کئچمیشین باغری چاتلاییر
آیهان میانالی
آنادیلیمیز: سؤزلرین باغرینا هئچ دوشونمَزدن، ائوه کئچیب، دووارلار‌لا دردلَشیرم. بیرآن اؤزومو ایتیریب، آسیلی قالیرام. اؤزومه گلیب، گوزگو قارشیسیندا دورورام. پاسلانمیش چرچیوه‌‌‌‌‌نین قیرمیزی لکه‌لری، گوزگونو اؤرتور. گوزگونون شوشه‌سی چاتلاییر. او پاس‌لارین دیبینده، او چات‌لارین آلتینداکی چاشقین بیر آدام، سانکی نسه آختار‌یر. او چات‌لارین دیبینده هر یئری دومان بورویور. اؤزومو اوشومه‌گه باشلا‌ییرام. کولک پنجره‌دن اوتاغا گلیر. کولک پنجره‌‌‌نی سیلکله‌ییر. پنجره‌‌‌‌‌نین آرخاسیندا کولکده آغلایان بیر اوشاغین سسینی، سانکی چوخداندیر ائشیدیرم. قولاق‌‌لاریم باشلا‌ییر چاشماغا، آردیندان اؤزومده بوزولورم. قولاق‌‌لاریم دوغرو ائشیدیر. سانکی بیر کؤرپه‌‌‌نی ائشیکده اؤز باشینا بوراخیبلار. کؤرپه‌‌‌‌‌نین سَسی هر آن داها یوکسه‌لیر. بیر سَس قولا‌‌‌غیمدا پیچیلداماغا باشلا‌ییر. باشیمی ال‌‌لریمین آراسیندا توتورام. باشیمی سیخیرام. بوتون بَدَ‌‌نیم تیتره‌‌مه‌گه باشلا‌ییر. دووارا سؤیکه‌‌‌نیرم. باشیمی ترپه‌دیب یئره اوتورورام. نه واخت کولک ساکیت‌لشسه، آغلاماق سَسی ده دایا‌‌‌نیر. دورقونلا‌شیرام. یاتماق ایسته‌‌ییرم. دوشونمک ایسته‌میرم. بیری سورکلی منه باخیر. آددیملاریمی سا‌ییر. نفسیمی ده عینی. شاختا‌‌‌‌نین سیزی جا‌‌نیما هوپوب، ایستر-ایسته‌مَز تیتره‌‌ییرم. پرده‌لر چکیلی حئکایه‌‌سینی یازماغا باشلا‌ییر. گئجه‌‌دیر، یوخسا گوندوز؛ اونو دا بیلمیرَم. اوزون سورج‌دیر قارانلیقدا یاشا‌ییرام. سئویل قارانلیغی سئومیردی. یاغیش یاغیر. یاغیش سینان شوشه‌دن، پنجره تیکیشیندن اوتاغا گیریر. کولک الیمین جیزیق‌لاریندان کئچیب، الیمین یاراسیندا یووا قورور. نییه قارانلیق قارانلیقدان بو قده‌ر فرقلی‌‌دیر؟ قبرین دیبینده‌کی قارانلیق بو اوتاغین قارانلیغیندان نییه فرقلی‌‌دیر؟ بو اوتاغین قارانلیغی، جنازه‌‌سینی الیم‌له قبیره قویدوغوم قبیرین قارانلیغیندان فرقلی‌‌دیر، او قارانلیغی گؤرَن کیمی، قورخوب، جنازه‌‌سینی یوخاری‌دان قبیره آتدیم. نه قورخمالی ایدی بو قارانلیق!
