الله هین رحمت آیی

الله هین رحمت آیی

حاضیرلایان:اکبرسعادت
آنادیلیمیز:ائی آللاه منی بو آیدا سنه توکول ائدنلردن ائت، و سنین یانیندا کاما چاتانلاردان و اوغور الده ائدن‌لردن ائت, و سنین درگاهینا یاخین اولانلاردان ائت، احسانینا خاطیر ائی آختارانلارین مقصدی!
ائی آللاه منی بو آیدا عئیبلری اورتمک و هر جور پیس ایشلردن چکینمکله زینتلندیر، منی احتیاج میقدارینا قانع اولماق و کیفایتلنمک لیباسینا بورو، عدالت و اینسافا وادار ائت، منی قورخدوغوم هر بیر شئیدن قورو و آماندا ساخلا، قوروماغینا خاطیر ائی قورخانلاری قورویان!
هر شی دن اونجه اوروجلوق آیین گینه سیز دوستلارا قوتلاییب، عیبادتلرینیزین حاق قاپیسیندا قبول اولماسینی دیله‌ییره‌م..
و بوتون وطنداشلارا، قلمداشلارا و موسلمانلارا تبریک دئییب، معنوی اوغورلار دیله ییر و هامی عزیزلردن خیر دعا اومورام.
اوروجلوق آییندا،نفسلریمیز اونون سحر یئللری‌ایله دویونله‌نیب. ایفطار چاغلاری‌نین موناجاتلاری‌نین شوقی اورگیمیزده آخیر. اوروج اینسانا ایلاهی نعمت‌لرین دگرینی بیلمگی و اونلاری تقدیر ائتمگی اویردر. قناعتی اویره‌دیر. بون‌لار سایه‌سینده اینسان اوجا اللها قارشی مسئولیت‌لرینی داها لاییق بیر شکیلده یئرینه یئتیرمه تلاشی ایچینه گیرر. حضرت پیغمبرین بیر حدیث‌سینده الله هر عبادتین قارشیلیغیندا بیر دگر تعیین ائدرکن، اوروج عبادتی‌نین قارشی‌لیغینی ساییلا بیلمه‌یه‌جک اولچوده توتموشدور. بو مزموندا بونو سویلمک مومکون‌دور کی، اوروج عبادتی بیر طرفی ایله بیرباشا روحا خیظاب ائدرکن، دیگر یانییلا اجتماعی‌دیر. بیر یونو ایله بشر-الله مناسیبت‌لرینی بیرباشا ایلگیلندیریرکن، دیگر طرف‌دن بشری مناسیبت‌لرین اوست نقطه‌سینه تماس ائتمکده‌دیر.اینسان ایکی ضدین بیر یئرده اولدوغو بیر وارلیق‌دیر. بدن ایله روح، ماده ایله معنا ایچ ایچه‌دیر. اینسانین خوشبخت‌لیگی بو ایکی فرق‌لی عنصورون تعادولوندا توتولماسینا باغلی‌دیر. مادی ایستیقامتیمیز داها آچیق اولدوغو اوچون روحی گوجلریمیزی گولگه‌لمکده‌دیر. بو تمایل دوام‌لی و تأثیرلی اولسا، اینسان روحونون گلیشمه‌سینه مانع توردیلمیش اولار. اوروج، روح ایله بدن مباریزه‌سینده عقل و ایراده صاحبی اولان اینسانین آغیرلیغینی روح‌دان یانا قویماسی معناسینی وئرر.اوروج بیر معنادا ایراده و صبر تحصیلی‌دیر. اوروج‌لو کیمسه صاباحدن آخشاما قدر نفسی‌نین آرزولارینا ست چکمکله گوناها قارشی دوزوم گوجو قازانار. حیات اینسان اوچون هر زامان راحت و شن اولمایا بیلر. بعضن چتین‌لیک‌لری ده اوزو ایله گتیرمکده‌دیر. اوروجون قاتدیغی دگرلرله صبر آلیشان آدام، حیاتی‌نین چتین‌لیک‌لرینی آسان‌لیقلا آشا. بونا گوره اولما‌لی‌دیر کی، حضرت پیغمبر “اوروج صبرین یاری‌سی‌دیر” دئمیش‌دیر.
او بیری طرف‌دن اوروجون اینسان ساغلام‌لیغینا مثبت تأثیرلری اولدوغو متخصص‌لر طرفین‌دن دیله گتیریلمکده‌دیر. اوروج خصوصیله معده و هضم سیستم‌لری‌نین استراحت ائتمه‌سی و داها سونراکی وظیفه‌لرینی داها یاخشی یوروده‌بیلمسی اوچون وئریلمیش یاخشی بیر استراحت. گوزل بیر پرهیز خصوصیتینده‌دیر. حضرت پیغمبرین “اوروج توتون کی، ساغلام اولارسینیز” سوزو اوروجون اینسان ساغلام‌لیغینا اولان فایدا‌لاری اوزرینه دئییلمیش بیر سوزدور. بو سببله اوروج، روحلا بیرلیکده بدنی ده حدین‌دن آرتیق مصرفین گتیردیگی روحی و فیزیکی خطالیق‌لاردان قورویار.
دین و دونیا موضوعسوندا اولان اوروج عبادتی و اونون اجتماعی فایدا‌لاری هر اینسانا عاییدیر.
