بوش وعده لر
حاضیرلایان:اکبرسعادت
آنا دیلیمیز:باش سوز، گوزل بیر گونلریدی.هر داریخاندا عایله ینن بیرلیک ده اورمو گولون گورمه یه تله سیردیک.آغ گمی لرده گئچمیش خاطیره لر یادیما دوشور.
اوندا کی ایکی اولکه نی گمیینن گزه ردیک.اما ایندسه هر اتوبوس نان اوردان گئچدیکجه دوزلو یوللار اوره ییمی ده لیر.دورنالار اورمو گولون قوناق لاریدی.جیرانلارین،حیران باخیشلاری ایندیسه یئرین بوش داغ داشا وئریب.
اوره ک لره بیر دونیا سئوینج قوناق ایمیش.اولکه مین یاشیل گونلری دوزلاردا قالدی.مین لرجه آرزی لاریمیز اوره ک لریمیزده سولدی.
ایندی سه هریانا باخیرام بلکه بیر دامجی سو تاپام…اما ندنسه بیر لیوان سو یوخدو. ایندیسه ایللر بویودور کی، بیزلرین چیخارلارینا قارشی اولانلارین گیزلی و آچیق اللرینی بورادا گوروروک.
هامی بیلیر، او گول بیزیم وارلیغیمیزین اونملی سندلریندن دیر.او بیزیم بویوک نیشانه‌لریندن بیری ساییلماقدادیر.
بو گول بیر زامانلار کوچن قوشلار و فلامینگولار اوچون بیر جنت ساییلیردی، ایندی بونلارین هامیسی تهدید آلتیندا و ابدی اولاراق محو اولور.
من تبریزده دوز توزونون قارلارین اریمه‌سینه سبب اولدوغو بیلگیسینی آلدیم. بو دوز انسانلارین حیاتینی و طبیعتی تهلوکه‌یه آتیر.
آذربایجان سفرینده تورک دیلی قورومونون یارادیلماسی و اورمو گولو ایله باغلی وعده لر وئردی. آنجاق، عملده بیر ده ییشیکلیک اولمامیش، حتی بعضی ساحه لرده وئریلن وعده لرین تام عکسینه عمل ائدیلمیش،” گوروندی دفعه لرجه بوش وعده لر وئریلدی.
آلداندیق …اما بیلمیرم نه زامان اوز حالیمیزا آغلایاجاییق. آخی اوراسی بیزیم اوچون یالنیز دوز گولو دئییل. اوراسی بیزیم اوچون مین ایللیک تاریخ و کولتور دور. اوراسی بیزیم اسکی تاریخیمیزین سمبولودور.اوراسی بیزیم یازیچیلاریمیزین شاییرلریمیزین، ادبییارچیلاریمیزین ایلهام قایناغیدیر.
هامی بیلیر اورمو گولونون نجاتی، بیزیم گله‌جگینین تمیناتی و یاشاییشینین ساغلیقلیغی ایله باغلی اولدوغونا گوره هر آزربایجانلینین اورگینین آرزوسودور.
کیملیگیندن آسیلی اولمویاراق بو آرزونون یئرینه یئتیریلمه‌سینده هامیمیزین ال-اله وئرمه‌سی موثبت نتیجه‌لره گتیریب چیخاراجاغیدا اینکار ائدیلمزدیر.
بیر هدفه چاتماق اوچون اونون دوغرولغو و گئدیلن یولون دوز، منطیقی و عملی اولماسی گرکمکده‌دیر. شوبهه‌سیز کی، اورمو گولونون نجاتی قدر دوغرو بیر فیکیر اولاماز.
اونا گئدن یولون ایسه بعضی غیری فننی و غیری منطیقی اوصوللارا سویکننتکلیفی، قصدن اولماسا دا،حوقوقی، تئکنیکی و ایقتیصادی بیلگیسیزلیکدن اورتایا چیخابیلر.