سئویمین کیرپیک‌لری‌نین آرخاسیندا‌کی قارانلیق، مزارین آلتینداکی قارانلیقدان فرقلی ایدی. قالخیب گئدیب یئمک ماسا‌سی‌نین آرخاسیندا اوتورورام. باشیمی ماسا‌‌‌‌نین اوستونه قویورام. سوووزورام. ماسا‌‌‌‌نین اوستونده‌کی سو ایستیکا‌‌‌‌نینا دوموب باخیرام. سو ایستیکا‌‌‌‌نیندان باخدیقدا سئویمین چکدیگی رسم ایسلا‌‌‌نیر. باشیمی قالد‌یر‌یرام. سویودوجونون قاپی‌سیندا ایلیشیب قالان رسم اثرینه باخیرام. من، سئویل و سئویم رسمده اگلشمیشیک. رسمده ال‌‌لریمیز بیر-بیرینه توخونوب کیمی گؤرونور. دئدیگی کیمی جَنّت اولان یاشیل بیر یئرده. قالخیب سویودوجویا ساری گئدیرم، سونرا بیردن-بیره باشیم گیجه‌لیر. رسم یان-یؤوره‌مده فیرلانان کیمی منی توولا‌ییر. رسمین یان-یؤوره‌سینده فیرلا‌‌‌نیرام. ماشین قاردرئیل‌لره دگیر. سئویم یوخلا‌ییب. سئویل قیشقیریر، باشیم ماشینین اؤن شوشه‌سینه دگیر. الیم ایستیکانا توخا‌‌‌نیر. ایستیکان یئره دوشور. ماشین دره‌‌‌‌‌نین دیبینه قا‌ییر. آغاج‌لارا دگیر. آیاق‌‌لاریم قیریلان شوشه‌لرین اوستونه گئدیر. آیاق‌‌لاریمین آلتی قانا‌ییر. گئری قا‌ییدیب سئویمه باخیرام. کیرپیک‌لری‌نین آرخاسیندا‌کی قارانلیق، ماشین سوردوگوم گئجه‌دن داها آرتیق قار‌ادیر. قولاغیندان قان سوزه‌رک، ساری سیرقالارینی قیزارد‌یر. مطبخده یئره دوشورَم، دره‌‌‌‌‌نین دیبینی آغیر بیر سَس‌سیزلیک بورویور. مطبخین یئری قیرمیز‌ییا چئوریلیر. کئشکه کیمسه منی تاپیب بئیینیمه سیلاح دایاسین. یوخسا بوروسونو آغزیمین ایچینه قویوب قیشقیراردی: سوس و یئرینده قال، یوخسا تَتی‌گی چکه‌رَم. کئشکه امر ائدیب فرمان وئرن اولسایدی. دوردورماغا بیر فرمان کیمی.
بئله دوشونورم کی هر بیر حرکت و یا ائتدیگیم هر ایش، یا دا وئرد‌یگیم قرارلار، دورومو اولدوغوندان دا داها پیس ائدیر. سانکی هر زامان بونو ائتمیشم. بونا گؤره بیر هفته سونرا خسته‌خانادان ائوه گلنده، ائوی ترک ائتدی. یَقین کی، آتا‌سی‌نین ائوی تبریزه گئتدی. نه‌دن کی بو هوندور شه‌هرده، کیمسه‌میز یوخ ایدی. بیر سؤز دئمه‌دی. منه باغیرمادی و منه ائله عذاب وئرن بو‌دیر. ساده‌جه منه باخدی. سانکی من گوناهکار ایدیم و نه بیلیم اولا بیلردی کی گوناهکار سا‌ییلام. سئویمین اوتاغی‌نین قارشیسیندا دورورام. اوتاغین قاپی‌‌سینی آچاندا، اوتاغیندا آسیلان دمیر زنگی‌نین سَسی اوتاقدا ائشیدیلیر. جیرینگ جیرینگ. زنگین سَسی بئینیمده سسله‌نیر. سَسی قولاق‌‌لاریمدا او قده‌ر یوکسک اولور کی، قولاق‌‌لاریمی ال‌‌لریم‌‌له توتماق مجبورلوغوندا قالیرام. او قده‌ر کی، باشیم آغری‌ییر.