وطن اوچون چیرپینان اوره ک
کوچوره ن:اکبرسعادت
آنادیلیمیز: هاوا نمیشلیکدی. خزر یالنیز شام آغاجینی ساغدان-سولدان دؤیوردو. یاغیش گیزلنقاچ اویناییرمیش کیمی گاه یاغیر، گاه دایانیردی.
جمیله ائوده تکـدی. اوز-اوزونه دانیشماقدان یورولموشدو. ائله بیل ائودهکی هر شئی اونون کیمی یورغون و حالسیزدی. ایش گؤرمهگه طاقتی یوخ ایدی. او قدر ده یاشلی ساییلمازدی. فقط یورغونـدو، بدنی هئی سیزیلداییردی.
حربی خیدمتده اولان اوغلو اونو زورلا حکیمه گوندره بیلمیشدی. حکیم: “شیکایتین نهدنـدیر”– دئیه سوروشاندا ائلجه سوسوب قالمیشدی. نه دئسین، نئجه باشا سالسین؟ هاراسی آغریـییر بیلمیردی. بیر نئچه دفعه آنالیز وئرسه ده، بیر نتیجه چیخمامیشدی.کولک تاختا پنجرهنین آراسیندان ویـییلتی ایله ایچری گیریردی. اوتاغا داخیل اولان سویوق هاوا پنجره اونوندهکی دیبچهگی و جمیلهنین سینهسینی اوشودوردو.
گورهسن، قونشولار نئجهدیر؟ یئنی ائولرینه یئرلشه بیلدیلرمی؟ بس روقَییه(رقیّه) گیل؟ بلکه ده کنده قاییتدیلار. یاخشی-پیس ائولری وار. بس کنده اویرشه بیلهجکلرمی؟ عؤمر?ن-گونون بو واختی ائودن-ائشیکدن دیدرگین دوشمک راحات دئییل کی…
کولک یان-یوورهده داغیدیلیب خارابایا چئوریلن ائولرین توز-تورپاغینی هاوایا سوووروردو. أری نفتچی ایدی. ائله أرینین قوخوسو اونون یادداشیندا نفت قوخوسو کیمی قالمیشدی. هر دفعه کولک نفت قوخویاندا جمیله بو قوخونو ایچینه چکردی.
بورانی قویوب گئتمک بیر آز دا بونا گوره چتین ایدی. آخی هر یئرده کولک نفت قوخومایاجاقدی.مین بیر عذاب-اذییت’له تیکه بیلمیشدیلر بو ائوی. ائو حاضیر اولانا جان ائله یئرلرده یاشامیشدیلار کی، جمیله ایندی ده او ائولری خاطیرلادیقجا دئهشته گلیردی. آنجاق هر شئیه رغمن نه او، نه ده أری اومودونو ایتیرمهمیشدی. بو ائوین هر داشی یوکسلدیکجه هر شیفئری یئرینه قویولدوقجا خوش گونلرین بیر آز داها یاخینلاشدیغینی دوشونوب سئوینمیشدیلر. ائوین بیتیب عرصهیه گلمهگی دوز یئددی ایل چکمیشدی.
بیر ائو اینسان اوچون نه دئمکدی؟… اینسانی خوشبخت ائدن دیوار، قاپی، یا دا پنجرهایدی می؟ یوخسا بیر یئره عایید اولماق حیس می؟ چالخالانان شهر حایاتینـدا قورخوسوز، أمین بیر یئرده یاشاماق… اونلار دا بئله حیس ائتمیشدیلر. قورخولاری سیلینیب گئتمیشدی. ایکی اوتاقلی داریسقال ائو اونلارا گئن دونیا جان فراهلیق وئریردی.
ساختا کاغیذی یاستیقلارینین آلتینا قویاراق راحات یاتماق ایستهمیشدیلر.
یازیق عادیل، منیم کیمی سن ده گون گورمهدین. ایندی کیم بیلیر یئتیملرین’له هاردا دیلهنیرسن. بلکه ده سنی گورنلر آغیز-بورنونو بوزوب گئنـدن گئدیر، سنی ایشلهمزدن یئیَن سانیرلار. کاش کی گئتمهیَیدین… هئچ اولماسا بیر-بیریمیزه هایان اولاردیق.
