خائنان ملک ایران،خانه سی ویران اولوب

خائنان ملک ایران،خانه سی ویران اولوب

حاضیرلایان:اکبرسعادت
آنا دیلیمیز:انقلاب یعنی سیاسی اقتدارین کوکیندن دگیشیلمه ‌سی و جامعه‌ده داها یئته‌رلی انکشافین ظهور ائتمه‌سی دئمکدیر. دونیانین ان بویوک انقلابلاریندان سوز آچماق گره‌کیرسه، دئمک لازمدیر کی صنعتی انقلاب و هابئله فرانسه‌نین بویوک انقلابی دولتلرین ترکیبیتی دگیشدیرمکله برابر جامعه نین اقتصادین و توخونوشونودا دگیشدیرمیشدیر.
تاریخی نظردن باخاجاق اولورساق، قدیم یونان دووریندن، اورتاچاغا قدر انقلابلارین مفهومو و آنلامی، ووروب سیندیرماق و آبادلیقلاری ویران قویماق ایدی. آنجاق رنسانس دان سونرا یعنی عثمانلی تورکلری‌نین ایکینجی سلطان محمد فاتحین اوندرلیگی ایله قسطنطنیه (ایندیکی استانبول) نی فتح ائتدیکدن سونرا، انقلاب جریانلاری یارادیجیلیق و انکشاف یوللارینی ترجیح ائتدیلر و بیر چوخ انقلاب جریانلاری ائل- اوبایا داها یاخشی یاشاییشی ارمغان گتیردیلر.
۱۳۵۷نجی ایلین انقلابینا گلینجه، هئچ کسین خیالینا گله بیلمزدی که شاهلیق رژیمی بو ساده‌لیکده آرادان قالدیریلا، شوکورلر اولسون کی زمانین و مکانین ال وئریشلی شرطلری باعث اولدو کی ایران انقلابی ۵۰ ایللیک بوغونتولو شرایطه، خصوصیله ملتلرین قدغن اولان دیللرینه سون قویولدور و بوتون ایران خلقلری اوز دوغما آنادیللرینده یازیب، اوخوماق امکانینا نائل اولدولار. حال حاضرده او گونلرین شاد و هیجانلی فضاسینی جانلاندیرماق چوخ چتین دیر.
آنجاق دئمک کی انقلابین عرفه سینده‌کی و سونراکی خاطره‌لی گونلردن نمونه اولاراق بئله یاد ائتمک اولور: نظره بئله گلیردی کی او گونلرده ایران شهرلری نین و کندلری‌نین هابئله اوبالاری نین جمعیت ساییسی چوخالمیشدی. ائل – اوبا هیجانلی سئوینجیندن قاناد آچاراق اوچماق ایسته ییرلردی .
دئمک انقلابین سسی بوتون هر شئیی تحت الشعاده قرار وئرمیشدی، نظره بئله گلیردی کی سووزلولک کتابلاریندان غم، کدر، غصه، قورخو و اوره‌ک دویونتوسو سوزلرینی چیخارتمیشلاردی.
هر شئی گوزه‌ل و سئوینجله قارشیلانیردی. گوزه گورونمه‌ین شکیلده آزادلیق قوشو، قانادلارینی اولدوغو کیمی آچاراق ایران آدلی بویوک و ۴ فصل اولکه‌نین اوستونه گرمیشدی۱، سانکی۲ ائل- اوبامیمیک۳ حرکتلری ایله جوشموش، غیرتلی هیجانلاری ایله، پولاد تک یومروقلاری ایله دئییردیلر: ای جان سیخان قارابولودلار، دوغما دیاریمیزی ترک ائدین. بیزیم تاریخ بویو بئلنچی هیجانلی صحنه‌لری عملده گورمه‌میشدی، اونا گوره که زمان، مکان هابئله یئر- گوی شادلیقدا غرق اولاراق آزادلیق عطری ساچیردی.
ائل – اوبا وطن اوغروندا مبارزه آپاران شهیدلره قان وئرمک ایچون اوزون صفلرده نوبته دوروردولار، جامعه ده اینام، مسلک، نژاد، سیاست و دیل آیریلیغی گوزه دگمیردی. قوجالی، جوانلی، کیشیلی- قادینلی هر کس وطنین قورتولوشونا جان آتیردی. ائله بیل جماعت دده قورقود، بابک و دومرول پهلواندان غیابی پیام آلمیشدیلار کی: قورخما گلدیم اونا گوره خلق سئوینجیندن اوز دری لرینه سیغماز اولموشلاردی، واقعیتده بیر عجیب معنوی و ملکوتی گوج دامارلارا تزریق اولموشدی. »قورخو نه دیر بیلمه ریز بیز وطن آسلانلاری«شعار کیمی اورکلره الهام قایناغی اولموشدی.