اوتاق لاپ قارانلیقدا بوغولور. آیا‌‌غیم یئرده‌کی قولچا‌‌غین اوزه‌رینه کئچیر. اوتاغیندا ماهنی سسی جالا‌‌نیر. هئی ماهنی تکرارلا‌‌‌نیر. ایکی دفعه، یا دا اوچ دفعه. منی قه‌هر باسیر. اوتاغین لامپا‌سینی یاند‌یر‌یرام. اوتاغین گوزگو‌‌سونون یا‌‌‌‌نیندا، منیم‌‌له سئویل-سئویمین بؤیودولموش شکلی‌نین اگلشدیگینی ایزله‌‌ییرم. تام سئویمین بیر یاشلی‌‌لیغی. آتا سؤزجوگونون ایلک دفعه دئدیگی گون و بیز، یا‌‌نی سئویم‌‌له من، بو گونو قوتلا‌ییب قئید ائتدیگیمیزی خاطیرلا‌ییرام. بیر فوتوشکیل ایله بو گونو، بو ثا‌‌نیه‌‌‌نی چکیب ساخلاماق ایسته‌‌ییردیک. هئچ بیلمه‌‌ییردیک کی نئچه واختدان سونرا، فوتوشکیل گوزگونون یا‌‌‌‌نیندا یئرلَشیب، سئویمی ایتیره‌جه‌‌ییک. و بو شکیل هئچ بیر زامان بیزیم اوچون سئویم اولمایاجاق. یئنی‌دن کؤرپه‌‌‌‌‌نین آغلادیغینی ائشیدیرم. پنجره‌‌‌‌‌نین یاخینلیغینا گئدیرم. بیر چینار آغاجی‌نین بوداق‌لارینا باخاراق. یالنیز ساغا فیرلانان، سولا دؤنن، فیرلانان و یاغیشا باتمیش آسفالتین اوستونه د?شن بیر یارپاغا باخماق؛ بورایا سپه‌لَنمیش باشقا ساری یارپاق‌لارین یا‌‌‌‌نیندا، لاپ ائله اور‌ادا. کیچیک بیر قیز ائوین تام قارشیسیندا، خیابانداکی چینار آغاجی‌نین آلتیندا دوروب، او بالاجا قیز گؤره‌سن سئویم دگیل‌می؟! گؤدَکچه‌‌سی‌نین بویاغی، قیرمیزی رنگده‌دیر. تام سئویمین گؤدَکچه‌‌سی‌نین بویاغیندا. قا‌ییدیب سورعت‌‌له ائنیرم. پیلله‌کن‌لردن جوت-جوت یوخاری ائنیرم. کوچه‌یه چاتیب اونون اولمادیغینی حیس ائدیرم. کیمسه آغاجین آلتیندا دگیل. کوچه‌ده کیمسه یوخ‌دیر. دیرکده‌کی ایشیق‌لار، ایشیلدا‌ییب، ایشیق ساچیرلار. نفس‌لریم اوزومون قارشیسیندا بیر آن‌لیق بولودلا‌‌‌نیر، سونرا یوخ اولور. سونرا یئنی‌دن گیجه‌لیرَم. آغاجین یان-یؤوره‌سینده فیرلا‌‌‌نیرام. آغاج دا یان-یؤوره‌مده فیرلا‌‌‌نیر. سئویمه دوموب باخیرام، سئویل یاواشجا گؤزلرینی آچیر. آیاق‌‌لاریم یارپاق‌لارین اوستونه سویروشور. سئویل، سئویمی گؤرور، قیشقیریر. سئویمی ال‌‌لریم‌‌له گؤتوروب قالد‌یر‌یرام. یولا ساری گئدیرم. کیمسه یولدا دگیل. یول دومانلی‌دیر. بیر ماشین آیاق‌‌لاریمین اؤنونده ساخلا‌ییر. باشینی پنجره‌دن چیخاردیب سؤ‌یوب، یولونا داوام ائدیر. یولون اورتاسیندا دیز چؤکورم. باشیمی گؤگه قالدیریب قیشقیریرام. یاردیم! منیم کیمی بیری‌سی، سسله‌نیب سسی باتیب محو اولور؛ او دا یاردیم اوچون باغیر‌یر! دووارا سؤیکه‌‌‌نیرم. کؤرپه‌‌‌‌‌نین آغلاماق سَسی قولا‌‌غیمی بورویور. اینسان‌لار یان-یؤوره‌می توتوب، سَس‌لری آری‌لارین ویزیلتیسی کیمی قولاق‌‌لاریمدا پیچیلدا‌‌‌نیر. اینسان‌لار اؤز ایش‌لری‌نین آردینی توتماق اوچون، یوخ اولورلار.