بیر گون محللهده شاییعه یاییلدی. قارا عئینکلی، قارا کوستیوملو، قارا قالستوکلو آداملار محلله آراسیندا گزیب نسه موذاکیره ائدیردیلر. دئییلنلره گوره بوتون ائولر سؤک?لمهلییدی. هامی چاشیب قالمیشدی: بس اونلار، بس اونلارین حایاتی، بس اوشاقلارین گلهجگی؟ محکمه بئله قرار وئرمیش، قیلینجینی یئتیم-یئسیرین قوللارینا ائندیرمیشدی.هارای گلدی شیکایت ائتدیلر. محللهده ألی چاتان، اونو یئتن هر کس محکمهنین قرارینی دایاندیرماق اوچون چالیشدی. اونلارین گوزلمهدیگی، اصلینده گوزلهنن نتیجه اولدو: قرار دَگیشمهدی. ائولر ایجازهسیز تیکیلدیگی اوچون ائو صاحابلارینا بیر شئی ده اودنمَیهجکـدی.جمیله اوغلونو جیبههیه گوندرنـدن سونرا اورَگی داغ-داغایا دوشموشدو. ائله بیل نسه پیس خبر ائشیدهجک دونیا باشینا ییخیلاجاقدی. یالقیزلیق، قورخو کیمسهسیزلیک کابوس کیمی اونو سیخیب طاقتـدن سالیردی. قونور گوزلرینی هئی اوزاقلارا دیکیب باخیر، باخیر باخیردی…قونشولار تورپاغی آلان شیرکتین تضییقینه دوزه بیلمهمیشدیلر.
بعضیلری ائله بو باشدان آغ بایراق قالدیریب بو محللهدن چیخیب گئتمیشدیلر. باشقالاری ایسه آتدیقلاری هر آددیمین عبث بیر ایش اولدوغونو آنلاییب بیر-بیر محللهنی ترک ائتمهیه باشلادیلار.
شیرکت صاحابی آرخالی آدامدی، تئز بیر زاماندا تیکینتییه باشلاماق اوچون جور-به-جور یوللارلا یاشایانلاری اوردان اوزاقلاشدیرماق ایستهییردی. گاه ایشیغی، قازی(گازی) کسدیریر گاه ائکسکاواتورلاری(کاوشگر) گوندریب هر یئری توز-تورپاغا غرق ائدیردی. شیرکتین بیتیب-توکنمهین اینصافسیزلیغیندان زارا گلن اینسانلار باش گوتوروب گئتمک مجبوریتینده قالیردیلار.
زاواللی توکز، اوزونو یاندیرماغین بیر شئیـه یارامادی. بونلاردا ویجداندان، اینصافدان اثر-علامت اولمادیغینی بیلمیردین می؟ نیـیه ائله ائتـدین؟ باخ ایندی سنین ائوینین یئرینده یئللر اسیر. قوی سنه ظولم ائتسینلر، ظالیمین توپ-گولـلهسی وارسا، مظلومون دا گوگـلری یاندیران آهی وار. ائله بیلیرسن بو آج جاناوارلار بیزیم أتیمیزی دیدیب یئیَنـدن سونرا راحاتمی یاشایاجاقلار؟ یوخ، باجی، یوخ، سنین آهین کابوس اولوب اونلاری هر ایکی دونیادا بوغاجاق.جمیله گیلین ائوی محللهنین قیراق حیصهسینده یئرلشیردی. هلهلیک اونا دَگیب-دولاشمامیشدیلار.
چیخماسی اوچون تئز-تئز خبردارلیق ائتسهلر ده، جمیله دیرنمیشدی. اوغلونون حربی خیدمتـدن ترخیص اولوب گلمهگینی گوزلهییردی. تکباشینا أشیالاری نئجه ییغاجاقدی، ییغیب هارا گئدهجکـدی؟
اوغلونا ائولرینین سؤکولهجَگینی دئیه بیلمهمیشدی. دئسه نه فایداسی اولاجاقدی کی؟ اونون بو یاشدا درد تاپماغینا کؤنلو راضی دئییلدی. اوغلو اونو چوخ سئویردی.
