وارلیغین انعکاسی
حاضیرلایان:اکبرسعادت
آنا تک جاندان عزیزدیر آنا تورپاق آنا دیل
حورمتین ساخلا یاشارکن آنالار قدرینی بیل
آنا دیلده آنانین سئوگیسی عطری دادی وار
آنا دیلده وطنین شانلی شرفلی آدی وار
آنا دیلمیز: بوتون دیللر گوزل دیر و یئرینده هامیسینا دیر وئریب اونلاری قورویوب ساخلاماق بیز اینسانلار اوچون آغیر گورَودیر(وظیفه)–دیر. بونون یانیندا هر اینسانین اوز آنا دیلی داها فرقلی و اونملی ساییلیر. اینسان اوز آنا دیلینده دویغولارینی اوزه چیخاریب اونلاری یاشادیر. آنا دیلینی بیلمه ین اینسان ایسه اوز آنا دیلینده اولان دویغولاردان اوزاق قالاراق اوزگه دویغولاری ایله یاشایاجاق دیر! بیزیم آنا دیلیمیز اولان تورکجه دونیانین گوجلو، گوزل قایدالی و دیرلی دیللریندن ساییلاراق یاشاماقدادیر.
بیز ایسه اونو یاشاتمالیییق. اونجه اولکه میزین قانونوندان فایدالاناراق، اونو اوخول-لار ایله بیلیم یوردلاردا دیری ساخلاماق ان واجیب اولان دیر و بودا رویالاردان اوزاق قالان بیر زاد دئییل دیر.دیل مسئله¬سی بیزیم ادبیات آلانیمیزدا همیشه بیر مسئله اولوب و بیر مسئله کیمی قالاجاق. دیل هر شئی‌دن قاباق ایجتیماعی و میلی بیر وارلیقدیر. فردلرین اوستونده، بیر میلتی ایلگیلندیریر.
بوتون بیر میلّتین دویغو و دوشونجه خزینه‌سینی تشکیل وئریر. بیر میلتی آیاق اوسته ساخلایان، فردلری بیربیرینه باغلایان، ایجتیماعی حیاتی نیظاما سالان و داوام ائتدیرن، میلی شعورو بسله‌ین بیر عونصور اولاراق دیلین اوینادیغی رول چوخ بویوکدور. میلی شعورون ان قووتلی قایناغی دیلدیر.
بوتون اینسان حوقوقلارینا سایقی، ائحتیراملا باخان و یاناشان اینسانلارین فیکرینجه، دونیا اوزه رینده اینسانلار گونده لیک کئچیم لرینده و یاشام لاریندا اوز آنا دیل لرینده دانیشماق لا چوخ راحات دیرلار و آنا دیل سئوگیسی هر بیر اینسانین ان ده رین دویغولاریندان ساییلیر.دیل اینسانین معنوی ثروتی دیر، قدیم دوره لرده دیلدن تکجه ارتباط واسیطه سی کیمی ایستفاده ائدیردیلر آمما، ایندی بو گونلر دیل، اردم (فرهنگ) و مدنیت بیر میلتین هویت و وارلیق سندی کیمی اوزونو گوستریر.اوز قانونلاری ایچه‌ری‌سینده یاشایان و گلیشن جانلی بیر وارلیق؛ میلتی بیرلشدیرن، قورویان و اونون اورتاق مالی اولان ایجتیماعی بیر موسیسه؛ مین ایللر بویونجا پیشرفت ائده‌رک مئیدانا گلمیش بیر ایجتیماعی قوروم؛ سسلردن هورولموش بیر آغ کوکو بیلینمه‌ین زامانلاردا آتیلمیش بیر گیزلی آندلاشما‌لار سیستمی‌دیر.
