گؤی رنگینین اوستونده یاشیل رنگ
یازیچی: فرزانه طاهری
فارسجادان ترجومه ائدن: حلیمه مردانه
آنادیلیمیز:قادینین‌می شَپیتلری گئیدیگینی، یوخسا شَپیتلرین‌می قادینین آیاغینا کئچدیگینی دئمک اولموردو. بیری گئدیردی، او بیریسی ده آردینجا. بیر اوتاقدان او بیری اوتاغا، هالدان آشپازخانایا، اوردان دا ایش اوتاغینا.
قاپی بیر الین ایته‌له‌مه‌سی ایله جیریلداییب آچیلدی. اوتاغین اورتاسیندا بیر نئچه صاندالیه و بیر بؤیوک یازی ماساسی وار ایدی. هر یئر بؤیوک-کیچیک کیتابلارلا دولویدو. هر کیتاب اؤزونه ا?یغون بیر جیلده بوکولوب، یان-یانا قفسه‌لره دوزولموشدو.بو اوتاغا چوخ آز گلیردی. ناهاردان سونرالار هئچ واخت، سحرلر ایسه چوخ آز. سون زامانلار بو اوتاغا گلمه‌سی داها دا آزالمیشدی، آیدا بیر-ایکی دؤنه.قاپینی آچیب اطرافا باخیندی. اوتاغین اونا همیشه یئنی‌لیگی وار ایدی و اونو همیشه بو حالا سالیردی، اورک دؤیونمه‌سینه! ائله‌بیل اَری اوجا بویو ایله، بوغدایی ساچلاری و چاتما قاشی ایله اوردا ایدی. ماسانین آرخاسیندا اوتوروب، کاغیذلارین اوستونه اَییلمیشدی. ایندی، تک ائشیدیلن سس دیوار ساعاتی‌نین تیک-تاکی ایدی، بیر ده قلمین کاغیذ اوستونده گاهدان یئیینله‌یییب، گاهدان دا یاواشلاییب ایره‌للمه‌سی‌نین سسی.ساعات اونو ایگیرمی دقیقه کئچیردی. اَری درسده ایدی و اقتدارلا اوستادلار سککی‌سینین اوستونده بیر طرفدن او بیری طرفه آدییملاییردی. اونونلا برابر اونلارلا گؤز اویان-بویانا گئدیب-گله‌رک بوتون حرکتلرینی ایزله‌ییردیلر. او دا ائله ایلک جلسه‌ده هر شئیی بیر طرفلیک ائله‌ییردی: »من اللی اؤیرنجی یوخ، اللی هئیکل ایسته‌ییرم. باشا دوشدوز؟« سونرا دا جاوابینی آلماق اوچون گؤزونو د?زلتدیگی هئیکل‌لرین آغیزلارینا تیکیردی.نملی دسمالی بیر قات داها قاتلادی. بو ایشی گؤروب بیتیرمه‌لیدی؛ بو اوتاغین توزو آلینمالیدی. سون تمیزلیگی نه واخت یاپدیغی یادینا گلمیردی. خاطیرلادیغی قدر، اَری اَن سون اونا »بووندان سونرا منیم ایش-ماساما توخونمایاجاقسان،« دئمیشدی. سونرا دا اؤزونه بیر ایستکان چای تؤکمک اوچون آرخاسینی اونا چئویریب آرتیرمیشدی: »هر شئیی قاریشدیریرسان. سن گئدندن سونرا آرتیق هئچ نه اؤز یئرینده اولمور«”قاپینی یاواشجا اؤرتوب، ساللانا-ساللانا ماسایا ساری گئتدی. کاغیذ دسته‌لرینی آغیر-آغیر گؤتوردو، آلتلارینا دسمال چکیب، دقتله اؤز یئرلرینه قویدو. سونرا یئنه ده آیری بیر دسته‌نی گؤتوردو. ماسانین ساغ طرفینده رنگی و بویو فرقلی بیر آز کاغیذ وار ایدی. اونلار اینجه-اوزون ایدیلر، رنگلری ده گؤی ایدی. بو گونه قدر بو کاغیذلاری گؤرمه‌میشدی. اوستلرینده قیسا سطیرلر حالیندا، بعضا صحیفه‌نین اورتاسینا قدر اوزانان بیر شئیلر یازیلیب، سونلارینا تاریخ قویولموشدو؛ ۱۳۷۷ تیر آیی‌نین اونو، ۱۳۷۷ مورداد آیی‌نین اوچو، ۱۳۷۸ فروردین آیی‌نین بیری و… . بیری‌نین ده تاریخی ائله بو دونن ایدی؛ ۱۳۷۸ خوردادین ایگیرمی بئشی. عنوانین قاباغیندا ایسه بو جومله اوخونوردو: »سوسن قبول ائتسین!« اَری‌نین اونو آلداتدیغینی بیلیردی، اما شعر یازدیغینی دئییل.بیرآن، ماسانین آرخاسینداکی فیرلانان صاندالیه‌یه اوتوردو. بویونون قیسا اولمادیغینا باخمایاراق آیاقلاری ندنسه یئره چاتمیردی. الینی اوزادیب، قلم قابیندان جوهرلی قلمی گؤتوردو. قلم یاشیل ایدی. شعرلر ده بو رنگله یازیلمیشدیلار. بلکه ده کؤنلونه بیر شئیلر یازماق دوشموشدو. اما جوهرلی قلمین قاپاغینی گؤتورمه‌دی.ساللانا-ساللانا آشپازخانایا قاییدیب، دسمالی حامامین قاباغیندا یئره آتاندا اللرینده بیر شئیلر هله ده آغیرلیق ائدیردی.
نوشته شده توسط admin در شنبه, ۲۴ اردیبهشت ۱۴۰۱ ساعت ۹:۵۶ ق.ظ
