار شیر کیمی دوشمنین حصه‌لرینه یوروش ائدیب قارشیلارینا چیخانلاری هلاک ائدیردیلر. حسین علیه السلامین اؤزو ائله شجاعت و ایگیدلیکله دؤیوشوردو کی، ابن شهرآشوبون یازدیغینا گؤره، تکجه او حضرتین اؤزو تخمیناً ایکی مین دوشمن عسگرینی اؤلدورموشدو.
حسین (ع) اصحابیندان و یاخینلاریندان بیریسی گؤزلری‌نین قاباغیندا شهید اولاندا، داها قوتلی، گوجلو و قرارلی آددیم‌لارلا ایره¬لی¬له¬ییردی. دوشمن عسگرلریندن اولان بیر نفر عاشورا گونونون حیرتلندیریجی حادثه‌لری حاقیندا بئله دئییب: عاشورا گونونده حسین (ع) بیر شهید وئرندن سونرا روحدان دوشمک عوضینه، اونون صفتی‌نین داها آچیق و داها پارلاق اولدوغونو و داها دا قوتله دؤیوشدوگونو گؤروردوک.
فداکار دؤیوشچولر، آج و سوسوز اولما‌لارینا باخمایا‌راق، ائله ایگیدلیک و قهرمانلیق گؤستریردی‌لر کی، دوشمن عسگرلری‌نین سرکرده‌سی اولان ابن سعد بئله باغیرماق مجبوریتینده قالدی: اگر بئله دؤیوشمک ایسته¬ییرسینیزسه، هامینیز حسین و اصحابی‌نین قیلینجی ایله اؤلدوروله¬جکسینیز.
بونا گؤره ده تخمیناً دؤرد مین نفر اوخ آتانلارا بیردن اوخ آتما‌لارینی، قیلینجلا دؤیوشنلره ایسه بیردن یوروش ائتمه‌لرینی امر ائتدی. محاربه قازیشدی. حسینین اصحابیندان هر بیر آتدان یئره ییخیلیب شهید اولاندا بئله دئییردی:
»پروردگارا! بو فداکارلیغی بیزدن قبول ائله!«
آللاهین سلامی پاک روحونوزا اولسون ای آللاهین و حسینین یولو ایله گئدنلر، ای قوران یولونون دؤیوشچولری. حسین علیه السلامین اؤزو ده، بد‌نیندن قان آخماسینا باخمایا‌راق اللرینی گؤیه قالدیریب بویوردو: »ای منیم اومود آرزولاریمین قایناغی اولان الله! سنه آرخالانیب سنه اومید بسله¬ییرم. پروردگارا! بو قوربانلاری بیزدن قبول ائله!«
نهایت، شیخ مفیدین یازدیغینا گؤره، حسین (ع) ایله اصحابی هجری ۶۱-جی ایلین محرم آیی‌نین اونو شنبه گونونده شهادت شربتینی ایچیب، گله‌جک نسل‌لره شرف و ایگیدلیک درسی وئردیلر.
نوشته شده توسط admin در دوشنبه, ۲۰ آبان ۱۳۹۲ ساعت ۶:۱۷ ق.ظ