بیلیندیگی کیمی اوجا یارادیجی اینسانلیغین باشین‌دان اعتباراگوندردیگی بوتون دین‌لرده اینسان‌لارا قوللوق و عبادت ائتمه وظیفه‌سی یوکلمیش‌دیر. عبادت‌لر اوز باش‌لارینا بیر هدف اولماییب رئال‌لاش‌دیرا‌جاق‌لاری داها اوست مقصدلر اوچون بیر واسطه حسابیندادیر. بو دوشونجه‌ده اولان‌لارا گوره عبادت‌لر آرتیق آرخالاریندان‌ بیر آن اول آتیلماسی لازیم اولان بیر یوک اولماق‌دان چیخار. سانکی اوزرینده یوکسلدیگی بیر واسطه حالینا گلیر. اوروج عبادتی ده بون‌لاردان بیری‌دیر.ایسلام حقوقوندا اوزونه خاص تعریفی ایله رمضان آییندا بیر آی بویونجا یئرینه یئتیریلمه‌سی لازیم اولان بیر عبادت‌دیر.
اوروجلوق،اینسانین یئتکین‌لیگینی علامت‌لرین‌دن بیری، حیوانی طبیعتینی آغلینا و روحونا بویونن ائیدیرمسی‌دیر. بو مقصده چاتماقدا آجلیق، سوسوزلوق، جینسی آرزولاری محدودلاش‌دیرماق، دیلین، اورگین، ذهنین و او بیری اورگان‌لارین یوخلاما آلتینا آلینماسی ان تأثیرلی یولدور. بو وظیفه‌لرین هامیسینی ان یاخشی یئرینه یئتیره‌جک اولان شئی ده اوروج عبادتی‌دیر.
قورآن‌دا: “ای ایمان گتیرن‌لر، سیزدن اولکی‌لره فرض قیلیندیغی کیمی، سیزه ده اوروج فرض قیلیندی” دییلمکده‌دیر. بورا‌دان آیدین اولور کی، ایلاهی تبلیغین چاتدیغی بوتون قوم‌لار اوروج توتماقلا مسئول توتولموش‌دور. ایستر یهودی‌لیک و خریستیان‌لیق کیمی سماوی دین‌لر ایستر بودیزم کیمی سماوی اولمایان دین‌لره باخیلسین بون‌لارین هامیسیندا اوروجا بنزر بیر تطبیق واردیر. لاکین ایسلام‌داکی اوروج عبادتین‌دن چوخ فرق‌لی اولدوغو گوروله‌جک. دئییله‌بیلر کی دیگر دین‌لردکی اوروج اصل ماهیتینه چیخاریلیب بیر نوع پرهیزه چئوریلمیش‌دیر. بئله‌لیکله امر ائدیلدیگی شکلیله گئرچک بیر عبادت اولا‌راق یئرینه یئتیریلن اوروجون یالنیز ایسلام دینینده اولدوغو دئییله‌بیلر.
قیمت‌لی اوخوجولار :یوخاری‌داکی ایشاره ائتدیگیمیز آیه و دیگر حدیث قایناق‌لاریندا ایفاده ائدیلدیگی کیمی، اوروج عبادتی بعضی استثناء‌لار خاریجینده هر کس طرفین‌دن یئرینه یئتیریلمه‌سی مجبوری اولان بیر عبادت‌دیر. دیگر عبادت‌لرده اولدوغو کیمی اوروج عبادتی ده اینسان‌لار آراسیندا بیر برابرلیک پرینسیپی اوزرینه قورولموش‌دور. هئچ بیر مسلمان آراسیندا آیری-سئچکی‌لیک ائدیلممکده‌دیر.
حضرت پیغمبر بیر سوزونده “اوروج قالخان‌دیر” دئیرکن، ان اوز ایفادسیله اینسانی اللهین قاداغالاریندان‌ قورویان بیر سیپر اولدوغونو بیلدیرمیش‌دیر. الله بو معنوی قالخان ایله مسلمان‌لاری بوتون داخیلی و خاریجی پیس‌لیک‌لردن قوروماقدا‌دیر. اوروج بد‌نین زیرئه گئیمه‌سی کیمی، روحون گئیدیگی بیر زیرئه‌دیر. “رمض”ان سوزون‌دن آیدین اولاجاغی کیمی، بو آیدا اوروج توتان کیمسه چکدیگی چتین‌لیک‌لر، آجلیق و سوسوزلوق سببین‌دن گوناهلارین یوخ اولماسینا وسیله اولاجاغینی سویلمک مومکون‌دور.
اوروجلوق، کاسیبین و احتیاج صاحبی‌نین حالینی، اوزونو باشقاسی‌نین یئرینه قویا‌راق چوخ داها درک ائتمیش اولار. دواملی وارلیق و غنی‌لیک ایچینده یاشاماغا آلیشمیش اولان بیری، اوروجلا شخصا محرومیتی دادا‌جاق‌دیر. بو تجروبه اونون کاسیب و یوخسولا داها فرق‌لی بیر گوزله باخماسینی تامین ائدر. نتیجه‌ده محتاج اولان‌لارا کومک ائتمه دویغولاری حرکته کئچر. بو دویغولارین حرکته چئوریلمسیله کاسیب ایله غنی آراسیندا گوزل علاقه‌لر قورولار. بو وسیله ایله ایکی طبقه آراسین‌داکی قایناشما اجتماعی دینجلیگه زمین حاضیرلایار. بون‌لارین هامیسی بیر معنادا اوروجون دونیوی فایدالاریندان‌ ساییلا بیلر.
ائی آللاه بو آیدا منه اوزلرینی سنین قارشیندا کیچیلدن موتیع اینسان‌لارین اطاعتینی نصیب ائت، قلبیمی توبه ائتمک اوچون سنین قارشیندا ایطاعتکار و تواضوعکار اولانلارین توبه‌لرینده اولدوغو کیمی آچ، پناه وئرمگینه خاطیر ائی قورخانلارین سیغیناجاغی!

نوشته شده توسط admin در دوشنبه, ۳۱ خرداد ۱۳۹۵ ساعت ۴:۵۱ ق.ظ

دیدگاه


− 7 = دو