باشماق واکسلایان اوْغلان
آنادیلیمیز:ساعت سحر ۶ حدودوندا، هوا آلانیندا (فرودگاه)، ایکی نفر دوْستلاریملا بیرلیکده، اوچوش اعلانینی گوزلهییردیک.
۶-۷ یاشی اوْلان بالاجا بیر اوْغلان گلیب قاباغا، سوْروشدو: واکس ایستیرسیز؟
باشماقلاریمین واکسلانماغا احتیاجی وار ایدی، اما من اوْنا اورگیم یاندیغی ایچون، دئدیم:– هن ایستیرم.
تئز بیر جوت آیاقآلتی باشماق جوتـلَدی قاباغیما، باشماقلاریمی چیخارتدی. دقت ایله باشماقلاریمین توْزونو آلدی. واکس قوتوسونو آچدی، باشماقلارین بندینی چیخارتدی کی، چیرک اوْلماسین. سوْنرا یاواش- یاواش، سلیقه ایله باشماقلارا واکس یاخدی. او قدر دقت ایله بو ایشی گوروردو سانکی رساملیق تابلوْسونا یاغلی بوْیا یاخیرمیش کیمی.
باشماقلاری واکسا بولادیقدان سوْنرا، توک چوکگه ایله واکسی پرداختلاماغا باشلادی. باشماقلار پار- پار پاریلدادی. آخردا دا باشماقلاری پارچا ایله سورتدو، باشماقلار برق وئردی. دئدی:
– آرخایین اوْل! نه جورابین نه ده شالوارین واکسلی اوْلمایاجاق.
اوْنون ایشلهدیگی سورهجه من اوز- اوزومه فکرلشیردیم بو اوشاق، بو یاشدا، سحرین بو ساعتینده نه قدر ده چالیشیر!
ایشی بیتینجه، باشماقلارین بندینی سالدی، منیم قاباغیمدا جوتلَدی.
باشماقلارأ گییدیم، بندلرینی باغلادیم. اوْ دا اسبابلارینی ییغیشدیریب، ادبله دوردو. دئدیم:
– نئچه تقدیم ائیلهییم؟
دئدی:– سن ایلک مُشتریمسن، هر نه وئرسن آلله برکت وئرسین!
دئدیم:– دئنه نئچه؟
دئدی:– بو گونه کیمی ایلک مُشتریمه قیمت دئمهمیشم!
دئدیم:– هر نه وئرسم قبولوندو؟!
دئدی:– یاعلی!
اوز- اوزومه فکرلشدیم اوْنو سیناییم. جیبیمدن بیر ??? تومنلیک چیخاردیپ، وئردیم اوْنا. هیچ شُبههم یوْخیدی کی، ??? تومنلیگی گورونجه اعتراض ائدهجک. من ده بو ذکالی حرکتیمله اوْنا بیر درس وئرمیش اوْلاجاغام کی، داها دئمهسین هر نه وئرسن قبولومدو!
حِیرتلر ایچینده اوْ، پولو آلدی، آلنینا سورتدو، سوْنرا دا سوْخدو جیبینه، تشکّر ائیلهییپ، کیفینی گوتوردو گئتسین.
تئز بیر ۱۰ مین تومنلیک جیبیمدن چیخارتدیم اوْنا وئرم. باشینی دیک توتوب، آلنیآچیق منه باخیپ، دئدی:
– من دئدیم هر نه وئرسن قبولومدور!
دئدیم:– هن بیلیرم! من سنی سیناماق ایستهدیم!
کیبارجا منه باخدی، نفوذلو باخیشینین آلتیندا اَزیلدیم.
دئدی:– سن منی سیناماق می ایستهییرسن؟!
»سن« کلمهسینی ائیله مُحکم ایشلتدی اوزونو دوندریپ، چکیب گئتدی. نه قدر اصرار ائتدیایسم، قبول ائیلمهدی چوْخ آلسین. سوْنوندا دوْستلارین آراجیلیغآ و اصراری ایله قبول ائیلهدی آما کونولسوزجهسینه.
گئدینجه، آرخادان اوجابوْیلو، گوجلو بیلکلی، ائنلی کورکلی، اوتکم آددیملی، مُحکم ارادهلی بیر أرکـگه بنزیردی. آرخاداشلاریمین یانیندا خینگ اوْلدوم، اوتاندیم. اوْ بالاجا ایگیدین قارشیسیندا، اوز یانیمدا و آللهین یانیندا خجالت اوْلدوم.
نوشته شده توسط admin در شنبه, ۱۷ اردیبهشت ۱۴۰۱ ساعت ۹:۱۲ ق.ظ