پاییزین کدرلی گونشینین سون شوعآلاری
نریمان ناظیم
سون بولوم
آنادیلیمیز: درین دویغولارا دالمیش »مریم«، زنگین چالینماسی ایله، آییلیر. دوکتور دی، «نئجهسیز مریم خانیم«- دئیه، ایچهری گلیر. »مریم«له بیرلیکده اوتاغا کئچیرلر. دوکتور، تختـین قیراغیندا اوتورور. الین ،»صادق«ین، آلنینا قویوب، سسلهییر: »صادق«…»صادق«، منم سیاووش. دور گؤروم نهییندی! . »صادق«ین گؤزلری آچیلیر. قیزارمیش گؤزلرینین حاشیهسی شیشیب پورتموشدور. قیزمار نفسیندن، قایساقلانمیش دوداقلاری چاتلاییب، شیریم- شیریم اولموشدور. اوزون زامان دینمز- دانیشماز، دونوق باخیشلا، دوکتورو سوزور، سونرا سوروشور: »سن ده! گؤردون اونو؟ گؤردون نه گونه سالمیشدیلار؟! دئییرم آخی شرفسیز…. بیشرف قیچیندان نییه بس؟!… دئییر… دئییر، اوشاقلارین اللری اسیب، سؤزه باخ، سؤزه! اوشاقلارین اللری اسیب! باخ سؤزه… باخ سؤزه!«
الین اوزادیب، دوکتورون الیندن یاپیشیب، اؤزونه ساری چکیر: »الیوی بیر قوی باشیما, گؤر نئجه زوققولداییر, بئیینیم!… بئینیم، ترپهنیب سیاووش. یوخ دای… یوخ، من دوزهلن دئییلم. دای من دوزلمم، سیاووش« دئیه، سوسور. سیاووش، »مریم«ـه ساری دؤنور, »تبی چوخ یوخاریدی«- دئیه، سویو‌ایلا دسمال ایستهییر. »مریم« بیر لهین سو, بیر دسمال، بیر شیشه آلکول گتـیریر. سیاووش دسمالی ایسلادیر، »صادق«ین آلنینا قویور. »صادق« دسمالی آلنیندان آتـیب باغیریر: «بوشلا بابا, بوشلا منی! من دوزهلن دئییلم… من دوز… من دو…». سیاووش اونون چیینیندن باسیر: «دی دایان، قوی قیزدیرمانی یئندیریم. آخی!« دئیه، اونو یئنیدن یاتـیردیر. »صادق«، آغیر نفس آلا- آلا زاریلدایاراق، ساییقلاییر.«گؤزومو یومورام، گلیر یوخوما. ال چکمیر او, گولور منه… او… او منیم سققهلیمه گولور. آخی سنده کیشی سن؟ سن… سنده ده، شرف وار, یوخ، یوخدور. دوز… دوز دئییر او، یوخدور… یوخدور. گیریب منیم بئینیمه، سیاووش. بئینیمده چابالیر او، چیرپینیر سیاووش… چیرپینیر…»!ایشیغین یایدیغی معلومات اساسیندا آرازآذربایجان راپورونا گوره ، سیاووش، هلهده، اونون آیاقلارین تئشتده سرینلهدیر. آمما قیزدیرما، یئنن دئییل. »صادق« ائلهجه صادالاییر: «کئشگه…، کئشگه گؤرمهیئیدیم اونو. آخ یانداخ کولو… یانداخ کولو… ، بیر یانداخ کولون، الینده سیخیب ساخلامیش, دیک منه ساری, ائله او جور… ائله او حالدا، قولو قورویوب، قالمیشدی… ائله بیل منه وئریردی، ائله بیل دئییردی گل… گل! آقای دوکتور بو دا دسته گول! گل… گل آپار قوی ددهوین گؤرونا… گه… گه… گل آپار!». قیزدیرما اطرافا یاییلیر. »صادق«ین، بارلانمیش آغزی، قوخویور. جووجولرینده قایساقلانمیش آغ کؤپوک گؤزه چارپیر. قه‌هر بوغازینا ییغیشدیقدا زور ایله اؤزون توپلاییر: «آخخ… سیاووش بودو… بو… بو… بودونون بیر طرفینین اتی، بوتون گئتمیشدی, گئدیب لاپ سومویینه چیخمیشدی. دئییر: اوشاقلارین الی اسیب… بی… بیشرف…, بیشرفلر. گؤره سن آللاه، گؤر نه قدهر چابالاییب, گؤر نه قدهر چیرپینیب، سیاووش, گو… گو… گؤر، نئجه… گؤر…, سؤزون چاتدیرا بیلمهدن, »صادق«، هؤنکورتو ایله آغلاییر. سیاووش، »مریم«ـه دؤنور، دئییر. »گئت داوالاری گتیر«. سیاووش الی اسه- اسه، بیر آمپول سورنگه چکیب، »صادیق«ـا وورور. »صادق«، آستا- آستا ساکیتلشیب اویور. اوتاقدان چیخیرلار. سیاووش بیر لیوان سو ایستهییر، سویو ایچیر، توما گئدیر. سونرا سوروشور، جریان نهدی؟