جمیلهنین أری اؤلنـدن سونرا آنا-اوغول بیر-بیرلرینه چوخ باغلانمیشدیلار. أل-أله وئریب کئشمهکئشلی گونلره بیرلیکدهسینه گرمیشدیلر(ساواشاراق گلیب یئتیشمک). آنجاق بو دفعه جمیله تک قالمیشدی، ائو ییخماغا گلن لوتو-پوتولارین(جنایتکارلارین) اونونده یارالی جئیران کیمی چارهسیز و یالقیز ایدی.
بیر دفعه أری اوغلونو بوینونا گوتوروب جمیله ایله یاناشی پارکـدا یئریـییردیلر. أری ایشلهمکدن قابار باغلامیش، مازوتو(قازوئیل-گازوئیل) هئچ جور تمیزلنمهیَن ألی ایله جمیلهنین ألینـدن توتموشدو. اوغلو ماوی سمادا دالغالانان بایراغی گورسهدیب آتاسیندان: “بو نهدیر؟” – دئیه سوروشموشدو.
اوغلوم، بو بیزیم اوکهنین بایراغی دیر.
– آتا، بایراق نه ا?چ?نـد?ر؟
بایراق سیموولـدور، اوزگور تورپاقلاریمیزین هاوادا دالغالانان رمزی دیر. بایراق دالغالاندیرماق اوچون اونجه تورپاق لازیمدیر؛ تورپاق اولماسا بایراق دا اولماز.
– بیردن تورپاغیمیز اولماسا، بو بایراغیمیز نئجه اولاجاق، آتا؟
تورپاغی تاپدانانا، شرفی چئینلمیش اینسانا بایراق دا لازیم دئییل، اوغلوم. تورپاقسیز بایراق سادَجه أسگی پارچاسی دیر.
جمیله ایختییارسیز اوشویوردو ائله بیل اوتاغین بیر کونجونده گیزلنمیش بیر جوت منفور گوز اونا زیللنمیشدی. ائله بیل اونو ائودن چیخارماق اوچون او گوزلردن نیفرین توکولوردو
قاپی تاققیلتیسی قولاغیندان کئچیب ائلئکتریک جریانی کیمی بوتون بَدَنینی گیزیلدَتـدی. أل-آیاغینی ائله بیل بوز کسمیشدی. یاواشجا قاپینین آرخاسیندا دایانیب گلهنین کیم اولدوغونو اؤیرنمک ایستهدی. قاپینین او بیری یانیندا ایکی نفر دیدیشیردی. یوکسک سس’له دانیشان آدام خیریلتیلی سسی ایله او بیرینین اوستونه چیغیریردی:
بیر أتک پول تؤکدوک، نه ایستهدینیز وئردیک ایندی ده گلیب منه دئییرسن کی، من باجارمیرام.
باجارماماق دئییل إ إ، کیمسهسیز قادینـدی قزئته-زادا چیخسا، هامیمیز آبریسیز اولاریق.
– نییه آبریسیز اولوروق؟ ألیمیزده قانونی سند وار. قانونا عمل ائتمهین وارسا، پولیس چاغیریب آتدیراق دا باییرا، بورادا نه وار کی؟…
قاپی بو دفعه داها شیددت’له دویولدو. جمیله یئریندن دیک آتیلدی.
مسأله بوندادیر کی، اونجهدن بونلارا کاغیذ پایلانیب. بونلار اوزه چیخسا، روسوایچیلیق اولار. ایندیـیه جن گیزلتمیشیک، اوزوب-اوزوب قویروغونا گلمیشیک، تلهسیب هر شئیـی برباد ائتمهیک.
منه باخ، بو قادینی بو ائودن آت گئتسین یوخسا قزئتلره ائله من اوزوم خبر وئررم.هئچ اوزولمه، بو دقیقه حل ائدهجم.قاپی داها دا شیددت’له دویولدو جمیله سوست دوشموش أللرینی اوزادیب قاپینی آچدی. قاپیدا بیری اوجابوی، قارایانیز، او بیریسی قیسابوی، توسقون ایکی کیشی واردی. قیسابوی قارا پالتار گئیینمیشدی، جمیله اونون شیرکتین آدامی اولدوغونو آنلادی. اونون اوزو غضبـدن قیپقیرمیزی اولموشدو، سیر-صیفتینـدن زهریمار یاغیردی.آی آرواد، نییه چیخیب گئتمیرسن بو ائودن؟ ایستهییرسن بو ائوی باشینا ییخاق؟جمیله ائله بیل بو منفور گؤزلری تانیـییردی، ائوده حیس ائتدیگی او گوزلردی. بوتون بدنی أسیم-أسیم أسیردی:
هئچ بیر یئره چیخیب گئتمهیهجم. بورا منیم تورپاغیمـدیر؛ هئچ بیلیرسن بو ائوی نه عذاب-أذیتله تیکمیشیک؟
– منه باخ، سنین بورادا بیر قاریش بئله تورپاغین یوخدور، هامیسی بیزیمدیر. بو ائودن چیخیب گئتمهسن،اوزوم بیلیرم نه ائدهجم. سنه گوره بوتون شیرکت دایانیب گؤزلهییر.
