جامعه‌نین قضاوتی اشخاصی یالانچی ائلیر
میرزه عبدالصمد ملکی
آنادیلیمیز:جامعه‌نین قضاوتی انسانلاری یالان دانیشماغا و یالانچی اولماغا سوق وئرر.
مخصوصاً دینی جامعه‌لرده، اشخاصین دینی و اعتقادلاری‌نین اونلارین اجتماعی موقعیّت و قضاوتلری باره‌ده رولو اولدوغونا گؤره انسانلار اؤزگه‌نین دقّتینی جلب ائله‌مکدن اؤتری چوخ راحت یالان دانیشیب اؤزلرینی اولمادیقلاری کیمی گؤستریرلر.یاخشی اولار یالانین تعریفینه نظر سالاق: حقیقت و واقعیتله مطابق اولمایان عمل و سؤزه یالان دئییلیر. یالانچی شخص ذهنلری حقیقتدن منحرف ائله‌مکدن اؤتری یالان دانیشار. مثلاً اؤزو باطلین اساس مهره‌لریندن بیری اولارکن اؤزگه‌نین یانیندا و ظاهرده حقدن دفاع ائلیر.یالانلارین چوخونون اساس عاملی قورخودور. متأسفانه بیزیم جامعه‌میزده تنبیهلی رفتارلار، دانلاماق و مقایسه‌لی رفتارلار انسانلاری، ائله اوشاقلیق یاشلاریندان یالان دانیشماغا طرف سوق وئریر. اوشاق، تنبیه و مجازاتدان قورتولماقدان اوچون یالان دانیشماغی لاپ راحت یول کیمی سئچیر. و بو رفتار اونون شخصیتینده کؤک سالیر.
اؤزونه اینانماماق و اعتماد به نفسین اولماماغی‌دا یالان دانیشماغین آیری سببلریندن بیردیر. اؤزونه اینانمایان شخص همیشه اؤزونه ایده‌آل شخصیت کیمی گؤرستمگه چالیشار و بونا گؤره یالان دانیشماقلا اؤزلریندن آیری بیر شخصیت تصویره چکمگه چالیشارلار.تأسفله یالان دانیشانلار اؤز پیس عمللری‌نین جزاسینی گؤرمورلر و بو جهتدن یالان دانیشماق نه اینکی منفی بیر خصلت بلکه معمولی و گاهدان مثبت بیر خصلت کیمی حسابلانیر. بو مسأله‌نی حل ائله‌مکدن اؤتری عایله و جامعه‌ده یالان دانیشانلاری یالانلاری‌نین هزینه‌سینی وئرمگه مجبور ائله‌ین بیر مکانیزم لازمدیر کی یالانچیلاری ائله‌دیکلری پیس داورانیشلارین جزاسینی چکمله اونون قبیح و پیس اولدوغونو آنلاسینلار.بیر جامعه‌نین اساس سرمایه‌لریندن متقابل اینانماق و عمومی اطمیناندیر کی یالان دانیشماق بو سرمایه‌نی کورلاییر و آرادان آپاریر.
یالان دانیشماق خیانتدیر. یالان دانیشماق معمولی رفتارا تبدیل اولان بیر جامعه‌ده گروهی و جمعی ایشلر، اورک بیرلیگی و مشارکت آرادان گئدر و اضطراب، خشونت، بدبینلیق عدالتسیزلیک و صداقتسیزلیک اوندا ریشه سالار.
یالان دانیشماق انسانین ۵-۴ یاشیندان باشلار. انسانلار گونده‌لیک یاشاییشلاریندا اؤزگه‌یه توهیندن اجتناب اوچون، شخصی حسّیّاتلارینی گیزلتمکدن اؤترو و آیری سببلره گؤره یالان دانیشیرلار.
آما یالان گونده‌لیک مشکل‌لرین حلّی اوچون همیشه ایشلنیرسه چوخ ضررلی اولوب بیر ناخوشلوق ساییلار. بونا گؤره بئله انسانلارا ناخوش گؤزونده باخیلمالیدیر و اونلارین درمانی اوچون روانشناس و حتّی روانپزشکدن کؤمک آلینمالیدیر.
نوشته شده توسط admin در شنبه, ۲۸ بهمن ۱۳۹۶ ساعت ۱۰:۲۳ ق.ظ
