بستهلنمهمیش ماهنی
رقیههاشمزاده(خانصنم)
آنادیلیمیز:_قیزااا! من نییه فیکیر وئرمهمیشدیم. سنین غریبه سسین وار؛ گئتسن دوبلاژ ایشینه یاخشی آد قازانارسان. بوتون اینستاگرام سننن دانیشار: »شوک شوک! برد پیتی سسلندیرن آدام کیم؟«»اؤلکهمیزده ایلک دفعه لئنوناردو دیکاپریونو بیر قادین سسلندیردی!…دی دی دی دین«
بو سؤزلری دئیرکن جیددیلیکله، اللرینی هاوادا اویناداراق جور به جور پوزلار وئریب، ادالار چیخاردیردی.
بیردن بیره اوچو ده پیققیلداییب گولوشدو. آرتیق، اولدوقلاری مکانین رئفلکس شوشهلری گوزگویه چئوریلمیشدی.
ملک ساعاتینا باخدی. ماسانین اوستوندن آلدیغی تورکجه کیتابلاری الینه ییغاراق «اوشاقلار بتر یوبانمیشام، دورورسوز یا من گئدیم؟«دئدی.
اونسوز دا سئودادان خوشلاندیغینا و اونون انرژیک، صمیمی و سئویملی اولدوغونا باخمایاراق بئلنچی اوتوروملاردان اوقدر ده حظّ آلمیردی. بونون نهدنینی بیر تک اؤزو بیلیردی آنجاق لازیمینجا ایداره ائدیر، صینیفداشلارینی یولا وئریردی.
سئودا، گؤزلرینی سوزه-سوزه یاستیدان:
-یاخجی دا یاخجی! سنی ده تعریفلهدیک اؤزونن چیخدین، نه یوبانماسی هله اول آخشامدی. باخائ! دئییرم، ائوه خبر وئر بو گئجه بیزه گل، خوش کئچراااا.
بونو خاص بیر طرزله و چوخلو عیشوهیله دئییب، مارالا گؤز ووردو!
سسی دویسا دا، نیسگیل دولو قونور گؤزلری یان ماساداکی یاراشیقلی بیلره دیکیلمیشدی. اورهیینده آرزولار سولور، حسرتلر دوغولور، اومیدلر گؤمولوردو.
بیردن ماسانین آلتیندان قیچینا بیر شئی توخوندو.
– آخ
– هاردا سومسونور گؤزلرین قیز؟!
مارال چیمخیردی.
ملک اؤزونه گلیب: »سئودا جانی چوخ ایستیییرم آما، سحر سکگیزدن آخشاما کیمی درسیم وار. همی ده، چوخ یورقونام؛ یاتماسام ایته دؤنهرم واللاه!« دئدی. »اوووف« دئیه ، مارال بیرده سسلندی، سونرا »بیز قاپیلماغا حاضیریق ملهییم!« دئییب، اونا بیر اؤپوش آتدی.
یئنه دوداقلاریندان پیققیلتیلار دیغیرلاندی!
اوچ یئنی یولداش اؤز حاللاریندان ممنون گؤرونوردولر. ملک ساغوللاشیب کافیشاپی ترک ائتمک اوچون آیاغا قالخدی.
– هر حالدا کرایه قالدیغیمیز ائو یونییه(University سؤزونون قیسالمیشی) یاخیندی. ناواخت ایستهسن گل؛ چوخ سئوینهریک.
مارال الینده کی ناپئلئونی شیرنیسینه بیر دیش ووروب ایری گؤزلرینی اولدوغوندان داها دا چوخ آچدی. دولو آغیزلا قالین بیر »هیم« سسی چیخاریب، باشینی قالدیریب ائندیرهرک سئودانین سؤزلرینی تصدیقلهدی.
اونلاری اؤپوب »یاخجی، باخاریق« دئدی.
قاپیدان چیخان ملک اؤزونده دئییلدی. خورجونا بنزر چانتاسینی چینینه فیرلادیب گؤیه زیللندی. هاوا قارالسا دا گؤی اهلیندن تکم سئیرک چیراق یاندیران اولموشدو! بوینوندان آسلانان قولاقلیغینین اوجلارینی یوخلاییب قولاغینا تاخدی. تلفنوندان سئودییی بیر ماهنینی سئچدی، دینلهیهرک یولا دوشدو .
اسلش شالواری، اسپورت باشماغی، بارماقلارینداکی آرابیر لئنتواری قارا اوزوکلری و قولاقلاری ساللانمیش فری سایز چارخانا کؤینهیی بیر یانا چییینلرینه دوشموش ساری شالی و سکگیز نومرهیله ماشینلانمیش ساچلاری چئورهدهکی هر کسین دیققتینی چکیردی.
چوخدان آلیشدیغی ترس باخیشلارا اؤنم وئرمیر کیمی داورانسا دا اؤزونو اوزایدان گلمیش کیمی حیس ائدیر، ایچینده قاسیرغا قوپوردو.
آناسینین، آتاسینین، خالاسینین، عمیسینین، ائلهجه ده بوتون قوهوملارینین آجی سؤزلرینی، قیناقلی باخیشلارینی خاطیرلاماغی، یئددی آرخا یاد اینسانلارا یئتمیش دفعه حاق قازاندیریب اونلاردان گولومسهیهرک کئچمهیینه سبب اولوردو. کیملییینی ایتیرمیش کیمی هئچ یاندا یئری یوخایدی.
