گؤیچه عاشیق صنعتی
حسین اسماعیلوو
آذربایجان سووئت فولکلورشوناسلیغیندان فرقلی اولاراق سون دؤورون بعضی تدقیقاتلاردا عاشیق صنعتینین گئنهزیسی و اینکیشاف مرحلهلری بارهدهکی تدقیقاتلاردا کونسئپتوواللیغا مئیل خیلی آرتمیشدیر. لاکین چوخ تأسف کی بو مئیل و جهدلر عاشیق صنعتینین تشککول و تکامول دینامیکاسینین تخمینیده اولسا، سیستئملی علمی ائسکیزینی جیزا بیلمهمیشدیر. اون – اون بیرینجی عصرلرده اساساً تصوّفی ایدهآ بازاسی اساسیندا قرارلاشان ایسلام مدنیتی ایله قدیم تورک مدنیتینین سینتزیندن، وحدیتیندن دوغولان عاشیق صنعتینین تشککول و تکامولو اولدوقجا مرکّب بیر پروسئس اولموشدور. بو مرکبلیک، ایلک نؤبهده، بو صنعت فئنومئنینی وحدت ده دوغوران قدیم تورک مدنیتینین ایدهآ اساسلاری ایله ایسلام مدنیتینین ایدهآ اساسلارینین آنالوژی مقاملارینین یاخینلاشماسی حسابینا )ایسلام مونوته یئزمی و تورک تانریچیلیغی(، ضدّیتلی مقاملارین بیر – بیرینه قارشیلیقی گوذشته گئتمه حسابینا قایناییب قوووشماسی پروسئسی ایله شرطلنیر. محض بونا گؤره عاشیق صنعتینین ایستهنیلن اینکیشاف مرحلهسینده کونسئپتووال مضمونونو دا بدیعی – ایستهتیک ایدهآ دان داها چوخ، ایستهتیک لشن فلسفی ایدهآ معینلشدیریر. بیر طرفدن ایدهآ قدرکی فولکور شوناسلیق فیکریمیزده عاشیق صنعتینین گئنهزیسی و اینکیشاف مرحلهلری حاققیندا کونسئپسیانین مؤوجود اولماماسی دیگر طرفدن ایسه گؤیچه عاشیق محیطینین اساس ایدهآ ایستهتیک بازا ایستاتوسوندان قایناق لاناراق بو مرحلهلری اؤزونده داها دولغون عکس ائتدیرمهسینی نظره آلاراق بیز بو پروبلئمینده تدقیقاتیمیزدا علمی حلّینی باشلیجا مقصدلریمیزدن بیرینه چئویرمیشیک. آذربایجان مدنیتینین و شیفاهی خالق ادبییاتینین اینکیشافیندا مستثنی رولو ایله سئچیلن، صنعتی و سؤزو، موسیقینی و پوئزیانی مکمّل شکیلده اؤزولده بیرلشدیرن عاشیق صنعتی ادبی – مدنی بیر فئنومن کیمی کفایت قدر مرکّب تکامول یولو گئچیب ؛ هم فورما، هم ده مضمون باخیمیندان کامیللشرک، بوتؤولوکده بؤیوک بیر مدنییته مالک خالقین ادبی – ائتنیک احتیاجینی اؤدهمک فونکسیاسینی اوغورلا یئرینه یئتیریب و گؤیچه عاشیق محیطی اؤز اینکیشافیندا عاشیق صنعتینین تشککولو، تکامولو و انتباهی مرحلهلرینین هر اوچونو بوتون دولغولوغو ایله عکس ائدیر. خصوصیله، ائتنیک – مدنی آرهآلین مرکزدن و سیاسی نفوذدان کنار پئریفئریک مکانین دا، بیزیم میللی مدنیتیمیز تاریخنده ترکمه – ائلات آدی ایله گئچن، ائسکی خالق عنعنهلرینی موحافیظهکار شکیلده قورویان توپلوملاردا آشیغین ایستاتوسو، رولو و فونکسیاسی هم کمیّتجه، همده کئیفیتجه داها بؤیوک داها میقیاسلی و داها دولغون اولوب. قئید ائدیگیمز لوکال خاراکتئرلی ایسپهسی فیکا، ایلک اؤنجه همین کئیفیتلری تام دولغونلوغو ایله اؤزونده