بولودلار اورمو گؤله آغلایین…
اکبرسعادت
آنا دیلیمیز:دونیا تحوللاریندا ۱۹۷۰دن بری محیطزیست دائما اونده اولان بیر مسئله اولوبدور.بو مسئله لرین اساس آماجلاریندان زیستیمحیطی قوروماق، دولتلری توسعه برنامهلرینده اینسانلارین ساغلامی جهتده محدودلاشدیرماق،محلی توپلوملارین گلیشمهگی، اولوسلار آراسی سویهسینده یاشاییشدا قالیب اونون اوزهرینده سیاستلرین قارشیسیندا دایانماق، اولوبدور.
آذربایجاندا اساساً اوز جغرافیاسینی قوروماق اوزهرینده چئورهسینده تورهنیلمیش زیستی محیطی مسئله لری منیمسهییب اونلارا هر حالدا حل ائدیجی گوروشدن یاناشیبدیر آنجاق بویاناشماق دوشمنمحور یوخ، عینی حالدا میللته بیلگی وئریجی بیر جریانا چئویریلیبدیر. اصلینده بو سوزه دایاناراق ایندیکی زاماندا، گوندهمده اولان زیستیمحیطی مسئله یعنی “اورمو گؤلون” قوروماق گئدیشی بیر اساسی سورونا چئویرلهنیبدیر. آذربایجان میللتی اوز کیملیگینه دایاناراق جغرافیاسینی ساغلام شکیلده ایستهمکدهدیر. بو جغرافیادا گوجلو بیر زیستیمحیطی چالیشقان جنبشی اولمادان، آذربایجان میللی اورمو گولون قوروماق ائتگیسین اوز گلهجک یاشامیندا دوشونهرک حیاتین بو اساسدا جیددی حالدا آرادان گئتمهگین بیلیب، دونیا میللتلریایله برابر اوز حاقیندا سوسماییب، اعتراضلارینی تام مدنی شکیلده گئچیرتمکدهدیر.
آذربایجانین بئرکتلی یئرلریندن اولان گمیچی، خان تختی، سولدوز، قوشچو ساهیلی، قولونجو، کهریز، جامالاواد، بورچالی، اورمو جؤلگسی، آق گونبد، شیرین بولاق، گوورچین قالا، بوی داش، قارا باغ، باری، کاظیم داشی، قوشاچای، توفارقان، سالماس، خوی، ملیک کندی، خانا، اوسکو، ایلخچی، کوزه کونان، شبیستر، ماراغا، تبریز، عجب شعر…..شرفخانا بوتونلوکله زار و پریشان اولماقدادیرلار.
نئجه کی، هامی بیلیر، او گول بیزیم وار اولماغیمیزین بیر اونملی سندلریندن دیر.او بیزیم کولتوروموزون بویوک نیشانهلریندن بیری ساییلماقدادیر.
اونو ساخلاماق اوچون علمی و عملی آددیملار آتیلمالیدیر.او گولون قوروماسی و قورودولماسی هم ائکولوژی و هم ده اینسانی فلاکت و فاجییه اولماقدادیر دیر.
غربی آذربایجانین ۳۷ مین کیلومئتئر مساحتی واردیر. بیزیم میلتیمیز مینلر ایلل تاریخه مالیک دیر. اوراسی بیزیم اوچون یالنیز دوز گولو دئییل.
اوراسی بیزیم اوچون مین ایللیک تاریخ و کولتور دور. اوراسی بیزیم اسکی تاریخیمیزین سمبولودور.اوراسی بیزیم یازیچیلاریمیزین، شاییرلریمیزین، ادبییارچیلاریمیزین ایلهام قایناغیدیر.
اورمو گولو اونوتولان بیر مسئله دئیر، بیز اوشاغلیق دان گوزوموزو آچیب اورمو گولون سولو گورموشیک، ایندیسه بو آندا بو دوزلو گوله گرک یاردیم اولاق. اوشاغ اولار کن یایین ایستی گونلرینده اورمو گولو قوجاغین بیزه ساری آچیب و بیزی باغرینا باسیردی، هئچ یادیم دان گئتمز او گون لریمیز. بو آندا هر بیریمیزه وظیفه دی بیلییی نه قدر و باجاردیغینا قدر بو دوزلو گولون حاققیندا چالیشا. مینت اولماسین چونکی اوز حاققیمیزدا وطن حاققیندا و آنا حاققیندا چالیشیروخ آذربایجانین ایشچیلری، اکینچیلری، یاشام چئوره فعاللاری، کارخانا ساهیبلاری، صنعت ایشینده مشغول اولانلاری، مال، حئیوان ساهیبلاری، اونیوئرسیته اوستادلاری مال، حئیوان ساهیبلاری، اونیوئرسیته اوستادلاری، اویرنجیلر، رادیو، تئلئویسیون، اینجه سننتچیلریمیز، جاوان و یاشلیلاریمیز،یایین و مطبوعاتلاریمیز:
بیز هامینیز اورمو گولونون قورتارماق اوچون مسئولییت داشاییریق.بیز، گلهجک نسیللرین قارشیسیندا جاواب وئرمه مسئولییتینی داشاییریک.
طلبیمیز:
۱-اورمو گولونون قوروماسینی دایاندیرماق اوچون سدلرین آرخاسیندا دولان سولاردان یئترلی میقداردا اورمو گولونه پای ایستهییریک
۲-اکینچیلیک اوچون علمی قطره لی سووارمادان یارارلانمالی
۳-اورمو گولونون اطرافیندا گوی قورشاق یارادماق(ورالارین اطرافینا آغاج، چاییل، چوغان…..اکیلملی)
۴-گولون اطرافیندا بوتون صنعتی و شیمی کارخانالارین گولدن اوزاغا داشینماسی
۵-دونیا دولتلرین تجروبهلریندن فعال یارارلانماق
بو گون اورمو گولونون یاشامی هر طرفدن خطرددیر.بو گولو بیز قورتارمالیییق و او گولو قورومانی اوزوموزه موقددس بیر وضعیفه سایمالیییق
اومودوموز وار اورمو گولو بیر داها گئچمیش دورومونا قاییدارکن اونون ایستکلی لری ، اوجامان دالغالارینین موسیقیایی سسلرینی ، دورنالارین قانادچالماق لارینی ، آدالارین یئنی دن دیرچه لیش لرینی و ان اونملی سی بولگونون ان بویوک اولاییندان قورتولوشونو ائشیدیب و گورسونلر
نوشته شده توسط admin در جمعه, ۰۳ بهمن ۱۳۹۳ ساعت ۳:۴۴ ب.ظ