سارای گؤرونوشلو ائولرینین قاپیسیندا دایاندی. آچاری قاپییا سالار-سالماز ذهنینده فلاشبک وورولدو.
بارلی-باغچالی حیطین قاپیسیندان ایچهری گیردی. قاپیدان بینایا قدر آزی یییرمی متیر آرا وارایدی.
بو آرادا حیرصیله قیرمیزی شالینی بوینوندان آچیب بیر طرفه، مانتویا بنزر اوست گئییمینی ده چیخاریب چانتا قاریشیق باشقا طرفه توللادی.
ژرمن سویلو شابالید رنگلی ایتلری شیمشیر بیتگیلرینین آرخاسیندان چیخیب اونا هوروب میریلداندی.” هه سئباستیین ائله بی سن قالمیشدین” دئییب، بینانین یاخینلیغینداکی اوزمه حووضونون قیراغیندا چؤمبلدی.
سودا عکس اولونان ملهیه خئیلک باخدی. اوندان ایرهنیر یاخاسینی قورتارماق ایستهییردی. ائله پارلی پالتارلی اؤزونو سویا ووردو. حووضون اوزونلوغونو نئچه دفعه گئدیب قاییتدیقدان سونرا چیخیب آرخا قاتدا گونش آلتینا سریلدی. قاماشان گؤزلرینی تام آچا بیلمیردی. کیرپیکلریندهکی سو دامجیلاری گونشین شعاعلاری آلتیندا آلماس کیمی پاریلداییر ذره-ذره محو اولوردو.
– نهدی بو انایین ایشلر؟ گئنه نولوب؟ کیم نه دئییب سنه؟
سوال ائلهین ، بایاقدان پنجره آرخاسیندان بوتون باشوئرنلری گؤروب، حیطه ائنن آناسیایدی.
آیدین گؤره بیلسین دئیه گؤزلرینین بیرینی قییب او بیرینی آچدی. دیرسکلرینی یئره دایایارکن آناسینین اوزونه باخدی.
– یانی سن بیلمیرسن؟
بارماقلارینی شاققیلدادا-شاققیلدادا: “منیم الیمنن نه گلیر آخی قیزیم! آللاه بئله ایستییب” دئدی آناسی.
آجیقلی_آجیقلی آیاغا دوردو:
– آی ماما منی بوننان آرتیق ایت ائلهمه! قیزیم! قیزیم! آللاه بئله یارادیب هه، آما سیز نییه او طرفلیک یوخ بو طرفلیک ائلهدیز؟ سیز نییه گؤزلهمهدیز من یئکهلم اؤزوم سئچهم؟ اصلا نییه هامیدان گیزلتدیز؟ مگر دئمیرسن آللاهین ایشیدی؟ به آللاهین ایشینه کیم نه دییه بیلردی؟ اونسکگیز ایلدی منیم روحومو اسیر ائلییبسیز. بسدی! دای یورولموشام. او مالی چوخ گونو قره ددهمه دییرسن من فیکیرلریمی ائلهمیشم. زحمت اولماسا، مالینا ضرر دیمهسه دئدیییم پولو بویون تؤکسون حسابیما. صاباحدان بو ایشین دالیسین توتاجام. تصدیقدن جاوازدان، لازیمدی هامیسین آلیب اؤزومو بو فلاکتدن قوتاراجام.
اونون دا ایجازهسینه احتیاجیم یوخدو. بورا کیمی من حیاتا مجبور اولموشام بوردان اویانا حیات منه مجبور اولسون!
اللرینی باشینین آلتیندا چارپازلاییب آلا قارانلیق اوتاغین تاوانینا ماریتمیشدی. آخشام گؤروشلرینی گؤزدن کئچیریر، ان چوخ دا سئودانی و یاناغیندان آلدیغی تاثیری دوشونوردو. هردن دوداغی قیمیشیر، هردن گؤزلری دولوب داشیردی.
اؤزونو تانییان گوندن حایاتی پارادوکسلارلا دولویدو. دوشمان تورپاغیندا آزمیش، سیلاحسیز عسگر کیمیایدی. نه دورا بیلیردی نه قاچا بیلیردی. هریانی مینالانمیشدی. آناسیلا سون دارتیشمالاریندان ایللر کئچمیشدی آما آتاسی هلهده آنلاییش گؤسترمیردی.
گؤزلری آغیرلادی. بارماقلاری اوجوندا اطرافی سئزهرک مطبخه کئچدی. داوا درمانا مخصوص اولان سیییرتمهنی ائهمالجا چکدی. الینه گلهنی، ان چوخ دا یوخو داوالارینی ییغیب اتاغینا قاییتدی. ماسانین اوستوندن قلم کاغیذ گؤتوردو. نسه بیر ایکی جومله یازیب قلمی کاغاذین اوستونه بوراخدی. داوالاری اووجونا بوشالدیب توالته گیردی.
آینادا اؤزونه باخدی. تام بیر درد توپلوسونو گؤردو. توالتین چیراغی چیرتیلدایاراق سؤنوب آنیدن یانیردی. “سن نییه جان وئریرسن”دئییب، بوش اولوب اولمادیغینی یوخلاماق ایستهدی آما اووجونو آچا بیلمهدی. آینایا ساری قاییتدی.
نوشته شده توسط admin در دوشنبه, ۲۷ اردیبهشت ۱۴۰۰ ساعت ۱۰:۵۵ ق.ظ