بوگونکو قادین لار دئوریمی

بوگونکو قادین لار دئوریمی

حاضیرلایان:اکبرسعادت
آنا دیلیمیز:هربیرجمعیت و تشکیلات موختلیف فیکیر لرله دانیشیب. البته‌ ایسلام دینینی قبول ائدنلر قادی‌نین حاقیندا چوخ یازیلار اوخوموش، چوخلارینی دا اوخشار مووضولارسایاراق آرتیق بوجور مووضولارا فیکیر وئرمه‌مه‌یه قراروئرمیشلر.
۶۰نجی ایل لرین سونلاریندان قادین لارین و اونلارین اوزگورلوک اینقیلابی اینکیشافا دوغرو حیاتینی باشلایاراق، توپلوم لاردا اولان آتا ارکیل دوشونجه لری قارشیندا ائولرینده ن دیشاری چالیشمالارا غئیرت گوستره ن بو قادین لار ائکونومی اولاراق باغیم سیز اولدوق لاریندا سوسیال حیات لاری نین معنالاری نی دییشمه یه باجاردیلار دئمک دیر. بو گونکو دونیادا قادین لارین دئوریمی بویوک و أن اونملی دئوریم لرده ن بیری ساییلیر. چونکو توپلوم لارین اینانج و دوشونجه لری نین کوکونه قده ر کوک آتمیش و گون گله- گله اینکیشاف ائتمک ده دیر. آمما بواو دئمک دئییل کی دونیانین هر گوشه سینده تام اولاراق ظولم و برابرسیزلیک اورتادان قالدیریلمیش دیر. نییه کی هله ده یاسالار ارکک لر دوشونجه سی اساسیندا یازیلارکن آتا ارکیل محکمه لره راست گلمک اولار. او اوزدن بو اینقیلاب هله ده دوام ائتمک ده دیر آمما طبیعی کی جغرافی یا اولاراق هر بولگه نین تانیم لار( تعریف لر) ، شرط لر و حیات طرزلرینه گوره بو یولدا امک وئرن قادین لار دونیانین هر بیر گوشه سینده اولورسا دا اورتاق گونده بیر آرایا گلیب و سس لرینی بیر ائتمه شانسینی الده ائتمیش لردیر.
وهمن اساس دا ۸ مارت قادین لارین بیرلییی سئوینج لرینی پایلاشان و آرزولاری نین گرچک لشمه یه دوغرو گئدن گونو ساییلیر. طبیعتین باشلانغیجینی تانری قادین لارا ایتحاف ائتدیینه گوره ایلک اونجه کورپه اوشاق دا آنا کلمه سی ایله دیل آچیر و آنا دیلی هر میللته بیر تانیم اولاراق کوتسال ساییلیر. داها دا دوغروسو بو یاشاییشین بیر کورالی ساییلارکن طبیعتین باشقا یاسالاری کیمی اونادا باش ایمه ک لازیم . اصلیندا اینجه وداهادا یوموشاق یارانیش ساییلان قادینین چیین لرینه طبیعت آغیر یوک لر قویموش، بو چیین لرین دیه رینی بیلمک و اونلاری کوتلاماق گره ک لی دیر، او اوزدن بو گونون کوتلاماسیندا آذربایجان قادین لاریمیزین دا او بیری قادین لار کیمی پایلاری وارمیش دئمک دیر. تاریخ بویو آذربایجان قادینی کیشی لر ایله چیین- چیینه چالیشاراق بو گونه قده رهرنه یی برابر قازانمیش لار، آمما تأسسوف لر اولسون کی بیر دونم ده ن سونرا هئچ ده برابر پایلاشیلمامیش دیر. اوشاق بویوتمک ده ن توتموش ، هونر، موسیقی کولتورل، سیاست و یا خود ساواش مئیدان لاریندان. دئمک بوتون ساحه لرده اوموز- اوموزا گلن بو آذربایجان قادینی نین یئری بو گونکو چاغدا هله ده بلیرتیلمه میش دیر.
دئمک قادین لاریمیز حیاتیمیزین چئشیدلی فعالییت لری ائکونومیک، پولیتیکا، حقوق، بیلیم و ادبیات آنجاق هر ساحه ده اولورسا اولسون هئچ ده کیشی لریمیزده ن گئری قالمامیش لارو منجه بونو گورمه مزلیک ده ن گلن ارکک لریمیزین آرتیق اینانماق لاری گره ک دیر.