اورمو گولونه آخان چایلارداکی بوتون سدلر آچیلاراق، سویون گوله آخیدیلماسی بیرینجی آددیمدیر. بو اراضیلرده‌کیاکینچیلرین اراضی اولچوسونه گوره قازاناجاقلاری گلیر حسابلانیب اونلارا اودنه‌رک، آلما و اوزوم باغلاریندان باشقا هئچ بیر اکینه سو وئریلممه‌لیدیر.
بو برنامه ایکی و یا اوچ ایله قدر دوام ائدبیلر. بو کیمی تدبیرلر دونیانین بیر چوخ اولکه‌سینده تجروبه اولونوب و موثبت نتیجه‌لر وئرمیشدیر.
مسئوللار، مهندیسلر، پروژه یازانلار و نجات یولونو گوسترنلرین هامیسی بیر عقیده ده موشته‌رکدیر.
اودا، چئشیتلی ایشلرین یانیندا ان واجیب و حیاتی اولانی اورمو اوواسیندا سووارما سیستمینین مودرن لشدیرمه‌سیدیر. گوره‌سن ندن کیم سه بو هاقدا هئچ بیر آددیم آتماییب.
گوره‌سن نییه دوغرو دوروست ایش گورمک یئرینه یالان وعده لرله اویدورما سوزلرله خالقین باشینی آلداتماغا چالیشیلیر.
بوگون لر اولکه میزده یاشایان اینسانلارین اوره یی چوخ دولوب.
بیری دئییر، اویدو شکیللری اورمو گولونون دولماغا باشلادیغینی گوستریر. بیری دئییر آرازدان سو چکیریک- قارشیداکی دئییر “اوندا موغان سوسوز قالار” او بیری دئییر خزردن سو چکیریک، او بیری دئییر گورجوستاندان سو آلیریق، بیر باشقاسی دئییر گوناه اکینچیلریندیر، او بیری دئییر گوناه هاوا-نیندیر.
یوز آغیز بوش-بوش سوز سوهبت، بیر آددیم عمل یوخ.بیز یوباندیق.نئچه ایللردیر کی الی بوش تکجه وعده وئریرک.آما داها گوره ر.
بوندان آرتیق گئج قالماق بیر بشریت فاجعه سی یولا سالاجاق.کاش بیزیم مسئول لار بونا دوشون سون لر.
گینه بونو دئمه لییم کی:بیز هامینیز اورمو گولونون بو وضع دن قورتارماق اوچون مسئولییت داشاییریق.بیز، گله‌جک نسیللرین قارشیسیندا جاواب وئرمه مسئولییتینی داشاییریک.آتا بابالاریمیز اورمو گولون بیزلره یادیگار قویوب گئدیب لر.اونلار اورمو گولون بیزه دالغالی تحویل وئریب لر.گوز یاشلاریمیز دا اولمالی اولسا گرک اونو دولو قایتاراق گله جک نسیل لره…
اومودوموز وار اورمو گولو بیر داها گئچمیش دورومونا قاییدارکن اونون ایستکلی لری اوجامان دالغالارینین موسیقیایی سسلرینی دورنالارین قانادچالماق لارینی ، آدالارین یئنی دن دیرچه لیش لرینی و ان اونملی سی بولگونون ان بویوک اولاییندان قورتولوشونو ائشیدیب و گورسونلر.
نوشته شده توسط admin در دوشنبه, ۲۳ شهریور ۱۳۹۴ ساعت ۴:۲۹ ق.ظ
… “هارای وئرن یوخدور منیم دادیما
هچ بیر کیمسه گلمه ییر امدادیما
دنیز دئییرلردی منیم آدیما
ایندی داها دنیزدن بیر آد قالیب
دورنالاردان خاطیره مده یاد قالیب ”
(تایماز میانالی) اورمو گؤلون یئنی دن جانلی گؤرمک دیلگی ایله