تورک داستانلاریندا قادینلار

تورک داستانلاریندا قادینلار

یازان : مینا پورحیدر
آنا دیلیمیز: میللتلرین یاشام طرزلری و اینانجلاری حاققیندا بیلگی له نیب اولاری تانییا بیلمه ک اوچون فایدالی اولان قایناقلاردان بیری “داستان” لار دیر و بعضی تاریخی اولای لارین دا ایزی داستانلاردا گؤرونور.
بیر خالقین تاریخینده باش وئرن اولای لار بعضا ده تخیل گوجو ایله بیرله شیب داستانلارا یول آچیر و قهرمانلار یارادیر. تاریخین مختلف دؤنملرینده اَنیش_یوخوش لارلا اوزله شن تورک خالقلارینین داستانلارین آراشدیردیغیمیز زامان، قادین لارا وئریلن قونوم(جایگاه) دیقت چکیر. هر فرهنگ و مدنیت ده، قادینلارین شخصیتی توپلومدا گؤرولن کیمی یارادیلیر و بو اوزدن مختلف خالقلارین فولکلوروندا قادینا وئریلن شخصیت، او خالقلارین قادینلارینین اؤزللیکلرین هابئله توپلومدا قادینا اولان باخیشی یامسیلاییر.
تورک داستانلاریندا قادین هر زامان یوخاری قونوم دادیر و فداکارلیق، وفادارلیق، شجاعت و بونا بنزر گؤزل و دَیَرلی صفتلرله تانینیر و باشقا میللتلرین داستانلاریندا قادینلارا نسبت وئریلن چیرکینلیکلردن اثر یوخدور. قادین کیشینین گوج و ایلهام قایناغی و تورک اولوسونون برکت قایناغی ساییلیر. چوخ داستانلارین قهرمانی کیشی لر اولسادا، تورک داستانلاریندا قادین قهرمانلاری یوکسک درجه و اؤنمه صاحیبدیر. ده ده قورقود کیتابینین داستانلاریندا قهرمان کیشی لرین کناریندا قهرمان قادینلار واردیر.
بو کیتابین داستانلاریندا ۲۴ قادینین آدی گؤرونور کی وفادارلیق، شجاعت، سئوگی، اینسانلیق، وطن سئورلیک و بوکیمی گؤزل و دَیَرلی اؤزللیکلرین اؤرنکلریدیلر:دلی دومرولون جانینین نجاتی اوچون جان آختاریلان زامان، دومرولون حیات یولداشی اؤز جانیندان کئچمکدن چکینمیر و سونوندا آللاه ایکیسینین ده جانین باغیشلاییر. قانتورالی ساواش سیناقیندان کئچدیکدن سونرا یوخویا گیردیغی زامان، قادینی سالجان، ساواش پالتاری گئییپ قانتورالی نین نگهبانی اولور و دوشمنلرله ساواش آپاریب اولارا غلبه ائله ییر. بورلاخاتون، اؤز درایت و شجاعتیله اوغلونون و حیات یولداشینین جانین قورتاریر. دیرسه خان توطئه لره آلدانیب اوغلو بوغاجی سوچلادیغی زامان، بوغاجین آناسی آلدانماییب اوغلونون حیاتین نجات وئریر و بوغاج دا دوشمنلرین ساواشینا گئدیب آتاسین دوشمن گزندیندن قورتاریر. ایمران داستانیندا، “بگیل” اؤز قادینین یاردیملاری و نصایحینین سایه سینده بحرانلاردان باش اوجا چیخیر.ده ده قورقودون باشقا داستانلاریندا دا قادینلار هر زامان اولوملو(مثبت) یؤنلندیریجی اولوبلار. زامانیندا شجاعتلی بیر ساواشچی ، زامانیندا مهربان و فداکار بیر آنا و وفالی و درایتلی بیر حیات یولداشی اولوبلار و قادینلارا هر قونوم دا و هر دورومدا سونسوز سایغی و حورمت واردیر. کوراوغلو داستانیندا، سارای دا یاشایان زنگین بیر سولطانین قیزی اولان نگار، آزاده وشجاعتلی ظولم ایله ساواشان بیر قهرمانین قادینی اولماق ایسته ییر و کوراوغلونون حیات یولداشی اولور. او کوراوغلونون آییق و ذکالی یول گؤسترنی دیر و کوراوغلونو چوخلو یانلیش و خطالاردان نجات وئریر.
نگار آنالیق موهیبتیندن محروم اولسادا چنلی بئلین قهرمانلارینا آنا کیمی ایدی. کوراوغلو داستانین قادین قهرمانی تکجه نگار دییل. تئللی، حوری، محبوبه و ….. چنلی بئلین قهرمانلارینین کناریندا اولان قادینلاردان دیلار.
بو داستان دا قادینلارلا کیشی لرین ساییسی برابردیر و قادینلار هر دورومدا اؤلومونه دک اؤز کیشی لرینین کناریندا دایانیرلار. عشق و سئوگی میللی حماسه لرین یارانماسی ایله بیرلیکده قادینی اَن یوکسک درجه لره یوکسلدیر. اصلی کرم، عاشیق عباس، گولگز و …. کیمی باشقا داستانلاردا دا گؤزل اؤرنکلر واردیر.
گرچکدن ده تورک قادینینا یاراشان ائله بو گؤزللیکلردیر. آنجاق یاشادیغیمیز دؤنمده، بعضی سورونلار گؤرونور کی اولاری آرادان قالدیرماغا چالیشیب قادینین یوکسک قونومون قوروماق، هر بیر آذربایجانلی قادینین آتماسی گره کن آددیملاردان دیر.

نوشته شده توسط admin در شنبه, ۰۷ آذر ۱۳۹۴ ساعت ۷:۵۰ ق.ظ

دیدگاه


4 + چهار =