عاعیله ده صادیق حیات یولداشی و سئوگی دولو آنا اولدوغو کیمی توپلوم دا دا قادین لاریمیز رول لارینی یوکسک سوییه ده ایفا ائدیرلر، آمما چوخ واخت لار ارک لر و توپلوم طرفینده ن تصدیق اولونمامیش دیرلار. بو اوزدن آذربایجان قادینی نین چیینینه دوشن یوک منجه داهادا آغیر اولموشدور. اولدوغو دوروم، یاشادیغی موحوط ، توپلوم سال و آنا یاسا اولاراق، آذربایجان اولکه سی(آذربایجان جمهوریتی) قادینی نی بو گون چتین دوروم لارا بیراخمیش دیر. بیزیم توپلوم دا یالنیز باشینا توپلوم و عاعیله سورون لاری ایله قارشی- قارشی یا چیخان و تک باشینا دویوشن قادین لاریمیزین سایی سی آزدا دئییل . بیزیم آذربایجان قادینی تاریخ ده هئچ زامان عاعیله لری نین و یا خود میللتیمیزین آلچالماسینی ایسته مه میش لر وهر زامان ساواش لاردا اون پیلان دا اولماسایدیلاردا ایل لر بویو جان لاری نین شیره سی ایله بویودن ایگید لرینی ساواش مئیدان لارینا گوندرمیش لر آمما بیزیم توپلوم بو گونه قده ر بو قادین لاریمیزا لاییق اولدوغو دیر و قییمتی اودویه مه میش.
بو گونه دک قادین پروبلئم لری اوزره چالیشان بیر چوخ ارکک اولموش دور . آمما همن ارکک لرپراتیکه کئچدیک لرینده قادین لاری نین حاق لارینی اودویمه میش و یالنیز بیر سوزده و شوعاردا دالیب قالمیش لار. بو ارکک لریمیز قادین لار مسئله سینه نه قده ر آچیق باخماق ایسته سلرده اوز قادین لاری، قیز لاری و باجی لارینا یئتیشدییی زامان هر نه یی اونوتوب وداهادا باغلی باخماغی ترجیح ائدیب لر، چونکو بو ایچی بوش ایقتیداری الده ن وئرمک ده ن هر زامان قورخموش لاردیر. او اوزدن هر زامان قادین بیرینجی پلان دا موطباخ و ایکینجی یا دا اوچونجو پلان دا ارکک لر یانیندا یئرلشمیش و بو آذربایجان قادینی اوزونو ساوینماغا قالخیزدیغی زامان دا یانلیش آنلام دا فمینیزم آدلاناراق ، هر طرفلی باسغی یا معروض قالمش دیر. آصلیندا قارشیندا دوران دا ، همن آیدین بئیین ارکک لریمیز و بیلیم سیز خانیم لاریمیز اولموب دور.
توپلوموموزون دار باغلی باخیشی ندان و حرکت ده اولان ارکک لریمیزین داهادا کاپالی دوشونجه لرینده ن آسیلی اولدوغونا گوره سوزوم آرتیق آذربایجان(ایران) ارکک لرایله دیر، چونکو هجرین، نیگار، بورلا، ذینب پاشا و حوکومه بولوری لرین نسلی نین بئله سوسمالاری نین بیر چوخ نه دن لری نین اونلاردان آسیلی اولدوغونون دوشونجه سی ندیم.
دئمک ایسته دییم بو کی آذربایجان قادینی نا آرتیق گووه نمک و اونودا باشقا دونیا قادین لاری کیمی گورمک و اینسان کیمی اوزل و سوسیال حیات لاریندا حاق وئرمک لازیم.سوزون قیساسی بو کی اوزگورلویون یالنیز بیر آنلامی واراودا اوزگورلوک دئمک دیر و اوزگورلویه موجادیله وئرن اینسان لار اوزگورلویه تام آنلام دا و هر طرفلی باخماق لاری لازیم و طبیعی قادین لارین دا حاق لاری اونا داخیل.
بویلجه قیزلاریمیزین بو گون باشقا کولتوره داهادا ماراقلی اولدوق لاری و دیل لرینی اونوتمایا چالیشما لاری نین نه دنی نی آنلاماق داهادا راحات دیر، چونکو بو گونکو قادی نین تعریفی دوندن فرق لی اولدوغونا گوز یومماق اولاماز. کئچمیش ده اولان دینی، سنتی و باغلی باخیش لاردا دالیب قالماق او دا بو گونکو چاغدا مانطیقلی دئییل. زامانی بئله گلمیش کی قادین لارین ایستک لرینی دوشونوب اونلاری منیم سه یره ک یئنی تعریف لر وئرسین بو آذربایجان آیدینی !!! نییه کی حیات طرزی گئت گئده دییشیلدیینه گوره بکلنتی لرده دییشیلمیش …

نوشته شده توسط admin در شنبه, ۲۸ شهریور ۱۳۹۴ ساعت ۸:۴۱ ق.ظ

دیدگاه


1 × نُه =