گؤزلریمی آچاندا لامپا‌‌‌‌نین ایشیغی گؤز‌لریمه د?شور. سئویل سَحَردن بری، سئویمین اوتاغیندا گیریب، هئچ ائشیگه ده چیخما‌ییب. ائوی آغیر بیر سَس‌سیزلیک بورویوب. نه قده‌ر چاغیر‌یرام، اوندان بیر یا‌‌نیت گلمیر. باشینا بیر اویون گتیرمه‌گی‌ندن قورخورام کی. یومروغوم‌لا سئویمین اوتاغی‌نین شوشه‌‌سینی سیند‌یر‌یرام. الیم پارچالا‌‌نیب، قانا بورونور. یئرین اوزه‌رینه قان تؤکولور. قیریلان شوشه‌لرین اوزه‌رینه تؤکولور. سئویل ایسه اوتاغین بوجاغیندا اوتوروب هئچ چؤنوب باخما‌ییر. اوتاقدا سئویمین گولوش سَسی ائشیدیلیر. سئویل تئلئفونونون ائکرا‌‌‌‌نینا دوموب. نه قده‌ر ایره‌لی‌له‌سم، گولوش سسی او قده‌ر یوکسک اولور. سئویمین اوچونجو آد گونونون فیلمینه باخیر. ال‌‌لریمین قا‌‌نی، آیاق‌‌لاریمین اوستونه داملا‌ییر. چیگین‌لری تیتره‌‌ییر. بیر سؤز دئمیر. من ده بیر سؤز دئمه‌‌ییب، هَمَن یئرده اوتورورام. دووارا سؤیکه‌‌‌نیرم. سئویلین گئدیشیندن اون گون کئچیب. ایلک اون گون‌ده یئنی‌دن ایچمه‌گه باشلامیشام. ایلک گون ایکی ایستیکان، سونرا دؤرد ایستیکان. سونراکی گون آلتی ایستیکان. ائرته‌سی گون شوشه‌ده‌کی قالان ایچگینی باشیما چکیرم. اوره‌گیم ایچگی ایسته‌‌ییر. دولاب‌لاری نه قده‌ر آختار‌یرام، ایچمک اوچون بیر شئی تاپا بیلمیرم. شوشه‌‌‌‌‌نین دیبینده بیر قورتوم بئله یوخ‌دیر. یوخو گؤرورم، یا‌‌نی یوخلادیغیما دوشونورَم. چونکی بیردن قار‌لا دولو بیر دوزن‌لیکده دایانمیشام. هر طرفی قار اؤرتوب، باسدیریب. گون دوغان یئری‌نین دیبینه‌جن آغ بویاقد‌ادیر. دیزه‌جن قارا باتمیشام. قارشیمیز‌دا یالقیز بیر چینار آغاجی وار. قار بوداق‌لارینی اؤرتوب. بعضن بوداق‌لار بونجا قارین آغیرلیغیندا دؤزه بیلمه‌‌ییب، قارلار ایسه یئره ییخیلیرلار. تام آغاجین آلتیندا دایانان کیچیک بیر قیزین آیاق‌لاری‌نین یا‌‌‌‌نینا. آردی وار
نوشته شده توسط admin در شنبه, ۱۱ شهریور ۱۴۰۲ ساعت ۳:۲۳ ب.ظ