,هاچاندان بئله اولوب. »مریم« دئییر: چرشنبه… او گئجه، چوخ بئواقت گلدی. گئجه یاریسئ ایدئ, گلدی، یاتدی. صاباح، سحر تئزدن، گون تازا چیخمیشدئ کی، »پزشک قانونی«دن تئلفون ائلهدیلر. شهلندیم. دئدیم، ایندی کی پزشک قانونی اولماز. دئدیلر، دستهیی وئر دوکتورون اؤزونه. آییلتدیم، دانیشدی. بیلافاصیله گئییندی، گئتدی. بیر ساعات چکمهدی قاییتدی. من، صبحانهنی دؤشهدیم ،گؤردوم کی، سیغار یاندیردی. دئدیم، آج قارنینا نه خبردی؟ دینمهدی. بیر دنه چای ایچدی، یئنیدن، سیغار یاندیردی .گؤردوم ناراحاتدی. سوروشدوم، نه خبر ایدی؟ دئدی، اؤلونو باسدیرماق اوچون ایجازهنامه ایستهییردیلر. گؤردوم، قههردن دوداغی اسیر. دئدیم، اونوندا ناراحاتچیلیغی وار؟ دئدی، آخی ،جاوان قیز ایدی. سوروشدوم، کیمایدی… دئدی، بیلمهدیم. دئدیم نییه اؤلموشدو؟ بیردن اؤزوندن چیخدی، اوستومه چیغیردی «مفتّیشلییی قورتاریرسان، یا یوخ». دای من بیر سؤز دئمهدیم. گئتدی ایدارهیه. ساعات اون بیر ایدی قاییتدی. گئتدی اوتاغا. گئتدیم گؤردوم، پالتارایلان تختین اوستونده اوزانیب، یاتـیب. ائله او یاتـیشدی کی یاتـیب. داییم یوخو گؤرور. سایقیلاییر یوخودا…،پیس وضعیتده یوخودان قالخیر…».سیاووشون گؤزلری قالینین گوللرینه زیللهنیب، باشین قالدیرمادان سوروشور:»خوب نه دئییر؟« »مریم«ین سسی، سانکی، قویودان چیخیر: نه دییهجک، الان دئدیکلرینی، قاتـیر قاریشدیریر. بیر سؤزو بلکه یوز دفه دئییر… من نئیلهملییم؟ قورخورام دوکتور… قورخورام، دلی اولا آخیردا… »مریم«ی قه‌هر بوغور. سیاووش، هئچ نه دئمهدن قویور»مریم« اورهیین بوشالدیر. »مریم« گؤزلرینین یاشین سیلیب، سارسیلمیش حالدا، دوکتوره باخیر: و نئیلهمهلیییک دوکتور؟- دئیه، گؤزلرین سیاووشا تیکیر. سیاووش ” شاید ائوده توختادا بیلک، آنجاق، اگر بیماریستانلیق اولسا، بوردا یاتا بیلمز, بوردا یاتسا، ایش چیخاردار- دئیه، کؤکسون اوتورور.?گونلر بیر – بیری نین آردینجا گلیر، سوووشور. سیاووش، هر گون »صادق«ا باش چکیر. اونون داوا – درمانینا چالیشیر. »صادق« ایسه, ایندی، نه قیزدیریر, نه سایقیلاییر، نه ده قیشقیریر. آنجاق، او هئچ بیر سوز دانیشمیر, داییم توموب، فیکره دالیر. سوسقون حالدا، گؤزو بیر نوقطهیه دیره‌نیر, اؤز ایچینده یاشاییر، سون گؤروشده سیاووش اونو محبتّله سوزوب، سونرا دئییر: «شوکور آللاها دای حالین یاخشیلاشیب. من دئییرم، یاپیشاسان »مریم«ین، الیندن, بئش- اون گون گئده‌سن شیمالا. قوی بیر آب-هاوان دییشیلسین. »صادق« اونون جاوابیندا دئییر: فعلن کی استعفامی یوللامیشام ایدارهیه، اونون جاوابین گؤزلهییرم. آه چکهرک, ادامه