آج قورد،باشی بلالی قویون لار…

آج قورد،باشی بلالی قویون لار…

اکبر سعادت
آنادیلیمیز:بیری واریدی بیری یوخیدی، بیر قورد واریدی. بو قورد ماحالدا قویون کئچی قویموردی. یئیردی. آما یئنه ده آجیدی. گون لرین بیر گونو، شیرله پلنگ یولی له گئدیردیلر. آز گئتدیلر، چوخ دایاندیلار، آز دایاندیلار. قوردون قازماسینا چیخدیلار. قاپیدان ایچری گیرنده گوردولر کی قورد بویرو اوسته یاتیبدی.
پلنگ اوندان سوروشدو: آ قورد قاقا نئجه سن؟
قورد دئدی: پلنگ قاقا اوچ گوندور بیر شئی یئمیرم آجام.
شیر دئدی: دور بیزیم له گئدک بلکه قاباغیمزا بیر شئی چیخدی.
قورد دئدی: یول گئتمه یه منده طاقت یوخدور.
پلنگ دئدی: ایندی کی بئله اولدو سن بوردا قال. بیز گئده ک ناهاردا اوزوموزو سنه یئتیره ریک. شیرله پلنگ گئتدیلر. قورد اونلارین گئتدیگینی گورن کیمی یئریندن قالخدی. او بیری قازمایا گئتدی. او ایکی قوزو پارچالایب گتیرمیشدی. قوزولارین اتینی قاباغینا قویوب اییلدی. یئنه ده اوز یئرینه گئتدی. اوبیری طرفدن پلنگ شیرده ن آیریلیب قورد قاقاسی اوچون اوو آختارماغا باشلادی. آز گئتدی چوخ گئتدی بیر چائین قیراغینا چاتدی. گوردو بیر بالیق چی چایین قیراغیندا یاتیبدی. یانیندا بیر نئچه یئکه بالیق وار. پلنگ بیر اویونا بیر بویانا باخدی بالیق لاری گوتوروب قاچدی.
اوزونو قورد قاقاسینا یئتریب دئدی: قاقا دوغرودو منده آجام آمما باخیب گورورم کی سن آجیندان لاپ اوزولورسن آل بو بالیقلاری یئه. گوره ک سونراسی نئجه اولور.
قورد دئدی: چوخ ساغ اول. پلنگ قاقا یوخسا لاپ آجیمدان اوله جکدیم. پلنگ بالیق لاری اونا وئریب گئتدی.
قورد اوز اوزونه دئدی: یاخشیجا پئشه تاپدیم. نه الیمی آغا- قارایا وورارام نه ده بوز کوپکین اوزونو گوره رم. بو سارساقلار آج قالار اوولادیقلاری منه وئرر لر. قورد تئز آیاغا دوردو بالیق‍‍‍‍لاری آپاریب جمدک لرین یانینا آتدی اوزوده دووشانین یانینا گئدیب دئدی: دووشان قاقا بئله اولماز؟ بوستانلارین شیرین یئمیشینی یئیرسن منه وئرمیسن؟
دووشان دئدی: قورد قاقا بو ایل بوستانلاردا سن دئین یاخشی یئمیش اولمایب کی. سنه ده گتیرم. منی باغیشلا
قورد دئدی: هئچ زاد بیلمیره م. گرک منیم پایمی گتیره سن.
قورد بوردان بیر باش قئزیل قوشون یانینا گئدیب دئدی: قاقا اون گون اولار کی منه چولپا وئرمیسن بئله ایش اولار؟
چولپا یوخدو.
قورد دئدی: بیلمیره م گرک منه چولپا تاپیب گتیره سن یوخسا بالالارینی الینده ن آلاجاغام. بونلار بوردا قالسین. سنه دئییم پلنگدن. پلنگ یولی له گئدیردی. گوردو بیر تولکو بیر پارچا سوموک گمیریر.
پلنگ اوندان سوروشدو: تولکو نه یئیرسن؟
تولکو دئدی: گورمورسن؟
پلنگ تولکونون یانیندا یئره چوکوب دئدی: تولکو بیر قورد وار لاپ قوجالیب اوزوده آجیندان اولور. بایاق الیمه بیر نئچه بالیق دوشموشدو آپاریب وئردیم اونا. تولکو برک دن گولدو.
پلنگ اوندان سوروشدو: نیه گولورسن؟
تولکو دئدی: او قورد دا اولان جمدک لر منده اولسایدی دوز بیر ایل یئیب یاتاردیم.
پلنگین اونا آجیغی توتوب دئدی: یالان دئیرسن.
تولکو دئدی: گل مرج چگیشک. گئدیب یوخلایاق. تولکو ایله پلنگ مرج چکیب یولا دوشدولر. یولدا شیره راست گلدیلر.
شیر سوروشدو: هارا گئدیرسینیز؟ پلنگ تولکونون سوزلرینی اونا سویلدی. شیرده بونلارا قوشولدو. یولدا قیزیل قوشا راست گلدیلر. قیزیل قوش قاناد ساخلایب دئدی: تولکو بابا، فیلان یئرده بیر قورد وار. لاپ بیزی تالایب چاپیب.
تولکو گولوب یولداشلارینا دئدی: بو بیر.
بیرآز گئدیب دووشانا راست گلدیلر. اودا قورددان شیکایته باشلادی.
تولکو دئدی: بو ایکی.
پلنگ دئدی: تولکوبابا سن دوغرو دئیرمیشسن. تولکو، پلنگ، شیر، دووشان بیرده قیزیل قوش بیر-بیرینه قوشولدولار، دوز قوردون یانینا گلدیلر. قورد بونلاری گوره ن کیمی قارنینی قوجاقلایب یئره اوتوردو، گویا او آجیندان لاپ اولور.
پلنگ دئدی: قورد قاغا نئجه سن؟
آجیمدان لاپ اولورم.
سوزونو قورتاران قورد اوزونو اولولویه ووردوکی، چئخیب گئتسینلر.
تولکو تئز ایرلی چئخیب دئدی:قاغا دونیادا پیس گوذران کئچیریب، گلین اونو یاخشی دفن ائلیه ک.
تولکو تئز بیر قبیر قازیب دئدی: داها دورماین گلین قورد قاغامیزا بیر آز آغلایاق. یالاندان بیرآز آغلادیلار. قورد گوردوکی خئیر ایشلر شولوغدو، بونلارین الینده ن قاچیب قورتارا بیلمیجک، بوغازی لاپ قورودو.
تولکو پلنگه دئدی: گوتورون قورد قاغامیزین جمده کین قبره قویاق. تئز قوردو گوتوردولر. قورد اوز – اوزونه دئدی: باغیرا چیخاراندا قاچارام. تولکو ایشی دویموشدو. چوخ آیق ترپه نیردی. قوردو قبره قویان کیمی، تولکو تئز اوستونو تورپاقلادی. قورد اوردا موردار اولوب اولدو.
تولکو دئدی: ایندی قورد قاغانین قازماسینی آچین. آچیب نه گوردولر، ایچی جمده کله دولو.
تولکو دئدی: خاینین اوزونو ساغ باسدیریب، مالینی دا یئیرلر. نه ایستیرسینیز یئیین. قوردون توپلادیغی جمده کلری یئیب اوستوندن سو ایچدیلر. سونرا داغیلیب گئتدیلر.
قایناق:آذربایجان ناغیل لاری

نوشته شده توسط admin در چهارشنبه, ۳۰ مهر ۱۳۹۳ ساعت ۵:۴۴ ق.ظ

دیدگاه


شش × = 24