بوگون، او خاطره‌لی گونلرین هیجانینی و سئوینجینی وصف ائدیب، گنج نسیله چاتدیرماق چتین‌دن ده چتین دیر، حقیقی ایثارگرلیگی آنجاق او گونلرده لمس ائتمک ممکن ایدی. آذربایجان خالقی‌نین ایران تاریخینده قویدوغو قهرمانلیق ایزلری خالقلارین یادداشیندان پوزولماز ایزلر اولوبدور. آذربایجانین کئچمیش یوزایللیک ایران سیاسی، اجتماعی تاریخینده اونودولماز رولو اولوب و بیر سیرا تاریخی حادثه‌لرده اوینادیغی رول اعتباریله بوتون شرق اولکه‌لرینه اورنک کیمی اوزون تانیتدیریبدیر.
معاصر تاریخیمیزده شرف گونشی کیمی پارلایان بویوک اجتماعی و سیاسی دگیشیک ‌لیک‌لر، آذربایجان خالقی‌نین آدی‌لا باغلی‌دیر. مشروطه حرکاتی، شیخ محمد خیابانی نهضتی، ۲۱آذرده یارانان ملی- دموکراتیک قورولوش، ۲۹بهمن حماسه‌سی و ۲۲بهمن انقلابی کیمی اجتماعی سیاسی حرکتلرین اوزه‌رینده قویودوغو تعیین ائدیجی ایزلر اوچون، آذربایجان خالقی ، ابدی‌لیک ملی غرور حیسی کئچیره بیلر.
۱۳۵۶نجی ایل بهمن آیی‌نین ۲۹نجی گونو آذربایجانلی‌لارین ظولم و شاهلیق استبدادی علیهینه گوستردیک‌لری قهرمانلیق یئنی بیر حماسه‌نین یارانماسینا سبب اولدو. بو حماسه‌ ایران سویه‌سینده آزادلیق و باغیمسیزلیق شعارلاری آلتیندا یارانان خالق حرکاتی‌نین ان قووه وئریجی عامیلینه چئوریلدی.
ایران اهالیسی شاه مامورلارینین قم شهرینده اعتراض سسی قالدیران جاماعاتین علیهینه تورتدیکلری تضییقلره اعتراض اولاراق، شهرین مسجیدینه توپلاشماق ایسته‌ییر، آنجاق شاهلیق قورولوشونون کئشیکچی‌لری یول وئرمه‌یه‌رک، بیر گنجی اولدورورلر.
خیابانلاردا باشلانان نئچه مین‌لیک اعتراض نمایشی شاه رژیمی‌ علیهینه اوجالان دئوریلمه‌ شعارلاریلا داوام تاپیر. مامورلارین ائتدیگی جنایتلر ملتی قورخوتماییر، عکسینه خالق، انقلابین درینلشمه‌سی اوغروندا آپاراجاغی مبارزه‌نین داوامینا داهادا ایناملا یونه‌لیر.
۲۹ بهمن حرکاتی‌نین ان اونملی تاثیری، ایران سویه‌سینده گئده‌ن مبارزه‌نین دوز استقامته یونلمه‌سینه یول گوسترمه‌سی اولور.
شاه رژیمی‌نین دئوریلمه‌سی و پهلوی خاندانی‌نین آرادان قالدیریلماسی، اساس انقلابی مقصده چئوریلیر. شاهین سوسقون آداسینا ولوله دوشور؛ بیر یانداندا بو انقلابی حرکت، ایرانین باشقا شهرلرینده گئده‌ن مبارزه آخیمی‌نین گوجلنمه‌سینه سبب اولور. ساواک، شهربانی و دیگر استبداد قوه‌لری‌نین ”شکست ناپذیر“لیک افسانه‌سینه بیر یوللوق سون قویولور.
ایران حرکاتی‌نین تاثیری آلتیندا ایستر انقلاب گونلری ایسترسه‌ده اوندان سونراکی گونلرده خالقین دیلینه یاخین اولان یئنی مضمونلو ادبیات یارانیر.
مختلف ادبی ژانرلاردا اوز عکس صداسینی تاپان مبارزه روحلو، آزادلیق ایستکلی صنعت اثرلری، خالقین دیلینده ازبر اولور. دویوشچولرین سنگرلرینده هیمن‌لره و بیر سیرا یارانان نظم اثرلری خالقین اوز آرتیرمالاریلا، نمایش شعارلارینا چئوریلیر:
نایب صاحب زمان چون وارد ایران اولوب
خائنان ملک ایران خانه سی ویران اولوب…
اون بش ایل آیری دوشن اوز دودمانندن گلیر
دین یولوندا آیرلان اوز خانمانندن گلیر…

نوشته شده توسط admin در جمعه, ۱۰ بهمن ۱۳۹۳ ساعت ۳:۳۲ ب.ظ

دیدگاه


یک × 9 =