ان اوزون گئجه
معصومه اسدی
پاییزین سون گونو، ایلین ان اوزون گئجه سی دی. بو گئجه ائلیمیز ایچره، چیلله گئجه سی آدلانیر. یوردوموزدا چیلله گئجه سی اؤزونه مخصوص دبلر و عنعنه لری واردی. بو دبلر زمانین سوزگجیندن کئچسه ده و بیر سیرا دگیشیکلر و یادلاردان چیخماغا معروض قالسادا بوگون دوام ائتمکده دیر.
بو گئجه ده عائله لر و طایفالار بیر یئره توپلانیب و بو گئجه یه خاص یئمکلری یئییب و ماهنی ایله بایاتیلاری اوخویارلار.تاپماجالاردا بو گئجه نین اونودولمازلاریندیر. قارپیز ایسه اولمازسا اولمازی.یوردوموزدا قارپیز چیلله نین سمبولو و سیمگه سی کیمی تانینیبدیر. بو میوه شیرینلیک، قان ایستی لیک و طراوت نشانه سی دیر. چله دئمک اولار مجلسلرین آغ ساققالی اولوب، همیشه یوخاری باشدا گزیبدیر. کئچمیشلرده یوردوموزدا قارپیزی بوستانلاردا درنده، ان یاخشی سی و ان بؤیوگونو چیلله گئجه سی اوچون آییریب سامانلیقدا ساخلایارمیشلار. بیزیم ائلده قایدادی کی چیلله گئجه لری یئنی ائولنمیش گلینلره چیلله لیق آپارارلار. چله لیق پای آدی ایله مشهورلانان هدیه لری گلین ائوینه آپاریب. بو هدیه لر میوه، شیرنیات، پارچه، گئییم و تزئیناتدان عبارتدی. بیر تعداد عائله لر بو پایی آپارارکن، بؤیوک طمطراقلا بیر توی و جشن کیمی بو گونو کئچیررلر.
بو گئجه ده مختلف نوع شیرنیات و نخود-کشمش و سایر نوع آجیللردن استفاده اولونار. بادام، فیندیق، مختلف نوع قاخلار، جویز، پشمک ایگده، و توخوم او جمله یئمکلردندی کی بو گئجه ده گرک اولا.عائله بیر یئره توپلاندیقدان سونرا و یئمکلری یئدیکدن سونرا، گئجه یاریسینادک، یوردوموزا اولان ناغیللاری بایاتیلاری و آتالار سؤزونو بیر-بیرلرینه دئییب اوخویارلار. حتی قدیملر ائولره آشیق چاغیریب آشیقلارین داستانلاریندان و سؤز بولاقلاریندان فایدالانیب اؤز زنگین ادبیاتیمیزدان داهادا آرتیق فایدالانارمیشلار.
بیزیم ائلده بؤیوک چیلله و کیچیک چیلله دئییمی ایشلکدیر. بؤیوک چیلله و کیچیک چیلله قارداشدیلار و بو آرادا بؤیوک چیلله قیرخ گون و کیچیک چیلله ایگیرمی گون اولار. بو ایکی سینین آناسی قاری ننه آدی ایله تانینیر. بؤیوک چیلله چیلله گئجه سیندن باشلانالار. بؤیوک چیلله نین سونوندا، کیچیک قارداش اوندان سوروشار: کئچیردیگین گونلرده نه ائده بیلدین؟ اودا دئیه ر: قادینلارین اللرینی کوزه لرین سویوندا دونداردیم.
کیچیک قارداش ایسه جواب وئرر: سنکی بیر ایش ائتمه ییبسن،من کؤرپه لری بئشیکلریندهو قونداقلارینا دونداراجایام و آردینجا بیر سیرا ماجرالاری وار.
چیلله گئجه سی بیزیم ادبیاتیمیزدا اؤزونه مخصوص یئری وار و چوخلو شاعرلریمیز بو حاقدا شعر دئییبلر. بو شعرلر بیزیم ادبیاتیمیزدا و ائلیمیزده چیلله نین نه قدر اؤنملی اولدوغونو گؤستریر. هر حالدا بیز چیلله نی ائلیمیزین بیر دگرلی وارلیغی کیمی گؤرمه لی ییک و هئچ زمان اونو اونوتمامالی ییق و گله جک نسیللره کئچمیشلرده نه لر یاشاندیغینی دا آشیلامالی ییق.
نوشته شده توسط admin در شنبه, ۳۰ آذر ۱۳۹۲ ساعت ۱۱:۲۰ ق.ظ
