بیر حئکایه حئکایهسی
ریحانه پورغنی
آنا دیلیمیز:قیزینین چانتاسی آباژورون یاشیل ایشیغی آلتیندا گوزونه چارپدی. اوخول أشیالارینی سلیقه ایله ییغیب، سالونون بیر کونجونه قویموشدو.
چانتانی آچیب، أشیالاری بیر ده گوزدن کئچیرمه قرارینا گلدی، هر شئیین حاضیر اولماسیندان أمین اولماق ایستهییردی. تَپ-تَزه دفترلر، رنگبهرنگ قلملر، سو قومقوماسی، یئمک قابی، هر شئی حاضیر ایدی. ألینی دوم-دوز اوتولنمیش، قیرمیزی اوخول فورماسینا چکدی. بارماقلاری، قیزینین گوودهسی ایچینده وارمیش کیمی، محبتله فورمانین اوستونده سوزولدو. مطبخه ساری گئتدی.
چایداندا قالان چایی ایستکانا سوزدو. ایچدیگی چایلارین نئچه-جی اولدوغونو بئله هئچ بیلمیردی، هرحالدا بیر چایدان چایی قورتارمیشدی. لوش ایشیقلی مطبخده، ماسانین دالیندا اوتوروب، سویودوجو موتورونون ضعیف ویزیلتیسینا قولاق آسیردی، ائوین سسسیزلیگینده سسلر داها آیدین ائشیدیلیردی. گوزو ماسانین اوستونه سریلمیش سوفرانین گوللرینده گزینیردی. ساری، نارینجی یئمک لکهلرینی گوروب، »صاباح سوفرانی یومالییام« دوشونوردو. قندی ألینه گوتوروب چایا باتیراندا، قند بارماقلارینین آراسیندان بوراخیلیب چایا جومدو، قندین چایدا أریییب یوخ اولماسینا باخیب، دوداق آلتی »سئوینهجهیم« دئدی. چایی ایچیب، ایشیقلاری سوندوروب، یاتماق قرارینا گلدی.
حیات یولداشی چوخدان یاتمیشدی، یاواشجا یاتاغین قیراغیندا اوتوروب، موبایلینین ساعاتینی آلتی یاریما قوردو، یاتاغا اوزاندی، یئنیدن موبایلی گوتوروب، ساعاتی ۶:۱۵ دقیقهیه چکدی. راحات بیر مووقع سئچیب، یاتماغا چالیشدی، ألینی یاسدیغین آلتینا قویدو، اوزو اوسته اوزانیب، گوزلرینی یومدو. اوزونو یاتماغا زورلادی، صاباح، قیزی اوخولا باشلایاجاقدی. دئمک اولار، او قیزیندان چوخ هیجانلیایدی، اما بو هیجانی یاتیشدیریب، یاتمالی ایدی. ساغ طرفه، حیات یولداشینا ساری دونور، همیشهلیک عادتی اوزَری، نفسینی اونون نفسیایله اویغولاشدیریب، یاتماغا چالیشیر. اما اولمور، ایچیندهکی جوشقو اونون راحات و دوزنلی نفس آلماغینا مانع اولور. اوقدر چایی ایچدیگی اوچون اوزونو قینیییر. گوزلرینی تاوانا زیللهییب ذهنینده بیر حئکایه باشلادیب، اونو ذهنینده جانلاندیراراق یوخویا دالماغا چالیشیر، اما بو گئجه ذهنیندهکی قوش بیر بوداقدا اوتورماق بیلمیر. واز کئچیب، گوزلرینی یومور. شیدیرغی یاغیش اوتاغین پجرهسینی دویجلهییر. یورغانی باشینا چکیر. یاشیل بیر کیتاب حیطتین اورتاسینداکی حوووضا تولازلانیر. حووضون یاغیشدان دالغالنمیش سویو داها دا دالغالانیر، کیتابین یاپراقلاری ایسلانیب، یاواش-یاواش سویا جومور. یاشیل کیتاب حووضون ماویلیگینده بوغولور. بیر کیتاب داها حیطده اوچوشور و بیری داها. یاشلی گوزلرینی، یوموق گوز قاپاقلاریینین دالیندا گیزلهدیب، داملالارین یاناقلارینا آخماماسینا چالیشیردی. آجی بوتون قلبینی جایناغینا آلیب، قلبی سیخسنتیدان پارتلاییردی. چکدیگی آجی زهر کیمی قانینا آخیب، بوتون اورقانلاریندا دولانیردی. قیچلارینی قارنینا ییغیب، ألی ایله یورغانی قارمالاییردی. گوزلرینی آچیب دیوارا ساری دوندو. قارانلیق گوزلرینی هجوما آلدی.