وئریر: »اوننان سونرا گؤروم نئیلهملییم«. بو لحظه، »مریم«، سؤزه قاریشیر: »تصمیمی وار گئده، آمما تک گئدیر. منی آپارماق ایستهمیر. دئییرم تک گئتسن، من نیگران قاللام آخی…«. »مریم« سؤزونون قالمیشینی اوتور. نئچه لحظه سوکوت ایله اؤتور. سیاووش باخیشی ایله »صادق«دان جاواب ایستهییر. »صادق« دئییر: ایستیرم گئدم،آمما شیمالا گئتمک، ایستهمیرم. من ایستیرم، بوزقوشا گئدم. »مریم«ی من اوردا نئیلهییم. اوبادا منبم تار- تانیشیم چوخدور. آمما آروادیلان جور گلمز. بیر ده دوزون ایستهسن ایستهییرم بیر مدت تک اولام. تکلیک آختاریرام. فقط ایستهییرم تک اولام. ناراحات اولما »مریم«, بو منه لازیمدی. من بیر سایخاش یئر آختاریرام بیر آز فیکیرلشم. بالاخره، من اؤز تکلیفیمی گرهک مشخّص ائلهیم. آخی من بو دونیادا نهچییم. سن دیء سیاووش، من نهچییم… نهچییم؟«. »صادق«، سؤزون بیتیریب سوروجو گؤزلرین، سیاووشا تیکیر، سیاووش قفیلدن طرح اولونموش سوآلین آردیندا، »من نهچیام؟« سؤزو اوتاغین فضاسیندا هرلهنیر، قاسیرغا کیمی تاوانا, دره- دووارا دهییب قاییدیر و اونون، عکس صداسی سیاووشون قولاغیندا سسلهنیر: من نهچییم؟ مریمین یاناغینا آخان یاش و نهایت بیردن- بیره آچیلیب، هر نه اورهیینده وارسا، ائشیگه تؤکمهسی بیر نئچه آنلیق اولورسا دا، سیاووشو بو بورولغاندان قورتاریر: » منی بو حالدا قویوب، گئتمه… من سننن ده پیس گوندهیم،»صادق«… بس مننن نییه قاچیرسان…«. »مریم« دانیشیر، آمما سیاووش اونون دئدیگینین، اونون گیلایهلرینین بیرین ائشیدیر، بئشین ائشیتمیر. او اولدوغو فضادان چیخا بیلمهییر. »صادق« ایسه… مریمی‌توختاقلیغا چاغیریر. اونون اورهیین آلماغا، چالیشیر: …. من ایندی اؤزومدن قاچیرام »مریم« یاخشی اگر اؤزون ایستیرسن گل… یاخشی گل….، آمما، سیاووش، اؤز عالمیندهدیر. او اؤز ایچینده چیرپینیر، بوغولان بیر آدام تک، گاه سویون آلتـینا گئدیر، گاه اوزه چیخیر. هردن بیر کلمه, یوخسا بیر جومله ائشیدیر، بیر شئیی سئچیر، یئنیدن اؤزونه دالیر. اونجا اوتاغین تاوانی گئتدیکجه آلچاقلاشیر، دووارلار یاخینلاشیر، اوتاق کیچیلیر، فضا دارالیر.ایشیغین یایدیغی معلومات اساسیندا آرازآذربایجان راپورونا گوره
سیاووش،هاچان ائودن چیخماسینی دویمادان، اؤزونون ائشیکده اولماسینی، حیسّ ائلهییر. گئجه، یاریسینا یاخینلاشیر, یول سایخاش, شههر دینجدیر، تکه- توک آدام گلیر کئچیر، آمما سیاووش اونلارین هئچ بیریسین گؤرمور.»من نهچییم؟« سؤزو اونون قولاغیندا سسلهنیر. »صادق« اونون آردینجا گلیر. اوز سورغوسون تیکرار- تیکرار سورور. سیاووش بیر آن حیسّ ائلهییر بو »صادق«ین سسی دئییل، بو اونون اوز سسیدی. هویوخور، یان یؤورهسینه باخیر، اؤزونه گلیر: من‌هارا گئدیرم؟! یولو اشتیباه گلمیشم!”- دییه، گئرییه دؤنور.زیل قارانلیقدیر. گؤزلری یاخشی سئچمیر, گؤزلرین اوووشدورور. اوچ- دورد یول، گؤزلرین، مؤحکم یوموب آچیر, سونرا یولا دوشور…
نوشته شده توسط admin در شنبه, ۲۹ مهر ۱۳۹۶ ساعت ۷:۴۲ ق.ظ