احتوا ائدن گؤیچه محیطینه عایددیر. گؤیچهنی ادبی-مدنی محیط کیمی سجیهلندیرن باشیلجا گؤستریجی قدیم تورک خالق عنعنهلرینه ماکسیموم باغلیلیق صادیقلیک و تورک اؤزگولویودور. تورکون اؤز کؤکوندن قوپمادیغی، بؤتون مدنی اینستیتوتلار اؤزره اؤز کؤکو اوسته بیتدیگی و اوجالدیغی، میللی دگرلر سیستئمینین اوپتیمال ائلئمنتلرله زنگینلشدیردیگی ان مکمّل محیطده گؤیچهدیر. افسانهوی اوغوز خاندا، تاریخچی آتا »پیغمبر« قورقوت دا اؤز روحی – معنوی عؤمرونو داها چوخ بو یورد دا یاشاییب، دیل، دین، فیکیر و صنعت یادداشیندان بو گونه دک سیلینمهییب. آذربایجان تورک موسیقیسی شرق موسیقیسینی، آذربایجان تورک پوئزیاسی کلاسیک شرق پوئزیاسینی موافیق اولاراق یالنیز گؤیچهلی عاشیغین سازیندا و سؤزونده اوستهلهییب شاعیری شعرده، صنعتچینی صنعتده، مؤمونو تانری سئوگیسینده حئیرتده قویوب، شعر و صنعت مکمّللیگی ایله یاناشی دین و ایمان کامیللیگی، حقّ، عدالت و معرفت علمینین ادب – ارکان قایدالاری عادی معشیت حادثهسی سویهسینده مؤحکملنیب، بوتؤو بیر مدنی گؤیچه فئنومنینی شرطلندیریب.
۱۹۸۸-جی ایلدن ائرمنستان طرفیندن ایشغال اولونموش غربی آذربایجانین گؤیچه ماهالی آذربایجان عاشیق صنعتینین ساز و ائل شاعیرلیگینین بئشیگی اولموشدور. سازدا هاواجاتدا، عاشیق شعریده، آغیر مجلیسلر آپاران صنعتکار دا گؤیچهده فورمالاشیب مکمّللشیب، یاخین و اوزاق اراضیلره بورادان یاییلیب. عاشیق صنعتینین بیزه معلوم اولان ایلک نومایندهسیندن – قوربانیدن خیلی اوّل یازیب یاراتمیش میسکین آبداللا باشلایان بو صنعت یولو ۱۷ جی عصرین دردلی نصیب اونون شاگیردی شیمپرلی قول ماحمود کیمی صنعتکارلارینین یارادیجیلیغی ایله اینکیشاف ائدهرک ممّد حسین، موسا عالی، علعسگر . ۱۹ جو عصرده گؤیچه ده عاشیق شعری ایله یاناشی کلاسیک پوئزیامیزین دا مختلف فورما و شکیللرینده گؤزهل صنعت اثرلری یارانیر. شعرلرینی سازسیز سؤیلهین زودلو اوستا عابدوللا، میرزه بگلر، حاجی الیش آغا، عزیز شاعیر آیدین کیمی ائل شاعیرلری کلاسیک پوئزیا ایله عاشیق شعری عنعنهلرینی قووشدوراراق دوغما ادبی محیطین اوفوقلرینی داهادا گئنیشلندیریر، اونا یئنی روح، طراوت گتیریرلر. بو جوشغون یارادیجیلیق محیطی ئینی – یئنی قودرتلی ساز – سؤز اوستالارینین، ائل شاعیرلرینین یئتیشمهسینه گؤجلو بیر زمین یارادیر. گؤیچه عاشیق محیطینین، زنگین یارادیجیلیق یولو گئچمهسینی، یوکسک تشککولو صنعت سوّیهسینه اوجالماسینی ایلک نؤوبهده همین اراضینین فولکلور محیطینده مؤوجود اولان معنوی – ایستهتیک و ادبی پوئتیک احتیاطلاری شرطلندیرمیشدیر، صنعت شجرهسینده مکمّللشن عنعنه فردی استعدادلار اولیالار و حقّ عاشیقلری طرفیندن فاصلهسیز اولاراق گؤجلندیریلمیش دیر.
نوشته شده توسط admin در دوشنبه, ۲۸ مرداد ۱۳۹۲ ساعت ۵:۰۳ ق.ظ