اوزونبوی آدام أزیله-أزیله اونو ساکیتلشدیرمهیه چالیشدی
خاهیش ائدیرم، حیرصلنمهیین، بو قادین پیس اینسان دئییل. کیمسهسیز آدامدیر. من اوزوم اونا کؤمک ائدجم، صاباح یوکلرینی داشیییب ائوی بوشالداجاغیق. لوطفا سیز ماشینا کئچیب ساکیتلشین، عصبیلشمگین، من ده گلیرم.قیسابوی آدام “بونا باخ، دئییر تورپاق منیمدیر” دئیه-دئیه بورنونون آلتینـدا دونقولداناراق اوردان اوزاقلاشـدی. اوزونبوی آدام ألینی اوووشدوراراق گولومسونوردو. خانیم، بیلیرسن کی بو ایشین آخیری یوخدور، هامی چیخیب گئدیب. گل بو داشی أتگینـدن توک، عیناد ائتمه گونو صاباح ائودن چیخ. من اوشاقلارا دئمیشم صاباح یوک ماشینی گتیزدیرهجم، نه یوکون وارسا، ییغاریق ایچینه، هارا دئسن آپاراریق. نه اولار، عیناد ائتمه.
اوزونبویلو نَفَسینی چکیب نسه قورخولو بیر شئی دئییرمیش کیمی جمیلهیه داها دا یاخینلاشدی:
– بونلار چوخ آدیپیس آداملاردیلار، باجی هیر-زیر قانمیرلار، ائوی ییخارلار باشینا… منـدن دئمکـدیر، اوزون بیلرسن، دیه من گئتدیم.
تیترهین آیاقلاری جمیلهنی داشییا بیلمیردی. قاپینین قیراغیندا دونوب قالدی. اورَگی یئرینـدن قوپورموش کیمی دویونوردو آلنیندا شیددتلی آغری قوپموشدو. یام-یالقیز کوچهده، کیمسهسیز ائوده یالقیز قالمیشدی.
جیبیندهکی تئلئفون زنگ چالدی. بیلیردی زنگ ائدن اوغلویدو.
– سلام، آنا، نئجهسن؟
جمیله اودقونوب قوروموش بوغازینی ایسلاتـدی. گوزلری قارالیردی.
– یاخشیـیام، اوغلوم، سن نئجهسن؟
من ده یاخشیـیام؛ أجلافلار دونن یئنه بیزیم طرفه آتش آچیردیلار.
اؤز?نـدن موغایات اول، اوغلوم.
سن اوزولمه، آنا، لازیم گلیرسه، وطنین بیر قاریش تورپاغی اوچون جانیمی وئرَرَم. سن منی بئله گونلر اوچون یئتیشدیرمیسن.
جمیلهنین گؤز یاشلاری ائله بیل کیرپیکلریندن آسیلمیشدی، هؤنکورتو ووراراق آغلاماغا باشلادی:
– قوربان وئرمک ایستهدیگین جانینا منیم جانیم قوربان اولسون، بالا. سنین آلا گؤزلرینه منیم جانیم قوربان اولسون، بالا.
اوغلو دا گؤز یاشلارینی ساخلایا بیلمهدی. هر ایکیسی سس-سسه وئریب آغلاییردیلار. جمیلهنین هؤنکورتوسو بوغوق اینیلتی کیمی بومبوش محللهیه یاییلیردی… .
نوشته شده توسط admin در دوشنبه, ۱۶ مرداد ۱۳۹۶ ساعت ۵:۳۸ ق.ظ
چوخ دویغولاندیم …