دیل، باشقا اینسانلارلا بوتون ارتباطلاریمیزدا بیزه آراچیلیق ائدن، ایجتیماعی رابیطه‌لریمیزی نیظاما سالان بیر واسیطه اولاراق حیاتیمیزین هر صفحه‌سینده مووجوددور. ائوده، مدرسه‌ده چولده، بازاردا، ایش یئرینده و هر یئرده اونونلا باهم یاشاییریق. اینسان دانیشدیغی دیلی دوغولدوغو گوندن حاضیر گورور. آنجاق دیل دوغوشدان بیلینمز. ایلک آیلاردا آغلاما‌لار، تقلید بیرسیرا حرکتلر آنلاشما ساغلاماغا چالیشیر. اوشاق ایچینده یاشادیغی ایجتماعنین دیلینی آنادیلینی اوزون بیر شاگیردلیک دووره‌سی مدتینده اویرنیر. داها سونرا قولاغینا گلن سسلرین بللی مفهوملارا، حرکتلره، وارلیقلارا قارشیلیق (مقابل) اولدوغونو آنلاماغا باشلاییر.دیل،فردلر آراسیندا دویغو و دوشونجه بیرلییی گتیرمکده‌دیر. میللت‌لر دویغو و دوشونجه‌نی یازی‌یا کئچیرینجه داها موحکم بیر، بیرلیک میدانا گلیر.چونکی یازی سایه‌‌سینده دویغو و دوشونجه‌لر،هم زامان، و هم‌ده مکان ایچینده یاییلیر.دیل ایله دوشونجه ایچ -ایچه گیرمیش وضعیتده‌دیر. اینسان دیل ایله دوشونور. دیلین پیشرفتی دوشونجه‌یه دوشونجه‌نین پیشرفتی ده دیله باغلیدیر. موختلیف مدنیتلرین مئیدانا گتیریلمه‌سینی فراهم ائدن دوشونجه، پیشرفتینی دیله بورجلودور.
دیل مدنیت عونصورلارینین باشیندا گلیر. دیل بیر میللتین سس دونیاسی‌دیر. هرمیللت کاییناتی دییشیک شکیل‌لرده آلقیلامیش و یوروملامیشدیر.
عینی زاماندا مدنیته آیید بوتون ده‌یرلری بنیه‌سینده باریندیران بیر کولتور خزینه سیدیر. بیر دیل، اونو ایستیفاده ائدن میللتین باش قورولوشونو، نسیل دوشوندوگونو،ذهنینین نسیل دوشوندوگونو و منطیقینی اورتایا قویار.دیل اولماسا دوشونجه و دویغو دا گلیشمزدی، اینسان ایجتماع‌سی پیشرفت ائدیب، بیر مدنیت دوزلده‌بیلمزدی. گینه بشره بخش اولونان دین حیاتی ایله صنعت حیاتی دا دیل کوکو اوستونده قورولموشدورلار.اینسانلار سوزلرینی اوزاقداکی‌لره چاتدیرماق، یا دا اوزون زامان ساخلاماق احتیاجی ایله اونلاری داها دایانیقلی بیر ایشارت سیستمینه چئویرمگی دوشونموشلر یازینی ایجاد ائتمیشدیرلر. اسکی اینسانلار حاقیندا بیلگیلریمیزی قویدوقلاری یازیلی سندلردن آلیریق. میلتلرین یازیدان قاباقکی یاشاییشلاری حاقیندا لاپ آز شئیی اویرنه‌بیلدیییمیز اوچون تاریخ یازییلا باشلاییر.
دیل بودور. بئله‌ده اولمالی‌دیر. چونکو آلله‌ین هر بیر آیتی اینسانی بئله یوکسلدیر. دیل اولماسایدی بلکه ده اینسان اشرف مخلوقات ….
بو معنادا من حقیقتن چوخ خوشبخت اینسانام. دئیه بیلرم کی، من ده دوغما وطنیمه، آنا دیلیمه و خالقیما قلبا و روحا باغلییام. هر بیر اینسانین قلبینده گوزل آرزولار کوک سالیر. منیم ده ان بویوک آرزوم آنا دیلیمیزی ساییلان، مملکتیمیزی گوزل و چوخ، خالقیمیزی آزاد گورمک اولموشدور.
خوشبختلیک ائله بیر مفهوم‌دور کی : » اینسان خالق اوچون یاشایاندا خوشبخت اولور « تورک و آنا دیلدا باغلی چالیشمالار، هر آداما قیسمت اولمور. گلین بو گونده ن اوز آنا دیلیمیزده یازیب-اوخوماغی باشلاییب، بیر-بیریمیزه تورکی کیتاب ایتحاف ائدیب، آنا دیلیمیزین اویره نمه و اویره تمه سینده چالیشیغیمیزی داها آرتیریب و آنا دیلیمیزه سویکنمکله اوز یوکسک کولتوروموزو (فرهنگیمیزی) یاشادیغیمیز دونیادا یایینلاماغا چالیشاق. بو قیسا یازیدا ایسته ییم آنا دیلیمیزی قوروماغی خاطیرلاتماق دیر و هر بیر آذربایجان تورکونه اوز دیلینی قوللانماق و اونو یاشادیب گله جک نسیل لریمیزه ساخلاماق، آنا دیلی بورجودور. اومود ائدیرم دیلیمیز یاشام بویو یاشایاجاق دیر.
نوشته شده توسط admin در دوشنبه, ۱۹ بهمن ۱۳۹۴ ساعت ۷:۱۰ ق.ظ