– آه آتا، کئشکی سنده ده بیر شمس کرامتی اولاردی، او کیتابلار او حوووضدان، او یاغیشدان قورخو چیخاردیلار، من ده مولانا کی »قیل و قال« دان چیخیب، »وصف و حال« گیرردیم. اوز-اوزونه دئدی.
یاغیشلی بیر پاییز آخشامی ایدی، اوفکهلی گویون قاباران پارلاق دامارلاری هاوادا چیرپینیردی.
– هله اوقدر بئغیرت اولمامیشام، قیزیم شعر درنکلرینده اوزگه اوغلانا عشق شعرلری اوخویا. ددهم گورو بیر داها دا ائشیدم، بیلم او قورومساقخانا درنَگه آیاغین قویوبسان، آیاغین سیندیرارام. بو گوندن ده درس، کنکور کیتابیندان باشقا بیر کیتاب بو ائوه گیرمهیهجم. باشین سال آشاغییا، درسینی اوخو. ائله ایش گورمه قویماییم بو درسی ده اوخویاسان.
کیتابلار اوتاغین کیتابلیغیندان بیر-بیر حیطه تولازلانیردی، بیر نئچهسی حوووضا دوشوب، قالانی دا یاغیشین آلتیندا ایسلانیب، أزیلن صفحهلری یئره یاپیشیب، یاسلیلار کیمی پالچیغا بورونوردو. اوتاغیندا بوزوشوب اوتورموشدو، آتاسینن قورخونج، قارانلیق بیر قویو کیمی آچیلان گوزلرینین گیلهلری اونو دهشتلی بیر بوشلوغا سوروکلویوردو. او آنلاردا بیر دوز خط گوزونون اونونده اوزانیب گئدیردی. سیسییو اوتاقلارینین مانیتوروندا، قلبین دوردوغونو خبر وئرن او اوفوقی خط. اونون قلبییندهکی حیسلین اولوم خطی. او گون اورهگینده ایکی سئوگینی اولدوردو، بیری یازیچی اولماق سئوگیسی، بیری ده وولکان پوسکورن باخیشلارییلا قلبینه اود سالان او شاعیر اوغلانین سئوگیسی. او گوندن ایستک و آرزولارینی اوز یالقیزلغیندا، دومانلی باخیشلارینین اوجقاریندا گیزلتدی، حسرتی، حسرت اوستونه قویوب، بیریکدیردی.
یورغانی اوستوندن آتیر، دیرناقلاری یورغانا ایلیشیر، بیرینین قیراغی سینیر. سینان دیرناق تورپو کیمی روحونا، فیکرینه چکیلیب، دوزونولمز بیر عذابا چئوریلیر. قارانلیقدا یانینداکی چکمجهنی قاریشدیراراق دیرناق قایچیسینی تاپیر. دورور، توالته گئدیب، دیرناقلارینی توتماغا باشلاییر. گوزو آیناداکی قادینا ساتاشیر، آلنینداکی نازیک جیزگیلره، قومرال ساچلارینین آراسینداکی آغ تئللره، گوزلرینین آلتینداکی گویومتول حالقالارا. آلا گوزلری بیر آز سولوب دورغون بیر گوُلو یانسیتسادا، اوزو اولغون بیر قادین اوزو اولسا دا، باخیشلارینین درینلیگینده هله ده او اونسککیز یاشلی قیزین آرزولاری یاشاییردی…
یازیلارلا دولو، چیرکدن آغ رنگی سارییا دونموش توکوک دیوارلی صینیفدا، قارا مغنعهلی قیزلار، پاسلانمیش، اوستلری یادیگارلیق قازینتیلارلا دولو نیمکتلر دالیندا سیخیشیب اوتورموشدولار. مبادا معلم تخته قاباغینا چاغیرا دئیه، هرهسی گوزلرینی بیر طرفه تیکیب، معلمله گوز-گوزه گلمکدن چکینیرلر. بیر تک اونون دالغالی، جوشغون گوزلرندن سئوای. خانم قراجهداغی قارا پارلاق ساچلارینی مغنعهنین آلتینا تیخیشدیریب، باخیشینی گوزلوگونون اوستوندن صینیفدا گزیندیریر. او گوزلرینی معلمین اوزونه زیللهییب، صبیرسیزجه خانم قراچهداغینین ایری گیلهلی قارا اوزوم کیمی أتلی، پارلاق دوداقلارینین آراسیندان آدینین چیخماسینی گودور. سوبانین ایستیسی ایله قیزلارین نفسی بیرلَشیب، بورکولو صینیفا مورگولنمه هاواسی چوکموشدو.
– پاشایی، دور پنجرهلردن بیرینی آچ. معلم دئدی……..
نوشته شده توسط admin در شنبه, ۰۶ آذر ۱۴۰۰ ساعت ۱:۵۱ ب.ظ